琴晚掛住推post 同狂loop番534 而家好想好想打番篇睇龔水嘅心路歷程 希望大家唔好介意我長氣
初初自己冇乜點睇愛回家 係無意中睇到龔水啲鬥氣冤家情節好有火花 先開始入坑 追睇番舊集數
龔水由10年結怨 老死不相往來 兜兜轉轉10年後再係職場重遇 無庸置疑呢種命中注定避唔過嘅緣份設定的確係最吸引觀眾
可能因為係現實生活中 好多時候錯過左就係錯過左 跟本冇咩可能咁好彩 可以好似戲劇咁重遇 再相知 相愛 相守 所以呢pair圓滿左好多觀眾心底入面最深切嘅心願 都係最成功嘅原因之一
記得初頭睇到呀龔玩呀水話公開左蓮夢露段錄音 再係後樓梯安慰佢個段 已經預感呢一對將來一定會勁好睇
可惜中段呀龔去左新加坡 佢係的士嗰個無奈要離開心儀對象嘅眼濕濕樣 到而家我都歷歷在目
經歷過工業行動 中間劇情又大起大跌 而家終於睇到佢地修成正果 個種興奮難以筆墨形容 相信每一位龔水黨都心知肚明
呢一對亦都有太多浪漫元素
電台傳情有彼此嘅專屬稱呼 信物一大堆(最重要當然係雙下巴天使) 仲有超多經典對白 好似食蕉連皮 每次調情必出嘅三個字 我驚你唔敢聽(其實就係呀龔唔敢講) 令到呢條愛情線舗得好靚 比起好多830 930劇集還要細膩動人 呢個就係處境喜劇嘅優勢 觀眾係實時咁跟住主角心境一齊心動 忐忑 不安 好似坐過山車咁經歷高山低谷 可能真係低谷愈低 上番高峰先會咁令人振奮 如果冇463咁虐咁絕嘅唔會將你放係第一位 都唔會造就到534嘅呀水比人放無限次飛機之後仲主動幫佢解開心結呢個催淚位 雙下巴天使真係絕世好女人
龔水呢pair 仲令我心血來潮 開始為佢地寫左另一個故仔 諗番自己當初嘅一時衝動 唔經唔覺寫左兩個幾月 真係有莫大嘅滿足感
再次衷心多謝龔水 多謝劇組 帶比我 2018 2019年都係滿滿嘅幸福感
祝開心速遞長做長有 收視集集過30點 年尾台慶掃哂啲獎 證明處境喜劇都可以好出色