當你實現的美好將來能淡化我悲哀
「開心就好,要幸福落去啊。」我向他露出了自以為很燦爛的笑容,是我的祈願,我的祝福。
「嗯,你都係,我都想你幸福。」
「哈哈,好老套啊,講呢啲。」
「明明係你講先嘅,老套!」
「哎呀,我哋都老喇。」
「係㗎,你老過我。」
「差嗰兩個月,咁都同我計!」
「兩個月都係老,哈哈。」
看着他的笑臉,就能忘記悲傷,抹去一點點痛,和眼角的淚水。
又何必掛礙秒速一段愛
「唔話當年喇,明明我哋仲好後生㗎嘛。」
「講吓而家囉,見你成個kol咁,啱啱先去完歐洲?」
「係啊,去咗兩個月,見識下世界嘛。」
「威啦,有冇識返個鬼仔啊?」
「學你話齋,總會有。」
「識食啊下。」
「無啦,萍水相逢啫。」
「有緣千里能相會啊,話唔埋㗎。」
「可能啦,緣份到了我都唔抗拒嘅,哈哈。」
一瞬即逝,是時間,是回憶,是我們。
我靦腆 你也坦率
未可得到的最愛
再後悔都精采
在屋宛前,一樣的位置,我們面對面站着。
「再見喇,夜喇快啲上去。」
說再見,未必會再見。
「嗯,你都係。」
「得閒再約出嚟啦。」
「下次帶埋女朋友出嚟比我哋見下啦。」
「哈哈,睇下點啦。咁,真係再見喇。」
「再見。」
他轉身離開,一樣的背影,我看過無數遍,只是我們的身影不會再次相遇重疊。
「多謝你,多謝你愛過我。」我低聲說,他好像跟我有心電感應一樣,竟回過頭來向我揮手,示意我快點回家。
他消失了。
他專心致志的看着我,聆聽我不怎麼樣的歌聲。有些歌詞忘記了我便隨便胡混過去,當他發現了我不自然的停頓,就會偷笑一個。
「點啊?好唔好聽?」
「嗯,好聽。」
「就咁咋?無其他喇?」
他默不作聲的看着我,十多秒過去,才緩緩開口。
「櫻花樹下嘅續集,睇嚟係一個遺憾。」
「百年樹木,首歌叫百年樹木。」
「見證人間所有愛恨,係幾有意思嘅。」
「嗯,我都覺。」
「多謝你嘅推薦歌,唔知等到我有得聽嗰一年,會變成點呢?」
「唔好意思呢兩位,我哋收舖喇。」店員姐姐悄悄走過來,叫我們離開。原來時間已經這麼晚,我們匆匆收拾好,離開本日最後一個景點。
晚風吹得更狠,我們倚在海邊的欄杆,他說還有一點說話未講。
「最後講埋呢樣,就送你返去啦。」
距離一天的結束,還餘15分鐘。