曼聯宣布同中堅杜安薛比續約至2023年6月之後,隨即將佢外借去阿士東維拉,為期一季,紅魔鬼主帥蘇斯克查認為呢位23歲新星可以喺維拉獲得更多上陣機會,吸取實戰經驗。
阿士東維拉借用杜安薛比後,發表聲明:「好高興宣布從曼聯借用杜安薛比,2019年佢有份協助球隊重返英超。」杜安薛比曾於2017/18及18/19年球季,被曼聯外借去維拉,並協助球隊升上英超,可以話係維拉嘅福星。
身高1米85嘅杜安薛比曾經係曼聯青年軍隊長,上年10月歐聯首場分組賽作客PSG,佢取代受傷缺陣嘅哈利馬古尼,以正選上陣,多次成功攔截麥巴比突破,令呢位法國國腳冇晒符。
不過,曼聯今夏簽入皇馬中堅華拉尼,杜安薛比難有上陣機會,將外借佢去維拉,有助佢成長。