17集補充
今集cut 咗好多好多好多好撚多野
雖然我知 動畫篇幅有限
但唔好斬咁多呀
平心而論 今集表現 不及小說同漫畫
雖然都有感動位,但硬係差啲野
推薦大家可以睇一睇漫畫
今次補充要分段講
首先係保羅 一開始90秒好簡略咁講咗保羅呢年半以來點過,但冇講到好幾個重點
1. 保羅身為前S級冒險者有一定嘅危機意識,所以佢一直喺劍鞘裡面收埋一個阿斯拉大金幣以備不時之需。好彩有呢筆錢,保羅一開始先可以照顧得好諾倫。
1.1 保羅知道自己係被傳送咗,因為佢以前曾經去過一個叫「轉移迷宮」嘅地方,地下會有轉移魔法陣,一唔小心踩中就會被轉移去魔物巢穴,而保羅喺果個迷宮體驗過「轉移」
2. 保羅匹馬係向冒險者公會借的。佢接一份速遞委托+S級冒險者嘅身份借到一匹快馬。
3. 其實保羅算好彩,佢只係傳送咗去平原,而且仲喺阿斯拉王國境內,所以佢好快認得路翻屋企。有好多人被傳送到非陸地嘅地方,連發生咩事都未知就死咗。
4. 幾經辛苦翻到屋企,面前只得一塊爛地,但保羅冇放棄,佢仲打算揾翻所有人。
5. 其實保羅一直好辛苦,但諗到諾倫只有自己可以依靠,就迫自己幾不安幾沮喪都要撐落去。
6. 然後保羅就同其他同鄉組成搜索隊,過程中,伯雷亞斯嘅總管家都來到揾保羅,並表示會提供資金援助搜索隊。
7. 揾咗幾個月,終於揾到希露菲嘅父母,但已經得翻一條唔完整嘅屍體。對此保羅好自責,甚至見到被希露菲老豆責備嘅幻覺:「點解你唔早啲揾到我?????」
8. 一啲被救嘅人會感激保羅,並且加入搜索團,但亦有人獲救後會遷怒於保羅:「你作為騎士唔係就係要保護好我地咩????(設計對白)」
9. 保羅可以話係出盡全力去揾家人,佢用盡哂所有諗到嘅門路,出動哂一切可以出動嘅貴族門路,其中包括塞妮絲嘅娘家。
10. 塞妮絲嘅娘家其實係米里絲神聖國數一數二大嘅貴族,有好大嘅影響力。
11. 一開始外家係完全拒絕保羅,理由係「塞妮絲早已與本家斷絕關係」,但當外母見到諾倫果瞬間,態度立即大轉變,表示願意提供援助,條件係諾倫要留喺米里絲國接受教育。呢個都係保羅留喺米里絲國嘅原因。
12. 搜索已經超過1年,但對保羅仲係毫無進展,睇住越來越多人得救,都越來越多人失救,搜索隊嘅人開始放棄,加上一直揾唔到塞妮絲,所以外家開始比壓力保羅,極度無助之下,保羅最後靠酒精逃避。
ex. 維拉之所以會長期著比堅尼,係因為想保護雪拉。因為轉移,好多年輕貌美嘅女仔比人賣去做性奴,一啲人會好似維拉咁捱得過,睇得開,但更多嘅女仔會好似雪拉咁,自此對男人有恐懼症,所以維拉專登著到咁暴露,等男人嘅眼光都集中喺自己身上,以保護雪拉。
關於保羅嘅年半就差唔多係咁,學上個po一位巴打講,如果盧迪係困難mode,咁保羅一定係地獄mode
關於父子重逢:
13. 保羅表示,自己真係越來越廢,自己個仔冇用盡全力都可以打贏全力應戰嘅自己,雖然係飲醉酒,但佢好清楚最後一刀係認真嘅全力一擊,反省自己係咪真係廢到連個仔都睇唔起自己
14. 基斯就係黑狼之牙最後一位隱藏人物,上兩個po 有巴打好強大嘅磨擦力
15. 基斯講嘅點止咁少,佢將大森林同盧迪相遇嘅經歷全部都同保羅講咗,保羅簡直唔敢相信,自己個仔原來差少少就會死,明明聽盧迪口中嘅「冒險」係咁輕鬆愉快。
15.1 漫畫入面,基斯帶保羅去接咗個突發B級任務,目標係要打死下水道嘅一隻變種魔物。保羅幾經辛苦終於打死咗隻魔物,然後基斯再講:「你知道嗎?這種程度的魔物在魔大陸每走20步就會遇到喔。」經過呢件事,保羅總算知道盧迪被傳送到嘅地方有幾恐怖。
16. 保羅翻到旅館,見到諾倫,諗翻基斯嘅說話,諗到如果盧迪唔係所謂嘅天才,會唔會依家都好似諾倫咁,喺自己身邊為諾倫做個好哥哥呢?諗到呢度,佢先諗到,就算盧迪再天才,同諾倫有乜唔同?都係自己仔女,點解唔可以坦率啲為個仔平安翻來覺得開心
然後決心揾翻盧迪道歉。
17. 到酒館,真係要讚製作組一點,佢地今集嘅面部表情真係做得好足,艾麗絲冇見過保羅,但點會知門口入來果個係保羅?就係從盧迪嘅反應同表情判斷出來,另外仲有兩父子傾計唔敢對望嘅場景,睇得出保羅真心想道歉,但又充滿不安嘅感覺。
18. 私心加一句,保羅絕對係一個好老豆,就算佢之前咁鬧過盧迪,佢都係一個好老豆,呢點絕不讓步
19. 和好之後盧迪同老豆吹水,總算係知道保羅呢段日子都唔易過,同時知道外婆好錫外孫,所以問保羅
「如果外婆見到我會唔會攞到多啲資助?」
保羅回:「不,你的話應該會有反效果吧。」
20. 盧迪拎到嘅資金係米里絲王券20枚,對翻日元就係100萬羊,對之前一直生活喺魔大陸嘅盧迪係天天天天天文數字。
21. 順帶一提,阿斯拉貨幣對米里絲貨幣嘅匯率係1:2
22. 原作中果封「介紹信」係來自瑞傑路德,改到咁有啲可惜。
呢度唔多補充,因為小說呢度寫得好分散。
下面好重要一部分竟然全部刪咗
23. 雖然父子和好姐,但兄妹未和好喎,所以盧迪就想趁住仲留喺米里絲嘅時候一家人坐低食餐飯
24. 最後約咗間高檔餐廳,但艾麗絲強行要一齊出席
25. 呢一餐飯,會係全劇唯一一次有描寫保羅行貴族禮,就係對艾麗絲做,盧迪心諗「原來我老豆可以咁優雅。」
26. 到餐飯嘅最後一刻,諾倫仲係唔肯原諒盧迪,表示絕對唔會原諒打咗爸爸嘅人
27. 保羅好希望兄妹可以和好,因為「佢哋彼此可能係最後一個有血緣關係嘅親人了。」
28. 一啲小補,留意下今集嘅人物表情,畫得特別細,一啲解釋就留咗喺呢啲細節度
29. 仲有個小細節,保羅間房一面牆有貼世界地圖
地圖入面見到大森林同聖劍大道
今集我覺得太趕,真係建議小說