由我知道佢鍾意同性之後,我一直都有懷疑佢會唔會對我有 feel。之不過,佢咁多年嚟都只係好似 best friend 咁同我相處,所以慢慢我都無再咁諗。況且,我雖然無拍過拖,不過一向都認定自己係鍾意男仔而唔係女仔。但今晚喺餐廳廁所入面,我居然比一個醉酒嘅人更加唔清醒,仲要身為一個唔係 les 嘅女仔,向一個 les 嘅朋友毛手毛腳。「我究竟點解會咁?」我好嬲自己頭先乘人之危,又好驚以後同允翹無 friend 做:「係咪純粹好奇,想知撫摸其他人身體係咩感覺?係咪因為無拖拍,太過寂寞,所以一有機會就想試吓情侶之間嘅親密行為?唔通 ⋯⋯ 我愛上咗允翹?無可能嘅!」連我自己都諗唔透我頭先嘅動機係咩。
我除哂啲衫褲、一絲不掛企喺鏡前面,望住自己。雖然係高,但無操開嘅我身型都係麻麻,有啲啲肚腩。我撳住自己微微脹起嘅下腹,細細聲嘆咗口氣。至於個胸就更加係普普通通,只係得 B。之前上網睇啲人話,男人多數都係鍾意啲坐底有 C 嘅女人,當然大到去 E、F 嗰啲喺二次元世界常見嘅身材就唔係個個啱啦。
突然之間,我聽到電話震咗吓,於是行埋去睇。係 Hannah 傳嚟嘅訊息:「heyy, you here?」。