[多圖多字] 一個人的15日秘魯、玻利維亞之旅 (附加東京24小時快閃)

AEON Lake Town 購物中心 & Outlet

我每年去幾次日本都總會抽少少時間shopping
尤其我呢啲窮L就成日去買啲特價嘢
如果可以喺同一個場買曬我想要嘅嘢就可以慳番好多時間啦

我要為大家介紹一個真係好好行、鋪頭多、少遊客嘅大商場
呢個商場我唔係第一次嚟，但真係諗咗幾諗先捨得介紹畀大家
就係位於越谷市嘅 AEON Lake Town

AEON Lake Town由三個部分組成
AEON Lake Town Kaze
AEON Lake Town Mori
AEON Lake Town Outlet


成個AEON Lake Town佔地高達22萬4,000㎡
超過700間商鋪，喺度行一日都完全冇問題
而且商場隔離有個好大嘅河畔，血拼完就可以去休息下

AEON Lake Town Kaze、 AEON Lake Town Mori有非常多嘅歐美品牌、日系潮流服飾
平價同中等價位嘅選擇都非常多
好似GU、Banana Republic、Muji…...仲有好多年輕人品牌
另外鞋舖、超級市場、傢俬鋪都有
完完全全係一個購物王國



Kaze個感覺比較有活力d，商場個格局外觀都係光猛少少



而Mori就感覺相對高貴少少，而且行得舒服d



大家完全唔使擔心冇嘢食
因為呢度兩個商場加埋分分鐘有超過60間食肆
快餐、日本嘢、甜品、西餐真係任君選擇



AEON Lake Town Outlet比起關東大部分outlet規模就唔算好大
大概同酒酒井差唔多
係outlet常見嘅品牌都有齊曬，Nike、NB、 Guess……


其實行就真係幾好行
始終遊客唔多，基本上九成都係本地人
而且好多貨品碼數都好齊全



我自己就好鍾意呢一個購物商場
距離東京又唔算遠、又唔多遊客、貨品價格都比較親民
所以我都好推介唔係買開好高檔牌子、而又唔想同人逼嘅大家去呢度行街
我之前帶媽媽黎呢度行，真係行到天昏地暗，媽媽完全唔想走

至於要點樣去呢個商場
暫時最方便嘅方法就係搭 JR武藏野線 去到 越谷レイクタウン駅


一出閘就已經會見到商場嘅出口
所以落雨都唔洗驚

睇到你個post
回憶返哂黎
永遠都唔會忘記係鹽湖上見到既銀河
成個星空倒影左係水到
好似上左太空咁
呢世應該唔會見到比呢個更靚既星空

係秘魯你唔去窮區同小巷基本上好安全，就算遇到賊都唔會傷人命，自動自覺攞百幾sol打發佢地走就得
佢地太窮姐，唔壞

嘩！！！！！好靚
星空倒影左係水到，真係好夢幻
好葡萄

其實我去個時無乜時間走盞
真係得個一日可以去睇星
真係好好彩
一落車見到呢個景，真係震撼到毛管棟

推

頂...未食lunch就見到你d圖 打曬鼓啦

Maido相對地技巧方面好d，加上食物擺盤、配搭係好細緻
Astrid y Gaston就真係正常水準高嘅西餐廳only

明白，總之一切小心

想問巴打係申請 B1/B2 定 C1

如果你係指美國簽證
我係申請B1/B2，因爲將來都可以繼續用

好可憐既小驢仔

まんてん鮨

晚餐我揀咗一間評價都幾高嘅壽司店 まんてん鮨

まんてん鮨 喺東京有兩間分店 - 丸之内(東京站)、日本橋
我今次食呢一間就係丸之內店


まんてん鮨 提供午市同晚市 Omakase 6000Yen (未連稅)
而星期一至五午市更加提供特價Omakase 3000Yen

我就建議大家事前book定先，座位比較少


餐廳格局比較簡單
大概有12個Bar枱位，8個餐桌位
Bar枱位有3位師傅平均招待
我個位師傅識少少英文，偶然都會嘗試用英文介紹壽司係咩魚


まんてん鮨 係一間江戶前壽司
而且食嘅時候會一件一件慢慢呈上，所以要預啲時間 (大概1.5hr)

咁我開始順序咁逐樣逐樣介紹啦

蜆湯
呢杯仔蜆湯係用北海道嘅蜆肉淆製而成
佢個目的係想你暖一暖個胃，順便感受下海洋嗰種嘅鹹味
蜆肉味好濃，不過對我嚟講有啲腥


金目鯛
不過好淋，咬落去好舒服


中華沙律
好滑潺潺，好似鼻涕
而且調味上加左醋，超級開胃


墨魚刺身
已經cut好曬d紋，亦都用左少少鹽調味，完全唔需要蘸任何醬料
口感係咬落去頭幾下好爽，之後就會變淋
就算加左鹽，都掩蓋唔到舊刺身本身鮮甜味



蟹肉沙律
加左少少柚子醋當係沙律汁，好開胃
而且蟹肉都比較甜


鰹魚刺身
做法同我當年係高知有少少相似，都係輕輕烤下個外皮
由於呢個係用火槍去烤，所以無煙熏味，肉質鮮嫩
接受程度比起高知明神丸高，容易入口


清酒茶碗蒸
好濃清酒味，我無食到 (小弟唔飲酒)
上面有少少柚子皮，但酒味真係好濃


真鯛壽司
有咬口，有少少筋，但都算鮮甜
慢慢細嚼，會有少少甘甜味，非常出色


鯵魚壽司
肉質比較結實，魚味都比較重
如果你平時係追求開入口好綿滑，呢個應該唔適合你


超迷你三文魚子丼
與其話係丼，不如話係轉左用碗仔作爲表達方式
三文魚子稍稍腌過，夠咸香，亦都爆汁
但咀嚼過程中又會品嘗到甜味


馬糞海膽、紫海膽
兩款海膽都係來自日本！
而且真係好甜好綿！！！！！！！
師傅會叫你伸大手扳，將海膽壽司擺係你手上面



清蒸鮑魚
鮑魚本身好甜，口感都好爽，尤其最中間部分都又嫩又甜
上面有少少青檸皮屑同鮑魚鮮甜味好夾


牡丹蝦壽司
蝦肉好綿滑、又鮮甜
不過我個人本身對生蝦壽司一般，中意食爽少少


赤身
魚味濃、無筋
赤身本身肌苷酸都比較多，所以會自帶好輕微酸味，所以蘸下豉油就最適合不過


中托羅
肥美程度可以再高少少，而家油脂感覺低左少少
我好鍾意食中拖羅，因爲可以保持咬口同有魚味之餘，又有一定油脂滿足到自己欲望


清蒸蠔
有咸香味、而且蠔肉仲係好爽嫩


燒粟米
粟米真係好甜好甜
但分量似乎細左d wo


吞拿魚腩蓉手卷
出面塊紫菜先正，咬落去仲係"索索聲"
吞拿魚蓉相對油脂更重更香
而且加左洋葱帶有少少辣味，係好新奇感覺，同蘸wasabi唔同


蜆仔味增湯
我以前都成日講我係好抗拒味增湯加蜆
因爲真係覺得好腥，呢碗都一樣有少少腥
而且蜆仔真係食唔到，好麻煩


玉子
真係我最愛，甜度好適中
咬落去仲有少少汁


牛蒡手卷
牛蒡爽脆，本身都係腌製過
紫菜都係咬落去仲係"索索聲"


燈籠果
好夠冰凍！不過呢粒有少少酸


總括而言，我覺得食物質素都係頗高，數量更加達23樣
完全對得住呢個價錢
而且好多野都好仔細，無論係呈現方式定食物調味上都好準確
手握過程中其實好多時都已經幫大家調好味，例如壽司飯已經落左醬油、魚生放置少量Wasabi

當然，係東京亦都有更高質素壽司店
但中等價位黎講，我認爲まんてん鮨絕對係唔錯嘅選擇

終於追晒 睇左一個星期