是咁的,今年第一次搞年宵
其實都係因為廢青返工搵唔到意義,想自己搵d野搞,發揮吓創意,做啲自己想做嘅事咁啫
由上年五月開始籌備,一路兼職搞年宵,自己團隊有人要返正職,有人要返學,但都一直堅持,自己一手一腳設計、搵廠生產、做marketing,搞到一月頭,產品終於由設計意念變成實物,亦得到一啲傳媒嘅青睞,嗰吓係有咁啲成就感(好似係)
但直到噚日,我哋團隊開始感到失望、沮喪...
年宵開咗兩日,買我哋啲貨嘅人真係寥寥無幾;相反,拎住侵權產品、淘寶貨周圍行嘅人就多到好似精蟲咁
冇錯,可能我哋嘅產品係比淘寶貨貴,但我哋真係好用心去做,亦好用心去sell
賣得貴啲唔係我哋想食水深,而係自家設計加小批量生產真係成本高好多,加上我哋用靚料,亦做好成個package ,令到我哋平唔過侵權佬同淘寶佬
問心,我哋設計一定全場獨家,亦極具本土特色,我咁講,呢個年宵以外真係唔會搵到
但頭兩日,我哋事實上真係賣唔出貨...亦有好多拎住侵權/淘寶貨嘅人對我哋投以不屑嘅目光... 的確,我哋好失落... 唉
在商言商,或者我哋今次真係太傻仔... 下次有機會再搞可能唔會自己設計了...
今次上嚟打咁多唔係要宣傳,亦唔係要大家可憐,只係想表達吓對香港呢個市場嘅失望... 同埋,港豬們,唔好成日問點解香港冇本土特色、冇創意,因為香港好多人其實唔識去欣賞
P.S. 衷心感謝呢兩日識欣賞我哋嘅香港人,雖然唔多,但為咗你哋,我哋會繼續努力
完!