《我還是救護員的日子》(2) [假人真事+你問我答]

最好就係住果邊守果邊。一開始就一定唔熟，好多說話聽咖啦，精神壓力係大咖，衝燈果啲考完個救護車牌，出到黎先學

果時我學車都諗，點解緊急車輛嘅駕駛訓練，係可以冇個地方比你試下衝燈，只係由所謂嘅教車師傅口頭講你知呢？證明呢個部門幾咁求奇

巴打。你咁後生一定得嘅，我建議就全部紀律部隊一齊考，拎下經驗，其實而家考嘅流程個個都差唔多，實際試過你就會知自己到底仲有咩可以改善，加油

其實司機要揸車，仲要上埋樓做野，真係好累咖 仲未計番夜凌晨操你去頂更 救護車司機真係最搵笨柒，我寧願唔要司機津貼，得果幾百蚊要做咁多野，仲要未計架車TA左大把野搞

其實每日咁多轉call 仲邊有時間操體能

lm

官: 人地消防返24都有時間操
返十二點會無阿 只係你唔識安排時間

唔好同人比較啦 只會自己唔開心
鬼叫你係救護車咩

官：你番十二個鐘，放左工仲有時間休息，人地番24冇得抖咖

太多西野啦，唉。都係果句，有熱誠嘅師兄keep住，走左嘅唔好望番轉頭，懷念下好啦

通想走既年資係咪都係做左4-5或以下

話唔埋，啲人考到更好就走，只係等緊offer。

但係人地嗰廿四個鐘可以打幾round 排球，然後沖涼，食飯，夜晚睇波。

一個月先得七百幾八百幾司機津貼，我情願個個月自己嘔返一千蚊出黎，以後唔使揸車。

你要嘔 消防咪成個車更一齊嘔 人地點會想
都無野做既

08 行外人毛病

「讓開讓開！救護員做嘢啊！」商場裡，走在最前頭既樂文師兄不斷大聲叫嚷，希望人群疏散讓路。

據稱商場入面有人不省人事，事主係一名長者，我地收到線報後第一時間趕到現場。

由於事發地點係人流密集既地方，可能會有好多途人圍觀，所以要打醒十二分精神，做嘢要盡量冷靜同埋小心啲，唔好有任何出錯。因為一旦有任何出錯，除咗會影響到個病人，救護車上面呢三兄弟隨時會惹來成身蟻。

「麻煩大家借一借過先！救護員要做嘢啊！讓開讓開！」幾經辛苦之下，我地終於黎到傷者面前。

同平時一樣，當發生事既時候，總係有好多唔關事既人喺度圍觀，有啲拎手機出黎拍，有啲純粹係無嘢做於是行過黎八掛吓發生咩事，正宗既搞搞陣無幫襯。

傷者係一位伯伯，但當我地趕到現場既時候，阿伯其實已經醒返，旁邊仲有一位著住便服既男士，佢身旁有部操作中既AED機，係擺放於商場供應俾識得急救既公眾人士於危急情況下使用。

「救護師兄你好！」男士見到我地幾個救護員黎到，立即向我地交代情況：「頭先我喺商場行緊，呢位阿伯突然間暈低咗，我幫佢檢查完發現佢無咗脈搏，於是就叫人去拎AED機，而我就立即幫佢做CPR，好彩我猜咗幾吓佢就醒返，而家應該無事。」

CPR咗幾吓就醒返咁神奇？

唔係話無可能...但幾吓就醒，會唔會兒戲咗啲？

我做咗呢行咁多年都未試過…唔好話試，聽都未聽過。

我對成件事感到有啲懷疑。

「輝仔阿寶，幫伯伯檢查咗先。」樂文師兄繼續同嗰位男士對話：「先生你學過急救架？識得用AED機？」

男士：「其實我係XXXXXX隊既。」(係香港某個醫療團隊)

「阿sir…頭先我好似突然暈咗，唔知點解醒返之後個心口就好痛…」伯伯不斷搓揉自己既胸口。

「你本身有無心臟病嗰啲架？」我問。

「無架…」

「你講既胸口痛，暈之前有無架？」

「都無啊...」

咁就奇怪喇，醒返之後突然話胸口痛？

雖然只係估估吓，但我大致上已經估到係咩事。

樂文師兄都非常質疑成件事，於是想要問清楚：「你肯定阿伯當時係無咗呼吸脈搏？」

男士點點頭：「係啊。」

樂文師兄：「你點樣幫佢檢查？」

男士：「摸頸動脈。」

摸頸動脈係一般做法，因為頸位置近心臟，脈象會比較容易摸得到。

但就算係檢查頸動脈，實戰經驗少既人好容易會摸錯。因為假如對方係血壓低既話，脈象會比較弱，需要好仔細咁摸先摸得到脈象，一般人好多時因為摸唔到對方既微弱脈象而誤以為對方無咗脈搏。

而我剛剛幫伯伯量完血壓，指數係85/40，血壓偏低。

樂文師兄：「你CPR期間有無總共猜咗十吓？」

「應該就無喇，因為佢真係好快就醒返。」男士自覺救返一條人命，表現得有啲自豪。

樂文師兄拍一拍男士膊頭：「咁你都幾犀利喎，唔該哂你先，呢度交俾我地處理。」

我同輝仔互相對望，搖搖頭然後笑咗一笑。

大家明白發生咩事未？

雖然只係推斷，但實情九成九就係咁。其實嗰位男士並唔係利用CPR救返醒阿伯，暈咗既阿伯係因為無緣無故俾人壓心口而「痛醒」咗。

畢竟嗰位隸屬某醫療團隊既男士可能無乜前線經驗，唔能夠準確判斷伯伯係咪真係無咗脈搏，同時又救人心切，所以先會搞出今次既誤會。

其實唔可以話個男士錯，畢竟佢只係想幫人，但只係判斷錯誤，用錯咗方法。

不過，假如佢施行胸外壓既力度再大啲既話，阿伯既胸骨隨時被壓爆，如果係咁到時就真係麻煩，明明唔死都隨時俾佢搞死。

＃＃＃＃＃＃

大家試過身邊有人發羊吊未？

見到對方不斷發羊吊，自己又無嘢可以幫到手，咁點算？

其實幫唔到手都唔緊要，但千萬唔好做多餘嘢而間接害咗對方。

「緊急輔助醫療救護服務，秋名山去234號救護車，病況：癲癇…」

癲癇，又名腦癇，係一種神經系統疾病，病人發作時會出現痙攣現象。

「阿sir…你快啲跟我入黎！」到達現場單位後，一個表現得異常緊張既中年男人開門俾我地幾個。

我留意到，佢既右手食指沾滿鮮血。

「係咪你報警架先生？發生咩事？」企喺閘門外既杰佬問。

「係啊，我個女頭先抽筋抽得好厲害啊，我都唔知可以點做！」中年男人內心非常焚急，佢拎住鎖匙諗住打開道鐵閘，但由於太急太緊張，開極都開唔到道閘，開開吓仲跌埋條匙落地，表現有啲歇斯底里。

杰佬：「先生你冷靜啲先！慢慢黎！急無用既。」

不過對方表現緊張都值得體諒既，屋企人有事，有邊個可以表現得冷靜？

入屋後，我地立即跟隨男人入房，繼而發現一名少女全身無力咁軟灘喺床上，佢面青口唇白，嘴角沾有少量血跡。

杰佬為少女進行咗初步既檢查後，然後話：「佢暫時無抽筋，不過…」

話仲未講完，個男人就打斷咗杰佬：「佢啱啱先停咗無抽咋，頭先真係抽得好勁架，阿sir你一定要幫吓佢！」

杰佬：「我知道，但佢而家已經無再抽，我地暫時無嘢可以做到。不過你放心，假如佢再有抽筋既話，我地係會有藥物提供，而呢隻藥係好有效既，只需要幫佢打枝針佢就唔會再抽架喇。」

「哦…」男人聽完杰佬既講解後，終於表現得鬆返口氣。

杰佬：「啱啱抽完筋個人會好攰，加上佢而家血含氧量有啲低，我地會俾啲氧氣佢聞吓先，聞完之後個人會舒服啲同精神啲，然後再送佢入院。」

「好啊！唔該你啊阿sir！」

杰佬：「你隻手流緊血喎，咩事整親架？」

我趁住目前有空檔時間，於是上前幫男人治理手指上既傷口。

男人：「無…頭先我驚佢抽筋嗰陣會咬到自己條脷，我咪俾隻手指佢咬住先囉。」

果然係咁。

當一個人抽搐，然後旁人俾嘢對方咬住，係一個頗為常見錯誤做法。

杰佬：「嘩…你下次唔好咁做喇，就算抽得幾勁都好，都唔好俾嘢佢咬啊。」

男人：「吓…但係我驚佢咬到自己條脷喎…」

杰佬：「咬都係咬損者，唔會咬斷掛？但係你咁樣擺隻手指落去，佢真係會隨時咬斷你，到時隻斷指跌落去哽住個喉嚨，隨時會窒息死人…總之任何有機會令佢哽到喉嚨既嘢都唔應該擺落佢個口。」

「哦！」男人聽完後一臉恍然大悟。

杰佬：「仲有，萬一真係咬損咗條脷，你可以打側少少佢個頭，等啲血流返出個口，咁就唔會俾啲血倒流然後哽到。」

男人：「原來係咁！」

作為旁人，若然見到有人抽搐或者痙攣，首要注意既事當然係唔好擺嘢落對方個口，以避免出現哽塞，因為保持氣道暢通係非常重要，透唔到氣就會出現窒息。

其次就係切勿強行抑制對方既動作，因為咁樣好容易會整傷對方，亦有機會整傷自己。對方抽筋就由得佢抽，唯一可以做既就係等待救緩人員前來施救。

仲有嘢樣可以做，就係盡量移開附近一切可能會對病人構成危險或受傷既物件，因為痙攣中既病人可能會亂咁郁，萬一撞到附近既硬物或者整跌放於高處既物件，隨時會令病人添上不必要既傷勢。

09 難忘事件(三)

屎尿血膿痰，救護員經常有機會接觸到，若然要揀是但一樣去用手掂，大家又會想揀邊樣？

邊樣都好，但我一定唔會揀屎，因為屎唔單止好多菌，仲好臭，而且好難清理。

關於屎呢…印象中最深刻既一次，大概係以下呢單「屎撈人」個案。

當日係返早更，時間大概係十二點，準備返局食飯，但好不幸地我地架救護車又遇到中途擊落。

根據資料顯示，對象係一名男性長者，病況係痔瘡痛。

將救護車泊好後，準備上樓之際，我腦裡忽然靈光一閃：「咪住…等我帶多幾張床單先。」

於是我返上車拎多咗幾張床單。

係直覺…直覺話我知，拎多幾張床單或者會有用，至於有咩用，我當時並唔知道，總之就係有用。

去到事發現場，推開門見到屋內環境之後，我地三個人分別有以下既反應：

杰佬：「嘩屌…等陣仲使食飯既…」

輝仔雙手抱住後腦：「Holy shit…」

我被當前既景象被嚇至退後咗一步：「唔乸係呀嘛…」

我地見到一個阿伯以雙膝跪地既姿勢伏喺床邊，佢條褲除剩一半，肛門位置有一粒頗為巨型既痔瘡凸咗出黎，粒痔瘡沾滿血。同時，肛門亦不斷有啲爛爛地既屎跌落黎，而屎當中亦混合咗好多血…

地下一片紅，一片啡，溝埋一齊變咗做草莓朱古力新地。

都唔緊要，最令我地感到卻步係屋內既環境，因為屋入面成地都佈滿屎跡，仲要係新鮮滾熱辣嗰隻。

除咗阿伯，屋內仲有一個人，佢就係阿伯個仔，但阿仔係有少少輕度弱智…

呢個都唔係重點，重點係唔知點解佢會搞到自己成對手都沾滿哂屎。

「阿sir…你幫吓我手啦…」阿仔個樣好似想喊咁。

見到咁既情況，其實我當時都有啲想喊。

「係咪你打電話叫救護車架？」杰佬問。

「係啊阿sir…我而家唔知點做好…你可唔可以幫吓我？」阿仔攤開一雙沾滿屎既手，表現得好無助。

杰佬眼見目前慘況，不禁表現得有啲浮燥：「你咩事搞到成手都係屎架！？」

阿仔：「我諗住幫佢清潔呀嘛…」

我見到床上面擺咗幾條沾滿屎既毛巾…我唔明白，點解要將啲抹完屎既毛巾放上張床度，而唔拎去掉咗佢呢！？

呢個時候，阿伯好勞氣咁講：「你呢個衰仔…都完全幫唔到手既！無鬼用架你！」

「我搞唔掂啊…阿sir你幫我搞啦…」

杰佬眼見阿仔好似想行埋黎咁，於是大聲叫喝：「喂你企喺度先！唔好行過黎！你而家乜都唔使做，立即去廁所洗乾淨自己對手，明唔明白？」

「哦哦哦！」阿仔點頭如倒蒜，之後走咗入廁所洗手。

然後我地有個好大既煩惱，就係究竟點樣行入去屋入面，而又避免踩到屎，最後得出既結論係完全無可能。

不過，幸好門口附近個櫃頂有疊報紙，我地於是將報紙鋪放喺地上，然後好似小朋友喺公園玩跳飛機咁跳入去。

下一個煩惱，就係點樣將阿伯搬到我地既救護輪椅上，而過程中又唔會整污糟自己。

期間，阿伯既下體一直有血屎流出黎，而跌落地上既一粒粒血屎就好似平時食嗰啲鐵蛋咁款。

我地商量咗一陣，決定先用幾張床單將阿伯包住，然後我同杰佬一左一右，扶住阿伯既腋下將佢抽起，而輝仔就負責喺後面推架輪椅過黎，然後阿伯坐上輪椅，綁安全帶，離場走人。

「一…二…三…起！」我同杰佬一齊將阿伯扶起。

嗰陣屎味真係好臭，我當時憋氣憋得好辛苦。

杰佬：「輝仔，輪椅！」

輝仔：「好！黎！」

當輝仔推架輪椅過黎既時侯，我見到輪椅底部既腳架將地下既屎通通剷起，呢個畫面令我諗起剷泥車。

過程中其實我都顧唔到咁多，鞋底應該都踩咗唔少屎...

不過算啦，唯有事後再進行清理。

杰佬：「用床單包實啲，落到車先搞…你地小心中招啊。」

將阿伯安置好後，我立即更換過一對新既手套。

呢個時候，阿仔終於喺廁所出返黎：「阿sir！我都想跟埋去啊！」

杰佬：「你洗乾淨對手未架！？」

阿仔：「洗乾淨喇…」

杰佬：「洗乾淨！？你啲手指罅仲係啡色既？入去同我洗多次！洗乾淨啲！」

「哦哦！」阿仔神經兮兮咁又再返入廁所洗手。

花咗好大既力氣，我地終於都將阿伯成功運送到救護車並安置好。

雖然阿仔話已經洗乾淨對手，但我信唔過，最後我俾咗對手套佢戴，以免佢整污糟救護車。

做完呢轉call之後，我地要為車廂進行徹底消毒及清潔，搞掂哂先至食飯，而嗰日既飯餸竟然咁啱有咖哩同茄汁…

一見到呢兩種顏色，我就諗返起頭先既畫面。

屎撈人都唔係第一次做，但呢一次都算係經典。嗰次輝仔就慘喇，因為佢係負責清潔輪椅，仲記唔記得輪椅個腳踏係剷起哂地下啲屎？

可能大家會覺得好核突，但做得救護員，就要預咗經常要面對類似情況，而唔係剩係救人咁簡單。

睇字都頂唔住

佩服救護員處理到

估計最快應該出埋下個星期就出完，未俾正評既記得正評啊！