[多圖多字] 一個人的15日秘魯、玻利維亞之旅 (附加東京24小時快閃)

22/5
《往鹽湖進發！》

7點起身，梳洗好7點半
就即刻去旅行社



旅行社一般7點半已經開門
我第一個目標就係Hodaka


佢有幾款團可以選擇


其實我本身心水係參加一日團、 日出團同星空團
但因為日出團得好少人，所以老闆娘唔建議我報
老闆娘話呢排滿月，對睇星空有影響
所以我就報咗一日團+日落(22/5) ，同埋日落+星空(23/5)

兩個團Total收左我310 Bs
其實起初收我340 Bs
然後我都係狂講價先肯discount比我
當然如果你越多人或者報越多團，個bargaining power就越大啦

就咁睇個價錢，隔離Brisa平少少
但因為我同呢個女職員(肥婆)真係幾好吹水
同埋Hodaka喺網上面比較多中文嘅評價
加上我當初喺馬丘比丘上同個美籍日裔新朋友Chris約定左呢間
(係咪好傻呢)
所以我最後揀咗佢

其實我都有周圍格下價
1 Day Tour + Sunset : 150 - 200 Bs
Starlight + sunrise/sunset : 120 - 150 Bs
大概係呢啲價位

當然價錢會隨著你嘅講價功力而有所改變

睇黎樓主講解能力好強
網上好多都話Hodaka個價企得好硬
雖然有好評價但都有麻麻評價
繼續留名學野先

發覺樓主真係好詳細,
岩岩睇返我買Perurail回程cusco原來係poray 既站
不過perurail好似冇得自己選位, 我買完佢直接劃左個位俾我嚕

Re #327
我覺得司機(即係個導遊)好重要
其實每一間旅行社都係，最緊要係導遊要夠主動、積極、願意幫你拍片

而火車呢方面你就要諗下啦
Poray門口我打聽過就唔多呢d共乘車，有都要同當地人share，所以的士係最多旅客選擇
當然你其實都可以係Ollan落車都得
你到時再諗下啦

報完就返去旅館食早餐

旅館早餐都係冇乜嘢食
任你食嘅麵包、生果同埋每人一份炒蛋



Uyuni上晝想食早餐
可以去呢啲帳篷下面啲攤檔
我見有湯、飯、麵包


旅行社叫我10:15就要返到佢門口集合
咁就當然唔可以遲到啦
而且仲畀我見到Chris！

我都即刻同佢噓寒問暖一番
佢話係個日8點幾到Uyuni，佢La Paz去Uyuni架飛機冇delay
喺門口見到張人名表有我個名嗰陣都即刻報咗名
都好開心起碼有個識得嘅人可以同一團

等齊其他團友大家就上呢啲八人車
除咗我同chris，其他團友係1個德國姐姐、1個英國姐姐、1個日本男人、1個韓國Oppa


第一站係要去攞水鞋
因為黃昏嗰陣我哋會去睇天空之鏡
要著水鞋先踩到水氹
(韓國Oppa唔小心入咗鏡)


喺架車上面，大家都唔係好認識對方
所以自我介紹完個名之後就變返勁安靜

《火車墳場 Cementerio de Trenes》

呢個一日團第一個景點就係火車遺跡 Cementerio de Trenes

喺19世紀末，Uyuni當時開通咗用嚟採礦嘅鐵路
不過去到20世紀中期就因為採礦業式微，令到好多火車開始荒廢
好多唔用嘅、舊咗嘅火車都被人棄置咗喺呢度
因此後來啲人叫佢做火車墳場



係呢個荒涼之地，生曬銹嘅火車就更加顯得孤獨
現代嘅人類反而將佢哋當作藝術品咁看待




亦都有啲旅客會係上面大肆塗鴉
都叫做幫佢加咗啲朝氣



遊客會企喺唔同嘅地方影相
甚至會企上火車頂



雖然有條路軌
但已經荒廢咗


呢個景點其實冇乜特別
不過就係一日團同埋三日團嘅必經之地
而且一日團全日嘅行程其實就係三日團嘅第一日，一模一樣

有個小題外話
韓國Oppa唔知點解成程都唔出聲
大家見到咁都廢事撩佢講嘢

《市集、鹽工廠》

去到第二站，領隊會帶我哋去到一個市集


呢度有好多賣手信嘅舖頭
不過都係大同小異，又係披肩、毛氈、冷帽呢啲
價錢都係合理嘅


然後會帶我哋入房仔
去睇下人哋係點樣整鹽


啲鹽堆到成座山咁高
但講真，真係乾淨咩？？？？


另外仲有啲位畀你自己買一包包嘅鹽
佢有好多唔同嘅味道，每隻味道一隻顏色
不過我聽人講，如果日子好潮濕就千祈唔好買


成間屋嘅裝飾都係用鹽嚟做
都幾犀利

《抵達鹽湖》

由市集開車去到鹽湖好快
轉下眼開始見到唔少白色嘅area


不過落車個陣
見到地下啡啡地、黃黃地，都幾污糟
同我想像嘅鹽湖有好大出入


不過當時導遊已經有講呢度只係邊界
真正雪白嘅地方會另外再去
所以先安心少少

呢度有幾個水氹好特別
啲水會不斷湧上嚟



導遊同我哋講呢啲水有好強藥用價值
可以醫治好多唔同嘅疾病
但當然我哋都半信半疑啦

喺呢度短暫會停留15分鐘
所以都喺度求其影幾幅相
呢個時候就考驗幫你影相嘅人嘅功力啦


學人咁樣跳住嚟影


幅相係個韓仔幫我影
而我都藉此同佢打開話題
原來佢係因為英文講得唔好，所以一直唔敢出聲
事實上係溝通嘅過程當中都聽得出嘅英文水平唔高，好多時都表達唔到
不過唔緊要呢個世界有樣嘢叫手語同埋google translate!!!

我都亂咁嚟，用以前係running man學嘅幾句韓文撩佢講多啲

個火車墳場好似早排有香港人跌死咗

唔係啊嘛
真係要小心d

之後正式進入鹽湖

架吉普車係某個位置停低
導遊同我哋講會喺附近棟建築物食飯
話我哋有15分鐘時間喺附近影下相，15分鐘後就入去食飯

呢座建築物喺鹽湖嘅入口地標
而且成座都係用鹽做成


有啲團甚至可以喺鹽湖上面踩單車
好想踩啊！！！
自從當年學完去四國之後就再無用武之地


呢度嘅鹽真係白雪雪呀


太陽真係好曬
而且地下感覺好似不斷反光咁
所以太陽眼鏡一定唔可以少，亦都一定要搽防曬


喺食飯隔離有個位置插滿曬國旗


當然入面仲有我哋嘅區旗 (係打文呢一刻我真係唔想稱之爲我哋嘅)
大家記得黎影幅相呀


影完支區旗就行入去建築物入面開餐

呢個食飯地方所有枱同凳都係用鹽嚟造


當然唔會叫你直接坐上鹽凳啦
上面一定會舖塊墊


每枱嘅午餐可能會有唔同
視乎都導遊係搵邊一間供應商

一打開蓋大家都急不及待開始攞嘢食
團友都好友善，會互相幫大家夾野
當中有肉扒、煎蛋、沙律、白飯、焗薯等，味道都ok


喺午餐嘅過程中，我哋7個都開始互相交談
當然都少不免一啲自我介紹
另外都有互相介紹下自己來自嘅國家或者城市，有咩特色之類
氣氛非常之好


而且我哋都分享到自己國家/城市面臨緊咩嘅問題
我分享咗香港嘅樓價好高，實用面積300呎，九龍區都可能賣緊6百萬或以上
好多地方呎價都超過萬五港幣
英國同德國姐姐聽到嗰陣都超驚訝， 講咗幾次難以想像

而且佢哋其實對香港都好好奇
係咁追問我點解香港係獨立出嚟，可以用“中國香港”呢個名義喺國際間行走
雖然其實佢哋查wiki都可以得出答案，但我都不厭其煩詳細咁解釋一次
好彩小學常識學過嘅嘢仲未忘記啫

另外兩位日本代表都分享好多日本當地嘅文化
咁鍾意日本嘅我當然都同佢哋傾得好投契，分享咗好多我之前去日本嘅相

韓國Oppa就比較辛苦啲啦
因為佢英文唔靈光，所以好多時都係用單字去表達，然後我再嘗試幫佢補充
有時兩個鬼妹問佢問題，佢都會用小狗般嘅眼神向我求救

咁啱在場人士竟然冇一個去過香港
我作為香港嘅代表就梗係要推廣下我哋呢一個領土
我介紹咗南丫島、長洲、好多香港嘅特色美食畀佢哋聽

成餐飯大家相處得好融洽
講講下就已經夠鐘要起行
所以我哋將傾計嘅地點由食飯枱轉移去到車上

真係好佩服啲司機認路真係好犀利
望見白濛濛一片都可以認得路
如果畀著係我，應該唔知要兜幾多個鐘先搵到出路

好期待天空之鏡的畫面。

我已經準備好去到同世界各地嘅人講解呢兩個月香港發生嘅事。

又係喎，唔講唔覺，佢哋點認路

希望越大 失望越大啊

《仙人掌島(Isla Incahuasi)》

下一個景點叫仙人掌島(Isla Incahuasi)
喺鹽湖上面突然有個小島種滿仙人掌


導遊同我哋講呢度啲仙人掌生到一米後，個生長速度就會減慢
不過我眼見呢度啲仙人掌絕大部分都高過我


仙人掌島(Isla Incahuasi)入場費係Bs30
一般團費都唔包，係自願性入場
如果你唔入去就可以喺休息地方抖下行下


另外提提，呢度係有廁所
記得一定要去
因為今次唔去，下一次見到有廁所嘅時間就已經係你返到Uyuni市區
喺仙人掌島大概2pm，而返到 Uyuni市區係7pm


成團所有人都冇一個入場睇呢個仙人掌島
大家都覺得要畀成Bs30入去睇仙人掌唔值得
所以我哋都係周圍行下就算


望來望去都係仙人掌
講真，真係吸引唔到我


反而望住身後嗰片雪白地下連接粉藍色天空
更加令我著迷


其實都唔少人選擇唔想去仙人掌島
大家都坐低休息

我就百無聊賴用架車做下我啲相嘅主角


導遊會喺呢一度大概停30至45分鐘
所以漫無目的咁等真係有啲悶

呢個真，代價好大，而且未必睇到。
要等佢落雨，表面有薄薄一層水先可以反射到，落太大又要等佢蒸發剩一層，太細又唔夠。
而且係果邊冇得沖涼，腌足幾日，只可以用沖涼粉捽身

想像下個頭癢足幾日

就咁睇你都好似入左個島到咁既

因爲個入場門口係唔係最底啊

完成咗呢個景點就會去到鹽湖嘅另一處
當然周圍都係白雪雪一片，我完全唔知自己身處何方


導遊叫曬我哋落車，話要開始幫我哋影寫真
然後問我哋借咗部手機
係咁教我哋要企喺邊度、擺咩post
而佢就勞苦功高趴喺地下幫我哋影相


辛苦曬！

畀大家望下影咗啲咩相啦


最前嗰個係我，係咪好入戲呢


另外導遊仲準備咗少少道具，薯片罐同恐龍公仔等
然後又開始影下一輯相




其實出發前嘅我一直覺得影呢啲相好似好低b
同好多人一樣都覺得好on99
但當我親歷其境、又係親身參與
成個感覺就即刻好唔同
我變得係好投入去參與，每幅相我自己都係掛住笑容
而其他幾位都係一樣玩嗰陣笑容好燦爛

返到嚟香港畀啲朋友睇我影咗呢啲相
佢哋第一個反應都係覺得好白痴
但我但笑不語
因為我明白冇親身經歷過嘅人係唔會明白當中嘅樂趣

當然以上只係部分相，仲有好多喺我部電腦度
但我覺得已經足夠精彩
https://youtu.be/mD5MZEyQCAg

啲相好得意

好搞笑喎點會白痴睇落好好玩

真係好好玩
而且導遊狂逼我地擺鋪士
我地全部人一路影一路超開心笑

D相影得好好一個人出去闖真係好正
btw intern仔日日扮工追你post

多謝支持啊
ching返工返成點呢，記得趁後生接觸多d
到你畢業先有出路，唔好好似哥哥我咁