[紅葉。基友。京阪奈]兩個小生去日本7天團

又要留名了

老老實實~有冇去飛田或玩JK

有冇貪玩試情趣朱古力

行緊書店見到有唔少男人買

今次揀左RIHGA Royal Hotel Kyoto
位置就係京都站西面行10分鐘直路就到
雖然中途冇乜行人，可能因為好撚凍
但係因為係大路，有好多車行
都唔怕俾人拐走既


雖然間野已經開業50周年
但係我地去嗰陣啱啱翻新冇耐
所以可以當新酒店咁住
房都好大下好舒服


係房擺低哂行李就去食Dinner
酒店附近好靜冇乜舖頭
便利店既話過馬路行2分鐘就有7仔
但要食正餐都要行番去京都站周邊先有
今次就揀京都拉麵小路，係京都站10樓
要瘋狂搭扶手電梯上去
因為就快聖誕節，所以有棵聖誕樹係度
而且播哂聖誕歌，都幾有氣氛
可惜我身邊嗰個唔係女
K先生好鐘意影相，係叫我幫佢影相
但係真係好凍，影左陣頂唔順都係入番室內



京都拉麵小路有10間舖頭
大部分都係食拉麵
貪食完飲埋湯暖笠笠


我地黎到既時候都8點幾
都已經過哂食飯時間
但呢度有1間舖都仲係排緊隊等食
以我睇過咁多日本節目同自己既經驗
呢間舖頭既食物點都唔會太差
於是我地決定呢間舖 - 一幸舍
排左15分鐘終於到我地入座
我地叫左招牌既味玉ネギチャーシューメン
係當年只係食過一蘭既我黎講
呢碗拉麵既水平高好多
豚骨湯底有好重膠質，濃得黎又唔會太滯
細麵就好掛湯但又唔會一夾就斷
薄過紙既叉燒有4塊，正常味道
一蘭唯一一樣贏既就係佢個辣係幾好食既

朋友K最鐘意就係周圍望周圍撩人講野
同我呢啲默默地向住目標衝既人唔同
但係有時不得不配服佢既觀察力
係拉麵小路嗰度佢無意中搵到個門口
冇乜人出入，但係又好似行到出面咁
位置就係上面嗰幅圖拉麵小路個水牌隔離
發現到一個京都站既景點入口 - 空中径路 Skyway

京都駅大樓分東西兩幢建築
東面就係伊勢丹百貨，拉麵小路都係嗰邊
西面就係京都劇場同酒店，基本上你唔會去
中間用大量鋼結構形成既京都駅大堂上蓋
所以搭JR係京都駅一出站嗰下望上去係幾有氣勢
除左地底既地下街同地面之外
係上層就只有呢條Skyway可以貫通東西兩邊
讀Engine既巴打可以上黎J下啲建築結構



除左用千里眼向下望睇下有冇靚女之外
呢度仲可以近距離睇到京都市區最高建築物 - 京都塔
如果你有追到我第一次去日本既遊記
我有提過京都既建築物有嚴格既高度限制
131m既京都塔就成為立例後唯一一座高樓
所以之後起既京都駅都只可以起到條例最盡既60m
建築師專登係10樓整左條路可以俾你高空睇住個地標


係空中径路行到尾會有扶手電梯落番去
嗰個位似係啲婚禮場地咁



東邊同西邊建築唔係連住
光管嗰個位上面就係Skyway


行完Skyway就落番地
因為都已經9點幾，啲舖都開始收
聽日又要早起身chur行程
所以都係番酒店訓覺算
京都駅既夜晚都好多人
但好多遊客主要都係影京都塔
如果啲人知道上面影仲靚會唔會踩冧條Skyway


返酒店途中見到便利店就梗係入去買宵夜
今次個行程專攻乳制品，所以揀左奶同布丁
明治士多啤梨奶對我黎講太甜，不過都好味既
森永燒布甸質感唔似一般啫哩狀，而係似燉蛋
所以食落好香同入口即溶
而且最重要佢好食得黎唔貴，性價比好高
香港Donki見過但要10幾蚊，不了

日本d布甸世界第一又平
香港賣貴咁多真係不了

重甜PLS

Day 02
今日諗住早啲起身出去搵早餐食先開始行程
但因為朋友K叫極都唔醒既緣故
所以搞到8點先出門口，所以冇食早餐
你地可能會問駛唔駛8點就出去
但其實今日預定要去5個景點
未計搭車食飯，每個地方留2個鐘既話都要6點先行完
所以差唔多架喇


第一個行程就係清水寺
正常就係京都站前廣場搭巴士
落左車行15分鐘上山
京都巴士係市區範圍都係劃一收費
如果搭得短既話其實都幾唔抵
同埋返工時間好驚塞車，分分鐘行路仲快
為左慳番啲錢，我地決定晨運
由酒店行路去清水寺，接近1個鐘
但我事前冇同朋友K講過要行幾耐
------------------------------------------------------------
我 朋友K

：我地行路去清水寺好唔好
：行路咋嘛，有幾難
：(計畫通り)

我地行到去京都站既時候都已經見到好多人等緊巴士
尤其係經過清水寺條龍都幾長
咁就啱喇，陪我行路過去啦


京都市區設計好似棋盤咁
線就係路，格仔就係小區，冇捷徑
所以行路都唔會點迷失方向
清水寺山下既入口係京都站既東北面
所以只需要沿大路向東行
之後去到最近清水寺既十字路口轉向北行就到
因為係返工時間，都幾多人同我地相反方向行去車站


中途會經過鴨川
沿著水流落去就會匯合到大阪既淀川



行到去近京都國立博物館就俾棵好高既紅葉樹吸引住
配合埋紅磚外牆感覺好靚，梗係要影下相
不過朋友K既視線反而係俾右邊門口吸引住
---------------------------------------------------
：行入去右邊嗰度望下啦不如
：...做乜呀，唔好阻住我影紅葉啦
：好多學生妹行左入去喎
：いくいく (熱菇熱菇)


呢度又係無意中發現既景點 - 三十三間堂
門口後面原來都有紅葉睇，仲靚過頭先


京都本身係千年古都，有一段時間佛教特別興盛
連天皇都信奉佛教，所以借勢起左唔少寺廟
而且好多到而家都保持得好好冇穿冇爛
三十三間堂就係其中一個保持完好既古蹟
主堂有超過700年歷史，屬於國寶
裡面放住千手觀音同風神雷神木雕像，全部都係國寶
不過門票要600yen，主堂都唔俾影相
而啲學生妹好似已經行完準備走，入去好似唔抵
所以都係唔好浪費哂啲時間
專心去番清水寺算數

點可以淨係影2張床咖間房咁大

冇正面

行番出去之後就行去京都國立博物館正門望下
因為太早未開門所以剩係可以係外面影下
呢個博物館本身就係古蹟，起左超過100年
入面放左好多國寶同重要文化財做展覽
京都作為千年古都，數量之多都係正常不過


之後我地就行番原路去清水寺
經過一間寺廟叫做妙法院
朋友K叫我幫佢係門口留影
我心諗，呢啲寺京都大把啦，做乜要影
幫佢影完佢又叫我過去門口幫我影
但係我打文揀相既時候Google過下
妙法院建築本身原來又係國寶
原來我地懵盛盛去多左咁多隱世景點
朋友K話佢真係唔知妙法院係國寶
純粹係因為覺得特別先走去影相
我無意中發現到朋友K原來係個國寶雷達


咁好啦影完就繼續行
我地8點半係京都站開始行
行到9點3先至行到黎呢個位
見到清水寺道就代表你行啱左路
清水寺道係舊名，而家就叫五条坂
係度直行上去就會到清水寺
Google Map會指你行大谷道
冇錯係近啲，但係中間會經過一大堆墳場


行到上去中途會見到一個三叉路口
好多遊客都會係度Hang機唔知行邊
其實直行同轉右都去到清水寺
直行就會經清水坂行上去，不過清水坂好窄好多人
所以我地選擇轉右經條路闊啲既茶わん坂行上去
見到三重塔就姐係就快到清水寺範圍了
行到黎呢度都唔需要特別驚
因為有好多人會陪你一齊行


呢間Cafe上面啲紅葉樹開得好靚


本身check過我地去既時候係凋謝期
都驚去到啲樹會得番啲枯枝
不過親身去睇又唔係好覺
啲紅葉仲要好紅好多

因為我影既時候個fd已經攤左係張床度
所以費事出嗰張相

lm

終於有返之前遊記d風格

事隔2年終於黎到清水寺
今次後面既三重塔終於整修好
可以一次過影番哂


我地上到黎都係9點半
下面啲舖頭都係啱啱開
但遊客已經有咁多
遲啲下面應該會迫過大三巴


你地要既學生妹
當時氣溫5度都仲著住短裙


如果想行入清水寺本堂就要俾300yen入場
入場券係好似書籤咁，有本堂同三重塔
話哂本堂係國寶，點都要籌下錢整修既


可能整好冇耐
個三重塔顏色好似淺色過其他建築物


係本堂側邊影出去，下面超多紅葉
山嗰邊就一忽紅一忽綠咁，幾搞笑


我去嗰日原來係今年漢字既發表日
每年由清水寺住持題字上去塊板度
所以半個舞台封左
同時又見到好多記者set好左啲cam
不過時間未到就剩係得塊白板

又黎到清水寺本堂後面既地主神社
可能因為啱啱開冇耐所以冇乜人


朋友K又基於探險精神
於是係咁揭人地啲繪馬黎睇
作為國際遊客必到既景點，乜野文字都有
當然唔少得中文，大約佔總數2成
但其實咁樣係好無禮貌
因為繪馬係寫俾神睇而唔係寫俾你睇



係繪馬板後面影出去都幾靚

影清水寺最靚個景就係行去子安塔條路中間
呢度望出去仲睇到京都市區全境
三重塔隔離就係愛宕山同嵐山
最左面就望到京都塔同京都駅



行完上面就行下面
呢度位有好多紅葉，雖然有啲已經謝左



音羽の滝依然係好多人排隊
呢度有3條水柱
1條代表學業，1條係戀愛，1條係長壽
每個人只可以揀其中一樣
如果唔係就唔靈，例如以呢張相為例
呢位女士選擇左戀愛，代表佢仲好愛佢老公
呢位男士選擇長壽，代表佢嫌條命唔夠長
結論：個老公成日激親老婆


清水寺起係山坡上面
突出黎既部分就用好長既大圓木支撐
再用木製榫卯固定，全個建築一粒釘都冇用到
呢幾百年咁多地震咁人踩上去都未冧就知佢幾硬淨

冇人係音羽の滝洗腳

行左1個鐘就開始行下面既商店街
越黎越多遊客上到黎




頭先行左紅字路徑上清水寺
而家就用藍字路徑落山去下一個景點 - 祇園四条
我地行清水坂再行五条坂
再行番轉頭轉落產寧坂二年坂咁行過去
頭先行左4公里，而家行多2公里
呢度全部舖頭都係做遊客生意，有好多手信店
例如筷子，和菓子，茶等等
不過個人麻麻地呢啲野，行完冇幫趁




上次黎清水寺發現到呢間おちゃのこさいさい
對於佢地既辣油念念不忘，今次都係要買番幾盒
無論炒野定打邊爐，落少少都會好香口
位置就係清水坂行落去產寧坂既樓梯邊
朋友K頭上面嗰間就係
帶住兩老去旅行嗰次買左10樽
而家用剩2樽，幾時可以放我過去補貨


今日天氣好好，曬得黎唔太凍
行呢啲戶外地方好舒服