《我還是救護員的日子》(2) [假人真事+你問我答]

機一定有 不過好撚低

其實真係好多人情冷暖，馬路唔讓救護車，升降機唔等人，泊車趕住救人又俾保安屌...

俾保安屌先最受氣，係當面屌我地老母，又話呢度唔泊得車，又話咁樣會令佢好難做...

仆佢個臭街，救緊命架嘛

我身邊有朋友考咗七年都考唔到。

之前講過，係資源問題，部門唔會想再投放資源去培訓你做消防員，然後又要訓練過一個救護員去替代你。

唔係話無機會轉，但真係好微。

今晚先出到文。

今朝青衣嗰單嘢....年頭年尾特別多呢啲嘢，同埋特別多人走，唔信邪都唔得。

好多保安仲串過馬撚，叫佢開消防閘，佢話淨係開比消防車，唔開比救護車 真係要同佢講話緊急車輛都用得，係咪唔開，有咩事你負責。
講完先肯死死氣開閘，好辛苦你咩屌你

先遣到先：師兄mask丫唔該！
先遣到後：師兄唔該晒！

痴線，咩剩係開俾消防車，一啲常識都無，如果警車話要入黎，佢開唔開啊？應該開都開唔切添啦，仲阿sir前阿sir 後，見到救護員就恰。

救護員救人先係最緊要。

師兄。交比你

俾mask 都唔緊要。做FR call ，早過救護車出動，但千方百計要吊返我地尾，總之就最後先到場

做collapse真係成日唔開pad ，一句師兄交比你跟住啦啦聲走左去

反映出香港人對救護嘅認識不足。

我有大學同學仲以為救護係隸屬醫管局，並非消防處；

有大學同學問畢業後想做咩，我話救護員，佢話姐係跟車送貨佬；

有啲人以為救護車司機只係揸車，唔需要識急救，唔需要上樓；

；甚至有人以為救護員只係將傷者搬去醫院，救護員做嘅檢查同急救係浪費時間......

教育不足係其中一個主因，試諗下以前小學常識/英文書入面，全部都係講消防員、警察、醫生、護士...... 甚少提及過「救護員」/ 'Paramedic'。

大撚把人 一上車就問做咩唔開車 做要搓果d 去到d人仲問你搞咩咩呀 仲唔走 仲唔送佢去醫院
根本d人就當救護車係DHL

真係慘 大把人當救護員係人體物流，特別係老人院：快啲掉佢去醫院啦，阻住晒

老人院都算 預左咁 最撚憎有少少錢又唔係好有錢果d 要求多多 成日叫開車 有錢自己坐的士啦 去私家啦

05 升職

於我眼中，救護員主要分兩種，當然唔係紅牌同綠牌，而係「搏」同「唔搏」。

局務，又名功夫。除咗去車救人，救護員於上班時間係需要處理局內既一切事務，一般都係文書工作，或者一切與救護站有關既其他支緩工作。

搏，係指搏升職。唔搏，即係嗰啲安於現狀，唔求爭取表現去博上位既人，呢類人一般被稱為大師兄。

若然要搏升職，就要俾上司見到自己係「做到嘢」。點為之做到嘢，唔係指去車救咗及幫咗幾多個人，收到幾多封讚揚信，而係指究竟幫上司處理咗幾多局內事務。

聽落其實相當諷刺，救護員升職與否，無錯係根據工作表現，但呢種表現同救護工作係完全無關。

「咦…杰佬你今晚唔係請咗假架咩？返黎做咩？」今晚返夜班，剛換好制服既輝仔問。

「返黎做嘢呀嘛。」穿著便服既杰佬回答。

尚未正式成為兩柴既杰佬係其中一個搏緊既人，明明請假但返黎既原因當然係為咗處理局務…

都係既，平時返工九成時間都係去車，邊有多餘時間去處理文書工作，咪唯有趁放假時間特登返局搞，或者放工後留低搞。雖然係OT，但係唔會有任何補水。

加班都好講timing，話明係爭取表現，當然係要揀阿sir仲未放工既時間返黎加班…

點解？

因為要俾阿sir見到，要俾佢知道你係點樣犠牲休息時間都要特登返黎做嘢。若然只係一直默默付出，自己所做過既嘢並無人知道亦無人見到，效果會係事倍功半。

曾經聽聞過，唔少結咗婚而又搏緊既救護員都經常被老婆投訴，話個老公成日唔喺屋企，就連放假都要返工，好似無咗個老公咁。

工作途中，杰佬既手機忽然響起：「喂？老婆？係啊返咗公司喇，而家做緊嘢。」

杰佬傾電話期間，局內忽然響鐘…

「燈凳燉鄧～」

「緊急輔助醫療救護服務，秋名山去123號救護車...」

杰佬：「響鐘喇，我去車先喇，你早啲休息啦，拜拜！」

然後佢關上手機。

「咦…乜你老婆唔知你返黎係做局務咋咩？」輝仔問。

「唔知架！」杰佬回應。

「咁你今晚唔會做通頂架？咁你等陣去邊？」

「超！你理得我？」

「去車啦，唔好理人咁多。」我同輝仔講，今晚我地係同一車更。

我當然知道，杰佬做完局務之後係有「特別既地方」要去，第二朝先會返屋企。

升唔升職，搏唔搏呢樣嘢，我當然有認真考慮過，但我諗自己係偏向「唔搏」嗰種人。實不相瞞，其實我最近萌生咗一個連自己都感到好掙扎既想法，就係選擇唔做救護員，打算辭職。

呢個想法，我只係同細華一個人講過…

「其實我想唔做。」當時車上只有細華同我兩個人。

「原因？」

「因為我發覺自己想做既，原來係另一樣嘢。」

當初投考救護員，某程度係因為阿傑，因為我想救人，想憑住救人去消除自己心中既內疚。身為救護員既呢段時間裡面其實幫過唔少人，過程中獲益良多。但日子越耐我就越發覺，救護員其實並唔係自己既理想終身職業。加上，我發現無論幫幾多人救幾多人都好，我心中既內疚依然無法消除。

「哦…」細華並無追問我到底想做啲咩，所以我亦無講。

我想做啲咩？我諗要賣吓關子先。

細華又講：「無所謂既，最緊要自己諗清楚。」

「其實如果唔係呢個原因，我本應打算今年結婚，但我覺得自己既工作好似仲未穩定…」

「痴線！結唔結婚呢啲嘢，係睇份工穩唔穩定架咩？係睇個人穩唔穩定架者！」

聽完對方呢句說話，我彷彿有種當頭棒喝既感覺。

「哈…咁你呢？你又打算時結婚？」我問。

細華有個差唔多拍咗十年拖既女友，感情狀況穩定。佢女友係一名護士，重點係佢未做救護員之前就已經同呢位護士女友一齊。

「唔知架！或者唔結都唔出奇，可能同居住埋一齊就算。」

「你另一半得咩？」

「得啊，只係價值觀問題者，我同佢都唔係隨波逐流既人。就算真係要結婚都一定唔會擺酒，可能就咁簽張紙咪算。」

細華對於結婚既態度，就好似啲病人拒絕送院咁，只需要係簽一張紙。

有一點係無庸置疑，佢地係相當擁有自由及生活態度既一對。畢竟唔少人係因為要應酬兩邊屋企人既關係，所以結婚時要使一大筆錢去搞場大龍鳳。

細華問：「你嗰件唔得咩？」

「咁又唔係…我地本身都唔想大搞，加上兩邊屋企人無咩所謂。」

「咁就得啦…而家咩年代啊，結婚仲係兩家人既事？係兩個人既事！」

細華係唔係一個「搏」既人？

係，佢幾年前就已經由紅牌轉咗做綠牌，目前唯一要做既就係等升職。搏升職既人，除咗要做局務，其實仲有一個條件，就係病假要少，甚至係要無請過病假。

簡單舉個例子，假如有兩個同時搏緊升職既人，大家做局務既表現差唔多，高層會以「邊個請得最少病假」去決定升邊個人。

好諷刺呢？但呢個部門就係咁。

病咗當然要請病假，但由於個制度同規則係咁，所以大部分搏緊既人係情願病住返工，務求要做到「零病假」紀錄，務求要於最短時間內順利升職。

細華雖然係搏，但由於佢係一個有性格既人，不甘於完全屈服於呢個腐敗既制度之下…至少佢病咗會去請病假，而呢啲病假唔係一般既射波，係合理既病假。

試想一想，假如救護員抱恙返工，而工作效率及表現其實係會受到病情所影響，咁樣對傷者病人公平咩？

畢竟救護員係一份對人既工作，所做既一切係會由病人既身體去直接承受。

生病去睇醫生，然後請病假，本應係一件理所當然既事。

由於細華唔能夠做到「零病假」，所以升職既事一直被拖延。關於呢件事，上頭方面只有咁既回應：「我覺得你仲未適合做救護車主管囉！」

一句認為未適合，只係因為救護工作以外既表現唔合乎上頭既心水，職途就會出現阻濟。

呢個看似係一個正氣凜然既部門，但其實背後既一切只係得啖笑。

06 奇聞

職業生涯當中，總會遇到一啲靈異事件…或者咁講，就算係遇到，但連自己都唔確定係咪真係「嗰啲嘢」，譬如夜晚揸車既時候，明明見到有個著住白色連身裙既女士企喺路邊，但當經過後再睇返倒後鏡，竟然發現剛才嗰位女士唔見咗…

或者只係自己眼花？

又譬如夜晚喺局訓覺途中，隱約聽到出面有啲雜聲，似係有人喺度執嘢，但當晚返工既人明明全部喺床上面訓緊覺…

可能係自身所屬生肖既問題，由細到大都未真正親眼見過鬼，喺呢方面無乜緣份，而我亦唔希望有朝一日得到呢種緣份。

有一宗唔知算唔算係靈異既個案，可以分享吓。

係一宗不省人事個案，發生於某夜凌晨三點三十三分…

唔知點解，我好記得當晚呢個去車時間，可能係因為電子錶上既數字全部都係三，再加上當時有種好強烈既預感，今次呢單不省人事唔係流料。

去到事發現場，比我地更先到達既先遣急救員已經開哂壇，幫傷者做緊CPR，而對象係一名婆婆，報案人係一位伯伯，佢係婆婆既丈夫。

「師兄，交俾我地！」樂文師兄同一班身穿藍衫既消防員講。

救護員到場，先遣急救員可以將工作交返俾對方，因為佢地既任務經已完成，可以功成身退。

我地幾個好似平時咁，各自各埋位做嘢，樂文師兄負責操作AED機，輝仔負責CPR，而我則負責處理氧氣供應。

然後，當時出現咗一個畫面，令到我地三個，仲有一班準備撤退既消防員感到異常驚訝…

「哇！？唔對路喎！」輝仔大叫咗一聲，停止咗CPR。

「咦！？係喎！」我當堂被嚇到呆咗。

「唔乸係啊！？」連樂文師兄都嚇到成個人彈起。

「哇！咁邪！？」一眾消防員都感到震驚。

大家之所以咁驚，係因為在場所有人都見到婆婆一隻前臂正在慢慢舉起…

手肘貼地，前臂慢慢舉高至垂直九十度，就好似一個訓低咗既人作出舉手既動作咁。

一個正常人舉高自己隻手當然係唔可怕，但問題呢個人理應係斷咗氣…

出現呢個現象就只有一個可能性，就係婆婆仲未死！？

其中一名先遣急救員立時開聲：「無理由架喎，頭先我地明明仔細檢查過佢係無呼吸脈搏！」

「定啲黎…定啲黎…」樂文師兄伸手摸向婆婆既頸動脈，過咗一陣佢先開口：「真係摸唔到有脈搏喎，你地兩個都試吓。」

然後我上前檢查，摸向婆婆既頸側：「無脈搏喎…輝仔你黎。」

輝仔一樣係摸向婆婆既頸：「我都摸唔到有嘢喎！」

我地三個輪流檢查，並再三確認，確定婆婆確實係無呼吸脈搏，無任何生命跡象。

咁…即係點！？

一個斷咗氣既人舉高自己雙手，係迴光返照！？定係屍變！？

又或者係阿婆其實有心願未了，於是以一個咁靈異既形式話俾我地知！？

抑或阿婆都已經活咗幾十年，其實早就對呢個世界感到厭倦，早就想安安樂樂離開…而家忽然黎咗班人打算救返醒佢，於是舉高手宣佈投降！？

樂文師兄當機立斷：「唔好理咁多，繼續做嘢！」

婆婆一雙前臂依然係保持舉起既狀態，但我地無理，只係繼續做自己應該做既事，直至將對方送到醫院。

事後大家傾返，如果以一個科學啲角度去睇呢件事，或者係去世既阿婆當時剛好出現屍僵，所以肢體呈現出僵直既情況，而當時我地又幫對方做緊CPR，由於軀體不斷承受外界力量既擠壓，手腳於是透過反作用力從而自然地慢慢提起…

但呢個解釋相當勉強，畢竟大家做咗呢行咁多年都未遇過咁既情況。

若然以一個迷信既角睇去睇，或者阿婆舉高手其實係想表示：「唔好再救我喇，你地俾我走啦！」

相信呢件事都算係職業生涯裡面其中一件頗為靈異既事件。

但係遇到咁既情況，到底驚唔驚？

有咩好驚，救護員只係憑良心救人，所以絕對係問心無愧。

＃＃＃＃＃＃

另一單奇聞，收到既情報係「扭傷」。

當時心諗應該都係扭傷手扭傷腳嗰啲，事發地點係住宅單位，可能係事主喺屋企爬高執嘢時唔小心趺低然後扭傷。

根據救護車上幾個人既過往經驗，多數都係咁既情況。

點知去到事發單位，入到房竟然見到一男一女，女既剩係著住胸圍底褲，坐喺床邊食緊煙。男既全身赤裸訓喺床上，佢下身俾棉被蓋住，面容有啲扭曲，偶爾發出屬於慘痛既叫吟。

一睇就知傷者係個男人，但我地幾個仲未知係到底發生咩事。

女人繼續吞雲吐霧，表現悠然淡定，俾人一種完全置身事外既感覺。

樂文師兄：「請問係發生咩事？」

「唉…我都唔識講，你自己問佢。」女人指既，當然就係訓喺佢身後既男人。

然後我地幾個同時望向個男人。

「阿sir…我嗰度好痛啊…」男人拎開原本蓋喺身上既棉被：「你地一定要幫吓我…」

！？！？

當男人將棉被完全拉出，繼而三點畢露既時候，我地三個人都呆咗，心底裡好想笑，但唔知點解笑唔出聲。

男人既陰莖處於勃起狀態，但估計唔係勃起既全盛時期，因為條陰莖睇落開始有啲委縮…

問題並唔係呢度，令我呆咗既係，佢既陰莖以一個不太尋常既角度彎埋咗一邊，若然係都要用一個詞語去形容呢種狀態，我諗會係「淆拎」。

男人只係輕輕移動身體，突然又發出幾聲叫吟：「我嗰度扭傷咗啊…哎啊…好痛好痛…」

「你嗰度扭傷咗…」樂文師兄露出狐疑眼神，相信佢腦海入面已經浮現起好多可能性：「咁係點扭傷架呢？」

然後我地幾個又同時望向返個女人。

「頭先做做吓愛，可能係我chok得激過頭掛，突然有一吓佢碌嘢入得唔正我嗰度，然後我又坐咗落去，於是佢碌嘢咪好似拗柴咁囉！拗柴啊！明唔明啊阿sir！？」女人描述得非常輕描淡寫，說話不疾不徐。

我嘗試幻想當時既情形，同埋佢地發生性行為所用既姿勢…

坐落去…我估佢地應該係女上男下？

「係喇係喇，就係咁喇阿sir…」男人笑笑口咁講。

成件事好詭異，簡單黎講，其實即係做愛途中條陰莖篤魚蛋！？

樂文師兄面向我地，睇得出佢忍笑忍得好辛苦：「用冰袋冷敷，然後包紮。」

然後我地只係跟返正常程序做嘢，雖然呢次係一啲都唔正常。

一舨扭傷，因為肢體會出現紅腫，敷冰袋係有助消腫，亦可以暫時舒緩痛楚…

但係講到包紮…呢個部位可以點包呢？真係未試過。

最後我揀咗用三角巾，好似底褲咁蓋喺外面，然後前後用膠紙貼住，立即變成一塊超薄尿片。

除咗包紮陰莖，仲有好多嘢係學堂入面唔會教，一切都係講求因應當時環境而作出臨場應變，而呢一次我就創作出呢個三角巾尿片，自己都相當滿意。

將男人送到醫院後，我地討論返呢件事，大家都對女人所講受傷過程描述感到好懷疑，不過當事人係咁講，我地就唯有咁聽。

我地幾個都唔係小朋友，性行為既經驗一定有，而過程激烈亦都一定試過，但從未試過或者聽聞過男方既重要部位會「篤魚蛋」，因為陰莖係由軟組織組成而唔係硬骨。偉大既造物者…即係神，之所以有咁樣既設定可能就係想避免「拗柴」呢種情況出現，如今咁都俾個男人遇到，只可以話佢唔好彩。

最令人感到懷疑既，係嗰個女人…

究竟個女人同男人係咩關係？

女人聲稱佢地係男女朋友關係，但一個女朋友見到自己個男朋友咁樣拗柴法，竟然可以表現得如此無動於衷同淡定？

睇落佢地兩個似係買家同賣家多啲。

個女人會唔會其實係性服務提供者，然後兩人於交易過程中發生咗一啲不愉快事件，於是個女人趁住性愛過程中搵機會「手刃」對方以報仇，但個男人又唔敢喺外人面前揭開真相…

真相係點，相信只有當事人自己先知。

出多兩嘢就出完

好多同事真係搏到牙血都出埋，都未輪到佢地

好多時真係要睇下其他隊嘅老總點睇，要投票之餘仲要睇下邊個老總夠牙力 牙力夠就power大好多

我而家做緊既事，唔知算唔算一種另類教育，希望會有多啲人接觸到呢個故，對救護員認識多啲，又認識多啲呢個部門。