貌似大家好似都仲係唔係好明我所講既「打版時收腰打直線」係咩意思。其實只要對住個紙樣就好易明，上面呢張圖係我響一個英國裁縫鋪Steed tailor既Instagram 截落黎，我標左記號，可以睇到版上收腰既兩條線係直不甩，少少轉彎位都無，直接形成左一個好急既角度。
其實響大部分英國裁縫鋪，尤其是比較傾向類似nutter cut既鋪頭，好多時收腰都係咁收。當你打版係咁打既時候，你揸起個試身、做好套衫既時候，就會有一個比較明顯既收腰，姐係咁：
好處當然有，如果你要「打假波」做到個胸有咁大得咁大時，呢種收腰就會令你條腰睇落更幼，腰身更明顯。
但收到咁既時候，製作既時候會比較難做得順，因為條線太直不甩，線條無空間去過渡，塊布就有機會因為伸唔開而出現啲奇奇怪怪既陰影同紋。
相對地，有好多裁縫（以我觀察南意通常係咁）就會打版時用弧線去畫，過渡順左，做時容易啲，當然出黎既感覺都唔同。例如下面係Paone既版：
你會見到佢地雖然同steed一樣前身大小片係無分開裁，一套衫由主要四塊裁片組成，亦即係我地講既四開身。但佢打腰部線條既時候，條線係用彎尺畫彎既，出黎既效果就會變左咁：
當然，呢啲打版上既分別唔係消費者suppose要知既野，製作難度亦唔應該係消費者需要理會既野。每間鋪打版時用既邏輯、算式、製作習慣都唔同，亦係house style有分別既原因（house style絕對唔係咩open quarter大啲、大啲個領之類咁膚淺既野，當中牽涉到好多範疇）。
消費者需要既只係搞清楚大既想要既感覺，再去搵岩既人做就可以。
大把啦，整到出黎先算啦，個個師傅都拍心口乜都話得得得世界第一，做完出黎兩回事
不過去DB好穩陣
