[多圖多字] 一個人的15日秘魯、玻利維亞之旅 (附加東京24小時快閃)

唔該哂, 雖然都幾難知佢up咩, 但起埋有d野跟到

Miraflores 去機場50sol巴打俾人呃左了

《東京24小時之旅》

轉眼間已經來到東京啦
喺羽田機場落機，跑都跑唔切衝出去搭車
因為今晚要食烤肉呀

《和牛一頭燒肉 - 房家》

我自己好鍾意呢一間㗎
有時來到東京唔知食乜都會走入去食


佢當然都係主打烤和牛啦
而且佢個價格比好多地方都平，皆因佢係成隻牛咁買
所以成本價會平啲
而且單喺東京已經有六間分店，主要遍佈喺上野同日暮里嗰頭

佢平日個lunch其實仲抵食
2400Yen 就已經可以食到A5和牛啦

而晚市提供嘅就大部分都係A5同少量國產牛
而且由於佢成隻牛咁買，所以佢稀少部分嘅肉數量都多
Click下面條link就可以見到餐牌啦
https://www.bou-ya.com/wp/wp-content/themes/bou-ya/img/sub/menu201903_2.pdf

有個別嘅分店有得立食，而我去嘅上野分店都有


佢有中文同英文menu，不過記載嘅菜式數量就少好多
所以我建議大家都係攞日文menu

醬汁提供兩款，鹽同埋灑上芝麻嘅烤肉豉油


我就叫咗三款稀少部位，都係叫細碟
三角バラ (三角肋骨肉)
はねした (羽下肉)
いちば (尾根肉)


三角バラ (三角肋骨肉)
三角バラ一向都好受人歡迎
佢油花分佈平均，夠肥美、油脂又濃，而且肉質比較淋
屬於比較邪惡嘅肉
我就將佢燒到7-8成熟，啱啱好


はねした (羽下肉)
はねした即係頸後面肩膀中間個位
油花都豐富，而且無筋，咬落都比較軟嫩
我自己就最鍾意呢一個，唔會太肥之餘又有肉味


いちば (尾根肉)
いちば係指後腰至臀部、直至後腿部位的肉
越接近臀部，膻味就會越重
不過我呢幾塊都係比較接近腰部，所以就冇膻味
いちば油花會比較少，反而肉味比較濃郁


另外我再嗌咗碟牛舌Combo，作為牛舌愛好者嘅點可能錯過
同坊間嘅厚切 / 薄切牛舌唔同
房家嘅牛舌set係成條脷每個部分切一塊，可以食到上下左右前後脷嘅感覺


牛舌一般油脂都比較少
望呢六塊牛舌，都好明顯見到每一塊嘅油脂分佈都好唔同
我就覺得厚切嗰兩塊最好食，因為有啲油脂之餘又夠爽脆
另外其他幾舊比較厚身都好食，我最鍾意牛舌嗰種爽脆感





另外我真係好耐冇飲過正正常常嘅湯，同食過正正常常嘅飯
所以叫咗碗辣豆腐湯同白飯
食到碗白飯真係好感動，從外都未試過因為食到白飯而咁開心

好正咁，多謝推介

好正，想直接跟住玩

《淺草中央酒店》+《雷門寺》

我今次住呢一間淺草中央酒店喺淺草
算係一間有少少歷史嘅三星級酒店

自設大浴場，個人感覺都幾舒服
但就比較多皺皮肉體，小鮮肉唔係好多

房間大細都ok，開到個29吋喼仲叫做有啲位行下


好多人會問我去東京住邊度好
呢個問題真係好難答你
首先要知道你鍾意咩環境，瘋狂完可以即刻休息？要周圍環境寧靜？平就得？
我係首要交通方便，然後鍾意日頭周圍去完夜晚8點後想附近有嘢行下
所以我一向都會揀新宿二丁目、上野呢啲價錢合理又比較近旺區嘅地方
今次住淺草純粹想慳得就慳

酒店包嘅早餐簡單但豐富
喺南美半個月冇食飽早餐嘅我完全係幸福嘅存在




呢度只係我第一round…....我完全係餓鬼投胎


整色整水十點先出發，先過去隔離嘅雷門寺
無論幾時都咁多人


但今次唔再入去啦，反而去咗對面嘅淺草觀光案內所


以前其實都介紹過畀大家
頂樓有個展望台可以畀你俯瞰雷門寺同埋平望Skytree

《豐州市場》

對上一次去東京係上年嘅事，仲記得係築地場內市場拆卸之前
所以一直都未有幸參觀新建嘅豐洲市場
唔少人都介紹過，但我都係決定親身去望一次個環境

叫得做豐洲市場，呢個新嘅”築地場內市場”就梗係喺豐洲啦
要去嘅朋友就記得搭Metro去木場站搭百合海鷗線去到市場前站
當然你鍾意嘅可以喺新橋站或者汐留站上車都得


從位置上我覺得係唔方便咗
比以前附近有幾個地下鐵站包圍，而家就只係得一條線去到
車費都貴埋，旅客常用嘅pass冇一款係包到
尤其百合海鷗線一向都出名貴

豐洲市場同以前嘅築地場外市場最唔同嘅係
唔係將所有嘅擺曬喺同一個area
而係分開咗幾棟buildings，每棟嘢配備幾間餐廳
就好似以前大排檔係幾間嘢同一屋簷下，而家就變咗幾個冬菇亭

係市場站一出分左右兩邊天橋
行邊一邊都冇所謂，因為d天橋其實都係互通，爭咗個幾步路啫
右邊：水產仲介批發賣場樓棟 (水産仲卸売場棟)、屋頂綠化廣場 (屋上緑化広場)
左邊：果蔬樓棟 (青果棟)、管理樓棟 (管理施設棟)、水產批發賣場樓棟 (水産卸売場棟)


以前大家慕名排隊嘅壽司店唔再係擺曬喺同一個位置
而係分散喺三棟大廈
要清晨去排隊嘅人就要試前做足準備功夫


咁等我逐棟逐棟介紹啦

先介紹水產仲介批發賣場樓棟 (水産仲卸売場棟)
佢分為前半部分 (3/F 餐廳) 同後半部分 (4/F 商店街)


包括壽司大、鰭文、大江戶等以往都比較出名嘅鋪頭都係呢度
而且壽司大門口仲擺咗幾張凳畀大家排隊可以坐下



我唔知自己有冇記錯
但我依稀記得一年前的築地市場，大部分舖頭食個Omakase都可以4000Yen或以内搞掂
宜家搬到新嘅地方，果然價格上都有一個新嘅展示

行返出去再向前行就係通往商店街嘅入口


條通道貼曬唔同品種嘅魚，佢哋嘅漢字、日文同讀音


而且從窗口可以望到樓下仲介批發賣場
不過我成十一點先去到就梗係冇嘢睇啦


搭扶手電梯上四樓會見到有商店街
嗰度賣唔少嘅乾濕貨，如漬物、厨具用品、食材等等
而且條通道又闊落又乾淨，同以前嘅舊環境截然不同



經過天橋過去對面管理樓棟
喺正水產仲介批發賣場樓棟 (水産仲卸売場棟)對面


一行完天橋入去個門口就會見到成條美食街
例如八千家、神樂壽司等就係呢度駐札
實不相瞞，餐廳嘅吸引力確實係低過對面嗰棟


一路向入面行就會去到水產批發賣場樓棟 (水産卸売場棟)


大家可以係樓上俯視下面嗰層嘅批發賣



亦都會有塊牌喺度簡介畀大家聽每一日嘅流程


慢慢行過去市場前站隔離嘅果蔬樓棟 (青果棟)


我相信大家靠名都應該估到呢邊主要係負責做蔬果販賣/批發


所有嘢好似都排列得好整齊
通道已經畫好曬位、有曬名牌
做事井井有條確實係日本人值得稱讚嘅地方


另外呢邊係通道嘅牆身貼滿曬築地市場嘅歷史
又舊至新咁樣排列
感覺各位遊客可以一路行一路了解多啲歷史


咦!? 點解我冇講另一間排曬長龍嘅大和壽司個位置???
其實佢就係果蔬樓棟 (青果棟)嘅地下


所以大家會見到豐洲市場將唔同範疇嘅嘢打散放置
食肆方面亦都散落喺唔同地方
好難再好似以前咁見到壽司大多人就即刻去隔離排大和壽司

今次第一次去豐洲市場畀我感覺係所有嘢都好新穎
見到建築物係好現代化、顏色嘅選取有一種新派嘅感覺
裏面嘅design、佈局非常有條理

但老實講，我都係鍾意以前舊嘅築地場內市場
從前嘅築地場內市場個環境係好有傳統日本嘅味道，所有嘢嚟得好自然
真係一睇就知係好大規模嘅魚市場
但而家呢個豐洲市場雖然好用心去裝飾，但畀我感覺卻似一個博物館多啲
冇咗嗰種近距離接觸、親切嘅感覺
反而有一種刻意展示自己先進嘅一面，失去咗嗰種樸素感

不過好多嘢都冇辦法
為咗配合都内嘅發展，好多嘢都要被迫犧牲

推

同女朋友完蛋了

係時候專注旅行

I am sorry to hear that, 振作啊兄弟
係時候去個旅行尋開心

對阿，我冇咩野了，係時候睇返你啲遊記振作

我無啊 唔係到到有得飲
好似近亞馬遜個邊會popular d

等我嘅遊記作爲你嘅心靈鷄湯
我東京個24小時都未寫得曬
年紀開始大，要諗返3個月前嘅野已經開始好辛苦

係，睇完會好想去

三個月，又難記得返起每個細節，但你果時冇寫日記之類？

我有每晚錄音mark低自己想記住嘅野
不過電話呢排收左皮 無曬record

你真係

秘魯、玻利維亞治安點？
睇到另一個旅人寫，好似好惡劣咁
https://swanblog.tw/latin-america-tips/

秘魯Cusco Arequipa我覺得都算非常安全
Lima舊城區 好多人都話比較危險，但我日頭去都算平靜，而Miraflores就好安全
玻利維亞始終係第三世界國家，治安一定係會有欠缺，尤其La Paz山上面/El Alto你人少就唔好亂逗留

我覺得防人之心不可無，少少安全措施一定要做
最緊要你行事自然就可以，貴重物品跟身，買定個防盜腰包
事前做足功課應該都還可以
個d有人撩、有人問路，其實你稍稍有智慧都無問題
盡量行大路！！

FYI 我自己望落比較細個又唔高大，都完好無缺返到香港

明白，睇你分享又好似唔係好危險， 但嗰位台灣女生講到電話相機都唔可以露眼， 影完相要即刻收埋，又唔可以當街搵路線，講到周街搶野咁