Day 03
之前嗰日朋友K搞到我冇得食早餐
今日因為checkout，佢都唔敢賴床
朝早8點搞掂哂就拖住行李搵早餐食
但一出到酒店門口就發生左我最唔想見到既事
屌，落雨
好彩嗰陣微微雨，仲行到去酒店附近間Lawson買遮
拎住個喼同背囊，縮骨遮遮唔哂
所以就買左把日本好常見既白色磨沙膠遮
雖然把遮好平，都係幾百yen，但係超硬淨
最起碼我拎埋把遮返香港用到而家都未爛
打風望見啲人啲遮吹反哂，我嗰把仲未試過
行去京都駅中途見到
扑吉野家
朋友K就話想試下同香港有乜唔同
我就未食過日本吉野家早餐，咁好啦
一如以往我都係有充足既探伏精神
就叫左個特朝定食，因為有納豆
而家個餐都係580yen，4年都係加價5%
香港1年加個數都唔止
舊魚比我想像中細，而且偏實偏鞋
生蛋打勻左撈飯好正，佢冇香港普通嗰啲生蛋腥味
而且好有蛋香，配熱飯同豉油撈埋好好食
納豆係外國人眼中同榴連腐乳齊名
第一次食其實又冇想像中咁可怕
聞落冇人地所講咁大味，可能因為係凍既緣故
如果乜都唔落就咁食就冇乜味，滑潺潺咁
可能因為本身我鍾意食秋葵，對呢個口感唔反感
人地話加啲鼓油會好食啲，我又唔係好覺
總括黎講，你叫我食第二次我是拒絕的
唔係因為難食，而係形容唔到食緊乜
朋友K就叫燒魚牛小鉢定食，啲牛都幾少
佢話啲牛係一模一樣味，冇違和感
因為酒店離京都駅有一段距離
呢日又落雨又凍，唔想行番去酒店拎行李
多雲有雨，氣溫3度，體感0度
所以計過度過都係俾啲錢寄存行李
當年我對Locker都唔係太熟，所以用番寄存服務
係京都駅入面扶手電梯落去地庫有間叫Crosta京都
當年500yen一日寄存一件行李，仲平過大Locker
而家要800yen一件，擺細行李就唔抵
好似仲可以送埋去你將會住既酒店，京都大阪都得
不過本人怕死，行李都係盡量跟住自己比較好
搞掂哂就去第一個景點 - 伏見稻荷大社
京都駅搭奈良線2個站就到
但千祈唔好貪快搭快速，會飛站
呢架103系都有番咁上下歷史
由當年未分拆成各JR既日本國鐵係1964-84年生產左3000幾架
係日本鐵路史上生產得最多既單一列車型號
唔同線會配唔同顏色，奈良線就配左綠色
因為國鐵時代啲舊車實在太襟用，所以好多都仲係現役
JR九州嗰啲觀光列車好多都係用70-80年代既舊車改裝而成
一黎方便遊客睇風景又唔駛開得快
二黎仲可以收貴過普通車，車上面又賣紀念品引遊客課金
咁樣廢物循環再用仲搵多左錢
JR西日本就有錢好多，所以都逐步退緊啲車換新車
而家除左奈良線之外都買少見少
奈良線顧名思義係去奈良，開業超過100年
當年技術唔夠好搞到條線有好多問題
例如單線路段同平交道好多
要擴建或者高架化又貴又影響景觀
單線雙程又搞到安全問題加密唔到班次
而且佢係依山而建，所以好多彎路
就算俾你全複線化都冇用，都唔開得快
況且JR奈良站同遊客去開撚鹿既地方差幾百米
行過去都真係幾撚遠
，詳情請留意下篇遊記
京都駅本身超大，南北2邊相距成200m
北面出口範圍，中間大部分月台路軌同通道屬JR西日本所有
京都駅大樓就係北面，附近有地下街同好多商場
之前講過，唔記得就睇番#34
大部分人都剩係知北面出口，以為呢度得JR同地鐵搭
其實好多人都忽略左京都駅既南面出口
東面既一半屬於JR東海既東海道新幹線月台
西面既一半就屬於近鐵既京都線月台
而係呢度搭近鐵去奈良其實係比JR更方便
落車既地方就係近鉄奈良駅，行出站就係撚鹿既地方
同難波出發相比價錢同時間唔係差特別多，1個鐘內點都到
再者，京都地鐵烏丸線同近鐵京都線又係直通運轉
每日都有幾班車由地鐵京都站去近鉄奈良駅唔駛轉車
所以下次可以考慮京都呢邊去奈良
十卜樓主，我第一次去日本都係大阪，我覺得大阪有特色過東京，印象深刻d
