見到你地唔滿意個結局
咁我就寫埋呢個番外篇啦
唔知仲冇人睇
番外篇
同呀成一齊左三個月,我成日去佢屋企過夜,佢叫我索性搬埋過去
我係房執野先發現原來仲有好多同呀柏既回憶係到
一齊去澳門玩既船飛、一疊戲飛、情侶tee、佢送比我既禮物⋯
仲有痴係牆到一直唔捨得撕落黎既合照
呢啲物品實在充滿太多回憶,一時之間我都唔知點處置好
呢個時候,有人打電話黎
「你幾時執完呀?我過黎接你」呀成把聲係電話到傳過黎
「無咁快,我執完再打比你啦」
呀成真係對我好好,可以話係個滿分男友
隔左陣,電話又響
一定又係呀成,佢真係好長氣
我望住部電話,呆左呆,雖然無儲存呢個電話號碼,但我一望就知係邊個
我望左好耐,鼓起好大勇氣,深呼吸之後終於㩒左接聽個制
「喂,心靈?」一聽到呀柏把聲就勾起左好多回憶
「咁得閒搵我既?」我笑住咁講,其實心底好驚,唔知佢搵我係想點
上次撞到佢同Hailey已經係兩個月前既事
「無呀,睇下你最近點姐。你始終都係同左呀成一齊喎」佢笑左笑,隔住電話,我聽唔出佢係咪想嘲諷我
「係呀,佢對我好好」
「咁咪好囉⋯」佢好似有口難言咁,「我下個月同Hailey結婚呀,你黎唔黎?」
我呆左幾秒,「下⋯咁突然?」
「無計啦,個bb八月都出世啦」佢好似好無奈咁
佢話當初搵Hailey都係諗住玩玩下,點知就玩出禍
因為有左bb,迫於無奈先要結婚
我聽得出呀柏唔想結婚,但佢無得揀,起碼佢都係個負責任既人
同呀柏講呢通電話之後,我再望一望牆上面既合照,覺得自己真係放低左呀柏
曾經美好過既愛情留係心到就夠
我笑住將啲相撕落黎,連埋啲船飛戲飛收左入個盒到
雖然有一刻好想扔哂啲野,不過始終都係覺得好有紀念價值,唔捨得扔
我遲啲再拎番出黎睇都一定會好似依家咁笑住睇,唔會好似以前咁喊住睇
「我執完啦」我打比呀成講
「我一早係你樓下啦傻妹」呀成笑住講
如果唔係有呀成,我一定仲重蹈覆轍緊
呀成救左我出火海,拯救左我成個人生
「多謝你」我一見到呀成就跑過去攬住佢
呀成一臉茫然咁,「做咩無啦啦多謝我?」
「嘻嘻」我無解釋,只係更加大力咁攬住佢
我以後淨係攬住你一個就夠
[完]