有關香港前途 你問我答

逆係我個本質，追求自由者必須時刻叛逆，時刻打破秩序。
嘶係我嘅表象，係吶喊嘅力量，但求力竭聲嘶，一氣呵成。
打blog係表達思想，就談論理念嘅地方，而亭即為聚腳地。
當然重有英文喇，我希望我嘅理念可以be exciting always。

舊學生路過一直有追開你ig，睇你cap fb嘅圖(因為好少上fb)雖然你嘅ig經常歡迎發問，但無奈自己才學唔高，一直冇膽發問。好認同你經常講嘅精進自身，亦覺得你今日ig story嘅文寫得好。我時時同朋友討論各種議題時都會提到你/你講過嘅嘢，因為一直都覺得你思路好清晰。呢個post值得push push～

係完全唔可行，所以我地都係一齊諗其他出路喇。

你點睇BNO平權？會有幾大機會平到權？
還望英國脫歐？

補習係我嘅副業，如果你係我舊學生，應該都知道我成日上堂都會越講越遠。我之所以補習，一黎係因為唔想畀全職工作困身，影響思考，而另一方面係想keep住同中學生交流，同埋同佢地分享理念。我成日都認為，exam skills係其次（當然我係有努力教架喇），我真正想做到嘅係等十六七歲嘅中學生知道兩樣嘢，一係大人世界唔係盡皆犬儒，二係香港真係有希望，只要你地相信。
大人世界，真係有好多人都屈服咗，但對我而言，所謂屈服，並唔係現實令佢地低頭，真正令佢地低頭嘅係佢地自身嘅選擇。有人曾經同我講過，「真係擔心到底三十歲就會回歸生活，到時真係靠班細喇」，我即刻提醒佢同佢講：
我地只係廿幾歲，出黎做嘢極其量都係四五年，如果有心，點會無法取捨？如果你真係想跟貼抗爭，你可以放棄買衫買車，搵啲冇咁困身嘅工，而如果你真係覺得攰，咁就專心搵錢，到時捐錢捐物資，唔需要太過自責。而更重要嘅係，唔好將期望推畀下一代，我地呢一代做到幾多就盡做，唔好相信有下一次，因為生命真係好短暫。
我學生唔算多，但亦唔少，所以估唔到你係邊個，但係希望你都會繼續精進自身，以後有乜都可以隨時問我，我隨時都準備好架。

除非有辦法可以迫到中共放棄香港， 咁樣仲有少少機會!
但問題係佢咬住香港唔放

ig係咩

仲有頭先巴打話， 香港對美國價值唔大， 應該幾難成事

雖然我都好想

Sorry誤導咗 ig係私人acc嚟 但ig story內容同fb係一模一樣

真正幫到香港嘅係美國，唔係英國，同埋任何向英方求援嘅行為都係依賴他者，咁樣永遠都唔會獨立得到。呢個世界要嘅，係獨立國家之間嘅互相合作，而唔係無意自立嘅負累國家，香港人戒除順從，檢討過分包容他人嘅傾向一定要改——記住只有表現出自我自信，保持獨立，至會重新擁有國際地位。
同美國合作，必有陣痛，要關係突飛猛進，必須具備意志，領受挑戰。要向美國靠攏，必須證明自己有意依附，呢個過程稍為痛苦，但我地回顧歷史，就會知道日本韓國同台灣都同樣經歷過，掙扎過。昭和帝國發動戰爭，最終戰敗，於是接受美國管治，然後雙方關係變得緊密；韓國對抗共產北韓，多任總統明顯親美，從屬於美國，然後成為亞洲強國；中華民國敗走台灣，親美反蘇，要對抗對岸中國，必須順應秩序，以美國為馬首。如今美國中國敵對，香港為求經濟利益而忽略道義，美國冷待，係源於香港自取其辱，自絕於世，香港人完全冇資格諉過於人。美國中國兩國鬥爭不息，源於中國拒絕美國主導嘅世界秩序，而香港可以做嘅，就係了解美國嘅直接作風，以勇氣同誠意敲開求助之門。

以下文章補充：
檢討香港民族性
https://gnimmm.com/2019/06/13/hknationalcharacter/

追post mode on

最近都覺得好嬲又覺得好灰 今次社運已經進行左兩個月，無論發生咩事政府都係唔回應市民訴求，有哂證據證明警察濫權執法偏頗都係冇用 除左繼續遊行做好文宣工作，香港人仲可以做啲咩去改變依家呢個局面？

真正幫到香港嘅係美國，唔係英國，同埋任何向英方求援嘅行為都係依賴他者，咁樣永遠都唔會獨立得到。呢個世界要嘅，係獨立國家之間嘅互相合作，而唔係無意自立嘅負累國家，香港人要戒除順從，檢討過分包容他人一定要改——記住只有表現出自我自信，保持獨立，至會重新擁有國際地位。
同美國合作，必有陣痛，要關係突飛猛進，必須具備意志，領受挑戰。要向美國靠攏，必須證明自己有意依附，呢個過程稍為痛苦，但我地回顧歷史，就會知道日本韓國同台灣都同樣經歷過，掙扎過。昭和帝國發動戰爭，最終戰敗，於是接受美國管治，然後雙方關係變得緊密；韓國對抗共產北韓，多任總統明顯親美，從屬於美國，然後成為亞洲強國；中華民國敗走台灣，親美反蘇，要對抗對岸中國，必須順應秩序，以美國為馬首。如今美國中國敵對，香港為求經濟利益而忽略道義，美國冷待，係源於香港自取其辱，自絕於世，香港人完全冇資格諉過於人。美國中國兩國鬥爭不息，源於中國拒絕美國主導嘅世界秩序，而香港可以做嘅，就係了解美國嘅直接作風，以勇氣同誠意敲開求助之門。

唔怪得國師都叫人舉美國旗

今朝寫落嘅，稍長，覺得灰可以睇一睇。

鷹派鴿派同樣重要——守過前線毋須驕傲，意見有用萬勿自滿

戰爭打咗一個月就提及敗象，一定會有好多人覺得有人投降主義發作，但眼見抗爭常態已經受信條主義所限，我希望我可以負責隨時檢討呢個部分，盡量瞻前顧後，提出有益觀察。互相鼓勵好容易，盲目輸出正能量亦好容易，因為失敗二字，大多數人都唔會想聽。然而，當批評已經成為禁忌，信任群眾成為黃金律，或者我地都係時候思考，運動有冇可能走向衰落，而群眾之中嘅每個個體係咪都已經做到問心無愧。自發群眾運動本質係好，但前提係每個個體要有力支撐起群體，而唔係連基本嘅自覺都未有，就以群體之名，掩飾個體能力不足，長此落去，抗爭係好容易不了了之，最終瓦解。

自覺，係源於對自己永遠不滿，每日三省吾身，然後搵出自己真正強項，以及將自己弱項交付畀更擅長嘅同路人。每個個體都應當要有呢種自覺，至會有可能聆聽他人意見，及早發現狀況，而培養自覺嘅具體方法，就係每講一句說話之前，都唔好覺得自己已經做得夠好，好過舊嘅模式。

當初拆大台，係拆走秩序，拆走大台所代表嘅概念，因為過去嘅大台漠視民意，群眾不停畀人騎劫。而家大台已經解構，唔再有人揸咪主事，但解構之後，新嘅資訊統合模式又係咪已經得以建構？假如大台消失，行動同理念仍然係無法互通，咁真正嘅問題其實就從來唔在於拆唔拆大台，而係在於個體夠唔夠自覺同努力。

就好似呢個連登post，當中提到前線都係有勇有謀而且理性感性並重，已經係極之缺乏自覺嘅表現。有勇有謀呢個成語，係唔容易達到嘅境界，大家到底知唔知道勇氣同謀略，理性同感性嘅定義？文中提到，向旁人解釋玻璃可以衝就係「理性兼感性結合嘅好例子」，試問其中係點樣運用感性？而要解釋爆破玻璃又要動用幾多理性？既然呢個程度嘅解釋近乎人人做到，咁勇氣同謀略又點樣得以體現？而既然大多數人都可以輕易稱為有勇有謀呢件事本身就係違反常理，咁所謂前線都係智勇雙全嘅比率又可以有幾高？

更加缺乏自覺嘅係，所謂群眾竟然拎最好嘅個體去美化現實，而唔拎最差嘅個體去思考現實，呢種態度本身就非常唔嚴謹，反映群眾嘅成長空間相當淺窄。梁繼平係有學歷，但佢嘅思想行為未必展現得到前線大多數人嘅行動趨向，而相比起高學歷，我喺佢身上見到嘅係，佢努力做佢自己擅長嘅事，就係專心行佢嘅學術路。梁天琦才學一般，但亦有自覺，最重要嘅係由挺身而出之初就已經準備承擔後果，以引起道德感召，佢又係努力做緊自己能力範圍所及嘅事，至會形塑到而家嘅共識。回歸現實，前線之中，有幾多人係有如此自覺？兩人之所以出眾，原因無他，就係勝在努力精進自身，然後再進入群體，而唔係希望從群體之中借力去補充個體嘅不足。

直到而家，大家講黎講去都只係講得出梁繼平同梁天琦，原因正正就係大家都拎唔出信念去成為同梁繼平同梁天琦一樣嘅人。如果大家真係尊重梁繼平，咁抗爭以外，又有冇去睇佢有份寫嘅《香港民族論》？我相信，梁繼平佢自己一定唔會為學者身分而沾沾自喜，而佢之所以值得信賴，亦唔係因為佢係學者專家，而係在於佢嘅行動係反映出佢嘅思考過程。正因為梁繼平優秀之處在於思考，我地從來唔應該要求佢去以身犯險，因為我地應當知道香港少咗一個真正有謀嘅個體，會係群體嘅損失，而佢主張佔領立法會之時，同路人又有冇諗過其實佢係理念先行，而非單單肉身存在？

關心政治絕對係好事，但參與社會運動，理應係考驗個體能力有幾有用嘅機會，而唔係文飾個體無能嘅避難所。梁繼平上過前線，梁天琦上過前線，唔等於你同佢地都一樣，因為守過前線唔應該係連結大家嘅核心價值。以為自己已經做得夠好，以為自己可以同兩人相提並論，呢種不求上進嘅心態，正正就係個體無法成長嘅關鍵，而個體不全，群體亦必然殘缺。話就話係同路人，但大家仍然會擔心前線生亂，又會嫌棄後方懦弱，原因就係大家都對前線冇乜信任。但前線更應該思考嘅係，要贏得同路人嘅信任，方法係不停出post自我陶醉，叫人安心，定係改變心態，謙虛咁以具體行動去自我證明。

從來，社會上嘅分工合作，唔係關乎階級高低，而係在於能力不一。當鷹派話緊同路人係冷氣房軍師之時，又有冇嘗試相信過人地唔企到最前，其實正係一個明知自己智謀更佳而做嘅選擇？如果信任無法建立，個體之間互相質疑，呢個一盤散沙嘅群體又可以行得幾遠？而所謂齊上齊落嘅意義，到底係只限於戰場之上嘅一個都不能少，定係虛心學習，虛心聆聽，令每個個體嘅距離得以縮短，最後達致同步？連自己同梁繼平梁天琦嘅定位都認知錯誤嘅人，又憑乜去妄下定論，預言抗爭必然有成？

群體之所以具有巨大能量，在於個體盡己所能去輸出能量。但當個體加入群體，並唔係為咗供應能量，而係從群體之中領走能量嘅話，群體就會馬上崩潰。中國之所以一直都成為唔到有力群體，就係在於所有中國人都無心戀戰，窮苦有窮苦嘅不問世事，有錢又有有錢嘅全心移民，群體能量一直流失。香港嘅情況比中國好，大多數個體都無意離開香港呢個群體，所以大家至會捱到而家都尚未退縮。但係，真正要留意嘅問題係，當個體依賴群體嘅數量，超過努力鞏固群體嘅數量，兩者比例一但失衡，運動就會陷入危機。而要確保呢場仗打到下年，打到中共投降，我地每個個體都要學識自覺，學識面對自身不足，學識寧願低估自己，都唔好高估自己。

要同其他個體交流意見，的確係攰，的確係較為低效，但要成功，從來都係欲速不達。以前左膠嗰套模式其實絕非無聊，只係佢地從來袒護中共，將所有中共帝國殖民政策扭曲成香港政府施政失當，至會屢屢事敗，講到底，係理念出錯，延伸而成嘅行為至會全部出錯，而香港人呢一刻嘅理念，已經清晰不過，就係捍衛自由，何錯之有？要避免香港唔再倒退至左膠當道嘅抗爭狀態，我地更要思考點至可以改進抗爭模式，而答案就係在於令每個個體都學識自覺。

自覺嘅練習，具體如下。前線如果永遠只同前線溝通，咁就會有盲點，永遠唔發現自己有錯；而後勤如果永遠都只同後勤溝通，咁後勤就一樣受盲點所限，無法準確判斷戰局走向。我地不必質疑前線決策係咪準確，但前線可以抽啲時間，平時趁返工返學通勤期間，睇多幾篇連登以外嘅文章，睇多幾本探討社會科學類嘅書，了解更多有關自由民主嘅基本概念；我地亦不必質疑後勤學識係咪堅實，但後勤理應定期落場，觀察前線士氣同準備，吸收更多只有戰場中人至會理解嘅情緒。當成個運動嘅參與者，都可以主動搵立場同自己相反嘅同路人傾偈，認真聆聽，繼而累積解說運動宗旨能力，同時亦具有一定體力傳遞物資奔走相告，屆時全民有勇有謀，則萬事如意，無往不利，要贏就真係只係時間嘅問題。

而家有好多人都逐漸覺得後勁不繼，甚至覺得自己攬好多責任上身，而其他所謂香港人就隔岸觀火，於是心理不平衡。有呢種感覺其實係好合理，因為每個禮拜都要上戰場係相當高強度嘅心理壓力，就算經過訓練嘅軍人都難免有創傷後遺。不過，大家一定要記得，群體之間係環環相扣，層層相連，如果鷹派據軍功而自滿，然後對所謂傻閪心生怨懟，視鴿派較為平淡嘅抗爭方式就係「少少嘢都驚」，不如自己忠肝義膽，咁往後運動就會趨向危險嘅兩極分化——有人唔想功虧一簣，就會隨時演化到脅持警察，重演日本淺間山莊事件，而有人唔想繼續流血，就會寧願抗爭草草了結，然後盡早遁入日常，重回正軌。要防止事態咁樣發展，由今日開始，每個個體就要開始調整心態，接受同路人係以自己最自在嘅方法繼續抗爭，勇武亦可，溫和亦可，否則場仗係好難打落去。

當個體之間可以達成共識，大家就毋須成日將「不割蓆，不督灰」掛喺口邊，因為行為就會證明心意。接受同路人嘅選擇，係應該由心而發，而唔係因為有外在信條約束而唯有遵守，聽從規則而接受命令，永遠都唔會促成真正嘅互相諒解。「大家都係香港人」，唔可以只停留於口號，而係要身體力行，向彼此交付信心。我地永遠唔知鴿派背後默默吞咗幾多墨水，或者鷹派喺前線流過幾多血汗，而所謂鷹鴿其實都係無法簡單歸類嘅籠統標籤，因此，只有做好自己，嚴己寬人，停止自我膨脹，一個由健康個體建構而成嘅群體至會勝過大台，勝過中共。

抗爭要繼續落去，其實只有八個字係最重要，就係「精進自身，分工合作」。人真係冇高低之分，但自覺不足，就會令個體漸行漸遠，最後令群體能量逐漸流失，化為空殻。如果大家始終堅信運動真係唔需要領袖，咁就請大家交出毋須領袖都可維持政治能量嘅志氣。

陳雲嘅弊病，一係前後矛盾，二係儒毒太深。
佢提出嘅策略，有時係合乎現實，亦非拾人牙慧，但佢對於自由人權嘅理解，非常淺薄，一直玩緊只係帝王之術，如果佢成為意見領袖，社會上充斥盲從之徒，咁香港就好有可能變成極右。以之前同性婚姻議題為例，陳雲成日都話一男一女先係符合陰陽天道，呢啲論調恕我不能苟同，因為我係相信人生而平等，任何人都有權去愛自己想愛嘅人，跟返harm principle唔好傷害他人就得。

你認為呢場運動將來嘅走向會係點？

推

點睇依家中老年人仲覺得可以「建設民主中國」嘅諗法

呢啲非關大勢嘅事答唔準，我只會設想最理想同最惡劣走向，但只要知道中共輕舉妄動出解放軍嘅代價係超級超級大，我地嘅總方向就一定係樂觀嘅。
解放軍唔出得，香港警察就成為唯一鎮壓工具，此之所以，警隊已經進入狂打狂拉階段，但求嚇怕民眾。不過，觀察社運史嘅軌跡，每當當權者行到大舉拘捕呢一步，就即係話佢已經扭盡六壬，望天打卦。大舉拘捕之後，畀人拉入警署打過嘅，會更加不忿，見住警察失控嘅，又會更加不忿，民怨只會升級，唔會降級。只要香港人趁政府變得聰明之前及早達成共識，為對方嘅階段性失敗立下定義，咁就可以立於不敗之地，呢個就係最理想嘅走向。
如果對手先下手為強，我地趕唔切為對方嘅階段性失敗立下定義，咁亡羊補牢嘅做法，就係快啲搵出失敗原因，然後吸取教訓，為下一波抗爭舖路。失敗原因其實我一直都整理緊，本身亦想提出，就係無責任體系泡沫爆破。呢點可以容後再講，畢竟今晚上環打到咁傷，大家都未必有心機消化住。
而最壞嘅方向，就係政府真係用返中共最擅長嘅招數，即係buy time。話就話，大家都知林鄭落台唔等於件事過咗，但到時一定有好多人覺得收貨。而如果政府真係成立調查委員會查警，求其捉一批人祭旗，民氣就真係會散，而呢一波嘅抗爭就係轉弱。我唔憂慮長期抗爭會完，因為中共對香港嘅種族滅絕政策係唔會變，但既然你問呢場運動，我就答返呢場，呢個就係我所能想像嘅最惡劣嘅走向，但其實都唔係真係好差。

我相信大自然法則，呢種思想會自然淘汰，唔使sad face。
民主制度只係自由理念嘅延伸，中國人唔重視個體自由，有民主都只會食返多數人暴政嘅惡果。中國人自始至終，都冇重灌OS，洋務運動思想嘅「中學為體，西學為用」心態從來唔改，就算學幾多民主，其實個OS都係王權專制，亦即係集體先於個人。人永遠都係先於國家，個體永遠都係先於群體，呢個係天理黎，所以中國顛倒天理，約束人性，覆亡只係遲早嘅事，而且完全唔關我事。
無論如何，建設民主中國應該由中國人做，唔係由香港人做。自己個小國都未搞掂，走去理十三億人，呢啲就係做唔到精進自身，亦即係拖累群體成長。記住有自由嘅人，至會有自由嘅群體，有自由嘅群體，至會有需要民主制度去協調資源分配同意見紛爭，呢個順序千古不變架。

仲諗住有得瘋狂follow亭主ig

都係同blog寫嘅一樣架咋屌，只不過多啲內心戲，同有貓仔相咁。