【 日常賽後評 - 菁英盃決賽 愉園 對 東方龍獅 - 曾文輝 】
菁英盃 20/21 決賽由愉園對住東方龍獅,賽前關於愉園參選資格嘅評論先擺埋一邊,集中睇下球員嘅表現。而今次想講嘅係東方龍獅門將曾文輝開賽大概4分鐘嘅一個非常精彩撲救。
當時愉園中場查理史葛一路推進,呢位前曼聯青訓球員一推順就嘗試以遠射挑戰曾文輝。今場我都有入場睇,我嘅位置個角度剛剛就喺正查理史葛身後,
所以好清楚可以睇到個波先飄向曾文輝嘅右邊,所以「德古」先踏一步向右。點知個波好快就飄返向左邊,令「德古」需要立即減速停止向右然後移返去左邊。
好彩「德古」呢下夠曬集中,加上減速減得切,令佢仲有時間做埋 Power Step 準備跳起。最後由於個波非常貼楣,令「德古」要出動埋 Top Hand 先僅僅可以將個波托出底線。
查理史葛呢球遠射雖然角度唔算好刁鑽,
但力度、軌跡加上高度都令要撲出呢球一啲都唔易。加上當時只係開波無耐,如果愉園咁快領先,相信成場波嘅形勢將會變得好唔同,不得不讚「德古」呢下確係好波!
https://www.instagram.com/p/CNYyBN3naCy/
From: 守門員日常 - Goalie Daily