對於唔少連登仔黎講,特別係蒲開旅遊台嘅手足,去日本已經係家常便飯。但係大家去嘅目的各有不同,有啲去爬山,有啲去睇景,而我就純粹為食野去。有見日本美食post入面多左好多志同道合嘅巴打,我又出篇遊記黎拋磚引玉先
事不宜遲,去相。
Day 1
為左爭取時間好用啲,去程搭red-eye,到埗大約7點幾,即刻去酒店放低行李先。住黎講我自己無乜要求,Budget全程放落食度。今次酒店個reception比較特別,係機械人黎像真度都幾高,夜晚見到有時都嚇一嚇
放完行李就先去下影相,去左30分鐘車程嘅景點 — 豪德寺。豪德寺最出名嘅地方,就係佢嘅招財貓仔更加有唔同大細。數量之多,成為左東京市內其中一個有趣隱藏小景點。咁啱個日落雨無人,隨便影都得。
去到3、4點左右見肚餓,返左新宿隨便醫肚先。最後揀左風雲兒 落雨都好多人排隊,等左20分鐘左右。
風雲兒
自己比較少食拉麵,所以揀風雲兒都係見佢幾出名。無做research,唔知佢沾麵係出名,所以隨手撳左拉麵。個人覺得無乜特別,係粒蛋幾好食。
鮨つきうだ
係新宿行左2個鐘街,就起行去位於目黑嘅鮨つきうだ食晚飯。話說呢間壽司舖其實係最後一間book嘅餐廳,當時已經係出發前嘅2個零星期。咁啱係ig見到合眼緣,加上無乜好選擇嘅情況下,就是但揀左佢。
先上刺身及酒肴:
煮蛸 - 室溫,肉質柔軟甜美。
白海老 - 有少許泡菜漬嘅味道,微辛,相當開胃。
鯨(クジラ) - 食鯨已經係好耐之前,加上係香港食唔到,所以上呢道刺身時,都幾驚喜。肉質偏有韌性,熟成過,血味濃郁。
蝦蛄 - 體積雖小卻十分鮮甜。
鮑、鮑肝醬Shabushabu、馬糞海膽 - 先試第一塊,無甚特別;第二塊鮑,大將建議放入以鮑肝醬油加昆布出汁調成嘅迷你Shabushabu入面烚下;之後,大將將舍利放入湯汁,舖上馬糞海膽,成為”Risotto”。總括黎講,搞完一大輪都係麻麻地。
跟住就上壽司,當中穿插少量酒肴。呢度嘅舍利(壽司飯)係白醋飯,溫度比平常高少少,偏黏。老實講舎利未算好滿意,wasabi好重手,型又唔係握得好靚咁。以下搵幾道好少少嘅黎寫。
小肌 - 清爽,酸味比較輕盈,處理得不錯。
車海老 - 向天本致敬?
塩釜 中トロ漬け - 脂肪比例相對平衡
河豚白子 - 掃過醬油黎燒,爆發。
喉黒巻き - 厚切,魚油滿溢,魚材本身就無懈可擊。
粟米、小蕃茄、茄子凍湯 - 清味蕾嘅過場,夠fresh。
鰹 醤油漬け - 分別點上小撮黃芥末及蔥蓉,魚肉軟滑,漬得剛好。
晚餐共30品,對我黎講飽到上心口,埋單2萬円內,十分合理。最後同大將吹左兩句就返去了。
- Day 1 完 -
預告黎緊個幾Day行程包括K+、是山居、海味、虎白等餐廳,有人睇再寫 依家準備緊冬天去個轉嘅booking,難度又高好多
(如果有身邊朋友發現左勿在此相認)
歡迎交流