[多圖多字] 一個人的15日秘魯、玻利維亞之旅 (附加東京24小時快閃)

建唔建議去埋Waynapicchu (S/.200) 或者Machupicchu Mountain (S/.200)？

我自己本身想去Waynapicchu，但無曬飛
其實兩個都係再向山上面行，係高d位置俯瞰馬丘比丘
高啲啲始終震撼度係大啲啲、遼闊啲啲

不過就好受制於天氣
如果春天就唔建議，好容易大霧乜都睇唔到

想問樓主係美國轉機係咪都要申請美國Visa?

係啊
總之美國係逢你踏足境内就一定要申請，even唔入境齋轉機都要
而且記得係申請B-1/B-2簽證

多謝你成日支持我d遊記
呢排無咩好寫，但年尾應該會再寫返既
南美呢個都希望呢1,2年可以去到

我等你

進入馬丘比丘

先講少少關於馬丘比丘嘅歷史畀大家知
佢係印加時期已經興建嘅一個古城
但後來印加帝國被滅之後就一直冇人知曉
直至到1911年美國探險家Hiram Bingham意外發現馬丘比丘先至令世界再次去印加帝國感到驚訝

馬丘比丘並唔係佢真正嘅名
因為呢一個古城到而家都仍然係一個謎
印加帝國並冇太多文字記載馬丘比丘，佢嘅真名同歷史都冇人知
正正係因為一個謎，所以每年都吸引無數咁多嘅遊客嚟到呢度朝聖

搭正六點就開門
大家畀入場券職員嘟完之後都急步咁向上行
個個都爭住比較高嘅位置可以望住馬丘比丘日出



我一開始見上面已經好多人
所以就冇行到好高，留係一個都已經可以睇到全景嘅地方



終於親眼見到馬丘比丘
我當下嘅心情係真係好興奮好興奮同埋好興奮
我冇諗過自己可以親身見到馬丘比丘，至少從冇諗過我喺人生都未過完四分一就見到


興奮過後，就係不斷湧上嚟嘅感動
開始覺得今次嚟南美旅行係值得
消除咗一開始對自己嘅懷疑


眼望見呢座古城全部都係由石頭堆砌
當中更加有唔少位係呈弧線
究竟當時嘅人係點樣進行切割呢？
喺山上面起一座古城究竟有幾高難度呢？
真係越睇越覺得神秘


仲未開始日出
我覺得仲有啲時間就放膽繼續行上去



大家都尋找緊一個自己覺得最靚嘅位置等候日出


個太陽漸漸咁樣走出嚟


好快地，太陽就已經照耀成個馬丘比丘



喺遠處望成個馬丘比丘
如果成個馬丘比丘個結構係好特別，但又有一種調理感


而咁啱有個望落應該係日本人想叫我幫佢影相
咁當然，我都奉行日本動漫鋼之鍊金術師嗰套等價交換
叫佢都幫我影幾幅haha

之後我哋傾咗幾句計
知道佢叫Chris，係一個居住左喺美國13年嘅29歲日本人
佢同我一樣 22同23號都會係Uyuni
好彩佢操流利英文，都叫做可以好順利溝通
所以我哋係冇任何承諾底下，相約22號一齊join Uyuni 1 day local tour

我同佢一齊行去Machu Picchu Bridge
途中都有分享下大家個生活環境、今次個旅行plan、點解會有日本走去美國咁遠生活等等
再一次成為推動我放膽講嘢嘅一個機會

跟住指示牌去到Machu Picchu Bridge門口
大家要先喺Counter記錄低自己個名同少量資料先可以再繼續行


遠距離已經見到條橋
窄到得人驚，心諗：點L行呀
但好彩梗係唔畀人行嘅


近距離望，就仲覺得得人驚
個底係磚頭，而個面就係木頭
好似我呢啲畏高嘅應該行唔到兩步就嚇到自己跌落去


之後我哋分道揚鑣
我就繼續周圍行下參觀馬丘比丘，佢就要去爬Machu Picchu Mountain

喺陽光底下嘅馬丘比丘少咗冇陽光照射嗰陣嘅神秘感，但就多咗一份古樸感
而且背後嘅一座大山同古城異常合拍，互相映襯




就算平時幾唔港女都好
望到呢一個景真係冇辦法唔瘋狂自拍
派下福利比大家啦Haha (唔好打我啊)

等左好耐隔離條友都唔移動
一個人用腳架點都係難影d

我後來換上咗件畢業袍，影咗幾幅相
就突然被工作人員制止我唔準著件畢業袍
我冇深究係咩原因，咁佢要我除咪除囉
我估係因為成件畢業袍都係黑色，喺顏色上可能同佢哋嘅文化有抵觸

留名，謝謝樓主分享，好想今年年尾去呀

不如講下Chris做咩去美國生活？

加油啊！！早去早享受Haha
我當初都係下定決心 逼自己去
不過個陣我仲係學生哥就free d, 打工仔就係有難處

Chris係要去美國讀書 所以讀完順便stay美國做野，間公司仲係某著名日系運動品牌
不過屋企人就仲係日本
Chris話自己習慣左美國生活，唔想返日本做野
仲話日本打工仔自殺率太高，唔想成爲其中一份子

特登帶埋畢業袍去旅行

打下卡 呃下like都要嘅
但我淨係着咗一次 嘥曬個喼位

巴打帶相機去？ 啲相幾靚

近睇又做過，遠睇又搞掂
就正式開始行入去呢個古城


望返轉頭就會見到我一開始行嘅位其實係梯田
越頂嘅位置就越多人
但係咁大幅度嘅梯田，真係想像唔到究竟嗰陣時要花幾多時間、人力、物力去整


呢度啲牆身同樣地都係由各種大細嘅石頭堆成
有啲就好工整，但有啲望落就冇咁穩固


不過呢度唔少地方仍然都用上金字塔式建築



馬丘比丘古城有好多點都係有背後嘅用途
我事前其實已經睇過唔少有關嘅資料
去到嗰陣都真係好多唔記得
所以好容易miss咗呢啲重要嘅石頭建築
如果大家去嗰陣想了解多啲，我都好推薦大家喺門口畀錢搵一啲Guide



有超多草泥馬
不過我見冇人行埋去，我自己都唔夠膽


大家會見到好多牆身都會有呢啲長方形嘅凹凸位
其實唔係窗，而係擺放裝飾、供品或其他擺設嘅位置
穿窿嗰啲就真係窗啦


有好多建築都係依山而建
喺嗰陣時夠膽淨係用石頭就起屋起神殿
完全唔擔心會冧低
睇嚟古印加人真係對自己嘅建築技術好有自信


呢度都有啲屋嘅設計喺上面有個蓋，下面就係間屋
即係以前幼稚園畫屋企嗰陣
總係會畫上面一個三角形，下面一個正方形個種




之後我就沿住條路慢慢行返去出口
叫做正式離開馬丘比丘



馬丘比丘帶畀我嘅感覺好強烈
除咗係一個歷史嘅見證之外，仲係一個視覺上嘅震撼
佢唔單止令我個心變得激動
更加係會令人停一停，對周遭嘅環境有一個思考
我諗呢一個正正就係歷史Mix美景帶嚟嘅一個真正感覺
個Feel同我去博物館睇嘢，或者係一個景色好靚嘅地方觀賞係截然不同

不過如果大家要去就真係趁早去
我指嘅唔係時間而係日期
因為由於從前真係太多慕名而嚟嘅旅客，結果不勝負荷
令到呢座山開始慢慢慢慢咁下陷
曾經用被報紙選為十大瀕臨景點第一位

出到去真係要休息下
所以就行上去上面露天cafe飲杯嘢
但呢度飲杯汽水都S/.13…...又再一次肉赤


另外馬丘比丘個出口有個地方可以盦返個馬丘比丘印
見好多鬼佬鬼婆會印喺自己passport度
但我就唔敢喇，唯有攞本筆記簿印上去

係啊 不過係d cheap cheap相機
我部ip6而家影相完全唔得

做咩唔着住 跳天空之鏡?

你估我唔想咩
我本身出發前已經幻想曬
點知最後去天空之鏡唔記得帶袍

so seven

Lm

咁平

留名 南美都好想去

留名

回到熱水鎮

返到熱水鎮
作為豬一般嘅我當然要醫肚先啦
(我早餐都未食...)
咁我呢一日中午就去咗熱水鎮中央市場食好西

去中央市場食嘢除咗平，更重要就係食到當地嘅食物
唔使捱熱水鎮嗰啲專為遊客而設嘅餐廳

中央市場其實就係熱水鎮馬丘比丘巴士站樓上


直接行上二樓就會見到十幾間舖頭
當中有啲係食飯，有啲係飲嘢


求其揀咗一間
叫左份Trucha Frita S/.8


Trucha Frita其實係炸魚(飯)，秘魯街頭好常見
根據google translate，佢應該係炸鱒魚
但我真係唔肯定係咪度度都用鱒魚
不過至少我呢一個係


個飯上面鋪上一塊炸過嘅魚
然後有幾條薯條...

魚肉非常嫩滑
個魚喺炸之前係有調過味，所以非常好食
而且炸得好香脆
作爲S/.8，真係人間美食
大家嚟秘魯真係一定要試下



食完飯我就周圍行下
呢條溪都算係熱水鎮比較吸睛嘅地方



然後慢慢一路行上去
就會有個地方畀你付費浸溫泉


但作為亞洲人
平時已經可以輕鬆去台灣、日本浸溫泉
所以呢一度個溫泉根本吸引唔到我
而且望到幅相都完全冇感覺

另外喺火車站附近有一個市集
講真都係做遊客生意啫


望住架火車喺你面前經過都幾過癮


之後真係冇嘢做
我11:45am落到熱水鎮
食完個飯，行埋去溫泉入口 都仲係1:00pm
我最後迫於無奈 買支汽水坐喺張櫈度不斷等時間嘅流失


我本身班火車係買咗四點
但我真係忍無可忍，走咗去office問可唔可以改早一班
點知又得喎
結果就好好彩改到去兩點幾走人
所以我可以話畀大家熱水鎮真係完全冇嘢做
超級無敵悶嘅一個小鎮

由於臨時改嘅班次，我個位自然就無咁靚
仲要係倒頭車

返到Ollantaytambo
第一時間就係搵車返去Cusco

如果你哋喺Inca Rail買埋巴士飛返去Cusco
會有工作人員指示大家點樣行


好似我呢啲自己搭車就要行返上去Office附近
揾下細Van返Cusco S/.10
大概搭1.5Hr


搭車嗰陣影左少少相
之後就已經去咗搵周公


返到Cusco我第一樣想食嘅嘢就係第一日第一餐已經食嘅嘢
Chicken Soup 鷄肉湯麵


唔知大家記唔記得我第一日嚟到Cusco咪唔舒服嘅
話畀大家知，我當時食呢碗麵其實係完全食唔到味
所有嘅感受都係憑第二次食麵而分享

Cusco中央市場比較早就閂門
大概6/7點好多鋪頭都已經打烊


我係間舖最後一個客人
老闆娘好好人免費幫我加麵加湯，而且仲送多我一隻雞髀
令我對當地人又再一次加分
對住我呢個溝通唔到嘅人都肯對我好


中央市場每逢到咗下午、黃金時間都好熱鬧
除咗有好多攤檔
更加會有人喺附近表演



影相嘅moment已經係夜晚大概8點
你可以見到條街仍然好多人，旅客都唔少
相對地真係都比較安全


街頭會有好多燒烤店
聞到陣味都想食
而且尤其以烤牛心小販車居多


可能係因為呢度海拔高
個月亮感覺上我好接近，好似可以唾手可得



之後佢啲小型超市買咗啲水同埋雪碧
果然，雪碧啲汽都係多啲



溫馨提示
另外有時d鋪頭賣野飲，擺雪櫃同冇擺雪櫃個價錢可能會有唔同

返到酒店就輪到宵夜時間
喺中央市場買咗兩個麒麟果
我其實一望就知係厄瓜多爾嘅品種 (即係渣d)
我諗住既然喺附近應該都唔貴嘅，會好似香港買大陸蘋果咁平
點知原來兩個都要S/.10


第二日要4:00am起身
所以呢一晚要早啲瞓