9章 – 失焦世界
「冇可能」…本來冇可能嘅嘢如果變得有可能,咁點解仲會有「冇可能」?
坐喺後坐嘅我望住眼前嘅鄧麗欣物體,開始接受各種各樣開頭令我毛骨悚然嘅不協調。內心,開始識得平靜落嚟。
原來人嘅適應力係咁強,我覺得我到而家都冇嚇死到,足夠證明我嘅心理質素係意外地強。
我開始好似鄧二咁,呆望窗外冇幾多街燈嘅馬路,夜靜處處嘅街上面,只有唔協調嘅電車聲,一時「轟轟」,一時「叮叮」;比跑步快少少嘅電車,好似由大開嘅車窗,聽到窗外面嘅空曠。好似鄧二咁講︰冇目的咁一個人行下、靜下,原來都幾舒服,特別喺四月已春未到夏嘅呢刻。
所有嘢,如果係夢,你話幾好呢。
夢醒,所有嘢回歸,咁再可怕嘅惡夢都唔係咩一回事。
唯一希望嘅係…
我哋唔係喺一個夢中夢裡面。
「不如影張相留念。」