[紅葉。基友。京阪奈]兩個小生去日本7天團

飛天翼龍有一下係驚到叫唔出聲
落返地下成個腦一片空白

未夠鐘就繼續鳩行
之後行到去HollyWood Zone
大部分紀念品商店同餐廳都係呢個位置
又有個大天幕罩住，落雨都唔驚濕
陣間花車巡遊都會經過呢度
呢度都係USJ門口既中軸線
一邊係入口個地球，一邊係聖誕樹



正當我影完相既時候唔見左朋友K
轉個頭見到佢去左尾隨學生妹
雖然入面都真係幾多，高質既都唔少
但呢幾個都唔靚，係咪咁雜食
這樣惡劣的宅男宅男才會被大家誤會.jpg


呢度唔係美國大使館，而係紀念品商店


出面有隻識郁史力加俾大家影相
但睇黎就嚇親個小朋友
你睇佢阿媽笑得幾開心


正當我想影多啲靚相既時候又唔見左朋友K
原來佢去左排隊同卡通女女影相
我睇下係邊個啦，原來係史力加老婆
咁人地都擺哂post，我無理由唔影啦
頭先就唔靚學生妹，今次就史力加老婆
現場咁多靚女你唔影係要影佢，你真識食


之後為左逃避史力加既追殺就去番湖邊
因為而家食飯時間，啲Game冇乜人排隊
我地頂得順唔食住，就去左玩大白鯊
其實就係上左隻賊船話去遊河
船上面有個導遊講下附近有乜，但我一個字都聽唔明
突然就有隻大白鯊彈出黎想食人
整到坐係船邊既人濕半邊身，我就係其中一個
朋友K：你夠大份幫我擋水花
係幾度既天氣玩呢啲野，好撚凍呀師父
之後架船就chok黎chok去避鯊魚
最後又放火又爆炸搞死條大白鯊就完
總結黎講都好玩既，可以一試

平時啲過山車係坐係位，飛天翼龍就係吊起你
我有少少畏高，最開頭上到頂衝落黎嗰下真心驚
落地有啲頭暈

終於Hea到夠鐘玩禁忌之旅
又行番去哈利波特園區
下午1點幾呢度多人過旺角，不過都未算
如果星期六日或者假期呢啲多人到爆廠既時候
呢個園區係會實施人流管制
冇整理券/確保入場券係直頭唔俾入
有券都要跟番你張券寫既入場時段入去
早左唔入得，遲左就更加唔得
因為我地嗰張係Express，包左確保入場券
所以就算爆廠都可以斯斯然入去



Express仲有個好處就係包幾種熱門遊戲特快入場
擺到明就係用錢買排隊時間
人地普通飛好辛苦排左幾粒鐘先玩到既時候
Express就行隔離隊打尖即刻有得玩
不過就只係包1次，玩第2次就要排番正常隊
當年我地嗰陣買嗰張Express 4
包哈利波特園區確保入場券同4款遊戲
頭先玩大白鯊冇乜人排冇用Express
其實係可以玩多次，不過玩多次做乜鳩
哈利波特禁忌之旅就係另一個包既遊戲
有註明13:20 - 13:50內要入場
如果係現場排隊既，如你所見係最少要排110分鐘
睇Blog話旺季試過隊尾要排310分鐘


點解佢標明最少？因為佢要預Express既人插隊
冇錢既蟻民就排左邊隊，隊尾唔知係邊
有錢人就係右邊，係唔駛排隊既
玩遊戲之前會經過霍格華茲啲場景，超靚
不過因為太黑，啲相全部鬆郁矇，唔放上黎了
另外佢要你放哂啲野入locker，玩完再攞番


禁忌之旅既本體就係室內過山車
座位係跳樓機設計，隻腳吊吊揈咁
故事就係玩魁地奇捉金探子俾催狂魔亂入既故事
首先要讚既就係佢呢個移動4D影院入面既畫面好真
仲感受到爆炸會熱，催狂魔經過有寒氣，經過水邊會有水花
另外就係唔好以為佢係室內所以就唔刺激
佢比室外過山車勁既地方就係你睇唔到條軌道
所以你係唔會知道究竟下一刻係會點行
個位可以360度環迴旋轉，仲識急停同突然加速
Chok黎chok去既離心力唔比普通過山車差
總括黎講好值得玩，排多次隊都抵


玩完出黎見到有魔法表演
但聽唔明，不了

個小朋友阿媽就唔遮

USJ越睇越覺得好玩
但買express真係幾貴

好想去。。。。。。

睇番時間2點半有花車巡遊
離而家仲有1個鐘，所以可以攝時間食飯
眾所周知，主題樂園就係一個同現實脫勾既地方
食飯既價錢都係同現實有一段距離
味道都唔係一分錢一分貨
哈利波特園區呢邊雖然都有野食
但係價錢勁貴，所以都係行番出去搵食
最尾揀左係湖邊一間舖食Pizza
1200yen包1塊Pizza+湯+野飲
買完就坐係舖頭後面湖邊啲圓枱仔坐低睇風景
雖然都唔係平但係都好過食幾千yen野
同女食就話姐，同仔食駛乜食環境
Pizza主要有吞拿魚，粟米加芝士
味道正常，熱辣辣都幾好食
但呢度有個唔好處，亦都係致命既缺點
師父好撚凍呀
雖然呢度係大阪市區，但USJ所在既櫻島係海邊
附近都比較空曠，一陣風吹埋黎凍到震
好彩有兜周打魚湯同熱茶頂一頂



食完坐係度都唔係辦法，會凍死
所以就行番去天幕底等巡遊
呢度係起點附近，之後會係附近兜1個圈
最後去到聖誕樹附近就完結同埋壓軸表演
啲人都企哂係度等開始


聽到有音樂同有人唱歌就代表巡遊開始
一開頭就有架地球車係度噴彩帶
之後就有架花生漫畫車裝住Snoopy同Charlie
隻Snoopy好似連豬咁係度unun下



過有幾架車之後就輪到芝麻街車
呢架野好古惑，不定時會對住人噴泡
不過噴中應該都冇乜野既



無嘴賤畜Hello Kitty都有


成個花車巡遊既壓軸就梗係minions啦
不過架車比想像中普通
佢地都係un下un下揮下手咁

以為咁樣就完左巡遊？梗係唔會啦
張飛咁貴，唔好蝕俾佢，一於睇兩次
係起點睇完，即刻行番去終點睇多次
我地頭先係通去出口條大路邊
行番相反方向就去番終點聖誕樹個廣場
估唔到天公造美，由天陰轉成出太陽


估唔到呢度有分Snoopy派同Minions派
不過Snoopy係熟女派
Minions係JK派


我精人地都唔笨，靚位一早俾人霸好哂
但我同朋友K勝在高過啲日本人
所以都係冇乜遮檔既
好！我地由頭睇過！
一開頭就有架地球車係度噴彩帶
btw估唔到麵咪媽芝麻街派都幾多人



之後就有架花生漫畫車裝住Snoopy同CharlieLucy
今次就輪到Lucy係度unun下


跟住就有連登名人麵咪媽and his friends
都仲係繼續對住人噴泡



最後當然有minions啦
架車一黎到成堆女人尖叫好似見到明星咁
又瘋狂對住啲minions揮手



啲花車係返歸之前會停一陣俾人影相
萬千少男少女信徒圍堵住佢地
為既就係掂到minions個頭或者隻手一下
之後就會索下隻手套，拎番屋企裱起佢
我的表情就同單眼隻野一樣，做乜撚
呢身full spec minion唔平架



現場情況類似係咁：

啲花車駛走之後就散場
而且啲雲散哂，好多人爭住同聖誕樹影相



頭先巡遊射左好多彩帶落地
啲大朋友小朋友執起一堆拋起
等朋友K同後面條女示範一次

頭先巡遊企左成粒鐘好鬼攰
好彩係暗角搵到位坐
仲要有個暖爐係隔離，舒服到想訓著


休息左陣又繼續鳩行
見到有堆學生妹買Minions爆谷
就咁買爆谷就450yen，價錢都算合理
但係我見個個都買特別版
雖然都係爆谷，但係用個minions公仔型既容器黎裝
價錢就變成3200yen


我去既時候Minions園區仲未起


呢3個背多分係咪天氣開始轉涼了啲fd
btw前面個男人揸住嗰舊就係3200yen裝爆谷既野


行行下就去左侏羅紀公園園區
去左玩侏儸紀公園- 乘船遊
因為Express包左，又係唔駛排隊
同大白鯊一樣都係坐船，不過所有隨身物品要放locker
佢個安全裝置只係一條攬枕型既桿拉落黎壓住你大脾
開頭同大白鯊一樣遊船河，只不過條鯊魚變左恐龍
之後就會入左去幢野度，開始上升
中間啲恐龍開始失控搞壞左啲野
然後為左脫離危險就無啦啦衝落街
以差唔多10層樓既高度向下60度高速衝落去
到地既時候就剷起啲水搞到成身濕哂

聽落好似唔係好刺激
但係我覺得佢瞬間恐怖既程度係勁過飛天翼龍
平時玩過山車個安全裝置會壓住你膊頭同腳
而你下意識都會捉實個手把獲得安全感
所以無論架車點轉黎轉去你都係固定左位置
感覺上都係好安全
呢個就唔係喇，幢野入面黑媽媽
你唔會知道幾時衝落街
過程中成日都有恐龍想搞隻船但都避過左
於是狼來了心態出現左，個人就放鬆左
臨到衝落街既一刻你都剩係睇到前面有隻恐龍阻路
正當你心諗住「唔好俾我估中，咪又係避到，個Game咁流架...」
去到個「架...」既時候突然間就成隻船向下墜好似自由落體咁
你剩係得個攬枕壓住你唔好飛出街
腰以上包括你隻手都係可以自由郁動
你會感覺到冇啲野捉實好撚唔安全咁
個諗法會延續住「架...DLLM呀呀呀」
情侶們會互相攬住大家，然後感情深厚左
事實上一定係安全既，衝力唔算大
我就唔會攬朋友K既，佢攬我手都切埋佢
於是我就用左搭飛機既防護姿勢
就係成個人俯身向前，但係攬住碌野
經驗證呢個姿勢係人類本能，因為個個都係咁做
總括黎講呢個Game黎得USJ一定要玩
唔試唔知自己自己膽量去到邊
不過真係會濕撚哂，記住要著件防水褸/雨褸

打鐵趁熱，玩埋飛天翼龍
朋友K話心血少唔玩，留係下面睇女
咁就啱喇，順便幫我睇袋
順帶一提，所有會甩出黎既野都唔俾帶上去
我就再穩陣啲，眼鏡都唔戴
好彩度數唔係太高，能見度10m
不過話哂飛天翼龍係USJ既皇牌遊戲之一
我揸住Express都要排20分鐘先到
一般過山車要行入個車箱又坐得迫迫地
呢度就好開揚，類似跳樓機咁既獨立位
坐係度俾個安全裝置夾住都好舒服
不過臨開車既時候就會將你90度轉背脊向上
你既視線只有高空向下望，同埋岳高頭遠望
對於畏高既我啱啱開始已經有啲淆底
啲架妹同我一樣都叫哂救命
不外乎助けて怖いやばい死んじゃう
個身仲要郁下郁下好想脫離咁
笑到我都冇咁驚

前面慢慢向上升之後就係衝落去既時候
全部既日文就變哂ああああああ包括我
設計呢個遊戲條友痴撚線
我睇離地最低點可能只係5m
仲要因為吊住左而睇唔到條路軌
搞到好似真係會衝落地一樣
另外飛天翼龍將你同軌道平行
你個人會好似電光毒龍鑽摩打咁轉
一時望天一時望地，成語天旋地轉就係咁樣解
玩到中途已經冇乜刺激感，反而係轉到頭都暈
但總括黎講都值得玩，不過最好唔好食野
因為玩完有啲頭暈作嘔


去完侏羅紀公園園區
基本上成個USJ都玩過哂
但離聖誕樹亮燈仲有個幾鐘
我同朋友K由朝早9點留到而家4點幾
不若而同行左去門口好想走
不過行出左個門口就入唔番黎
唯有望住啲學生妹個地球諗下去邊好


突然醒起可以睇下夜晚既霍格華茲
於是係門口行番10分鐘過去
果然個feel係唔同啲




個城堡有番平時睇戲嗰種陰陰沉沉既感覺

USJ黎緊開個任天堂主題區
睇相已經想去

https://twitter.com/usj_official/status/1333275816168460289?s=21

有圖有相有架妹 未爛尾 樓主好野

總算多返女睇

行完霍格華茲仲有半個鐘就亮燈
於是就行番出去聖誕樹附近
原來已經開始封路
有一大堆人坐低係附近等睇戲
我地已經遲左，公園嗰度一早爆滿
變左要係對住出口嗰條大路坐
但都唔執輸霸左個靚位
對正棵聖誕樹


等多一陣就有煙花睇
但睇黎坐係廣場嗰邊係靚好多
我地呢邊睇就俾啲樓遮住左
我啲相全部都放大左5倍先望落冇咁遠
實際上同聖誕樹都有成100m距離





以前啲手機影夜景相都係鬆郁蒙
我成功係幾百張相入面揀到幾張清既相





放完煙花本身以為完左就諗住走
天寒地凍剩係食左塊Pizza當Lunch
到而家都未食過野，餓死
我見啲人企番直繼續向前行
咁我地當然唔執輸
用左香港人行動奧義 - 攝位
相信各位無論係行旺角老銅定係發夢
大家都訓練慣左走得快好世界
例如慣左點樣穿過前面行得好Q慢既肥師奶
但同時又唔會撞到其他人
等自己可以行快啲搵fd子行街食飯
我就同小早川瀨那一樣睇到條最快路線
同朋友K使出左惡魔蝙蝠鬼影
瞬間攝到去個公園前面，離聖誕樹只係30m
行近睇棵樹超靚，經常轉色不特止
啲吊飾仲識好似星星咁閃下閃下咁



跟住無啦啦幕牆嗰邊有光影show
投影左唔同時代唔同地方既教堂Pattern上去
棵聖誕樹既燈飾會跟住光影show而轉，好特別
我地啱啱就係幕牆落少少，但又對正棵樹
所以唔駛擰轉頭，向左望45度就睇哂2樣野
反而因為個個都企哂係度，公園反而睇得冇咁清楚
我就利用身高優勢舉高部機冇遮冇檔咁狂影
又係幾百張相入面抽到幾張靚相出黎

幾時去到日本都未知

音樂完左之後就係要走既時候
情況就同放完煙花既迪士尼
或者哈囉喂臨完場既海洋公園一樣
賴死唔走既後果就係走唔到
所有交通工具都會有無限既人龍
就算你揸車都要排隊出停車場同塞車

我地係前面已經影相影飽哂可以即刻走
但你地睇下啲人多到好似除夕倒數咁
後面啲人頭先睇唔到，都係繼續向前行
我地變左逆流而上咁好難行
但好彩日本人都幾禮讓
見到我地想走都讓個空位俾我地過
個地球就係出口，你睇下隔幾遠


行到去天幕附近條路終於闊番
以本人既最高步速(大約係中環平均步速2倍)
終於甩哂前面既主車群到達出口



再見了USJ
而家老任同minions，有興趣去多次
但係我睇下年都未必得



USJ正門前面既4間酒店
如果係度玩2日既話留係度住都幾好
下面又有野食，朝早又唔駛迫車過黎



因為我地真係行得好快
所以直接上到車去西九条轉車

岩岩睇緊樓主帶兩老去日本黎止旅行癮，轉頭樓主呢到更新左

樓主同友人發揮腳長優勢
快速離開usj

等我估下樓主晚餐/宵夜食咩先
松屋，拉麵，燒肉

我估拉麵

仲有得玩咩

2016年冬天

番到難波第一時間梗係食飯
12個鐘剩係食得一餐真係餓死
其實又唔係話帶唔夠錢
而係我本身份人太精打細算
硬係覺得USJ樣樣野都唔值呢個價唔想駛錢
有人估我今餐會去食乜，盤口都開埋
可惜既係三選一估錯左
正確答案就係大家對我都好熟悉既松屋
唔係唔想食好野，但係食飯時間度度都要等
等得黎都餓死，而且乜松屋好差咩
今次食既係上一次旅行發現到既松屋最強料理
蔥鹽燒豚肉飯 + 半熟蛋
因為呢幾日冇乜點食過菜，再叫多個沙律
蔥既脆，鹽燒豚肉既香口，半熟蛋既濃厚
最後加上熱辣辣Al Dente既白飯
加幾滴燒肉汁同少少七味粉
撈埋一齊食，嘩！人間美味
松屋既沙律水準都唔錯，又凍又新鮮
啲椰菜絲紅蘿蔔絲切得夠幼，粟米又甜
加少少芝麻醬撈埋一齊食又係好好食
食唔到草青味之餘仲有少少菜甜味
尤其係咁耐冇食過野，呢一餐食到想喊
遺憾既係今次行程緊密剩係食到一次咁多
後遺症就係之後既松屋暴食症()


食完飯都係行下附近
行行下又肚餓，肚餓就要食野
今次就揀一蘭隔離長期排哂隊既章魚燒
夜晚10點去排都要等15分鐘
因為剩係得前面呢個爐整，1次剩係整到16盒
本身見前面得幾個人，以為實有啦
點知有位同胞一買就買左8盒
排到我同朋友K就啱啱好賣哂
於是就企定定望住人整，不過5分鐘就有



出面凍冰冰唔想係出面食
所以就行左落充滿油煙味既暖爐地下室食
朋友K見到隻Elmo就叫我幫佢影張相
Elmo：好似好好食喎
但我個重點係飛田新地本店


講番個章魚燒先，500yen有9粒
燒汁加蛋黃醬加蔥
上次係京都食既就比較軟身
呢度用籤吉落去就比較硬同脆
質感實淨過京都嗰隻，但又冇香港食到嗰啲咁硬
入面粒章魚超大粒，彈牙得黎咬得開
個汁都調得唔錯，唔會酸得滯
當宵夜食一流，食完又唔算太飽
不過我就唔食紅薑，嘥左

留名
越睇越想去旅行