[多圖多字] 一個人的15日秘魯、玻利維亞之旅 (附加東京24小時快閃)

大概去到四點左右就係旅程最後一個景點
亦係成個one day tour嘅核心 - 天空之鏡

天空之鏡其實係鹽湖上面的水透過反射，好似塊鏡咁將天空嘅影像反映出嚟
形成嘅條件有兩個，兩者缺一不可
1. 一層適中厚度湖水 - 即係事前要落過雨
2. 天氣好，冇乜風
假如天氣大風、冇落過雨、太大雨都唔會見到塊鏡

世界上嘅天空之鏡並唔係單單玻利維亞獨有
喺日本、馬來西亞、澳洲等地方都有
但玻利維亞嘅天空之鏡就絕對係最出名、最令人嚮往嘅一個，尤其係亞洲人
可能係覺得南美對於亞洲黎講好遠、好神秘
要踏上有層水喺上面嘅鹽湖，就梗係要著對防水鞋
呢啲鞋個團會包，所以大家無需自行準備


大家見到呢啲白色一舊舊、一塊塊啲水晶狀其實就係鹽

因為開始入冬，天氣都經常掛起大風
所以水面係好多波浪
咁唔平靜嘅水面就梗係冇辦法形成大鏡嗎
所以當刻我都幾失望



但我真係好唔甘心
一個人企喺鹽湖上面，被刺骨嘅寒風吹住
奢望會有停風嘅一刻
等咗幾個字終於畀我捕捉到風開始減弱嘅period


雖然其實個風勢都好強
但起碼叫做見到一塊好模糊嘅鏡




上面啲圖都起碼見到一個打散咗嘅太陽同尚算清晰嘅雲朵
天空嘅藍又令到鹽湖嘅湖水變咗天藍色

但可惡嘅係每次當我叫人幫我影嗰陣
都會突然間好大風！！！！

其實好失望，或者係因為自己個期望好大
我曾經無數次幻想可以見到一個好驚艷嘅畫面
亦都幻想過自己會好好彩唔會撞正好大風
但最後都係抱有一絲絲嘅遺憾

天氣真係太凍，其實風真係太大
我哋所有人都即刻上班車取暖
慢慢等日落嘅來臨


我五月中下旬身處鹽湖
當時係下午5點左右，氣溫大概攝氏3-4度
平時喺香港12-13度，我都係一件長袖衫+厚Zipup hoodie
喺1至2度嘅日本都係加多件Pullover hoodie
而我當時嘅衣著係：保暖内衣、 長袖衫、Pullover hoodie、 厚Zipup hoodie
我可以話畀大家聽，我嗰陣已經凍到不斷打冷震
啲風好大，開始穿過啲衫直吹我肌膚

所以大家如果4月中之後黎，一定要帶擋風風褸
我呢個on9仔就係冇諗過啲風大到咁，所以喺香港冇買風褸帶過去
喺玻利維亞，日夜溫差係好大
例如我五月中下旬鹽湖/Uyuni溫差可以係 -5至20度
而我未入夜已經開始覺得好凍，我當時係無法想像我點樣捱落去入夜之後、第二日嘅觀星團
我當時個身淨返兩塊暖貼係未痴，都特登等再夜啲先痴

都係朝九晚六扮工
我都好想好似ching咁搵到個好時機出去闖一闖
聽日繼續睇ching出post

d天氣真係靚到爆
自已去旅行無一次有呢d天氣

push
Charles哥哥好靚仔

終於都開始日落啦
日落嗰陣嘅太陽光照落去啲雲，令雲變成金黃色



有睇過我遊記嘅人可能會記得我係好鍾意睇日落
因為日落帶畀我一種孤寂、平靜同惋惜嘅感覺
反而日出嗰種正能量未必太吸引到我


現場環境真係超大風
完全冇機會捕捉到平靜而金黃藍相夾嘅鏡



但個天空真係好靚
從唔同嘅角度望過去都有唔同嘅景象、顔色


司機又開始叫我哋列隊，要幫我地錄片
佢教咗我5個姿勢，叫我哋逐樣逐樣做，最後再加一個自由動作
而佢就會一邊錄影一邊揸住架車圍住我哋轉
畀大家望下最後個製成品
https://youtu.be/OEydqgfnJlM

呢段片係我成個旅程最難以忘懷片段
雖然我哋未必做得好一致
但當時嘅精神相當亢奮之餘，又唔捨得完結
而且成段片無論係個構思、內容定係場景，我個人而言真係相當滿意
唔知大家睇完段片又有啲乜嘢感受呢

喺臨走之前
居然畀我捕捉到我自己覺得好靚嘅幾個畫面
有一種黑暗籠罩大地，光明漸漸退卻嘅滋味
好似人哋拍科幻片咁



(最尾呢幅係Chris影)

大概七點半左右
大家都拖住冰冷嘅身軀上返車返去Uyuni
我開始期待緊聽日嘅日落+觀星團唔知會係點呢

終於追到live 留名支持 我覺得其他人覺得越白痴越唔知入面既意思 對自己黎講先最特別得自己同當時既人先知既感覺

係呀 就算當朋友笑我個陣，我都仍然對擁有呢段記憶覺得好自豪

D相睇落都唔差丫, 條片好正, 個司機正Wor

估唔到個團除咗交通同講解仲有呢啲嘢幫大家留個紀念，真心正喎。唔知係咪個個團都有呢

係喎，睇落都幾好玩。

今次個司機真係好盡力
最衰唔記得叫咩名

真係唔知其他團有無啊
我附近個d團好似都無

回到Uyuni市區

返到市區都成八點幾
都有唔少餐廳仲開緊門
不過無論旅館職員定旅行社老闆娘都叫我唔好幫襯，話嗰啲舖頭又貴又唔好食
咁所以我就試咗當地啲小食攤

咁我首先就喺巴士總站嗰頭有檔踎街邊買左碗飯 S/.7


佢個底係白飯，然後上面淋上醬煮某動物嘅肉
啲肉好煙韌、有咬口，好似平時食金錢肚咁
而且炆煮一時間應該好耐，醬油超入味
薯仔都煮到好粉


不過白飯就唔係好似我哋亞洲人嗰種綿綿地、黏黏地
而係好鬆散、比較乾、好細粒、冇嗰種米香

我事後將碗飯嘅相俾當地人睇
當地人話番畀我知，呢碗飯上面嘅肉其實係羊駝嘅內臟
亦即係話我第一次食草泥馬嘅經歷就畀咗呢碗飯啦

我就坐喺啲塑膠櫈度同啲當地人一齊食飯
其實個環境真係好污糟、又多塵
但食得就好有feel，感覺自己真係融入咗喺當地
唔係吃喝玩樂，而係真係體驗

呢餐算係數一數二比較污糟
但都好好彩完全乜事都冇

之後我又喺啲小食攤買咗啲Junk food


呢啲小食攤喺Uyuni有好多
基本上就聚集喺鐘樓附近
好似漢堡包、薯條、熱狗、炸嘢呢啲都一應俱全

所以如果大家真係諗唔到食乜，呢啲小食攤真係幫到你
最緊要係真係唔貴
例如煎蛋/漢堡扒/香腸漢堡包都只係 Bs 5，想要兩樣餸亦都係 Bs 8
而且最重要，南美嘅人食薯條真係特別瘋狂，連漢堡包入面都會擺薯條做配菜
所以大家唔會唔飽


不過我自己就無食漢堡包啦
反而叫咗一份雜錦撈 Bs 10
真係乜都有啲，薯條、漢堡扒、煎蛋、香腸全部畀曬你

不過你睇，乜嘢都係用油炸
而且我諗啲油其實都係萬年油
不過唔緊要啦，夠香口就得啦
好過我入去餐廳食Bs 5-60l垃圾


大家睇下份量真係好多
我仲已經叫老闆娘少啲薯條 (當然係靠google translate)
但我蠢咗，應該叫老闆娘多醬！！！

睇見兜嘢都飽
當地人都真係食得幾油膩吓

好似幾正, 我中意食junk food

係啊 秘魯、玻利維亞 飲食都幾唔健康
我咁肥去到當地都覺得自己身材適中

仲有漢堡包 熱狗 薯條比你慢慢食

23/7
《Uyuni市區漫步 + 日落觀星團》

喺Uyuni除咗參加啲團之外就真係冇咩好做
所以呢一日都放自己幾個鐘假
特登係床上趴到10點幾先起身

呢日個日落觀星團係四點鐘先去到旅行社集合
中間六個鐘真係唔知要點Hea
不過好在，我之前已經check過Uyuni每逢星期四、日都會有市集
所以我就用呢個選擇作為我消磨時間嘅工具


個市集真係好大型，吸引好多當地嘅人去買嘢


乜都有得買，小型電器、個人用品、家庭用品、蔬果、家禽、熟食都有
當然呢啲嘢對遊客黎講冇吸引力
但我覺得成個氣氛、氛圍都好熱鬧、好開心





本身想買啲生果食
但醒起深夜就要離開Uyuni，所以放棄左

買咗杯蔗汁飲 Bs 4
新鮮榨出嚟，同平時香港街邊嗰啲一樣
不過唔同嘅係，呢度係會加幾滴檸檬汁落去
我自己就唔係太likey啦


見到呢啲原條烤魚，勁香勁想食


行多兩步見到有烤肉，呢個仲吸引


不過當時唔係太肚餓
所以就最後揀咗個份量少啲嘅嘢食


呢碗飯望落有啲似白飯底 + 肉碎 (Bs 6)
但其實呢啲肉都係一樣來自羊駝(草泥馬)
炆煮得好好，唔會好韌，又夠入味
而且路過嗰陣真係聞到好香肉味


但講真，衛生情況真係唔多好
玻璃肚嘅人千祈唔好食

呢度全部都係橙......究竟當地人有幾鍾意食橙呀????

大概兩點左右 Chris whatsapp我，問我一唔一齊食lunch
諗住如果而家唔食，就要捱餓 餓都夜晚九點先有得食
所以就約定佢兩點半喺旅行社等

我自己再周圍行咗陣
其實真係冇嘢好行



呢個就係個火車站


入面有一間Hostel，訂酒店網都會見到


去到Hakoda， 我哋問肥姐(旅行社職員)附近有咩餐廳可以推介
佢介紹咗我哋去斜對面嘅中國餐廳， 話應該啱我哋食
所以我哋就起程去咗啦

間中國餐廳叫做中華園酒樓，係 Uyuni唯一一間中國餐廳


入到去見到筷子同匙羹，就知一定係亞洲人開


畀大家望下個餐牌 (另外仲有韓文、英文)
其實真係好貴
食個番茄炒蛋飯都要 Bs 50


我就梗係秉持住師奶嘅精神
叫啲最抵食、又難中伏嘅野
我同Chris都叫咗紅燒牛肉麵


我覺得唔係紅燒牛肉麵，有啲掛羊頭賣狗肉嘅感覺
首先牛肉係切粒，而且份量好少
再加上個味道係用花椒、八角、醬油淆過，所以食落係炆牛肉麵
個湯底其實都係充滿花椒、八角味
唔會話佢難食，只係同我哋平時食開嘅台式紅燒牛肉麵係兩回事
反而就係大陸北方麵食嘅感覺

但明明都唔夠兩個禮拜未食過中餐
呢下一食就停唔到，好掛住中餐
尤其面前呢一碗熱辣辣嘅湯麵，真係俘虜咗我嘅心
我喺香港都係出曬名鍾意食湯粉麵

我同老闆都傾咗一段時間計
佢係山東人， 大概十年前嚟到玻利維亞居住
本身打算喺首都La Paz開餐廳
不過佢話嗰邊都有幾間中餐廳，所以有一定競爭
最後就決定黎Uyuni開，反正遊客源源不絕
佢間餐廳最受韓國人歡迎，因為韓國人都係鍾意食飯同麵多過西餐
喺旺季嗰陣佢間餐廳甚至要排隊

我好好奇點解佢會無啦啦黎玻利維亞住，而且廚房嘅廚師都係中國人
我其實追問咗幾次，但佢都係唔肯講
咁我都唯有尊重佢

Chris都有嘗試加入我哋嘅對話當中
佢比起我更加好奇點解會嚟玻利維亞住
不過傾咗一陣，佢覺得我充當兩者嘅翻譯辛苦曬，所以都交返畀我主力傾計，我再summarize返比Chris聽

雖然個價位唔低
但我覺得嘢食係正常，而且仲有菊花水飲
而且其實周圍嘅餐廳都係呢啲價位

臨走前chris仲問佢夜晚收幾點
當得知個結果係九點半，我哋都決定夜晚嗰餐返嚟再食
因為真係好對我哋胃口

南美之旅有冇柯過阿

有少少啦
不過算係正常範圍内，唔係痛個種

正呀樓主 你寫得好詳盡好有參考價值

夠鐘返到旅行社門口，已經見到我哋嘅團友
我一眼就望出有三個喺香港人，係一齊黎
不過我就冇同佢哋打招呼住，或者始終我都唔係咁外向嘅人
另外同車仲有一對夫婦：男嘅係澳門人，女嘅係台灣人，兩個都可以講廣東話
即係話全車得Chris一個係非同聲同氣Haha

第一站當然都要攞水鞋啦
之後就會搵一個空地畀我哋換咗對鞋先，因為之後一去就已經係有水嘅地方
換鞋嘅地方仲有個阿婆喺度買漢堡包


今日嘅天氣萬里晴空，一啲雲都冇
咁樣唔係好事，因為個倒影有白雲先好睇


更可怕嘅係今日仲大風
你哋望下個水面波浪不絕，我個心情都好似啲水波咁起伏不定


真係想喊出嚟，今日嘅天氣仲差過琴日
我睇個情況應該今日係唔可能睇到一塊鏡，Even係一塊朦朧嘅鏡


咁冇辦法啦
又未日落就唯有自娛一番，畀大家睇下我對腳有幾長


個鹹蛋黃終於都慢慢落嚟啦
但怕凍嘅我坐喺架車入面睇就算


落車望下相反嘅方向，天空嘅顏色依舊好迷人，有一種迷幻嘅感覺


當太陽完全落下， 鬱沉嘅藍色開始籠罩大地

多謝支持啊！
希望d資料幫到大家啦