我鍾意咗個網故女作家，但佢真人好樣衰。

外表唔係最重要
但係第一度filter, first impression
邊個唔中意靚仔/靚女丫講真
好多人擇偶條件都係睇樣先
呢個冇得唔承認

btw理科jj 表示皮膚下面仲有好多嘢先到骨

可是，此刻，她什麼都說不出口，畢竟幾分鐘前，她才向他傾訴對另一個男生的心意。

她只能別過臉去，然後說：「多謝你。」

二人把麥嘜忘記，不再提記她。

半晌，阿謙掩不住好奇，探問翩翩和王子的關係。

「咁你哋而家係朋友？」阿謙問。

「我唔知道啊，但朋友只係咁樣？你知唔知啊，我哋已經好耐、好耐冇靜靜哋坐喺度傾偈，全部都係佢有嘢先搵我，講完之後就走。朋友係咁樣？我都唔知道。」翩翩其實知道。

阿謙聽罷，隱藏對王子不滿：「可能呢個係佢同人做朋友嘅方式？」

「可能係喎，」翩翩失笑：「其實都明，佢由細到大都一直被圍繞，有啲嘢就好理所當然。」

「咁你開心嗎？同佢做朋友。」

他只關心這樣。

她玄妙地說：「冇話開唔開心，有啲關係都唔可以咁講。」

「咁仲可以點講？」

「靜靜雞同你講，」翩翩故作神秘：「大家都叫佢男神嘅係咪，但係佢依然會收兵，因為佢都幾接受唔到有人會唔鍾意佢，或者原本鍾意佢、後尾鍾意其他人。好好睇㗎佢啲收兵戲，總係有辦法用三言兩語就𠱁掂人，都係一種才能嚟！」

「點解呢？佢原本都已經多人鍾意啦。」阿謙不解。

「多人鍾意呢啲嘢，唔會嫌多㗎嘛，又唔使付出咁多。」

她有虛榮心，就算不能得到很多很多的錢，沒有很多很多的榮譽，她希望至少有些少人真的喜歡她；不過越多越好。她笑，自己憑什麼如此奢求？

她又不是錢、榮譽、喜歡本身。

阿謙好奇：「你呢？你都係咁諗？」

「係啊，」翩翩明白他在問什麼：「所以我先寫咁多文咋嘛，唉，呢行根本就冇前景，寫得勇啲又有事，隱晦啲又太悶冇人睇，寫愛情其實我又唔係真係鍾意——大佬呀，幻想人哋啲愛情故事都好撚攰㗎，我又冇咩男人。」

「幻想吓我囉，然後寫啲開心嘅嘢。」他扮花。

「開心嘢邊有人睇？」她搖頭。

「你寫咩我都鍾意，都咁多年啦，你唔係懷疑我呢個忠實fans呀嘛？」

不知道為什麼，和他在一起，真的很開心。

翩翩可以拋下自己的恐懼，畢竟他是見過她無數個面孔後但仍然留在她身邊的人，只是，不算很長時間。

她不是美人，為此，她一直自卑。她不是覺得美人絕對能夠遇上好命運，而是，如果長得好看一些，她的自卑感或不會困於外貌之中不斷徘徊——天生、難以改變。你說能夠化妝、減肥、扮靚，她全都做，可是寬大的臉、圓鈍的鼻、窄長的眼，對上她世俗的目光時，連自己都不能欣賞自己。

常說要「自愛」，因而時常歎息。

有某些時候，她都覺得自己「好撚正」，例如寫出很好的文字；她在想，她為什麼要自卑呢？她年少成名，出版套裝書，擅長儉財，選擇絕對不會乞食的學科，畢業後平步青雲，同性緣好，有真心愛自己的朋友和家人；她還求什麼呢？

是在哪些瞬間她覺得難過呢？

是王子說她不夠漂亮，不能做他女朋友，即使他已盛讚她的才華，甚至不介意與她偶然曖昧。

是很多次她察覺她的優點不能消彌外貌的「不足」。是很多次她走在美麗的朋友旁、看見目光全集中在別人身上。是很多次她用和善的語調與人傾談，對方說「如果你靚啲就好」。

是她一刻迷茫，覺得這五年來敲打的數百萬字全是垃圾，沒有人看見她真人後仍說愛她；無一字一句能夠安撫她。

她寫愛情故事，她的愛人不愛她。

翩翩平靜地問：「好難講，如果我轉寫殺人吸血題材呢？」

「你又唔係冇試過，」阿謙將頭哄前：「你有個故講殺人又講家暴又講虐蓄㗎喎……點呀，認可我嘅真心未呀？」

「我又成日date讀者喎。」

「你講過啦，我知道。」他分明不悅地看了一下她，又說：「咁你開心就得啦，我又唔係你邊個。」

「乜咁客氣吖。」

翩翩想說阿謙是她的朋友，但又怕他覺得她「派卡」；但他絕非「唔係邊個」，早就在她心頭有了重量。

他深呼吸，看她，語氣輕柔：「我覺得你好好，好有血有肉。」

「陰公，淨係畀人讚過呢啲同內在有關嘅嘢。」她聽出他的善意。

「你唔鍾意咩？」

「如果我好有內涵，可能會開心。但我原來真係好膚淺，完全冇人哋大作家嗰啲淡然嘅感覺，點解人哋可以咁超脫呢？但我一直都好care個樣。我成日都好擔心，人哋見到我真人會失望，人哋會覺得我寫所有嘢都係呃人——我咁嘅樣真係會有男人同我邂逅然後深深愛上我？」

自卑撚都係好柒麻煩嗎？

自卑撚都係好柒麻煩的！

她沒有遇過接納自己全部的人，包括她自己，光憑自身意志，無法變得自信。

「但係咩樣都會有真愛，大把人平平凡凡但都可以過到幸福嘅生活。」阿謙不同意。

「我知道，咁呢個人會係我嗎？我明明自己唔靚，但鍾意靚仔；明明內心有好多陰暗嘅想法，但都用文字修飾到我個心好光明咁；明明有好多嘢我根本唔想做，但我都會基於唔同嘅原因去實行。我只係一個咁樣嘅人，你覺得我可以獲得幸福？」翩翩反問。

只要此刻她嚎啕大哭，便是一個激烈人心、重新振作的橋段。她為自己無聊的想法微笑。

阿謙說：「獲得幸福係無條件㗎。」

他獲得過的愛和善意，是無條件的；母親、與家庭疏離的父親、曾出言助他的翩翩都在他一嚿飯時在他身邊。

她遲疑一下：「Hey，男神女神出pool率高過我呢啲人，交友APP都只有靚仔靚女會容易match到人。」

「翩翩，」阿謙喚了喚她的名字，說：「你做咩label自己係某一啲人呢？你聰明、細心、幽默，唔通就唔係好咩？」

她稍稍扯開話題：「王子嘅女朋友，從來都好放心我哋見面，但佢會呷醋其他女仔；原因係我個樣對佢嚟講——完全冇威脅。」

有時候，被接納也會傷人，翩翩寧願王子的女友處處敵視她，好過完全不把她放在眼內。睜眼，投入色彩和動靜，但她從不被看見，猶如隱形。

她的性魅力被忽視了。

阿謙察覺她的落寞，又真心地說：「只係佢一個人咁諗。」

他的安慰，使她放心地說：「我知道呢件係好小好小嘅事，甚至其實冇人覺得有問題——可以繼續同鍾意嘅人friend喎。但係，我寧願唔係，呢種因為天生嘅一啲嘢就去抹煞我其他可能嘅感覺好差。或者我講嘢好姣呢？或者我會灌醉佢跟住同佢上房呢？」她從未想像過有些驕傲的她竟會如此告白。

哼，翩翩不忿。

她不信憑她的說話技巧，會無法收服心儀的男人。

屌咩，她在網上假裝溫柔可愛地打幾個顏文字已有人覺得她性格好好、說會一輩子看她的書啊！

阿謙抓一抓頭：「原來你係咁諗，我一直都以為偏偏愛你好灑脫，仲會share啲雞湯、又會開吓心事台咁。」

YES！他認識到別人不認識的她了！他開心地想。

「失望呢？唉，你話好似我呢啲咁假嘅人，點會得到幸福。」翩翩憂愁。

「咁唔灑脫又點？有啲假又點？呢啲先係人吖嘛。」阿謙強調：「我真係覺得你可以得到幸福。」

他又心想：如果你肯同我一齊，唔再鍾意王子嘅話……似一種幻覺。

她不回應，又說：「你知唔知我最想聽到人哋話我——金玉其外，敗絮其中？都已經金玉其外，其實已經好好。」

「NO，NO，NO，唔可以敗絮其中！」

「大把人裏面靚啦，如果唔係咩皮囊千篇一律句嘢根本唔會紅，個個都覺得自己靈魂有趣先會share。但事實係你要有金玉外觀，人哋先會睇裏面係咪敗絮。」翩翩如此批判。

阿謙覺得她太過在乎外在，他不能完全理解。

「你真係覺得樣咁重要？」

「YES，你都明㗎，你瘦同肥嘅待遇都差好遠。」

他再次確認：「你覺得自己唔靚？」

她忽然停頓，皺着眉說：「係啊……個個都話大眼高鼻臉細先至——」

「但我好鍾意你。」

阿謙將每隻字清晰吐出，未有含糊。翩翩反應不及。

「嗯？」

「我話我好鍾意你，你嘅所有，你覺得嘅缺點，我唔會覺得嗰啲就係Good，但嗰啲都係你嘅一部分係咪？」

有冇搞錯⋯⋯你太溫柔啦，先生，我好難抵抗㗎喎。她盡量壓抑心理活動，說：

「就算係樣衰、虛偽、怯懦？」

「雖然咁樣聽落好似講經——Umm，都真係，哈哈。但係，冇一個特質係獨立出嚟㗎喎，性格呢啲嘢係互相成就，例如你怯咗喺現實中幫人，你咪會將啲嘢擺上網寫，跟住識到讀者，然後救贖到某啲人囉。你知㗎可？唔係睇你啲故，我讀書嗰陣一定會爆炸。」他充滿抑揚地說。

「好正能量添……」她心安地看着他。

「咩正能量，就係正常嘅能量，我真係咁諗㗎嘛。」他篤定。

「你好有內涵，小弟自愧不如。」

「咪扮男人。」

她大笑。以前扮「巴打」、自稱小弟的日子，很快樂。她將自己去性，真誠地相信自己寫得好。那是可愛的十五歲。

「點解你咁好呢？點解你咁包容咁就得人呢？」她真誠地問。

搞不掂，竟然，有男人傾聽她，多於只純粹向她吐苦水。

阿謙得意地道：「你唔知咩？得意嘅肥仔係好忍得人，由細到大都畀人話肥，但你扮嬲呢，又冇人當係一回事；到你真嬲啦，又會直接嚇走啲人。所以我明咩叫世界好殘酷——個前後對比真係太大分別，啲人嘅態度，仲變得多過我個身型。但係，又明咁人係複雜㗎嘛，我都有唔同嘅性格啦。」

可是他相信有些人沒有變，就算表徵變了，本質也沒有。

「喂，我講咗咁多秘密畀你知，你要同我換！」翩翩說。

「好啊，」他笑：「咁我講啦喎。而家，我有時仲覺得自己困喺二百磅嘅肉身裏面，就算我行路輕咗好多，但係個心成日形住自己冇變。」

「冇變啲咩呢？」

「都係好驚啲人會搵啲嘢嚟笑我，所以要好努力等自己唔好肥返。你知我成日玩交友APP傾偈、但唔同人見面吖可？我覺得唔見面就安全，淨係靠內在嚟相處，唔需要承受對方見到我個樣之後嘅反應。」他解釋。

「你又幾坦白。」

「得到你嘅真傳啫。我好鍾意你，你知唔知啊，以前真係得你同我玩仲肯幫我講說話咋。」最後那句話將他的情愫弱化了，喜歡她，就如鍾愛朋友。

她說：「以前吖嘛，我變咗好多。」

「嘻嘻，你而家都仲同我玩，你好專一！」

「痴線，亂講嘢。」

翩翩情不自禁地害羞起來，呼出鼻息時又洩漏了笑容。

阿謙近乎表白：「冇呀冇亂講嘢，全部都係我真心話嚟。覺得你好好係真，覺得你成個人都有血有肉係真，覺得你值得幸福都真。」

他覺得自己已將所有心意講出。

無論能否與她戀愛，這些都是他真心想說的話。他想起她曾把大黃蜂放生，那個表情，那段聲線，讓他難以忘懷。縱使，她說當中存有雜質，可是，她確實做了那樣的好事。

如此，雜質只能代表她作為人的複雜性。他如此相信。

翩翩嬉笑：「喂，聽講你係我書迷嚟，都係嗰句啦，開心嘢冇人睇。」

阿謙堅定地說：「都係嗰句啦，我一定會睇。」

可是，原來寫作是要靠生活滋養的。

當日常變得壓抑、無趣、麻木，寫作便很困難。她又食又拎，憑着與讀者見面來取悅自己，又因此取得靈感。所以，她不喜歡寫愛情故事，可是大眾喜歡，於是，她也不再問自己是否喜歡。她留戀在網絡上被關注、被重視的感覺，脆弱又迷人。

翩翩說：「我懷疑一個人開心，仲寫唔寫到嘢？Even我只係寫啲濕鳩又冇深度嘅文？文係因為唔開心先寫㗎嘛，你幾時見過以前啲文人好開心、跟住作詩㗎？佢哋都係被貶官、流放、死老豆老母老公老婆嗰陣，先有興致㗎啦。」

「咁開心時寫開心嘢唔得？」

「開心就歎世界啦，仲打文？肩周炎、腰骨勞損會開心啲？」她嗆口地說，卻以柔聲。

「吓，但我想你開心。」他敲一敲她的額頭。

「咁就冇嘢好寫啦……」她拍打他的手。

「我想你開心。」

阿謙又重複前幾個話題時提及的說話，那種緊張的悸動猶如再次生長；即使和她共對，他沒有一刻是完全平靜。

可是這種慌亂，真教人開心。

翩翩再次聽見這句話，再次被觸動；其實她如此簡單，連看一些廉價的煽情影碟也能流下感動的淚水。

「邊個係我？」她問他，也在敲問自己。

她想要什麼呢？其實她在喜歡誰呢？她喜歡自己嗎？

「你就係你。」

他真誠地看着她。她一怔，然後別過臉去，竟然有點心動，這種衝擊由心而發，不只是視覺的迷醉。

「我屌，做乜flirt我？」

她慌慌張張地說，已無昔日氣勢。他區區四字，她已覺得動人。

「講真，我唔想你再因為王子而唔開心。佢唔係好人……如果真係好人，點解會明知你鍾意佢，亦知你知道佢知道你鍾意佢，但都仲係咁同你相處？佢利用你感情，咁樣對你唔好。」

即使阿謙以朋友身分，也覺這番話沒有說錯。

「唔好咁講……」她否認。

「我有講錯咩？珍惜一個人，點會成日明知佢唔開心都若無其事？佢對你唔好，你知道㗎。」

「唔好再講啦。」

翩翩瞪着他。有些事實，一早在心裏發芽，長出的枝節從種子撐開來，葉的絨毛也將心刮得癢癢的；但是，她那麼祈求，一切只埋在血液之中，而非竄進她眼前開出沉甸甸的花果來。她努力保護早就清晰的猜想，為了可以繼續傻下去，名正言順地無怨無悔。

可是此刻，她也猶豫了。

阿謙和她原先溫馨的對話，被「王子」這個名字打擾。是的，她聽見他的名字時，總是不開心的，甚至將原有的快樂消耗。她想起他時，心頭也沒有甜蜜升起，只有一種哀愁苦絕在蘊釀——如同她筆下女主角的段段苦戀。

她看着阿謙，卻又蘊醞出另一種情感。

下次加更係300正皮！
再三多謝所有留名、正皮、推post、睇緊嘅人
希望你哋鍾意！快啲live～
有咩意見都可以講！

亦都歡迎follow：Instagram：@chingceciii
https://instagram.com/chingceciii?r=nametag

Live!

推

睇睇下d 眼淚係咁流

睇得出佢真係欣賞翩翩嘅靈魂

LM正皮
次次就final就會追你的文

返住夜留低正皮

推推

你令我發現咗！！
逢親呢個月份，我都係出緊自己都幾鍾意嘅故

因為佢都幾接受唔到有人會唔鍾意佢，或者原本鍾意佢、後尾鍾意其他人。好好睇㗎佢啲收兵戲

翩翩開始鐘意呀謙，王子會唔會出馬追翩翩

阿謙

lm

今晚有冇文？

謙少好有型呀

Sorry聽日中午先更

咁青青今日唞吓先啦
唔好太辛苦啊

等你

好好休息

喊完要飲多啲水補充水分！