之後去到另一個深刻嘅展區,Chamber of witnesses,又係一個應用咗高科技嘅例子,取代沉悶嘅文字poster
螢幕中嘅每個人,一開始都會向住屏幕起一隻手,只要你將自己隻手觸碰螢幕中嘅人隻手,螢幕中嘅人就會放低隻手,然後開始講嘢,分享自己嘅經歷。感覺上真係好似去咗一啲分享會,或者彼此圍爐嘅團契,真係不斷行去唔同人面前,聽佢哋分享自己一生,佢哋自身嘅慘痛經歷,同埋同紅十字會有咩關係
呢條友喺南斯拉夫內戰之中,被巴爾幹劊子手米洛舍維奇所逼害,雖然僥倖保住性命但斷咗隻腳,之後輾轉進入紅十字會工作,幫助其他因戰爭導致身體傷殘嘅人,支援佢哋脫離戰爭後如何適應日常生活
有人喺蘇丹出生,先後逃離至埃塞俄比亞及肯亞,途中經歷好朋友嘅死亡,最後經過紅十字會以及相關人道組織嘅幫助之下脫離危險,而家成為咗hip hop音樂人,用rap去為佢家鄉嘅同伴帶嚟勇氣,同埋控訴當地無能嘅政府。
( 仲有好多,其實已經唔係好記得咗
,但當下都係好深刻嘅,無論係天災定人禍,好多人都係承受完苦難,仍然希望可以改善呢一切)
展館接近最後,出現咗一道牆,牆上放滿咗好多好多細路仔嘅照片,每個人都揸住一個編號,呢度全部都係盧旺達大屠殺倖存落嚟嘅細路,佢哋透過紅十字會同埋其他組織,去記錄低自己嘅身份,希望佢哋嘅父母或者親戚能夠搵番佢哋
平時睇到歷史書、睇到維基,見到某場大屠殺死咗幾多幾多人,都只係一個數字,分別只係數字後面有幾多個零,但當數字變成一幅幅彩色個人照,每一幅相中細路嘅無助眼神都好似望緊你咁樣