[多圖多字] 一個人的15日秘魯、玻利維亞之旅 (附加東京24小時快閃)

睇到好多遊記都話 內陸會忽然取消/ 嚴重delay
如果搭哂飛機到時取消左 咁咪好大獲

本身Uyuni返La paz過夜巴士
然後La paz上午去月亮谷，但因爲有少少發燒 所以無去
變成成個上午休息

無睇Nazca line
我對小型飛機/直升機 細個有唔好嘅回憶

都係 内陸機都唔少會突然cancel
Latam相對好少少，國際綫(來往Lima - La paz)都算ok

事前準備

我今次去嘅地方係秘魯同玻利維亞
去呢d比較遙遠地方好多時事前都要準備少少野

1. 簽證

現時，無論持有特區護照定BNO，入境秘魯都係免簽證

但玻利維亞就唔係啦，持有特區護照人士就必須透過事前網上遞交文件申請或辦理落地簽證。
普遍人都會選擇網上申請，然後去到鄰國嘅玻利維亞大使館取得簽證，因爲只需USD30；但落地簽證就需USD100
不過網上申請只可以係領取簽證日前15日内申辦，否則將會作廢。例如我16/5會領取簽證，但我1號就申請，就會係無效。

另外，英國公民本身去玻利維亞係免簽證，所以好多手持BNO人士都會去搏一搏
搏人地出入境海關係井底之蛙，唔識分真英國公民同BNO分別
而事實上我聽返黎消息，如果你經陸路E.g.秘魯/智利以巴士入境基本上係無問題
但如果係搭飛機抵達，機場班入境處就見識多d就大機會過唔到骨
我旅途中遇到3個香港人用BNO(無申請簽證)搭巴士入境，係完全無難度地成功踏入玻利維亞境内。
所以手持BNO嘅你不妨自己考慮下

喺度先教大家點樣辦簽證

首先，大家電腦一定要準備好以下幾樣文件掃描檔/資料
1. 你本人嘅大頭相
2. 信用卡正面(作爲財政能力證明)
3. 護照(有閣下護照號碼同相片嗰一版)
4. 英文行程表 (行程中會以巴士出入境) / 玻利維亞來回電子機票 (利用飛機出入境)
5. 玻利維亞第一晚住宿地點證明
6. 玻利維亞停留嘅日數
7. Email address
8.黃熱病注射證明
9. 緊急聯絡人資料

之後就Click http://www.rree.gob.bo/formvisas/，入去填表
其實份表係西班牙文同英文都有，所以並唔難填

國籍嗰度大家就要揀返Peoples Republic of China (無辦法啦.....)
以前係要用電郵接收驗證碼
而家先進咗，用呢啲numerical問題就搞d掂

然後第2步就係要填個人資料
記得第一個Type of Visa要選擇Tourist Visa
其中有一項係填national identification number，記得要填你香港身份證號碼
我嗰陣諗住身份證關佢咩事，所以就填passport no.
點知到時領事對資料嗰陣發現我填錯結果收咗我10 Sol改資料
Email聽聞最好唔好用gmail，話有機會會收唔到，所以我係用yahoo
係呢一版就要上傳你嘅大頭相


第3步就係輸入你嘅passport資料
但無需上傳passport掃描


第4步都係一啲普通問題
第一條問題係問你之前曾經有冇申請過玻利維亞簽證
第二題就關於你會逗留玻利維亞幾多日
第三題係問你喺玻利維亞個旅程會唔會涉及以下組合嘅地方
如果你好似我咁淨係去La Paz，Oruro，Uyuni，Copacabana，就直接揀others
因為我仔細望過入面可以選擇嘅地方都係一啲容易感染黃熱病嘅城市


第5步就係你嘅緊急聯絡人資料
佢份form好白痴第一位緊急聯絡人係冇位畀你填電話號碼
當時領事叫我人手寫返
所以大家可以係第二聯絡人嗰度寫
寫完緊急聯絡人下面仲有一格
嗰一架係填你將會喺邊個領事館辦理簽證
我就係Cuzco，所以填Cuzco落去


最後一個步驟就係要你上載所有掃描文件
上傳曬咗之後 你就撳form print preview，會有個pdf file對一對所有資料係唔係啱
如果啱就將嗰一個pdf file上傳去FORMULARIO DE SOLICITUD
之後撳finish visa application，就會出現有申請序號嘅版面
然後撳display Visa application form，下載你份申請書，就完成整個步驟


其實成個程序好簡單，只不過比較浪費時間
之後記得Print份申請書出嚟，第二頁一定要簽名


親臨領事館之前記得要帶備所有你上傳過嘅文件副本
記得缺一不可，因為大使會逐份逐份檢查
網上面話申請簽證嗰份表要印兩份，不過最後大使淨係要左一份
1. 簽證申請表
2. 你本人嘅大頭相
3. 信用卡正面(作爲財政能力證明)
4. 護照(有閣下護照號碼同相片嗰一版)
5. 英文行程表 (行程中會以巴士出入境) / 玻利維亞來回電子機票 (利用飛機出入境)
6. 玻利維亞第一晚住宿地點證明
7. 黃熱病注射證明 (無檢查)
8. Usd 30

2. 黃熱病

南美衛生程同疾病嚴重情況都唔惹少
好多時食物衛生同傳染病都係非常令人憂心，尤以黃熱病、登革熱同腸道傳染病最爲肆虐
所以大家出發必須要小心

我主要講講黃熱病啦
佢d資料我就唔詳細講太多啦，總之就係透過帶有黃熱病病毒嘅蚊釘所引起
(想知詳細醫學資料就自己上網查啦)
係非洲、拉丁美洲熱帶地區(e.g.亞馬遜森林)都非常流行

而玻利維亞政府規定，所有入境者必須已注射黃熱病疫苗先可以入境
(過關完全無Check)

而呢個黃熱病疫苗係香港可以係衛生署轄下嘅兩間旅遊健康中心可以接種
而且必須事前最少半個月提前預約
預約電話同地址大家可以Click下面條link
https://www.travelhealth.gov.hk/tc_chi/faqs/yell_fever.html
我建議大家最好一book好機票即刻就打電話Book接種黃熱病
姑娘會安排時間，等你出發前半至一個月左右前往中心接種
不過個電話長期打唔通!!!!
電話錄音會講低Fax no.,如果你有fax機就fax資料去，姑娘好快會打比你
無fax機就慢慢打電話啦

去診所前準備好你一個簡單行程表，大概係講講會去邊個城市/景點
類似我個行程表再刪除d remarks同住宿就得
另外就記得帶錢啦，貴到飛起

如果你只需要打黃熱針，都要比HKD515
因爲焗住一定要收你診症費HKD315，而黃熱病疫苗同證明書就要HKD200
黃熱病疫苗係一定要打，因爲唔打就入唔到玻利維亞境(都係個句,當地入境無check)

醫生見完你就會交比姑娘幫你打針同做briefing
交代旅行要帶定咩藥物、要注意咩，同比一叠單張我睇


當中强調一定要買含有DEET 15%或以上防蚊藥物
係比較大型超市、個人護理店等都會見到有，大概5-60蚊都已經有交易
我自己係W字頭店買左支3M防蚊膏


另外Lima機場、Cuzco周街都有DEET 15%+嘅蚊怕水買
都只係12-15 Sol (HKD30)一支細
所以大家都可以唔洗係香港買，我其實搽左幾日就無再搽


另外中心個度都有travel kit賣，你地自己可以衡量需唔需要
HKD100有曬防蚊膏、消毒藥水、藥丸等


另外打左黃熱病疫苗，根據姑娘口講大概有3-4成人會幾日後出現頭痛、低燒等症狀
而我係有頭痛左兩日

打完針會有張針卡(證書)，上面應該會印住你個名
有一欄係要填護照號碼，記得唔洗填，換新passport個陣可以再用
因爲張卡係永久使用，但一旦有塗鴉就會作廢

————————————————————————————
3. 衛生情況

當地衛生情況欠佳，好容易腸道受感染，醫生就建議我打傷寒同甲型肝炎
不過我就無打，自問都非白鴿肚
而且我自己都有周街食野，腸胃都無乜事
所以大家衡量下打唔打

而且事實上尤其以玻利維亞真係周圍都塵土飛揚、烏烟瘴氣
大家食街頭野個陣特別要小心
我旅途中食左2餐係真街頭、0衛生，諗起都好彩無事

如果你係比較保障型，飲食會去d企理鋪頭食
相對地應該都非常安全
——————————————————————————————
4. 高山症

去秘魯同玻利維亞係好容易有高山症
因爲秘、玻兩國唔少主要景點都係海拔3千米以上
Cusco 約3400米 ；Puno係3827米
玻利維亞首都La Paz係3640米
天空之鏡嘅城市Uyuni係3656米
位於Arequipa著名峽谷Colca Canyon最高點係4900米
Rainbow Mountain彩虹山更加係5200米，拍得住珠穆朗瑪峰大本營

尤其可見，一定要做好預防高山症一切措施

預防高山症藥物分爲中藥同西藥

中藥係紅景天，北京XX堂有得賣，不過貴到飛起
而且我有朋友當年去西藏食紅景天係完全無效

而西藥可以係打針個中心順便買埋
個藥叫Acetazolamide，一包9粒，每包$45
上高海拔地方前一日開始食就得，一日早晚各1粒，會利尿，所以要多飲水
有2-3成人嘅身體會出現麻痹感覺，但醫生話最嚴重都只不過係好似平時坐到痹個種感覺，大部分有反應都係普通面頰、手指痹痹地


我第一次去打針個陣因爲仲未對抗高山症藥物做任何research，所以無買
然後仲比個望上去係有一定資歷嘅醫生串我仲有一個月出發都未search好

我係後來臨出發前先決定買西藥
打返電話過去中心，買藥都要預約
原來話買呢個藥又要見一見醫生先買得，個刻心諗又被人水左3舊水
好在最後無收呢個診症費
今次呢個醫生就好人好多，6隻字形容：高大靚仔健談
居然同我傾計傾左三個字，而且比左好多建議


大致上要對呢三樣野多加準備，其他野就有錢就乜都解決到啦

留名

明白，旅行住自己想住就夠

LM

今次出發都帶左好多野

由於個邊係南半球正值晚秋初冬，越遠離海邊城市就越凍
好似Puno，La Paz，Uyuni呢d地方日夜溫差好大，可以係15至-5度
而且海拔越高，風就會越大
好多時溫度可能係5度，但因爲風太大而令你感覺好似負5度咁
但由於我無風褸，所以就帶左幾件厚身Hoodies去頂住檔

另外都比大家望下我帶左咩野去

首先係個人護理
抗高山症藥、傷風藥、止痛藥、膠布、驅蚊膏、暈浪丸、眼藥水
防曬大家一定要帶，海拔高接觸陽光距離近左


另外再帶左普通抹身濕紙巾同消毒濕紙巾用黎抹餐具、清潔皮膚
面膜保濕用，個邊秋冬天好乾
暖貼以備不時之需，仲有口罩同香口珠


然後牙膏牙刷、杯、冲涼洗頭水必備啦
熱水壺係特登買，因爲小弟今次住嘅地方有部分係無提供熱水
另外買個運動腰包當係防盜腰包用，綁住我個豬腩肉，費事人地偷野
而且我係防盜腰包擺1/4錢，背囊暗格擺1/4，銀包擺1/4，行李箱入面又攝1/4


最後就係一大堆杯麵同零食
我真係好鍾意食呢個品牌麻辣鍋味杯麵!!!!

上網卡

香港暫時只有一張上網卡可以喺坊間買得到係秘魯同玻利維亞兩個國家都用得
個張叫做 T-Mobile
覆蓋全球210個國家，連南美多個國家都可以收到Network
喺鴨寮街買大概$200一張15日無限4G/3G上網，大概$300一張無限30日上網
網上好多嘅評價都係如果你唔嫌慢就OK


由於我呢次旅程係超過15日，所以我只可以買30日
我又覺得$300貴咗少少啦，所以我選擇咗另一個方案
就係先買一張秘魯用到嘅卡，然後玻利維亞上網卡就係當地買
因為素問好多非當地購買嘅卡喺玻利維亞都收得唔好

最後我就喺鴨寮街買咗一張3UK 30日5GB上網卡 $130 (坊間大概$120-150)
其實呢一張主要都係適合去歐洲用，不過就包咗去秘魯
另外如果大家覺得5GB唔夠用，仲有一張12GB $150 (坊間大概$140-170)


咁等我分享下我嘅用後感啦
我需要喺美國轉機，所以呢一張卡喺美國已經開始用
喺美國呢張卡可以行4G，無論IG FB都順暢無阻

但當去到秘魯嗰陣，就變成真正3G
無論係Cusco，Lima，Puno，Arequipa，IG FB都都係好難先用到
想上網查嘢都絕對會等到個人好忟
但基本google map，send msg就冇問題嘅
而且秘魯好多餐廳都會有wifi，所以大家食飯記得要問店員攞密碼
呢張卡收得最好就係喺馬丘比丘嗰陣，居然喺馬丘比丘可以流暢Po IG

當然，都有唔少人係去到秘魯當地先買
不過為免夜長夢多，都係買定張卡我比較安心啲

玻利維亞上網卡

如果大家係經巴士入La Paz
喺嗰度巴士總站行入少少已經有間舖可以買電話卡



喺呢度買卡，首先張卡要畀30 Bs
然後再按自己需要增值張卡買data
15 Bs - 500MB ; 30 Bs - 1 GB ; 50 Bs - 2GB
Top-up買Data嘅價目係公價
如果你夠曬，週街好多檔口都可以幫Top-up

玻利維亞有三間電訊商：Entel ，Tico(Tigo) ，Viva
店員話Entel一般都係比較好，Uyuni都收到
(店員識少少英文，而且會幫你安裝埋張卡)

不過我事前已經問咗酒店都有得賣，而且張卡只係10 Bs
所以我就返咗去酒店喺嗰邊買，然後再Top Up左2GB Data

大家都可以喺La Paz San Francisco Church附近有幾間大型電訊供應商舖頭動度買
不過聽聞就冇比較少流量嘅Plan

而係Uyuni
近Clock Tower嗰一帶都有好多舖頭可以買卡
如果由Cusco直接飛去/搭巴士去Uyuni嘅人可以注意

事前提要我已經講曬！
聽日開始可以正式入正題啦

我舊年4月去，秘魯+玻利維亞各一星期，都洗左差唔多3萬
慶幸上馬丘比丘都好好天不過南美個邊D野食就...

南美d野食我都一般
好熱氣

南美 留名先

正，留名

點解啲薯條可以又油又淋
人在Puno黎左南美3星期，建議必帶潤唇膏，我個嘴依家爛晒

你去到Arequipa個陣快d買枝啦！
個度都比較多鋪面光鮮藥房

未食過一餐好食

去到天空之鏡勁乾，擦潤膚膏都無用又痕又爆擦

嘩巴打咁勇坐巴士去Puno，條路咁爛唔驚咩

我有幾次寧願食杯麵、中餐

秘魯d野食算好嫁啦，係有時有d熱氣
本地菜好味既唔多，燒牛心同炸天竺鼠都唔錯
去Chifa食啦，同你平時見d中餐好唔同，但唔算難食
見到腦細求下佢炒個小菜，咁就有啖好食

我見好多人都係坐巴士去Puno
其實都無乜大問題，感覺上都算安全啊