台灣
行完夜市,搵緊路去捷運站番hostel。途中向一個女人問路,佢同個fd帶住我行,點知行行下佢突然拉開路邊架車度門,原來佢帶我去攞車,車我去捷運站。車車下佢發現差唔多尾班車,驚我趕唔切,既然上左車,就唔爭在車埋番hostel
就係咁,我得到一程free ride,臨走前佢喺車尾箱攞左堆手信同卡片俾我,原來佢係某間公司嘅CEO
另一次我唔開心,自己去左單車環島,有兩個單車友經過同我搭訕,可能佢地見我廢,於是幫我校過晒架單車啲坐位同教我踩車慳力大法,之後仲陪我踩左幾日車,喺我就黎頂唔順果時,慢慢跟住我尾、播我言談間講過話中意嘅歌,從來冇催我或姐嫌我拖慢進度。不過我覺得阻到佢哋非常唔好意思,於是決定分開,我停低休息一日,佢地就繼續踩。分開之後我炒左車,想直接搭捷運往北走,其中一個單車友知道左,就話要去捷運站接我。果排失戀真係頹得好緊要,加上人在異地,又整損晒,又俾雨dup濕晒,踩單又成身痛,架車仲要三更半夜先到台北....一落車見到單車友果刻真係好想攬住佢狂喊
之後佢帶我見其他朋友,仲請我食野陪我傾計,好感動
意大利
火車票務問題令我滯留喺米蘭,當時冇咩旅行經驗,手機又冇得上網,企左喺火車站唔知點算好。有個婆婆行過嚟關心我,佢聽到我同職員嘅對話,同我講左一堆唔知係意大利文定英文嘅野。我用左好耐時間,終於都明佢係想免費收留我,於是我哋兩個就感動到喺大堂度眼濕濕咁攬到實。但其實我心入面都十五十六,唔知跟唔跟佢番屋企好。
佢帶左我去附近嘅餐廳請我食lunch,介紹我俾啲伙記識,教我意粉食到最後要用面包抹乾淨隻碟啲汁、再飲杯紅酒先叫完成一餐。食完之後佢畫左張地圖俾我,話俾啲時間我考慮,如果我決定去佢屋企,就照住地圖搵佢。
雖然我都諗過各種恐怖嘅事....但係果晚我都係決定番去搵婆婆。佢知我黎左就即刻飛奔出黎接我,大大力啜完左臉就錫右臉,攬到我實!原來佢一早已經煮定晚餐等我黎!幾乎摷晒屋企啲野食餵我
喺飯枱度眼濕濕咁話想像唔到有人陪佢食飯,因為佢係獨居長者,仔女搬走晒,老公又行先一步。
我哋好努力咁溝通,佢查字典俾我睇佢想講嘅字,我就google translate答番佢。之後佢俾我睇家庭相簿,帶我出露台賞月。我廢廢唔識開熱水沖涼,佢就行入嚟親自幫我校水,幫埋我洗頭
我真係好廢!
第二朝佢做人肉鬧鐘morning call我,帶我去早餐店食croissant飲咖啡,又係介紹我俾伙記識。臨送我去火車站果陣,仲捉左我入超市話一定要買野食俾我隨身攜帶,我拒絕無效,最後帶走左啲餅同朱古力。我有問過點解佢要對我咁好,問過佢有冇擔心我會入屋打劫佢。佢話係緣份,見我咁細個又咁無助,所以好想幫我,成就左佢第一次收留人(我都係第一次俾人執番屋企)
佢對我好到好似自己粒孫咁,番到香港我寄左啲禮物俾佢,佢居然寄左handmade皮手袋俾我,我到依家都仲用緊。我同佢有書信來往。之後佢學識用email,我拍拖同畢業都有話佢知,有send相俾佢。
秘魯
喺機場外面孭住個大backpack等巴士,隔離果個人問我係咪想搭巴士入城,我答係。佢就話咁大件行李好難上車,話其實佢等緊老婆車佢入城,不如順路兜埋我。咁好啦我上左車,原來果日係佢老婆生日,佢哋邀請我夜晚去佢哋屋企參加生日party,話要帶我體驗本地style嘅party
去到佢哋屋企,佢哋啲親戚朋友都喺晒度,係咁塞野食同隊我飲pisco sour....呢隻係秘魯signature烈酒,有>40%酒精....佢哋圍左個大圈,由老婆開始領舞,之後換人入去跳...我就唔識飲酒跳舞嘅...但係咁多對充滿期待嘅雙眼望住我....我就唯有跳gangnam style同重口味,仲要俾人嗌encore
唔知點解揀呢啲歌
英國
喺利物浦嘅hostel 識左個北愛爾蘭女仔,我哋分開去唔同城市玩幾日,然後我就飛咗過去搵佢玩。佢全家好nice咁招待我,又揸車帶我周圍玩左幾日
瑞士
佢黎香港旅行果陣我帶過佢飲茶,到我去瑞士果陣我搵番佢。本來想喺佢度留宿,但最後佢啲室友覺得唔方便,所以佢就帶左我周圍玩。我一落火車就見到佢同朋友,原來佢朋友識揸小型飛機,於是佢就請我飛咗一轉
西藏
拉薩啲hostel冇晒床位,正當我好徬徨無助之際,竟然俾我撞到之前嘅包車司傅!佢係咁打電話搵人收留我,免費車埋我過去安頓,仲叫老闆娘收平啲
我見到佢果一刻好感觸,他鄉遇故知,流晒眼水咁,佢即刻走左去買雪條俾我食