第1章 - 敘舊
「Hello車仔 ~~~
最近點啊？完sem之後有冇時間出嚟食餐飯？」
電話彈出一個由未知聯絡人傳嚟嘅訊息。
我心諗「9成9係騙案啦，呢個年代仲有人信呢啲嘢㗎咩，等我㩒入去block咗條友再report佢，等佢唔好再周圍呃人」
差啲唔記得，等我介紹下自己先。
朋友通常都會叫我做車仔，啱啱喺3個月前入咗大學。
而家喺宿舍温緊聽日嘅考試，考完之後就可以享受人生第一次Sem Break喇。
話說小弟有少少古怪，就係一有電話號碼就要加人哋入自己嘅聯絡人，真係完全接受唔到whatsapp嘅聯絡人係個電話號碼
就算我同嗰個人完全唔熟，但只係因為要合作做嘢而傾過幾句嘅人，我都會入佢哋嘅電話，
所以就會有堆例如「補習學生xxx老竇 - 黃先生」同 「xxx社區中心 – 陳小姐」呢啲古古怪怪嘅聯絡人喺到
呢啲小弟嘅習慣就題外話啦，不過就證明咗揾我嗰條友一定係唔識
喺㩒咗入去正諗住block佢嗰下，望到個icon好似幾靚女，作為一個正常男性，就緊係放大埋個icon睇埋先啦
一睇到icon個女仔個樣，唔係講笑，真係嚇到呆咗，原來係中學同學嚟，仲要曾經好熟嗰隻。最震驚嘅係，竟然佢染咗把金啡色頭髮，真係估唔到曾經嘅乖乖女都會染髮染到成個mk咁。
我即刻加返佢入聯絡人，然後覆佢
「不如聽晚啦，就你去港島區好冇？」
隔咗半秒都冇，佢就覆返我
「唔好啦，你過海咁遠，我想去旺角嗰間日本餐廳食啊，7:30嗰到等啦，先到先入座」
我隨便覆咗個ok就走咗去瞓覺。
好死唔死，竟然完全唔眼瞓，可能真係因為收完佢個message，好多以前同呢個女仔嘅回憶即刻返晒嚟。
可能你哋而家心入面有好多個問號
到底佢係邊個呢？？？
有咩咁重要啊？？？
肯定係ex啦！！
佢叫咩名呢，我而家唔話俾大家聽住
不過！！不過！！
去到今晚餐飯，大家就會開始慢慢去了解呢個女仔㗎啦
望一望個鐘，原來都6點。
唉，都係唔瞓喇，一陣醒唔到仲大鑊。
既然都瞓唔到，就緊係去學校飯堂食個早餐先考試啦，正所謂「有早餐嘅morning先係good morning」嘛。
一入到去就見到收銀嘅櫻妹，唔好睇我叫佢做妹妹以為係後生靚女，佢個仔今年都20幾歲㗎喇。
只係佢話由我哋啲學生叫佢做妹妹，佢會覺得後生啲喎。
咁啲學生又唔介意，所以就個個都叫佢櫻妹囉。
「車仔，今日咁早嘅，係咪照舊？」
「係啊，唔該晒」
「搞掂，你嘅，雪菜肉絲五香肉丁雙併麵 凍奶茶少冰
早啲瞓啦車仔，隻眼起晒紅筋喇」
「Yes Madam！」
喺等緊餐嘅時候，聽到把好熟悉嘅聲喺後面。
未望過去就已經知係我個識咗好耐嘅老友，阿天。
雖然佢把口好衰，但係佢真係成日都陪住我，係我喺中學最熟嘅好gay友。
「嘩，竟然係車仔，我有冇眼花，7點就已經喺到，但係對黑眼圈又咁深
尋晚落老蘭食咗幾多條女啊？」
「咪玩啦，我毒撚嚟咋，哪有女，尋晚瞓唔著，一陣仲要考試啊」
「能夠令我哋車仔失眠，唔使審，肯定又係佢啦」
「佢尋晚突然揾我話想約我食飯，真係嚇到我呢」
「咪去啊你，一陣你又衰心軟同返佢一齊啊，你知你幾廢㗎啦，
因為啲小事又會喊，俾人氹幾句又會心軟」
「但係我應承咗佢今晚喇喎」
「唉，你自己睇路喇，有咩再揾我，我去考試先」阿天不屑地笑了一笑。
唉，而家都係咩都唔好諗，考埋個試再算。
呼，話咁快就已經到咗約定嘅時間，
一如我所料，都係我到先。
畢竟喺識咗佢之後，每一次同佢出街都差唔多係我早到，今次都唔例外。
入到去餐廳，我隨便揀咗張2人枱就坐低咗，碌住電話咁等佢嚟。
同大家簡單介紹下先，即將會嚟嘅女仔叫做Chloe。
佢唔知做乜喺大半年前改咗個英文名，不過呢啲唔太重要就是但啦。
咁佢就大我一年嘅，係一個品學兼優嘅好女仔，喺老師眼中直頭係模範生。
中學嘅時候好照顧我同好幫我，係我成個中學生涯入面，甚至直到而家，出現過而又最重要嘅人。
「車仔，咁早到嘅」
「緊係，約你喎，點敢遲啊。」
「唔好講住，等我叫咗嘢食先再慢慢傾，全日未食過嘢真係勁餓」
叫完嘢食之後，我哋都係同對方講下近況啊，講下自己讀書讀成點啊，大學識到咩人咁，都係啲普通嘢。
我心諗 「呢餐飯其實都冇咩特別啫，阿天真係諗多咗喇」
點知喺食緊嘢嘅時候，Chloe突然嚟個腦筋急轉彎
「你以前成日都話我對你好重要，你記唔記得我哋係點識㗎？」Chloe問我。
「高中嗰陣識囉」我扮傻。
「唉，你hea我嘅，唔想答咪算囉
我了解你仲清楚過你肚入面條蟲，你邊呃到我啫，連你眨個眼我都知你想點啦」
「係嘅係嘅，果然係Chloe姐姐，冇嘢瞞到你」我即刻認返個低威。
「你咁唔想同我講以前，仲叫咩我做姐姐，喺到扮晒熟咁」
「Sorry囉，最多請你食嗰間芋圓喇」
「咁又唔同講法喎，行啦傻仔，我仲點敢發你脾氣」
一路行嘅途中，經過咗好多同佢有回憶嘅地方。
因為我除咗旺角，就唔知可以約女仔去邊到，所以次次由大西北約人出城都係去旺角。
「你估嗰間芝士薯條執咗未」Chloe突然問。
「未啊，我上個星期先食完。」
「你都會去嗰到叫嘢食？明明你有選擇困難症㗎喎」Chloe笑著說
「唓，你估我係你咩」我反了反白眼
唔通我話俾你知，其實我真係揀唔到，每次都只係食返同你食嗰款咩
「車仔，呢間芋圓真係好正…但係我次次都唔識嚟…嗰次特登同家姐出嚟揾都揾唔到」Chloe邊食邊說。
「好心你地啦，兩個路痴就唔好學人揾路，去返啲識去嘅地方咪算囉，
9點鐘喇，食埋呢啖就走啦，唔係你趕唔切小巴㗎喇」
「係啵！！！」
我陪咗佢落地鐵站之後，就行咗去坐小巴返大學宿舍。
「返到去記得話聲我知啊」一按下發送鍵，我就喺小巴瞓著咗。
喺啱啱瞓醒嘅狀態下，仲要行山路返宿舍，你都咪話唔辛苦。
返到去之後，我即刻執齊啲嘢走去沖個靚涼。
事關小弟真係接受唔到自己污污糟糟咁攤上床。
咁當然喺攰到不省人事嘅時候，就緊係瞓醒再算啦。
一攤上床，就諗返Chloe啱啱問我嗰個問題
「你以前成日都話我對你好重要，你記唔記得我哋係點識㗎？」
如果初中冇發生嗰啲事，到底佢仲會唔會對我咁重要，而我又會唔會同佢一齊呢？
