【練膽大法】我每日迫自己搵一位陌生人傾偈

「唔好意思，請問你喺邊度落車？」
那位小姐呆了一呆，回答了一個地方名
「我哋可唔可以傾一陣偈？」
她錯愕地回答：「 傾咩呀......」
就是這樣，開始了我人生的第一場「陌樂偈」


　
《陌樂偈》第1天－巴士上的護士小姐
　
「跟陌生人傾偈」這計劃已經在我腦海中出現了很多年
每天可以跟一位不同身分、年齡、職業、性格的人傾偈
能夠鍛練膽量、提升口才、增廣見聞，十分有意義
一直未實行的原因是...... 沒有勇氣
　
隨著2017年的來臨，給自己一個目標－
「每天迫自己找一位陌生人傾偈」
我相信如果由1月1日開始實行，而那天失敗了
這個計劃就會告終，所以我早幾天就開始嘗試
　
已經連續兩天因為膽量的關係失敗了......
今天我下定決心，一定要成功！
早上七時，在巴士上層找到了第一位目標
一位沒有在使用手提電話，一個人看著窗外風景的小姐
過了幾個站，我也還未有勇氣過去，不停地想著開場白
很害怕，但我今天的決心真的很大！
　
我鼓起勇氣站起來！
突然有人坐在那位小姐旁邊了
我十分後悔，於是我尋找著第二位目標
前面的先生自己一個人拿著手提電話專心地捉精靈
還是不要打擾他好了，萬一連累他捉不到百變怪
那今天就會變成「跟一位陌生人吵架」了
　
另一位先生也是一個人，突然放下了一直拿著的電話！
機會來了～陌生人！
我今天的決心真的十分大！
我立即走過去坐在他旁邊：「請問你喺邊度落車？」
「下一個站」
Shit!
當然也可以試著跟他傾偈，但只傾幾句太沒意思了吧！
我「哦」了一聲就沒有再說話
到站了，眾人下車，坐在第一位目標旁的人也下車了！
這就是命運了吧！
　
我馬上坐了過去第一位目標的旁邊
近距離觀察這位小姐，才發現她的樣子有點兇
(知道她的職業後就知為甚麼有這種感覺了)
我的勇氣又開始減弱了......
但我今天的決心真的非常大！
　
「唔好意思，請問你喺邊度落車？」
那位小姐呆了一呆，回答了一個地方名
「我哋可唔可以傾一陣偈？」
她錯愕地回答：「 傾咩呀......」
「因為我迫自己每日同一位陌生人傾偈......」
(我知道這個開場白很瘋狂，但這是實驗的一部分）
　
她持續著錯愕的表情，我繼續說：
「而家啲人成日望住手提電話，對身邊嘅人好冷淡
我希望多啲人可以關心下身邊嘅人
其實外國好多人咁做，但香港就冇人咁做」
她點一點頭
「你估下你係我搵嘅第幾個陌生人？」
她猜：「第二個？」
我說：「第一個」
她笑了笑
　
「其實我鼓起好大勇氣先做到，同埋要揾到你都唔易
成車人都望住電話得你一個冇，你平時用唔用電話？」
她細細聲地回答我：「都有用」
「點解你搭車嗰陣唔用電話嘅？」
她繼續細細聲回答「用完就放低，冇必要係咁用」
「即係你平時搭車都鍾意靜靜地望下出面，休息下」
她點頭
我笑一笑「咁我咪嘈住你囉」
「唔會」
　
「你而家去返工？」
「係」
「我啱啱通完頂收工」
她終於細細聲地發問「你做咩㗎？」
「我做後期製作，幫電視台做」
她好像開始有點興趣「邊間電視台？」
「新嗰間，ViuTV，你有冇睇過？」
我有心理準備她答沒有，但她竟然答有
我問她是不是看無線多，她說很少看電視
她放工後的娛樂是用iPad上網
　
我轉一轉話題「你咁早起身都咁精神嘅？」
「嗯，你冇瞓覺又咁精神？」
「哈哈，因為我哋做呢行係咁，慣咗，你做邊行㗎？」
「我做護士嘅」
「哦～咁咪好辛苦」
「辛苦㗎！」
　
她說有些護士要輪班，但她上班時間通常是早上到下午
8-9個小時左右，但有時候要OT
我問「最辛苦係咩？太操勞？定係啲病人難搞？」
「最辛苦係啲人唔理解我哋...我做婦產科嘅」
「哦～即係日日要聽住啲媽媽喺度叫」
「哈，係呀，好忙」
　
「如果我未來太太生BB，你建唔建議佢去呢間醫院？」
「睇人，有人唔怕痛，有人好怕痛
有啲人照顧到自己就可以，要求好高我會叫佢去私家
好多時啲人都唔諒解我哋，有咩事一定會怪咗我哋先」
「嗯，發洩喺你哋身上就最唔好，你哋做嘢實好大壓力
不過你做咗咁多年應該駕輕就熟」
她有自信地笑一笑說是
　
接著，開始Dead Air
我開始跟她討論天氣「今朝凍唔凍？」
「凍」
我立即就後悔了
跟陌生人討論天氣只會更Dead Air，令氣温變得更凍

留名

我只好再轉一轉話題
「你有冇試過咁樣同陌生人傾偈？」
她說：「冇，點解你會諗到同陌生人傾偈？」
我告訴她我除了做後期，也是一個演員
演員的其中一個工作就是觀察別人，要懂得觀察才懂得模仿
　
我介紹了她在哪一套電視劇可以看到我的演出
她拿出了一直收起的手提電話「你叫咩名？等我揾下」
我以為她想找我Facebook，原來她想要我全名，在Google揾我
我說我的名字比較難寫，於是她借了電話給我寫
「你知唔知你呢個動作，我哋後生仔叫起底」
「知，而家啲人成日都起㗎啦」
　
她在Google看到我做過舞台劇，說她近年跟女兒到韓國看舞台劇
「咁你咪唔知佢哋講乜？」
「係呀，唔知講乜，陪我個女睇」
她說她的女兒很喜歡韓星，如果不太過份她也不會反對她追星
　
她問：「咁你出街有冇人認得你？」
「哈哈，梗係冇啦！因為我而家主要係靠做後期維生
但係我最想做嘅係演員，希望有一日你可以喺螢光幕見到我」
「加油」
　
半小時的車程到了尾聲，我問她覺得這樣跟陌生人傾偈好不好
她說幾好，從來也未試過這樣跟陌生人傾偈
「咁你第日會唔會試下同陌生人傾偈？」
「睇下對象係邊個啦」
「好似我咁嘅人就唔想傾喇係咪呀？」
「你都傾得下嘅」
「希望你都可以試下同陌生人傾偈，祝你工作順利」
「Bye Bye」
「Bye Bye」
　
她比我先下車，我站起來，換了個位置
我們互相微笑，沒有交換聯絡方法，就此告別
我們都是陌路人，就這樣傾了一場「陌樂偈」
2016-12-30

想方便追看每篇文章，可以去呢度
http://www.facebook.com/ChatToStranger
我會繼續貼喺度，多謝支持

《陌樂偈》第2天－荒謬中的大學生
　
昨天的成功，使我今天的信心更大
我在總站上車，先坐在巴士下層的最後排
以便尋找我今天的目標(說得像罪犯一樣...)
兩個站後，一位男生上車
他來到最後排坐下，和我相隔一個位
機會來了～陌生人！
我今天真的很有信心！
　
竟然還是開不了口......
真的有這麼困難嗎？你也做一次吧～
　
我觀察著他，發現他不是常常看著電話的人
發呆一會，又看一會電話，又發呆一會......
我打算把握他發呆的時機，向他進攻
結果，錯過了多次機會
　
10分鐘後我才正式開口：
「Hello，你喺邊度落車？」
他說了一個地方
「可唔可同你傾一陣偈？」
他竟然爽快地說：「好呀」
這次反而令我錯愕了
　
「我每日迫自己同一個陌生人傾偈」
「哦，咁得意？」
「不如我坐過嚟丫」
「好呀」
我們之間的距離縮窄了
　
「我哋平時上網，例如FB, IG見到陌生人咪好易會同佢哋講嘢」
他點一點頭
「但係喺現實又冇人會咁做，我覺得好奇怪
你有冇試過同陌生人傾計？」
「冇呀，所以你啱啱搵我，我都嚇一跳」
「係咪覺得我好似警訊嗰啲騙徒咁？」
「哈哈，係㗎～點解你會突然諗到同陌生人傾偈？」
「因為我去外國旅行嘅時候，發現啲鬼佬會好隨意咁搵人傾偈，我有諗過點解我哋華人唔會，我哋細個嗰陣阿媽咪會同我哋講“唔好同陌生人傾偈呀～”」
他十分同意地點頭
「所以我哋潛意識就好怕陌生人，冇咩事都唔會同陌生人講嘢。因為細個嘅教育唔同，所以外國人咁熱情同大膽，香港人就咁怕事同冷漠。所以我希望可以推廣多啲人同陌生人傾偈。」
他說這個計劃很有意思
　
我問：「今晚除夕，你會出去倒數？」
「睇下啲朋友到時想點，佢哋想咪出去，唔想同人迫咪幾個人自己數」
「你覺唔覺得特登出去倒數好無謂？迫幾個鐘為咗嗰10秒」
「係㗎，又要同人迫，數完之後又好空虛，不過都係為咗個氣氛」
　
我從他上車的位置推測到他就讀的大學
「你喺xxx讀書？」
「係呀，啱啱放學」
「間學校好唔好？」
「教得幾好，但我本來係住Hall嘅，冇交錢所以今日搬晒啲嘢返屋企」
「即係你啱啱俾人趕走？」
「唔算俾人趕走嘅，我自己住咗個幾月之後都唔想住
　
我從未見過不喜歡住宿舍的大學生，好奇地問他：「點解唔想住？」
「住Hall啲人掛住玩唔讀書，夜晚3-4點都好嘈，留喺度讀唔到書
嗰度個個人都係咁玩，我掛住讀書唔想玩，佢哋反而會覺得我好奇怪」
　
明明大學是讀書的地方，讀書人卻無容身之所
原來當生活在荒謬之中，正常人會被視為荒謬
　
「咁你有冇參加課外活動？」
「好多人讀大學掛住上莊，我都有諗過上，好似好威咁，最後都係冇
我留意到有上莊嘅人，成績好明顯差啲，朝早上堂又恰眼瞓
佢哋好似好忙咁，但可能傾一個通宵，只係為咗傾下張海報用咩底色」
　
我把音量收細地問他：「宿舍係咪好多人扑嘢？」
「香港學生就未聽過，嚟Exchange嘅外國人就一定有」
他說自己住的樓層沒有外國人，所以未親眼睹到過
我告訴他從朋友口中得知，香港大學生也經常在宿舍做愛
「可能我是Year1吧，只住了幾個月，所以未聽過」
我突然感到他對離開宿舍的決定有一絲後悔
　
得知他剛考完DSE，所以便請教他一下
「其實DSE啲分點計？因為我以前考會考」
經過他一番講解後，我終於明白DSE如何計分
　
5** =7分
5* = 6分
5 = 5分
4 = 4分
如此類推
　
「咁點解唔整7=7分，係都要整5**同5*，你覺唔覺得好戇鳩?」
「唔覺，我哋慣咗係咁，覺得冇問題」
　
原來在荒謬中成長，會使人對荒謬習以為常
　
他在大學讀工商管理，我問他：「你畢咗業想做咩？」
「唔知，冇諗過」
「咁點解你揀呢科？」
「有前途」
「如果而家任你揀一個職業就可以做到，你會揀咩？」
他想一想，回答「做銀行」
「點解？」
「見人哋做銀行搵好多錢」
　
香港的教育制度就是如此荒謬，從沒有花時間培養學生的興趣
讀書就是唯一要做的事，前途比一切重要，搵得多錢就算成功
最後，我問他覺得這樣跟陌生人傾偈好不好
他覺得這個行為很有趣，但有些人可能會覺得我有精神病
我告訴他，我也期待著被拒絕的一天
　
「你會唔會試下同陌生人傾偈？」
「可能都會嘅，但唔會咁快做到，我19年嚟先第一次遇到咁嘅事」
「新年快樂，Bye Bye」
「新年快樂，Bye Bye」
　
我們互相點頭，沒有交換聯絡方法，就此告別
我們都是陌路人，在除夕夜傾了一場「陌樂偈」
2016-12-31

LM

https://www.facebook.com/ChatToStranger



《陌樂偈》第3天－失敗後遇上的女校生
　
2017年的第一天，我馬上就心想事成
昨天說期待著被拒絕，今天就立即被拒絕了
今天在巴士上層守株待兔，結果一名中年男人坐了我旁邊
機會來了，陌生人！
經過連續兩天的成功，我愈來愈大膽了
　
還是開不了口......
我觀察著他，頭髮有點白，年紀令我想起自己老爸
坐了十分鐘，他慢慢拿出電話，打開Whatsapp
打算把 2017 Happy New Year 的長輩圖轉寄給別人
他電話突然響起，看來不太會接聽，又令我想起了老爸
他跟家人傾了一會，傾完後便收起了電話
　
我終於開口了：「唔好意思，請問你喺邊度落車？」
他耳朵像不太靈光，大聲問：「乜話！?」
他再一次令我想起老爸
　
我面臨「陌樂偈」有史以來最大的挑戰
要在巴士上大聲跟陌生人傾偈
我大聲地問：「你想唔想同我傾下偈？」
(我今天故意轉了問法，試試會不會有不同的下場)
他十分抗拒地回應：「傾咩呀！？」
附近的人開始望過來了
我解釋我每日都會搵陌生人傾偈
佢大大聲道：「我諗唔係咁好喇！唔好意思！」
我：「唔緊要」
我聽到附近有人笑了出來
我又想起我老爸了
　
你可以想像一下我接下來半程車的心情
而且我坐在入面，無法逃離現場
打算守株待兔，卻來了隻老虎
　
我不想今天就此失敗告終
但這程車是我今天的唯一一程車
下車後，想著還有甚麼地方可以進行「陌樂偈」
街邊有些獨自抽著煙的人，但我不想吸二手煙
　
我走進了一間快餐店，尋找著獨自吃晚餐的人
幾乎每一位獨自進入餐廳的人都是買外賣的
全場只有一位年輕女孩在一個人吃飯
我再一次面臨「陌樂偈」有史以來最大的挑戰
因為我是一位男生
一位害羞的男生
　
我決定買了餐，再走過去
我拿著餐盤，在她身後像蒼蠅一樣來回地走
那位女生一邊吃著焗豬扒飯，一邊按電話
剛才的老虎吃掉了我所有的自信心
但我為了各位讀者，為了自己
還是硬著頭皮衝了過去
　
「小姐你係唔係一個人？」
我突然想起了電影中的追女仔情節
她點頭
「請問我可唔可以同你一齊食飯，傾下計」
她呆了
我表示每天也會找陌生人傾偈，問她可否成為我的陌生人
我又想起了電影中的追女仔情節

她搖頭說：「...唔係...咁好...」
「放心...我唔係想識女仔...我只係想傾下偈，傾完就走」
她低頭瘋狂按電話
「唔好意思，有冇嚇親你？」
「冇」
「你係咪打緊電話報警？」
我當然用開玩笑的語氣問她，但我真心驚她會報警
她笑一笑「唔係...」
「不如我哋...傾一陣偈好唔好？」
「...唔好...」
「你有冇試過同陌生人傾偈？」
「冇」
「不如試下啦，我啱啱俾個中年男人拒絕，已經好慘」
她沒有回應我，繼續低頭瘋狂按電話
　
接著Dead Air了兩分鐘......
　
「呀...唔好意思」
她害羞地抬頭看著我
「你係唔係好介意我坐喺度？」
「冇所謂」
「你讀緊中幾？」
「中五」
「你讀文科、理科定係商科？」
「理科」
「升到大學嘅話你想讀咩科？」
「Nursing」
「啊，我前日同一位護士傾偈，你想做護士？」
「都唔係嘅」
她一邊說話，一邊持續地按電話
　
「咁點解你想讀Nursing?」
「因為讀理科，一係揀工程，一係揀醫護
我唔想讀工程，所以揀Nursing」
「咁你第時想做咩？」
「...唔知」
「如果而家任你揀一個職業就可以做到，你會揀咩？」
她思考了一會，回答：「...冇...諗唔到」
「你由細到大有冇...夢想？」
「...冇」
我再一次為香港的教育制度感到悲哀
我發現她按電話的次數減低了，開始不太害怕我
「我頭先坐低嗰陣，你有咩感覺？」
「好不安」
「你係咪驚我同你Sell嘢，或者呃你錢？」
「唔係，嗰啲我又唔驚
但係要同陌生人傾計，我就...好唔舒服」
「我可唔可以問下你，暫時人生之中最開心係咩事？」
她笑笑說：「冇乜特別，好多時都開心」
「睇得出，咁最唔開心呢？」
她放下了電話
「升中學嗰陣，同個好朋友分咗唔同班...」
她眼中出現一點淚光
「之後佢就...冇同我玩...」
「你好鍾意呢個朋友？男仔定女仔？」
她點一點頭「女仔，我讀女校嘅」

「啊～咁你想唔想讀女校？」
「初頭唔想嘅...」
「因為冇男仔？」
「係，但係而家就覺得好自由，冇男仔可以放啲」
「你哋係咪會玩得好癲？彈底衫...揭人條裙嗰啲？」
「啊～彈Bar帶揭裙底嗰啲好低Lv，F.1先會玩」
我大笑了「咁你哋最癲玩乜？」
「嗯...唔識講」
「唔想講？」
「哈哈...唔係...唔識點講姐，
例如唔著底衫，俾人check就放張A4紙」
　
「你哋會唔會整蠱阿Sir？」
「試過成班紥孖辮，迫埋阿Sir紥孖辮」
「女校係唔係會比較多女同性戀者？」
「我識得一個，我覺得唔算好多」
　
「你有冇用Facebook？」
她說現在的中學生都很少會用Facebook
大部分人都只用IG，FB是小學時用來玩遊戲的
「我開咗個Facebook Page，叫陌樂偈
我會打返我哋傾偈嘅內容放上，雖然你好少用FB」
她看一看我的電話：「嗯」
「你平時係咪好少同男仔傾偈？」
「係」
「所以我搵你傾偈你就咁驚？」
她害羞地點頭
「希望今日同我傾完偈可以令你冇咁驚」
她笑一笑
「你會唔會試下主動同陌生人傾偈？」
「一定唔會！」
「我走先了，慢慢食～Bye Bye」
「Bye Bye」
我站起離開，她繼續與電話共聚晚餐
不知道對方姓名，沒有交換電話，就此告別
我們都是陌路人，在元旦搭了一次「陌樂枱」
2017-01-01

http://www.facebook.com/ChatToStranger



《陌樂偈》第4天－快餐店內的哲學課
　
昨晚，Facebook收到了一位陌生人的訊息
他說看了陌樂偈，覺得這個idea很有趣
我道謝了他，他說其實我們之前見過面
原來他是我一年前，排隊時遇過的陌生人
「我想你問下人對生命嘅睇法，應該好有趣」
於是，我今天多了一項任務
　
昨天被人拒絕過後，今天的心情十分緊張
我再一次在快餐店內尋找目標
這幾天，我學到了一個人生哲理
「當你猶豫要不要做一件事
猶豫得愈久，就愈難開始」
我決定買了餐，就馬上找一位目標衝過去
　
取餐後，我發現今天有很多獨自進餐的人
機會來了～陌生人！
我鼓起勇氣，衝向我鎖定的目標！
...然後在他旁邊那張沒有人的枱坐下
我猶豫了......
　
猶豫得愈久，就愈難開始
經過5分鐘的觀察和掙扎
我選擇了一位看起來十分友善的小姐
我拿起餐盤，慢慢走過去
「新年快樂，請問我可唔可以坐喺度？」
她微笑著回應：「可以～」
「我可唔可同你傾下偈？」
她繼續保持友善的微笑：「你想傾咩？」
「我每日都會搵陌生人同我傾偈...」
「哦～我成日都同陌生人傾偈㗎」
「香港好少人會咁做㗎喎，你哋會傾啲咩？」
「通常傾下閒偈，你有咩想搵人傾？」
她看來誤會了我有心事
　
「冇～我只係想每日都搵唔同嘅人傾偈」
「哦～其實你想同人傾偈好簡單
首先...打少啲機」
我笑了出來，看來她對自己的孩子十分不滿
「拎個心出嚟真誠咁對人，最緊要唔好貪！
同埋睇多啲書，就會有多啲話題同人傾」
她說她喜歡看哲學和心理學的書
　
我問她「你平時點樣搵人傾偈㗎？」
「我唔洗搵人㗎，啲人主動會走嚟同我傾偈」
「可能你有吸引陌生人同你傾偈嘅超能力」
「係呀，我同呢度間餐廳啲人都好熟㗎
你夠唔夠飽呀？可以叫阿姐醒多隻雞翼畀你㗎」
「哈哈哈！我平時都唔會問陌生人拎電話嘅
為咗以後有多隻雞翼，我今次想問你拎電話
不過都係唔好喇，啱啱有人教我，唔好貪」
我們一起笑了出來

「唔見你用電話，你有冇上網？」
「我冇㗎，個電話我都唔係好識撳」
「你知唔知啲後生仔用咁多時間上網，到底做緊乜？」
「啲人用好多時間，去做一樣嘢...炫耀自己」
一矢中的
　
她繼續說：「我覺得好晒時間，你行出嚟係咩樣，人哋有眼睇㗎麻」
「而家好多女仔，網上個樣同行出嚟個樣完全唔同㗎！」
「哈哈，係咪化晒妝影到啲相好靚咁呀？」
「唔單止，佢哋會用電腦執相」
「有咩意思？見到真人嗰陣咪知係假」
「所以啲人愈嚟愈唔敢係現實世界面對人」
　
她說：「有個實驗，畀三種女仔啲男仔揀
唔化妝 、化淡妝 同化濃妝 ，化濃妝嘅女仔係最低分」
「因為太假？」
「可能因為濃妝女仔似唔正經」
「咁最高分呢？」
她回答：「淡妝」
「哈哈，係咪因為唔化妝又太嚇人喇？」
「咁人始終都係鍾意靚嘢嘅，
睇得出你都鍾意靚嘢㗎，如果唔係你都唔坐落嚟」
我又大笑了，今天遇上了幽默哲學大師
　
「我會將同陌生人傾偈嘅經歷寫低放上網
有一位讀者想我問你，你對生命有咩睇法」
「關於人生嘅意義，每個人都有唔同諗法
去到唔同年紀，又會有唔同體會。特別係去到30歲左右會有好大改變，身邊開始會遇到一啲問題，但冇人幫到你。呢條問題，你有冇叫佢問下自己先？」
「佢問得其他人，相信佢都有自己嘅答案」
「既然佢有自己嘅答案，又洗乜聽我嗰套呢？」
我突然好像覺悟了
「所以你唔會話我聽，亦唔會聽我嘅答案」
她微笑點頭，露出「你明白了」的表情
　
我很想繼續和她傾計，但工作關係要走了
我說昨天被人拒絕後信心盡失，幸好今天遇到她
她繼續保持著微笑地說：
「冇失敗又點會有成功嘅喜悅呢？」
　
我拿起餐盤，跟她道別：「希望下次會再喺度見到你，特別係想食雞翼嗰陣，Bye Bye」
我們笑一笑，沒有交換電話，就此告別
我們都是陌路人，在快餐店傾了一場「陌樂偈」
2017-01-02

http://www.facebook.com/ChatToStranger



《陌樂偈》第5天－傾場偈竟然有機會做騎師
　
有想過跟陌生人傾一場偈，就有機會成為騎師嗎？
世間上竟然真的會發生這種事！
我今天遇上了一位馬匹訓練員
　
晚上在屋邨商場內，一間像冒險樂園的店內找目標
我一直想知道，那些遊戲機到底有甚麼魔力
令一班師奶阿叔、公公婆婆，一日玩到黑
場內只有幾位婆婆，呆坐在一部大型Jackpot機旁
　
面對著老人家，我選用簡單一點的開場白
「Hello，請問呢部機點玩？」
她十分抗拒「我唔玩㗎！你問員工啦」
她前方的位置插著一張積分卡
「呢張卡唔係你㗎？」
她被踢爆了顯得有點驚慌「唔係我嘅」
旁邊另一位婆婆馬上搶了她的卡說：「哦，多謝！」
兩位老友記便開始爭奪那張卡了
我對著眼前陌生的景況，像到了另一個星球
我自知無能力跟外星人溝通，於是我離開了這店
　
店外站著一位老伯伯，臉帶微笑地望向店內
不知他在打量著各式各樣的遊戲機，還是外星人
對著老人家總是比較易開口「伯伯你等緊人？」
伯伯有點錯愕哋看過來「唔係呀」
「你成日喺度玩㗎？」
伯伯回復笑容「唔係呀，我唔玩㗎，我睇人玩」
　
伯伯說已經很久沒玩，最多人玩是推銀機
他說很多人整天在玩，是為了把積分賣給人賺錢
原來現在的積分卡很先進，可以卡過卡轉給別人
但積分不能換回現金，只可以用來換超市現金卷
「就算點玩都賺唔到錢㗎，一定輸」他說
「即係啲人唔係為咗贏錢？只係想打發時間？」
「啲人諗住贏㗎！好多人玩到輸成萬蚊㗎！」
我跟你現在一樣，呆了。
　
「輸咁多錢？咁咪好似賭場咁？」
「根本就係賭場」
「咁你以前最多輸過幾多？」
「輸幾百啦，輸到飲茶錢都冇, 而家唔玩喇」
「你最多見過人輸幾多？」
「呢度個看更阿姐輸到賣咗層樓」
我再一次跟你現在一樣，呆了。
看來剛才遇到的外星人，就是病態賭徒了吧
到底有多少人關注過這個社會問題呢？
　
「你退咗休幾耐？」
「95年退休，而家80歲」
伯伯看起來只像6-70歲，十分有精神
「嘩！你好健康喎，你以前做邊行㗎？」
「我騎馬㗎」
難得遇到了這麼特別的職業

「騎馬呀～喺邊度騎呀？」
「喺馬會」
「即係...騎賽馬呀？」
「係呀，我係騎馬人，負責訓練啲馬嘅」
我感到十分興奮
「嘩！咁西利～騎住隻馬跑係咩感覺？」
「搖下搖下，會感受到同隻馬一齊跑」
伯伯一邊說，一邊模仿騎馬的動作
　
「你同時間會訓練幾多隻馬？一隻？」
「十幾隻，我一騎上去就知隻馬幾多班，跑唔跑得」
伯伯表現得十分自豪
「咁你咪知每場邊隻馬跑得最快」
「係㗎～」
「但係你唔可以買馬？」
「我可以買㗎」
「嘩！咁你咪知邊隻馬贏囉」
「唔知㗎～嗱，我知隻馬跑得嘅，佢個頭肯去，
前腳肯去，後腳肯去，你話佢贏唔贏丫？」
我配合著他說：「贏呀」期待著他的反差
「贏？但係佢個背脊唔去呢～」
他展露出別有意思的微笑
我思考了兩秒後，張開了口，慢慢點頭
「造馬」
「所以你都冇得估嘅？」
「係呀，我見邊隻跑得又冷門咪買下，熱門唔買」
　
我十分好奇地繼續問：「點訓練啲馬？打佢？」
「我唔打馬㗎！餵佢食嘢，慢慢騎到佢聽話」
看得出他對馬匹十分有感情
他補充說：「但有啲人會打，用鎚仔揼都有」
「你同啲馬好好朋友？」
「係呀，同馬講咩語言都通嘅，佢聽得明
好似我哋就講－去！去！外國人就講英文」
他又再模仿騎馬的動作

我聽得十分投入，高興地說：
「我都好鍾意馬，一直都好想學騎馬」
「你幾多歲？」
我說出了自己的歲數
「啊～如果你早一兩年遇到我，我介紹你去做」
「哈哈，做騎馬人？」
「做騎師呀！」他認真地說
我大笑了出來「做騎師！？真係㗎？」
　
「我契仔本身喺馬會做緊，啱啱去咗外國
你身型就Fit喇，但年紀大咗少少，早兩年就得」
「真係可惜喇，早啲識你就好」
「你可以去做拉馬」
「拉馬？有冇得騎馬㗎？」
「冇，負責清潔馬房、照顧啲馬同拉馬」
「拉佢入閘嗰啲？」
「唔係，拉佢出場，拉入閘嗰啲高好多人工」
「咁拉馬有幾多人工？」
「冇馬跑嘅月份萬六，有馬跑嘅月份四萬幾」
四萬幾！我又一次呆了～

「咁你係做騎馬人係咪搵好多錢㗎？」
「我退休嗰陣每個月萬一蚊」
我聽起來覺得不算很多
他繼續說：「退休金有百幾萬」
「嘩～都唔少錢喎～你做咗幾多年？」
「63年入職，做咗6年拉馬就轉騎馬人
得6個騎馬人訓練所有馬，40幾人爭6個位」
他又再表現出自豪的表情
　
「你有冇聽過早排有隻馬叫 巴基之星？」
「冇，我而家冇做就冇睇馬喇」
我告訴他「巴基之星 」在網上很紅，由尾跑到最頭
他也分享了一些馬由尾追上來的經歷
我問他為甚麼會有這種後追馬，是性格還是策略
「睇隻馬，有啲馬開頭領先好多，但唔夠力都係冇用
有啲馬係愈跑愈快，跑到尾對後腳伸到去個頭前面」
這次，他在模仿一匹馬
　
接下來是一系列的「我問佢答」
「你有冇試過受傷？」
「試過跑跑下隻馬自己腳撞腳，我跌咗落嚟
成個人暈咗，到白車嚟先醒，不過冇乜事」
　
「係咪唔可以企喺馬後面？」
「後面同屁股旁邊都好危險，後面最多踢開你
旁邊打橫踢埋嚟，就乜都冇㗎喇」
　
「如果我見到一隻馬，要點做先可以同佢做朋友？」
「摸佢頭頂，佢會好舒服㗎～因為佢痕自己R唔到」
「背脊痕佢自己R到咩？」我好像突破了盲點
「哈哈～背脊有人幫佢梳丫麻！」

「你退休嗰陣有冇好唔捨得啲馬？」
「唔會話捨得，都冇得你話唔捨得」
他十分感觸，懷念著以前騎馬的日子
　
多有趣的陌生人，也有分別的時候
「我要走喇，你成日落嚟呢個商場行？」
「係呀，我冇嘢做日日都落嚟行下」
「希望再見到你，Bye Bye」
「Bye Bye」
我們互相微笑，沒有交換電話，就此告別
　
回家後，我開始有點後悔，應該留個電話
有空的時候，請他介紹我去做拉馬也不錯
之後幾天，我常常到那個商場，希望碰到他
但我也再沒有遇過這位馬匹訓練員
我們都是陌路人，頂你個肺做乜唔留電話
2017-01-03

http://www.facebook.com/ChatToStranger



《陌樂偈》第6天－地下鐵的精神病人
　
地鐵車箱內，一名男子在自言自語，手指不停指向周圍的人
附近乘客都用奇異的目光看著他，沒有想人靠近，除了我
「Hello」我慢慢向他靠近
他顯得有點驚慌，不停激動地搖手，示意我不要接近他
「唔洗驚，你冇事丫麻？」我說
他急忙地拿出了一張精神病証件給我看，咽泣著說：
「唔好意思呀！我有病㗎！我有覆診有食藥㗎！」
　
看來他很清楚自己有病，也知道其他人都很害怕他
但他控制不了自己的行為，於是見我走近就馬上道歉
令我想起了一套叫《Memento》的電影
主角有短暫失憶症，他連剛剛發生了甚麼事也會忘記，卻清楚知道自己有這個病
於是他每次遇到陌生人的開場白也是「對不起，我有短暫失憶症」
　
我本來打算拍一拍他膞頭，使他放鬆一點
突然想起可能會刺激到他，所以把手收回了
我說：「唔緊要，冷靜啲，我想同你傾下偈啫」
「哦～哦～」他開始冷靜下來
　
為免他太緊張，我保持微笑地問他：「你而家去邊呀？」
「去旺角，我今日放假」
「你平時做咩㗎？」
「我喺庇護工場返工」
「負責做啲乜？」
「畫畫」
「畫啲畫用嚟做咩㗎？」
「畫啲畫送去庇護工場」
我不知道是他說錯了，還是真的有一種工作，是負責在庇護工場畫畫送去庇護工場
　
「佢哋唔畀我同其他人一齊㗎，要分開我自己一個人畫畫」
我繼續保持微笑地問他「點解嘅？」
「如果有人拍我膞頭，我會一腳踢開佢，我唔鍾意人拍我膞頭」
他馬上把自己的腿功示範了出來，我慶幸著剛才沒有拍他膞頭
他補充：「或者會用手指大大力篤佢個肚！」
看來在交通工具上的阿叔都不喜歡被人拍膞頭，大家要注意！
　
他又開始用手指指向其他人
我微笑著叫他不要這樣做，會嚇怕別人
他說：「我唔鍾意女人㗎！」
「嗯，但係都唔好指住人，點解你唔鍾意女人？」
「我老婆8年前跳海死咗」他說這句話時出奇的平靜
我同情地說：「你太太過咗身，令你好大刺激，搞到你都有病？」
「唔係，我哋兩個都有病。我細個喺碌㗎床跌落嚟，腦震盪。」
很難想像一對夫婦兩人也有精神問題，生活會有多困難
　
他突然激動地說「我老婆有病㗎！佢自己跳海死，啲人就以為我害死佢，明明係佢自己跳落去，唔關我事㗎！所以我唔鍾意女人！」
他邊說邊指向其他女人，我微笑著叫他細聲點，不要指向別人
他十分聽話，立即細聲下來
　
「我知自己有問題㗎，我覺得自己個身體有兩個人，左邊男，右邊女
我唔鍾意多人嘅地方，有時啲人行埋嚟我會好驚」
「咁我頭先行埋嚟有冇嚇親你？」
「冇～但係我成日會覺得其他人望住我，有人想跟蹤我」
「你知道其實冇人跟蹤你，但你又控制唔到自己？」
「係呀～我唔鍾意人哋對住我笑㗎」
我即時收起了一直保持著的笑容
他又補充：「對住我笑同喊我都唔鍾意」
　
他到站了，比我先下車
你可能會問我，我害怕他嗎？
我不害怕，只感到同情
我明白精神病患者有可能會踢人或用手指篤人個肚
為免受到傷害，一般人不敢靠近他是十分正常的
但我在其他人臉上看到的，不只是害怕，而是厭惡
　
最近，我看了一套電影叫《一念無明》
戲中由余文樂飾演的主角患了躁鬱症，控制不到自己的情緒
生活十分艱苦， 得不到別人的關心，每天也活在悲傷之中
很多觀眾都看得感動流淚，十分同情這個角色
但在現實生活中，大家對他們的態度為甚麼會截然不同呢？
因為他們不是余文樂？還是因為他們生活在殘酷的現實中？
　
想像一下，當你不幸患上了精神病，控制不到自己
所有人都討厭你，永遠只能孤獨一人，是怎麼樣的感受？
精神病患者不是壞人，只是不幸的病人
　
他站在月台，依然隔著「月台與車箱間之空隙」跟我傾偈
我叫他小心一點，不要再指著別人了
車門正在關閉時，他還在努力地向著我說話
看來他很不捨得我這個陌生人，因為平時每個人也無視他
列車開出，我們不知道對方的名字，就此告別
我們都是陌路人，在地下鐵傾了一場「陌樂偈」
2017-01-04

想方便追看每篇文章，可以去呢度
http://www.facebook.com/ChatToStranger
我會繼續貼喺度，多謝支持！

上一個Post開咗喺「講故台」，好多巴打問我啲文係真定假
每一篇都係真嘅，真係作都作唔到咁多唔同人嘅故事
反正上個Post沈咗，喺呢度開新Post，由第一篇開始貼返

之前生活繁忙，未有時間打文
今日開始，我會Keep住更新
多謝各位巴打支持！

上個Post：https://lihkg.com/thread/69209/page/1

做show咩

上一個Post開咗喺「講故台」，好多巴打問我啲文係真定假
每一篇都係真嘅，真係作都作唔到咁多唔同人嘅故事
反正上個Post沈咗，喺呢度開新Post，由第一篇開始貼返

之前生活繁忙，未有時間打文
今日開始，我會Keep住更新
多謝各位巴打支持！

上個Post：https://lihkg.com/thread/69209/page/1

每日揾一個人傾偈

好睇 已like

做show咩

巴打，請問點解咁講呢？

好睇 已like

多謝巴打支持！

http://facebook.com/chattostranger



《陌樂偈》第8天－雨傘下長大的下一代

今天跟一位中學生傾偈，我問了他一條問題
「你覺得自己係唔係中國人？」
「香港人」
「咁你覺得自己係唔係中國人？」
-------------------------------------------------------------------
　
在巴士上層，連續三次被陌生人拒絕了
讓我發現下班時間很難進行「陌樂偈」
因為回家途中的人都已經十分疲倦
　
即使找到眼睛張開的目標
前後左右總有人在睡覺
我也不好意思在旁邊傾計
　
在我心灰意冷的時候，找到了一位穿著中學校服的男生
本來打算找其他類型的陌生人，以滿足各位的好奇心
但十分抱歉，整架巴士上單獨又清醒的生物，我都已經試過了
　
「Hello，可唔可以同你傾吓偈？」
他爽快地說：「好呀！」
看來年輕的男生，都比較喜歡「陌樂偈」
　
「我之前同中學生傾偈，佢話而家啲學生好少上FB」
「而家啲人用IG囉，我就Facebook同IG都會上，你而家做咩㗎？」
他竟然反客為主了！
　
我提到自己在參與電影電視的工作
他說正在讀Applied Learning的電影科
而我不知道Applied Learning是甚麼
原來Applied Learning，是讓學生選擇去讀的興趣科目
例如飛機維修，汽車等等，可以計DSE分，最高拿4分
　
「點解你會讀呢科？」
「畀個目標自己，我想做導演」
在荒謬的教育制度下，終於找到了一位有夢想的學生
　
他中一時參與校園電視台，覺得拍片十分有趣
我問他拍過甚麼，他說拍過「微電影」
「你知唔知咩係短片？」我問
「廣告囉，冇故事性嘅」
原來新一代已經用「微電影」取代了「短片」
　
我告訴他，以前沒有「微電影」這個名詞
我們都是用「短片」來稱呼所有短的影片，短片也可以有故事性
有些中國人認為「微電影」這個名詞有「電影」兩個字比較有型
所以便用「微電影」這個名詞把「短片」包裝成「電影」
就像「副學士」其實不是「學士」、「HKU Space」不是「HKU」
　
提到外來語入侵，我問了他一條問題
「你覺得自己係唔係中國人？」
「香港人」
「咁你覺得自己係唔係中國人？」
　
他思考了一會，然後說：「我唔會話自己係中國人囉」
「即係呢個身份你無可避免，但係你唔想承認？」
他點頭說：「我有港獨意識㗎麻」
我笑著說：「喂～你唔好咁大聲！咁你啲同學呢？」
「我間學校喺雨傘運動搞過罷課」
「中學都咁大膽？最後有冇俾人罰？」
「啲老師都支持」
　
他在雨傘運動時去過金鐘過夜，也有去過旺角
「你嗰陣先中二、三，你知發生咩事嘅？」
「我知，迫到埋嚟冇得唔知，再唔知就港豬㗎喇」
中學時期還是政治冷感的我，心感慚愧
　
他接著說：「冇得救㗎喇...我哋可以做得啲乜啫...冇嘢可以做到」
這句說話由一位中學生說出來，份外悲哀
　
我再問他：「你覺唔覺而家有好多中國嘅用詞入侵香港？
例如：打造，富二代，小三」
「我哋學校有一班，半班都係中國人」
「講普通話？」
「自己人同自己人講普通話，對住我哋講廣東話」
　
「我睇新聞話 魚蛋 要寫做 魚丸子
返學要講普通話，唔准講廣東話？」
「嗰啲小學嘅姐，中學就唔會嘅」
　
「咁你覺得嗰啲外來用語有冇問題？」我問
「冇問題嘅，台灣都係咁用，台灣同中國有啲嘢係相通」
「即係你對台灣文化唔反感，所以唔介意用台灣嘅用語？」
「係，都叫法題問姐，但我覺得唔可以剩係學普通話，就唔學廣東話」
　
我說：「最緊要保留到我哋原本嘅語言、文化，好似 放題 唔會取代到 自助餐，多啦A夢 唔會取代到 叮噹 咁。係喎，嗰隻嘢你會點叫佢？」
　
「多啦A夢」
「你知唔知佢叫叮噹？」
「知，技安都知」
「咁你自細都係叫多啦A夢？」
「唔記得喇，我好似夾雜咗喺中間」
看來再下一代，就沒有人知道甚麽是叮噹
　
香港人喜歡說有新鮮感的外來語，各大傳媒也帶頭推廣
外來語本來沒有問題，最理想當然是新舊文化也能保留
最怕是我們的香港文化，不知不覺被取代了，被遺忘了
　
文化入侵，最簡單的做法是由新一代入手
新一代不會再說短片丶有錢仔丶二奶丶魚蛋
不懂創造，不會建造，不識製造，只知打造
因為他們聽也沒有聽過
就像新一代，不知道甚麼是「叮噹」一樣
　
他到站了，我們還有很多說話未傾，時間實在不夠
他問我有沒有工作機會可以介紹，我說不習慣留電話
只告訴他可以到「陌樂偈」的Facebook Page找我
至今，還未收到他的訊息
　
我們不知道對方名字，沒有交換電話，就此告別
我們都是陌路人，就這樣傾了一場「陌樂偈」
2017-01-06

舊po追到黎留名

正
不過睇就易做就難
我好怕生 如果樓主過黎話同我傾計應該即刻跑走

我想知巴打點解會即走？因為驚？