[不定期]傻仔樓豬唔識日文,一個去日本工作假期,生活日常

樓主喺度消失咗

我未死呢兩日好累無出post 一陣出啦

30/5 京都 陰
因為昨日申請唔到，佢幫我約左十二點再去，咁我十點起身沖涼出發。結果又係同一個姐姐service我，其他同事都笑佢咁，睇黎真係唔中意同唔識講日文既人做生意

經過一輪講解（佢開頭瘋狂用手機翻譯，好唔想同我講野咁，但佢打字太慢啦，之後就用日文同我講，見我唔明先用手機翻譯。）簡完plan要簽約啦，發現一定要填電話（巴打話因為我簡有通話功能既plan）問我係咪讀書，填學校/公司電話都得，我兩樣都唔係 唯有填朋友個電話。（好彩都叫有個識既人係大阪，唔係就玩完）講解完一輪，iphone開通要注意既地方 就趕左我走。開頭以為會幫我換埋卡 結果就咁對比我就算。

搞左差唔多都9個字，行左陣街，又無野買 最後決定翻屋企開通電話卡先。中途買左想食好耐既お弁当做午餐。

味道幾好，首先係塊吉列雖然已經唔脆，但係塊肉都唔會乾同硬，生姜燒既部分，醬汁幾好食，但係肉好乾。飯特登押到好實 ，食既時候會一舊舊放到入口，唔會跌到周圍一粒粒，仲有飯有調味過，應該落左醋等佢無咁易變硬？

弁当入面仲有牙籤同濕紙巾好貼心

翻到去，開通完，出去買餸，學下日文，睇套劇又浪費左一日人生

晚飯煲左味噌汁，但係用柴魚做湯底，風味差左d同太多水 落得太小味噌

5/31 京都 陰 / 微雨
大致上搞晒要搞既野，差銀行未搞，念住閒日先去，就決定今日去熟習下屋企附近既環境。咁岩見到行十幾分鍾有商店街，咁就出發啦

沿途路過屋企後方既一段路有一排佛寺，但係唔開放參觀既

影唔到佢地本寺但有幾間幾靚，呢d地方好似係比人供奉先人？等其他巴打解惑

行左十幾分鐘到啦，旁邊行多五分鐘有另一條，今日就行左呢條北野商店街先，睇落都幾肅條，有一半既鋪頭都無開，但係都好長，行左一半仲有咁

呢邊都有家品/百円/超市之類既買 下次可以過黎睇睇

行左出商店街見到間超巨型既建築物，入去睇下先

原來係一間彈珠店，真係超巨型有幾層不特止（地底仲有停車場），一樓都有三個出口，其中一個出去有瓦遮頭既駐輪場咁，有個類似車仔檔咁賣野食（無車、帳幕咁）

離開呢間野旁邊又有間超市，一於入去睇下
呢間有d野都好平，同埋每星期7日每日輪流有一種類既產品9折！行到都有d餓，係度買左盒野翻去食
係度提一提，樓豬超中意食d用粉丫/米丫整既野食 接受餵食

翻屋企食完野，上左陣連登有巴打話搵下業務超市，咁岩屋企行十幾分鐘又有間，就出發啦！

好多野都好平，掃左堆貨就回家食晚飯。

發見65円既一袋方包


晚飯仲係蕎麦 食到悶買左盒太卷送麵食

最後一碗味噌汁，終於飲完一煲 煲得唔太好飲既，下次一定會好飲既！

留名

1/6 京都 雲
今日係樓主既誕生日緊係要大肆興祝下啦去睇戲！

今日十點起身，睇戲之前要食個早餐，早餐係納豆+飯+溫泉蛋

飯係微波飯，納豆現成買，溫泉蛋之前買落既最後一隻。上次黎日本就中意左食納豆，真係好正。將佢搞到起絲就倒落d飯度

食飽飽！戲院係二条駅旁邊，屋企行過去都係十分鐘左右，咁就行過去啦！


去到望左好耐都唔知睇咩戲好，想睇阿拉丁日配版，點知日本7號先上

最後簡左睇さよならくちびる，上網望過簡介係關於音樂。樓豬最中意睇文藝/音樂電影，扮文青


咁下一場係1:50分仲有成個鐘，決定行下先。結果呢橦野，基本上無野行既，30分鐘就行完。

咁之前見過呢邊附近有間ライフ，就去睇下啦

結果Life d野貴到呢...好彩路過見到間叫Coop既唔知咩黎，但見到好多人入去，所以我都去望下

原來都係間超市，我發現呢邊d超市總有d野平過其他超市 同埋呢間野 d熟食真係好香，但係岩岩食完飯決定再去行下。

行到咁上下，係七仔買左兩粒飯團決定翻戲院等入場

星期六都幾多人下，左邊有個休息區，坐30個人都算鬆動，旁邊係賣電影周邊同咖啡糖果，跟著係入口，再過就係candy bar 右上角係box office

有人會問，樓豬唔識日文到底點買飛丫？無錯呢邊係禁機買飛嫁 一句野都唔洗睇！識睇簡單日文就得

聽到職員小姐姐喊mic話我套戲入得場啦 咁我就去買爆谷汽水。望左陣爆谷d限定口味竟然全部賣晒！雖然我唔識叫，但係好想食丫 咁就買左個爆谷餐，似可樂（其他野飲唔識叫，有無巴打教我汽水機既Ice tea既日文）

超超超大桶爆谷我望到呆晒，反而汽水都幾細（m記中杯咁上下）

睇左兩個幾鐘睇完啦，日本睇戲原來會staff cast出晒先開燈，所有人都好乖咁坐係度睇（係香港我都好中意‘聽’片尾，但係見個個走晒，我都唔好意思阻住人做野）

毫無疑問，我係聽唔明既！得兩成左右係明，好彩劇情夠簡單，加埋有部分要表達既野係歌度表達左，所以套戲我睇得明。

呢度黎個戲院小總結先：
票價1200円，新戲上映既票價，過左首周好似會平d，如果唔係請其他巴打更正我，平過香港，計翻都係80-90蚊左右仲要係兩個幾鐘既戲。

爆谷餐680円，抵到喊，每月既9號仲係爆谷餐特惠日500円咋！ 爆谷用蝴蝶豆，我買既焦糖味，混左3次，分別係白豆，微砂糖豆同正常焦糖。食唔出咩油，但係我食晒成桶都唔膩，3個字 幾好食！

設備：
買飛部機程序幾唔錯，簡位禁第一下會放大座位表，唔會成日hi錯位。
CandyBar：好多個櫃位，做野好快手，爆谷又熱又脆。好好笑容（小姐姐好可愛）
入場：叫mic好清晰，我日文咁廢都聽得明

整體：十分良好既體驗，我會黎睇蜘蛛俠同超夢反擊戰嫁啦

本日未完 待續

加速！

支持樓主 唔好放棄

幾好睇

LM

樓主日文要惡補下
寫得幾好睇留一留名

慳d使呀 樓主
我仲等緊你更新日常生活嫁
唔好住兩三個月就用曬錢

追晒po留名
樓豬po得幾好 但係有條on9仔句句都疾住人做乜撚野

加油啊，但啲錢睇住洗啊

餐餐全澱粉質咁滯，睇見都辛苦

樓豬學自己煮啦