(不定期live) 西班牙讀書與歐遊之旅(2)

見冇乜人睇 好快繼續更新！

見你咁講 睇過都照推下

之前真係有打文

入到超市，門口嘅橙汁機已經感覺非常熟悉，同我喺西班牙見到嘅就係exactly同一牌子同一型號。但係對比之下，同樣一公升嘅鮮榨橙汁，價錢大約係貴咗2.5倍左右



係超市買咗支薑汁，一邊搭住輕鐵一邊飲。我當年第一次去瑞士嘅時候，聽咗啲台灣遊記講，飲咗瑞士一shot嘅薑汁對喉嚨幾好，就買咗嚟試下。今次故地重遊，依家直接買一支隊咗佢，味道仲係冇變，喉嚨好c伏




坐住輕鐵去第一個景點，聯合國總部 萬國宮 輕鐵唔算特別新淨或者高科技，但你會見到佢個玻璃係一啲污漬都冇，明顯係有專人負責抹窗

嚟到聯合國總部門口。由於疫情關係並冇對外開放 我都預咗，去門口睇下都好過冇嘅




總部正門對開，首先會見到一個大型藝術品，一個三四層樓高嘅三腳椅，其中一隻椅腳斷咗，得返三隻腳。斷咗嘅嗰隻椅腳係象徵住地雷嘅禍害，但即使冇咗隻腳，仍然要有尊嚴咁企喺度，企喺聯合國嘅大門面前，咁當然又係象徵住反戰啦，符合現今歐美潮流



總部對出嘅廣場，仲有一啲類似觀塘音樂噴泉咁嘅嘢，畀啲細路好開心咁樣去踩、去玩水。喺聯合國嘅大門面前，展示著一班細路好有童真咁樣玩水，的確好是像徵著某種維和嘅價值觀，好似同世人宣告緊，我做嘅所有嘢，就係為咗下一代能夠開心嬉戲





但係與此同時，噴水池廣場嘅周圍，充滿著表達訴求嘅人群，首先見到克什米爾嘅關注組織，佢哋深陷於印巴衝突之苦，佢哋只係要求普羅大眾關注當地嘅人權問題，同時要求聯合國去介入更多。當然，係冇人理的，聯合國總部因疫情而唔對外開放固然係一個藉口，其實有冇疫情，聯合國都唔會願意深度介入


此外，亦見到一啲維吾爾族有關嘅poster，具體情況我相信香港人都好了解。睇完呢一啲嘢，再望返噴水池廣場嘅細路，只係有一種粉飾太平嘅感覺

生活過喺香港嘅我哋，似乎相當明白眼前一切只係假象，好似為了保障大部分人嘅和平，小部分人就註定要畀犧牲



終於行到聯合國正門眼前呢一個畫面，經常喺各大新聞見過。聯合國所有成員國嘅旗幟係左右一字排開，隨風飄揚，確實係好有儀式感


從當年嘅國際聯盟，去到當今嘅聯合國，選址仍然係眼前呢一個地方，但講咗咁多年嘅和平，有冇真正實現過呢？無論如何，眼前呢度，依然係世界嘅實際中心之一，雖然我冇機會行入去睇到咁多嘢，但起碼到此一遊過

行完聯合國，打開google map搵下有營業嘅地方，見到呢個Musée Ariana，一個陶瓷嘅博物館，距離聯合國總部只係幾分鐘腳程

一入到去，第一次體驗到要出示covid pass 先可以入場，而我之後幾個月將會習慣呢一個動作 (依家嘅香港亦都不遠了 可惜依家人哋已經撤銷緊呢個政策，依家先開始跟人哋)。

呢個博物館係以前某個收藏家嘅屋企，佢臨終之前將佢間屋同埋收藏品全部送曬畀市政府，令到今日我哋能夠免費入場去欣賞




呢個時候我又已經開始眼瞓，迷迷糊糊咁樣大約行一次呢個館，隨便行咗一陣，就決定坐喺一部紀錄片面前嘅櫈，閉目養神瞓一瞓












我完全冇讀過藝術，當時嘅我喺呢邊學校take咗一個Spanish art course，但只係啱啱開始讀art，完全冇欣賞陶瓷嘅能力(其實讀完都係冇)所以基本上都係隨便望下咁樣，冇乜深刻的感受。


呢度嘅陶瓷展品分為唔同時期，你可以跟住佢嘅出土時間去睇，會見到歐洲陶瓷嘅技術同埋品味慢慢提升，其中後期引入嘅玻璃技術，同埋喺東亞參考(基本上即係搶)返嚟嘅洛可可風格陶瓷作品，係令我比較深刻嘅部分。最尾去到近代，甚至現代，一步一步變成你屋企嗰隻杯，感受到成個陶瓷進步嘅過程

多謝你

仲未睇厭博物館？

終於都復工

留意返，日內瓦係9月尾去，當時到埗未夠一個月

同埋其實我之後都仲有興趣睇嘅，但要睇咩類型

去到歐洲，啲人係咪已經唔洗好似香港咁咁癲做咁多抗疫措施

其實唔係，喺我唔好彩喇，我過去歐洲嗰排Omicron開始爆，當時都有防疫政策，冇香港咁嚴重，但都有類似逼針措施，實際上要視乎歐洲邊個國家

我返咗嚟香港之後，歐洲啲防疫政策就開始鬆曬了

動態復工

行到上頂樓，喺邊緣位置搵張櫈坐低，一邊慢慢睇下張leaflet。佢呢本嘢嘅設計真係好好，圖文並茂，方便睇，用字又唔算太難，我喺呢本嘢上學咗好多關於陶瓷、建築同埋當時時代背景嘅知識


可惜，喺落筆嘅今日，基本上我已經唔記得曬而我亦都唔諗住將wiki嘅嘢抄返落嚟，我希望都係盡量寫我記憶中嘅事



可能將來有一日，我行另一啲陶瓷博物館嘅時候，可以重新勾起我封塵嘅記憶，我期待住呢一日嘅來臨






整個建築物亦都非同一般，當然係靚，但似乎並唔係普通教堂或者城堡咁樣嘅常見建築風格。望下佢張leaflet，佢自稱呢個建築係remarkable 嘅eclectic style(折衷主義)，我係唔知咩嚟嘅，大致上就係同時混合咗幾種建築風格嘅建築 而且冇一種特別明顯，mix成一種新嘅風格。







打開google map，見到不遠處有個紅十字會博物館，就即管去睇一睇，一貫我打開google map隨便行嘅風格


入場費都要十幾歐，非常肉赤。講起紅十字會，似乎喺香港個朵已經臭臭地 但係運動期間，我相信佢哋都有喺街頭嘗試盡佢哋嘅職責，我唔期望入面會見到同香港有關嘅事，但我仍然願意相信應該值得一睇，入去了！

堆 好鍾意睇人地去旅行！

多謝！！

Yes而家開始鬆

今次嘅audio guide係有普通話版 門口塊牌嘅日文寫住人道主義の歷險，好似比中文譯名更加有意思



一入到場，見到一大班人好似撞鬼咁企喺度原來只係投影，做乜一開場就搞到咁恐怖呀



講緊紅十字會創辦人嘅經歷




眼前就係著名嘅日內瓦公約，唔知係咪正本，呢個亦都係點解紅十字博物館係位於日內瓦嘅原因

日內瓦公約嘅通過，標誌著現代戰爭人權法嘅雛型，任何人嘅膚色、背景、性別、年齡都唔係你唔去救援一個人嘅因素，而只係透過傷患情況去判斷，之外仲有好多對化學武器嘅禁止、對戰俘嘅保護、避免平民受到戰爭波及等等

聽住個audio guide喺度講解日內瓦公約嘅內容同埋意義，都令我有啲感受。日內瓦公約嘅出現，象徵住人類喺道德層面上嘅躍進，並唔係好似以往數千年咁樣，大多數人對只係戰爭嘅犧牲品，個體冇任何價值，每個人都係神聖而偉大嘅，每個人都有接受平等對待的權利




喺戰場上用來辨認身份嘅手帶，以防急救員俾人當敵軍

有冇幾得意嘅遊戲玩下，眼前係一張大圓枱，然後枱上有一個投影。畫面中間嗰個島，即將面臨火山爆發，跟住你要盡快喺限時之內調配最佳嘅資源，去救最多人出嚟，然後就要不斷圍圈跑，喺張圓枱周圍跑嚟跑去揾最新嘅資源，又幾好玩






跟住都見到好多其他人整畀紅十字會嘅物品，可能係受紅十字會幫助嘅平民，或者係軍人或者其他，佢哋整嘅嘢就擺放咗喺呢度








眼前呢一塊布，展示咗斯雷布雷尼察大屠殺嘅情況，呢場屠殺係發生喺南斯拉夫解體期間，波黑戰爭嘅事

我大約知道南斯拉夫內戰死傷慘重，但詳情我本身係冇乜了解，呢一場屠殺本身我係完全唔清楚嘅，但見到其中展示咗一塊長嘅白色布，上面寫咗好多字，當然絕大部分都係我唔能夠理解嘅語言，其中一句係英文，相信大家都睇得明

上面寫住 「world！help our mothers to find their sons, children and fathers！」見到呢個畫面，我只能夠聯想起天安門母親







再周圍行下，見到近代發生嘅唔同人道災難，盧旺達大屠殺、亞美尼亞大屠殺、庫爾德人危機等等，史實、圖片、遺物一件一件擺喺你眼前，和平從來未必然嘅


當下冇乜心情攞相機出嚟影相，當中有一啲照片，係影住當地嘅一啲寫喺牆上嘅字，又或者當地人高舉向國際媒體展示嘅標語。似乎，你係要自己親身經歷過人道災難，先至會真正明白前人嘅處境，原來眼前嘅場景自己或多或少親眼見過


但實際上，即使有咁多嘅標語同埋媒體曝光，呢啲人道災難都唔見得有太大改善，置身喺硝煙之中，人們係如此堅守信念卻無能為力


當時啱啱睇完james gunn執導嘅新自殺突擊隊，其中一句對白實在幾應景，peacemaker.... what a joke

唔寫好快會唔記得D細節野

牙痛巴咁夜瞓