J.Arie 成為咗獨立歌手之後,相比起以前音樂風格上有咗好大嘅改變,問到點解會有咁嘅轉變,佢就話喺2019年嘅時候,佢寫咗一本「誠實日記」,裡面有事業篇、愛情篇、娛樂圈篇等等。
當佢寫完之後睇番發覺原來自己係有「精神病」嘅,入行後經歷咗咁多事佢就決定擁抱自己嘅陰暗面,「精神病系列」就咁一步步誕生。
而喺寫歌嘅宗旨方面,J.Arie 就分享到其實想嘗試嘅曲風太多,所以佢寫歌嘅時候無論係寫俾其他歌手嘅曲定係自己嘅歌,都唔想局限咗自己,希望可以有多啲唔同嘅嘗試。
佢最想嘅係可以好似《判官之印》咁,將好多唔同嘅曲風放喺一隻歌裡面。