鑑於上個POST已經比人騎劫左,所以我重新開個POST
回一回帶先
5月27日 香港 雨
係機場等上機,心情好忐忑不安,未出發就落雨係咪暗示緊D乜野
不過我好中意落雨
聽到雨聲心情都平靜翻D上左機之後,機長宣佈延遲一小時起飛! 結果我訓多左一個鍾
5月27日 関西空港 陰
去到日本已經夜晚8點45分啦,入境果度大排長龍,全部都係大陸人
入完境已經9點半本身想搭Haruka出京都,但係賣飛果度收8半,只好去搭巴士啦
2250円,旅遊巴咁,有行李放置既下屠,每個位都算闊落,架車仲有免費WIFI添,可惜無得叉電.車程大約個半鍾左右去到京都駅.
5月27日 京都 陰
因為樓豬係28號開始入住租屋,所以就要搵地方訓一晚啦, 係出發前我就搵左近我聽日拎鎖匙既地方,係間膠囊酒店。因為無BOOK房, 所以搵多左個後備方案,都好近膠囊酒店既まんが喫茶店. 好,出發去酒店啦!
係京都駅搭烏丸線,去到四条駅,落車行5分鍾左右就到左酒店啦!
入到去就講左句準備已久既日文!
我:空室はありましか
店員:はい、ありまし
因為我十分緊張,下一句就唔記得左要講咩,店員見我無反應問我係咪一泊?
跟住我口快快就答左yes!
店員望住我, 就問我 英語？中国語？
跟住我就開始同佢講普通話
望一望名牌+聽口音, 應該係中國人黎
唔理咁多啦順利入住!
望一望key卡, 住4樓,咁我就上去啦
上到去左邊係幾張櫈同吸煙室, 右邊就係呢道門,用匙卡打開門就見到唔比穿室外鞋 ,有個鞋櫃比大家放鞋既,同埋有室內鞋可以借
旁邊就係locker,同共用既洗漱地方同洗手間,所有野都好乾淨,水漬都無,唔知幾耐清潔一次呢? 另外,沖涼既地方係B1F,大澡堂黎.
雖然locker好大,但係係放唔落我個喼既,所以我推埋個喼去訓覺果度(門口又寫著室內鞋都唔比著),因為好多人未訓打開住個膠囊門就無影到全景,唯有淨係睇下我果格
仲有部27吋電視唔記得影,不過都無睇過,雖然好肚餓,但係都係想沖涼先
人竹落到去B1F望到條樓梯,應該係行番上reception,唔理 去沖涼啦!
去到男澡堂,又有要除鞋(室內鞋都唔比著)跟著又係一堆locker同幾塊鏡,吹風機咁.
設備好齊全,竟然護膚品都有!(定係我見識小?)
入到去 有分開一格格比大家沖涼, 同2個浴池,一個42-44度既熱水, 一個12-3度既冷水池,外面有幅畫教人點沖涼.熱水池池邊仲有個牌用日文寫住溫泉, 有咩功效咁.
一路浸一路聽住古典音樂.
無錯!!!係播古典音樂, 成間野室內都咁古京風, 澡堂竟然播古典音樂. . .
因為時間12點,所以得我同另外一個外國人, 浸左5分鍾之後 我忍唔住呢個迷之尷尬, 終於同佢搭訕(英文)
原來係法國人, 但係住台灣2年, 而家係台灣工作, 黎京都玩3日, 問一問佢竟然中意台灣多d!!!! 話d人友善d d野又好食, 最中意食牛肉麵:3
最後12點半我忍唔住走左, 要出去食野, 真係餓死人
咁夜行左10分鍾都搵唔到拉麵店,最後係すき家解決晚飯.
ネギ玉子牛丼（並盛）¥480
點知突發事件又黎,咩話?食個牛肉飯都觸發到事件?
打隻蛋都可以打爛左,整到成手成枱都係。我對面既日本小哥哥同我都一面呆左望住蛋既殘骸,然後確認過眼神,一齊爆笑,跟著佢仲問我有無事
跟住我就用識得唔多既幾句答左佢:大丈夫です！
佢走既時侯仲同我講掰掰
(利申:非gay)就係咁樣27號就完左啦, 我今日真係好開心呀，我諗聽日一定會更加開心既姐，係咪呀，哈姆太郎
題外話,酒店3700円一晚(網上予約2700円),1樓有飲料吧同簡餐提供
飲料吧
¥300 一天 提供各種Soft drink
¥500一天 提供各種啤酒 好似有手工啤添
簡餐/早餐 無留意價錢 每日更換菜單既意粉 或 すきや
