台灣沒有天燈放
2020-04-07 18:22:35
「咁又唔洗鬧人既,唔可以一齊玩架咩。」有時我也真的不明白女生的相處之道…
「我鍾意既野,無人可以搶走。」她突然哄到我面前,差不多碰到我鼻子,嚇得我馬上退後。
「所以,你可唔可以幫我做一件事。」其實跟李曉婷個別傾談又不覺得她怎麼樣。
「你想我點?幫你同千雪道歉,定係同嘉柔道歉。」
「我想係返香港之前,可以令嘉柔原諒我,同埋…鍾意我。」
「下?鍾意你?你Les架?」我直話直說。
「係…」我只是開開玩笑,想不到她原來真是同性戀…
「麥Sir你幫下我啊…」李曉婷矯嗲著說。
「對唔住,我幫你唔到。」不是我不喜歡同性戀,而我不想幫這種性格的人,而且我不想嘉柔…
「嘉柔都鍾意女仔架咩?」我問李曉婷。
「唔係…」呼,心中的大石隨即放下。
「但係佢個陣都鍾意我架。」她很誠懇的說。
「鍾意同你玩啫,並唔係鍾意你個人,想同你一齊拍拖個隻呀嘛,我諗你自己都知架。」
台灣沒有天燈放
2020-04-07 18:25:44
「你如果真係想同佢friend返,點會初中之後唔搵佢,黎到中五先搵佢?」
「其實我有…只不過,佢唔想理我。」說真的,我是嘉柔也不會想理你。
「李曉婷,幫你地做返朋友我都可以,但係女朋友就…」
「都好…我唔想去到中學畢業,一個交心既朋友都無,淨係得一班唯利是圖,有事鍾無艷 無事就夏迎春既豬朋狗友。」
「唉,我睇下點幫你啦,第一樣嘢,唔該你改下你啲性格先,唔好話女仔,男仔都唔會鍾意你啊。」
「超,我又唔鍾意男仔。」
「你睇下,一話你就起晒鋼咁。」
「咁我由細到大都係咁啊嘛。」其實,對著這些人,我也不知道如何幫她。
「咁你就要努力去改囉。」
「CX505 第一次召集…」機場上傳出廣播。
「之後再講啦,去排隊先。」我跟李曉婷講。
「喂,墨子。」嘉柔皺眉跟我說。
「你做咩同李曉婷傾咁耐計。」她好像對此有點怨言。
「因為,佢想同你做返朋友。」我把剛才的話坦白跟嘉柔說。
「下,我唔想喎。」
「其實唔知佢點解對著一班人就會起晒鋼,係都要頂嘴,但係啱啱同佢傾計,發覺佢都唔係咁黑人憎啫。」
「你太唔認識佢啦。」嘉柔認真的說。
是的,我確實不認識她。
「先生,麻煩Boarding Pass。」空姐為我掃描機票。
坐在飛機上,挨著窗邊,腦海被嘉柔,千雪,李曉婷的事煩擾著;但願飛到天上,能夠將一切煩囂的事情留在香港。