[多圖多字] 一個人的15日秘魯、玻利維亞之旅 (附加東京24小時快閃)

我一路打字，個腦都不斷回想起個旅程
真係好難忘，連圖都唔望都打到

你真係歷盡千辛萬苦呢d經歷唔會忘記啦

無高原反應真係謝天謝地！！！！

Ollantaytambo

Ollantaytambo本身係一個小鎮
但佢亦都擁有印加嘅遺跡
再加上佢係一個前往馬丘比丘嘅中途站
所以好多人都會選擇到此一遊

個團大概兩點過啲就到咗Ollantaytambo
遺蹟門口係一個小市集
售賣嘅係各式各樣所謂手信


然後拎住bt pass就正式入場

雖然Ollantaytambo並唔係位處非常高海拔
不過都接近2800米
加上佢都幾多樓梯要行
所以行到我都喘曬氣


導遊話Ollantaytambo呢一個印加遺跡從前嘅地位非常之高
從好多石頭堆砌就可以睇得出
呢一度嘅石頭堆砌得非常公整
從前嘅印加人越重視嘅地方，石塊堆砌就會越整齊
越重視嘅地方通常都可能係用作祭祀同埋皇族住宿嘅地方


行到上去， 喘氣喘到不得了
好似中學做完體適能咁
但望返落去風景就好靚呀




導遊向我哋介紹有一幅石牆


佢話呢塊石牆嘅石頭並唔係屬於一個山頭
係從前印加人利用佢哋嘅智慧同技術由另一個山頭搬過嚟
一開始車上面淨係識英文嗰兩個人就不斷追問佢哋係用咩技術可以咁樣搵過嚟、點解要咁樣做等問題
導遊一開始都係咁不斷吹噓古印加人幾犀利
但後來都開始畀佢哋問到口啞啞
我心諗佢咁講你哋咪信囉，呢啲都係流傳落嚟嘅說話嘅啫

不過導遊有提及過佢哋係用人力追咁大嘅石頭運上山
我聽到呢一度真係好疑惑
用蠻力去做嘢，呢啲都叫智慧咩
埃及人識得用木製滾軸去運送，呢啲唔係先係叫智慧咩

導遊仲特登指畀我哋睇話對面座山有個位好似有個人頭咁
我望咗成分鐘都搵唔到
最後先見到一個類似嘅物體
唔知大家覺得似唔似，我就覺得似個馬騮頭多啲



由於我係呢一度就會自行離開
咁我都有事先同導遊講聲
而且佢成個行程都講解得非常之好
所以一向出名孤寒嘅我都畀咗少少Tips

基本上成個Ollantaytambo都係靠旅遊業維生
行返出去市區周圍嘅舖頭都係會有英文字
價錢都係正常旅客價


既然冇咩好行，咁我就慢慢行落去車站等搭火車前往熱水鎮


就快行到落火車站
就會見到Peru Rail office喺左手邊，Inca Rail office係前面少少位置

本身初步睇資料煩到無乜心機plan，但睇到樓主個post重燃番熱情，繼續推下post先。

唔好無心機啊！慢慢睇下資料啦，一次過睇太多會塞唔入腦

前往熱水鎮 Aguas Calientes

要去熱水鎮有多個唔同方法
鐵路： Peru Rail / Inca Rail
巴士+步行：Cusco搭巴士前往水電廠(Hidroelétrica)，然後沿著鐵路軌慢慢行，入黑前就可以去到
步行：參加Inca Trail Tour，用四日三夜體驗下幾百年前印加人行去馬丘比丘嘅印加古道

方法各異，而且特色都唔同
大家可以自己細心選擇

我冇咁多時間，所以就揀搭鐵路

Peru Rail同Inca Rail係兩間有營運來回熱水鎮同Cusco/Ollantaytambo嘅鐵路公司
前者係國營，後者係私人企業
價錢上面兩間鐵路唔同班次都係唔同價
而且就好似買廉航咁，唔同時候買都可能唔同價錢
不過Peru Rail班次就多好多

兩間鐵路公司嘅火車都有分級數
Peru Rail: Expedition(貴) ; Vistadome(好貴)
Inca Rail: The Voyager (貴) ; The 360° (好貴) ; The First Class (窮人走開啦)
普遍情況下(貴)就一定平過(好貴)
不過偶然做特價嗰陣兩者個價錢都可以好接近
而且旺季5-10月真係好旺，所以要提早買飛


我自己今次來回都係搭咗Inca Rail - The Voyager
Total Usd 138
我買飛嗰陣都已經比較遲，所以都唔夠膽格太多日價
個陣對比Inca Rail平少少，所以就揀咗佢
而且質素上面，從網上好多資料睇兩者都係不相伯仲

如果搭Peru Rail去熱水鎮， 或者從熱水鎮返出去
會有兩個站畀大家揀，Ollantaytambo / Poray Cusco
Poray Cusco同大家住嘅Cusco係兩個唔同嘅地方，Poray Cusco係鄰近Cusco嘅鎮
如果喺嗰度落車，門口會有一定數量的士等大家，大概20-30 Sol都可以送大家返到酒店

而Inca Rail就複雜得多
首先佢有三個上火車/落火車站：Cusco / Poroy Cusco / Ollantaytambo
而呢個Cusco就真係大家住嘅地方
其次嘅係就算你揀Cusco，都仲仍然有兩個選擇：直接係Cusco上(落)火車 / Cusco搭細巴去Ollantaytambo (相反)
當然唔同選擇，價錢都唔一樣

咁好多人會擔心
如果我係Ollantaytambo落火車，而又無買Inca Rail個鐵路+巴士套票點算
你可以放心，Ollantaytambo站門口超多十幾人座位細巴等緊大家
每程都係10 Sol，個半鐘就返到Main Square


---------------------------------------------------------------------------------------------
我今日搭嘅呢個班次係16:36
等到4點過啲終於可以上車


大家可以望到就算係最cheap嘅車廂其實都幾靚
座位都非常舒服


喺度要教大家點樣揀Inca Rail火車座位
因為呢一度係劃位制，之前一定要先去Counter/Office劃好位
首先，想出發去熱水鎮可以順便沿途睇下景色，就一定要：
一定要坐走廊左邊座位(1-4，9-12，17-20 ……)
左邊位置逢雙數位就係窗口位(2,4,10,12,18,20……)
每組4個數字當中大號碼嗰兩個係順風車; 細嗰兩個就係倒頭車
如果由熱水鎮出返Cusco，就第一同第二項嘅數字照舊咁揀
唯獨第三項就記得會調轉，變成大號碼係倒頭車

Inca Rail會送一杯嘢飲，一包餅同一嚿朱古力
飲品方面，都係得啲咖啡，茶，唔凍嘅凍飲


另外呢一個鐵路真係我坐過咁多火車以來，搖晃得最犀利嘅一次
一路搭在一路搖
去廁所如果唔扶住啲凳，一定跌到pk

走廊另一邊坐住一個台灣家庭
我仲同佢地傾得好投契

巴打寫得好詳細，幾年前既回憶返晒來，Cusco 其實值得留多一兩日，個主教堂值得一去，相當宏偉
順帶一提，可以去試Inca Kola ，你當係忌廉汽水咁

我地心有靈犀
因為我一到熱水鎮第一餐就飲左Inca cola
啱啱都打好 諗住聽日po

座位嗰段唔太明，有冇seat map睇？

Sorry我講到199咁

我搵唔到seat map吖
唯有自己又畫到199咁

熱水鎮 Aguas Calientes

本身話6點會到
但火車有少少慢，最後delay到6點半先到

一到步第一時間去check in先
咁我呢一晚住嘅叫做Golden House Inn
係透過airbnb book嘅
我只可以話畀大家知，千祈唔好book



如果唔仔細望會覺得間房係ok
但一畀啲眼力就會發覺所有嘢都好污糟
係污糟到我爭啲想去其他旅館重新租

利申定，我無潔癖、接受污糟程度其實平時都算高

後來我嘈咗兩句佢終於肯換過另一間稍為乾淨dd嘅房
叫做勉強可以接受，但熱水好弱

搞掂好住宿呢個環節，就到都幾重要嘅部分 - 購買上馬丘比丘嘅巴士票

購買巴士票嘅辦公室就喺巴士站對上少少路口
然後就會見到有個指示牌指住你入去
就喺第一條弧形天橋落少少



美金個價係fix咗嘅
只有當地貨幣會因匯率而變
Usd 24 來回，Usd 12 單程


買嗰陣佢會要求你出示馬丘比丘入場券同Passport
如果你出示唔到入場券就唔會畀你買
冇錯，亦即係話你必須要上網買定馬丘比丘入場券
而的確，所有嚟馬丘比丘嘅人都一定會預先買定入場券，因為好多時都一票難求
點樣買就輪到我分享上馬丘比丘嘅時候再一次過講啦
來回巴士票都冇限時，只要係一日之內用咗佢就得
所以要趕搭頭班車上去睇日出嘅人就真係當日要鬥快去排隊搭頭幾班車啦
而我亦都係其中一個準備上去睇日出嘅人


(圖為單程票)

圖嘅右手邊係一個市集同埋火車站，左手邊就係比較旺嘅路

熱水鎮主要旺嘅路非常多餐廳
沿路行上去都係數之不盡嘅餐廳同酒吧
而且我可以話畀大家知大部分餐廳餐牌啲數字都係唔細


我直接啲講，所有餐廳都係做遊客生意
越接近火車站嘅餐廳就越貴
而且喺呢度食嘢係好古惑

好多時門口貼住一塊價錢唔貴嘅餐牌
然後下面嗰架又有一份啲價錢幾貴嘅餐牌
當你入到去嗰陣佢只會畀下面幾貴嘅餐牌你睇

而且有啲餐廳真係好賤格
到埋單嗰陣，張單會無啦啦多咗一項Tax
而我就係深受其害

由於接近火車站嘅餐廳真係唔平
所以我就向上行，行到見到有間餐廳都幾乾淨企理就望下個餐牌


然後有個職員就出嚟招呼我 話佢哋啲嘢又平又好食
然後我就指住S/.15嗰個餐牌，問佢係唔係15 Sol
佢話 Si (即係Yes)
咁我就即刻入去啦

入到去坐低佢就畀咗個餐牌我
份餐牌個價錢係完全唔同㗎


好在我一開始喺出面影咗相
指住15 Sol其中一樣叫Lomo Saltado
然後再叫咗一款汽水叫做 Inca Kola
諗住total都係23 Sol姐

等咗一陣碟飯就嚟啦
我望咗一望個飯，仲細過平時酒樓白飯嘅一半
It’s fine~~當我順便節食


Lomo Saltado其實係秘魯一款好平民嘅餸
佢係利用一啲辣椒、豉油、胡椒同其他調味料，落牛肉落去炒
聽落係咪好有香港茶餐廳風味呢
其實秘魯唔少嘅菜式都同亞洲菜有啲類似
包括同中國、香港一樣都鍾意用炒嘅方式去烹調
亦都有受到日本菜影響，唔少日本餐廳或者日mix秘餐廳
所以我個人感覺，亞洲人嚟到秘魯應該唔會完全食唔慣
而且食唔慣，秘魯都有唔少中國餐廳，個名寫住Chifa都一定有炒飯、炒麵或者湯餛飩食

講返呢碟餸先
真係好鹹好鹹，連我平時咁重口味嘅人都有啲卻步
而且啲牛肉又係超級鞋，咬20下都應該未爛
秘魯人真係咁唔識得煮牛肉咩
因為我喺旅途中真係有刻意去問其他遊客覺得秘魯啲牛肉如何
好多人都覺得真係鞋到媽媽都唔認得


而薯仔粒佢係有炸過
都好香脆，但同樣地都好鹹
而且後來我發覺秘魯同玻利維亞都好鍾意食薯條
炒牛肉又要落薯條，炒雞炒豬肉都要落薯條，甚至番茄煮雞都要落薯條
真係好彩我有帶清熱酷嚟旅行咋......

咁支嘢飲望係黃色嘅汽水
我諗大家都可以聯想到喺平時飲嘅邊一隻嘢


我見台灣啲遊記形容到呢款汽水好特別、好有特色
所以我一早都好想試
但結果一飲落去，根本就係多氣、多色素版嘅忌廉
但不得不說，汽水嘅氣一多真係飲落特別爽

而且喺秘魯同玻利維亞食嘢，你想飲水係要另外畀錢㗎
所以好多人都會寧願選擇飲汽水、果汁、酒

到埋單嗰陣，我望一望個價錢係S/.39
我眼珠都就快跌出嚟
個飯由15變左25， 無啦啦又有項唔知咩嚟收我 S/.6


然後我即刻指住個餐牌話嗰度寫S/.15
佢又死死地氣幫我改
然後我又問S/.6係咩嚟
佢就答我係Tax，話一定要收，之後就開始扮聽唔明我啲英文
最後我變返死死地氣比S/.29

我嗰晚唔服氣上網check
原來呢個熱水鎮啲餐廳真係專門用呢一招去劏遊客
所以有啲良心餐廳門口係會貼住No Tax


而我呢一晚住嘅旅館自稱有包早餐
佢仲問我係唔係要搭5:30am最早班次嘅車上馬丘比丘
我話係，4:45am出門口
佢仲答我ok

睇完決定即刻將清熱酷加入行李list

熱水鎮果度附近有個food court的，要上樓，真是好像熟食市場果種又熱又小亂的食店. 可能夜晚收咗舖吧. 我是food court 食的，連一杯大大的鮮炸果汁17sol...我仲餵薯條比狗食

不過咁..我是坐火車加shuttle來回，因心知自己體力勁唔掂..所以當日就算食平嘢條數都圍唔返.

繼續留名睇post

LM

5月去天空之鏡會點? 又話香港冬天去最好
BTW南美一直想去,但一定要辭職先有成個月去,冇奶由咁撚蝕去半個月架,機票咁撚貴,應該都係一世仔去一次

本身有美簽?

如果即場REJECT左,咁可以點做? 訂左火車果D又點搞

咪撚理條傻鳩,出晒名偷圖扮去旅行

可以落地簽俾人劏到一頸血
上網睇完預左俾100美，去到屌佢老母叫我俾120

五月嘅天空之鏡係點 就真係唔好意思要你繼續追落去啦
香港嘅冬天係嗰邊嘅夏天，雨季就多水，有水先可以造成塊鏡

等下次搵到份好工 中間留一個月休息時間比自己囉
去得少日子都真係好後悔㗎

如果即場REJECT左,咁可以點做? 訂左火車果D又點搞

我本身冇美國簽證，為咗轉機都即刻出發前去申請

如果佢即場reject一般係得三個原因
1. 你作奸犯科，臭名遠播
2. 你份application form填錯/漏嘅

咁正常嘅人其實都係衰第二行姐
咁嘅情況下就重新再整個份申請就得
自己搵電腦再重新填過份form，upload返所有附件

最重要嘅係
你係香港應該要將所有附件儲存喺仼何你係外國都可以access到嘅雲端

如果你帶漏資料通常唔會reject, 最多叫你下次再光臨
不過如果照足簡介都帶漏資料，咁就真係抵打啦

火車個度你指去馬丘比丘火車？

你真係唔好彩
可能你一個人容易劏
我問過關口d人都係話100

18/5
踏上前往馬丘比丘之路

我呢日四點半起身
梳洗完，同我預計嘅一樣都係四點九出發

落到樓下想推開道玻璃門
點知發現道門係鎖咗



我敲咗張枱好耐
由細聲叫到大聲Excuse me
一直叫到五點鐘都冇人應
而喺門外就不斷見到其他遊客喺旅館行出去車站排隊

我必須承認自己當時有啲嬲
等到個職員5: 05am喺佢間房出現
佢仲同我講you are so early
我嗰刻真係燥燥地，有少少態度唔係咁好講咗幾句嘢
但當然係冇侮辱人嘅成份
然後就即刻急急腳去巴士站排隊

我5:10am去到巴士站
已經排曬長龍


人數係好多，不過班次都好多
1hr=1個time slot，每個time slot都有10架車以上
我就係搭第5架車


沿途搭車嗰陣太陽準備升起
我都好急，希望快啲上到去


馬丘比丘係準時6:00am先開門
所以大家都排好曬隊準備衝入去

-----------------------------------------------------------------------------------------
喺度就先教下大家點樣買馬丘比丘入場券

https://www.machupicchu.gob.pe/inicio
大家可以click上面個網址，係馬丘比丘嘅官網

之後大家就可以揀選將會參觀馬丘比丘日子
輸入你想要嘅門票數目
就可以撳availability睇下你想要嘅日子、咩時段入場仲有幾多門票淨


然後大家就會入到呢一個版面
直接可以”select”你想要嘅嗰一個入馬丘比丘時段
成人 S/.152 ，學生 S/.77 ，小童 S/.70


如果大家仲想行埋 Waynapicchu (S/.200) 或者Machupicchu Mountain (S/.200)
都可以喺呢個網站同版面買埋飛


揀好之後佢就要你輸入個人資料同passport no.


之後就會要你確認資料，同埋一啲聲明條款
再下一版就會顯示你嘅預訂初步已經確認
爭在未畀錢


喺payment methods 有幾個選擇可以揀
線上比錢嘅可以用visa或者mastercard， mastercard手續費平啲
或者可以去到Peru嘅任何一間National Bank以現金支付 / Cusco嘅馬丘比丘辦事處用信用卡或現金支付亦可(Cash係最抵)


畀錢之前記得係actions嗰度save低張預約確認
到時入場都係帶返呢一張紙作為你嘅入場券


其實真係好易透過官網買到飛
大家千祈唔好咁傻豬走去啲旅行社 / 網上旅遊代理買飛
佢哋收好貴手續費

購買學生飛

另外要提下各位學生哥
喺官網買飛係冇得畀你揀學生價
當初我都困惑咗好耐要點做，但心裏面又想用少d錢

我後來膽粗粗send咗封email去呢個官網
問佢如果我想訂學生飛除咗經travel agency訂/親身去Cusco辦事處買之外
有冇其他辦法，然後再求下佢可唔可以線上幫我買定學生飛
然後嗰邊職員好好人，佢叫我先用大人身份落咗reservation先
去到畀錢嗰一版會有個reservation code
將個reservation code連同你Scan好嘅護照、有效學生證檔案Send畀佢，咁佢就會即刻線上幫你處理
你F5一下，或者刪咗個網站重新再開，然後喺check in嗰度打你個code
就去返畀錢嗰版，個金額就會變咗學生價

而且記住成個過程一定要喺對方office hour內進行
而且你個reservation code只係有效3小時，愈時就整個預定作廢，要重新黎過
另外學生證可以用Isic(國際學生證) 或者我地本地地學生證都得，最近要有expire date、學校名、你自己個名



好彩當初無啦啦夠膽send email問下
否則就會無啦啦畀多咗S/.75

我就18號登上馬丘比丘，9號先買飛
我覺得其實提前2-3日買就已經足夠
尤其好早就已經抵達cusco、又幾日之後先去馬丘比丘，不妨親身去辦事處買飛
手續費都慳返
(當然你自己都要睇定個門票情況啦...)