《我還是救護員的日子》(2) [假人真事+你問我答]

跑樓梯唔係講笑
真係靠死頂先pass到
攰到仆街

好多時去到，個所謂「patient」都精神過你，特別係番夜，真係屌都廢事，啦啦聲送佢去醫院之後番局博有得抖下好過

搏鬼搏馬咩，根據經驗，九成時間都係搏輸

睇下個勢點。如果係頂更control真係仆街 頂更頂到痴撚線，果到有車係局都照操你去頂更，都唔知做乜撚野

呢排都係閪多過like 博不了

希望冬天好景啲啦

冬天好多呼吸困難
同埋年頭年尾特別多人走，成日中DBA

btw，聽日先出文

辭左職做啲咩

總之咩日子都多車去啦

主要都係煮吓飯放吓狗，同埋俾老婆養

師兄 受小弟一拜

第四章:

01 先遣急救員

FR (First Responder)，呢個計劃大約於2004正式推出，目的係要培訓消防員擔任先遣急救員，以分擔救護員既部分工作。

當出現呼吸困難，不省人事，心臟病，大量出血…等比較危急既案年，先遣急救員會聯同救護車一齊出動。

消防局既數量比救護站多出一倍，所以消防局於地區上既分佈相對密集，當發生事故既時候，消防車理應可以比救護車更快到達現場。
(全港九新界，消防局約有九十間，而救護站約有四十間，有關數字可參考部門年報。)

部門成立先遣急救員既目的，無非係想整靚啲數字。

救護車係有服務承諾，就係「當接到緊急召喚，救護車需要於十二分鐘之內抵達現場」，而好多時救護車係唔能夠於十二分鐘之內到達現場，亦即係超時，未能達到當初所許下既服務承諾。

可能係因為全港救護站既分佈密度唔夠高，所以當出現跨區工作既時候，由基地出發到現場既車程會比較遠，需時會變得較長。

但係，另一個主要原因係救護呢行長期唔夠人手，緊急召喚數字每年遞增，但救護員既人手增聘方面一直只係足以應付退休及自然流失，根本就供不應求，長期處於十個煲得六個蓋既情況。

題外話，我曾經睇過一份關於部門既統計報告，內容大概係指當年既救護服務召喚數字上升咗5%，而當年既救護員人手增聘亦都有5%，所以當年人手既增加係足以應付救護服務需求既提升…

但係稍為有啲數學常識既人就會知道，條數根本就唔可以咁計。

因為召喚數字係講緊一年六十幾七十萬宗，但全香港既救護員先得嗰二千幾人。

個情況就等同當年通脹係5%，然後老闆同員工講已經加咗5%人工俾佢，薪金既調整係足以應付當年既通脹…

但問題係員工既月薪先得嗰一千蚊，加5%即係加五十蚊，然後話每個月多五十蚊可以應付到通脹！？

講返正題。

因為救護車有時唔能夠於十二分鐘抵達現場，而部門又唔知點唔肯增聘人手，於是就用其他招數，為消防員提供培訓，要佢地做埋救護員嗰份。

部門當然可以美其名話想讓消防員能夠參與及了解更多關於救護既工作，以促進往後消防同救護之間既合作，但實情係點，相信大家心裡有數。

由於有FR呢樣嘢既存在，好多時救護車未能於十二分鐘內抵達現場既情況，先遣急救員都可以預先到場處理。講得好聽啲，就係當發生一啲相對危急既案件嗰陣，可以有救緩人員更快抵達現場處理。但事實上部門只係利用先遣急救員呢樣嘢去將「救護服務承諾」既達成率提高。

接受完先遣急救員既訓練之後，消防員係會有每月額外津貼，幾百蚊左右，同救護車司機津貼差唔多。而正式成為先遣急救員之前，消防員係需要跟車兩星期…當然係跟救護車，目的係要視察同學習救護員既工作模式。

呢段時間裡面，消防員會成為救護車既第四人，同救護員一齊去車。

「嘩…救護師兄，乜原來你地做嘢係咁辛苦架？」跟車嗰位消防師兄咁講。

佢之所以咁講，係因為返緊夜更既佢剛剛體驗咗連續第三次中途擊落，對我地黎講或者係家常便飯，但對消防師兄黎講簡直就係地獄般既非人生活。

莫講話中途擊落，消防員本身去車既次數屬於少，平時返工係有充分時間休息，唔似得救護員，忙到一餐飯要分幾次食。

「今日算好架喇，啲call又輕鬆，起碼叫做唔急先啦，平時仲辛苦啊。」我回應。

另一位跟車既消防師兄又話：「原來夜晚都咁多人叫救護車架！？咁你地平時咪無得訓？」

「係架，我地有兩個鐘頭訓已經算好幸福架喇。」我答。

自此之後，嗰兩位消防師兄每次撞到我都會請我飲咖啡，因為佢地體驗過救護工作既辛苦，作為伙記一場佢地都十分體諒同敬重身為救護員既我地，所以呢罐咖啡某程度可以話係出於對我地既佩服。

關於先遣急救員，有件事可以分享吓。

話說嗰次係一宗人事不省案件，先遣急救員比我地更早到場。

去到現場，我地見到消防員正為病者進行CPR。當救護員到場，消防員會將現場控制權及餘下工作交返俾救護員。當時既救護車主管並無立即吩咐我地埋位做CPR，反而係上前幫病者做檢查，將對方既身體反一反。而經過呢一反，主管發現病者既背部佈滿屍斑，證實係明顯死亡，救護員毋須施行急救。

當時係有家屬在場，家屬都覺得奇怪，點解明明消防員搶救緊，但救護員黎到就話唔救？

原因好簡單，因為根據部門指引，只有救護員先可以判定一個人是否屬於明顯死亡，先遣急救員一旦接到call，無論係咩情況都要施救，就算對方係無咗個頭…

又試過有一次，做一宗不省人事個案，先遣急救員又係比我地更早到場，我地去到現場發現消防員幫一個無咗半個頭既人做緊CPR...

其實根本就係跳樓，而唔係一般既不省人事。途人可能見到有人訓咗喺地，於是就報案話係不省人事。

當消防員見到我地救護員到場，佢地露出一種「得救」既神情，因為我地可以為傷者判定明顯死亡，而佢地終於都可以功成身退。

或者大家會覺得奇怪，對方無咗半個頭都仲要繼續CPR？

當時日光日白，條街又咁多途人，假如先遣急救員到場後乜都唔做，豈不是會惹來話柄？

加上嗰次可以話係屬於灰色地帶，對方無咗上半邊頭，連個腦都唔見埋，即見唔到有腦漿流出，但又唔係屍首分離，咁咪即係唔算明顯死亡？咁咪即係要救？

其實大家心裡面都清楚知道，對方點都係救唔返，無奈先遣急救員並唔係救護員，佢地必須按照部門指引辦事，而呢個可以話係「制度」令事情變得本末倒置既一大漏洞。

點解部門情願用資源去培訓先遣急救員，都唔去請多啲救護員同埋添加救護車？

或者應該咁問，點解救護員一直都被外界稱為「二奶」呢？

救護員番12，平時一定好得閒。
消防員番24好辛苦，先係真英雄

02 救護員 VS 救護主任

救護員薪酬：一般紀律人員(員佐級)薪級表第4點(每月20,365元)至一般紀律人員(員佐級)薪級表第14點(每月28,185元)。

救護主任薪酬：一般紀律人員(主任級)薪級表第5點 (每月33,320元)至一般紀律人員(主任級)薪級表第21點 (每月67,475元)。

(以上係2018年資料)

救護員同救護主任之間既最大分別，除咗份人工，就係兩者之間既工作性質。

救護員主要於前線進行緊急救援工作，而主任則主要留喺辦公屋處理部門既行政/文件/人力資源等工作。

大家同樣係受訓廿六個星期，但一個出班之後要飽歷民間既水深火熱，另一個係坐喺冷氣房過住天堂般既生活...

而後者既起薪係高過前者既頂薪。

救護主任只需要間中跟吓車，佢地九成時間都唔會落前線工作。除非係發生大型災難事故，呢個時候救護主任或者會去事發現場進行指揮…

但係一個長期處於火線之下，毫無實戰經驗既人又有幾多能力可以勝任到舉足輕重既指揮工作？

佢地係有能力既，但只限於理論，而唔係實戰。

而由於佢地只有「理論」呢個籌碼，於是就好鍾意進行問書，務求要喺一班經驗老到既前線人員面前爭取返作為既「官」既面子。救護主任唔需要返夜，所以問書一定係出現喺日頭。當救護員做完call，返到局想爭取時間休息吓既時候，啲主任就會叫大家集合，可能係有關於部門既資訊要分享，但最常見既都係想於大家面前拋書包，出啲問題考吓大家。

「唔好睇電視住喇，阿sir叫全部人出去啊…」益哥走入休息室同大家講。

輝仔：「又問書？尋日先叫我地示範吊鹽水俾佢睇咋喎！今日又黎，使唔使咁密啊！？」

細華：「少年你真係太年輕，如果唔係咁，啲官邊有嘢做？」

出到去，見到地下擺咗個阿ANN公仔，睇黎唔係問書咁簡單，應該仲有即場示範，而進行示範既當係唔係主任自己，而係我地。

主任：「相信大家都知最近發生咩事架啦，就係有同事做call嗰陣將AED機既電極片貼錯位，最後俾記者影低咗仲見埋報，外間有聲音話我地前線人員唔夠專業…」

「妖…屎忽鬼…」樂文師兄雖然無講咗聲，但我見到佢既口型。

老實講，喺唔專業呢方面，阿sir敢認第二，相信無人敢認第一。

主任繼續講：「所以今日想同大家溫吓Cardiac Arrest 既protocol，順便練習吓心肺復甦法…」

「佢係咪傻架…CPR呢啲我地日日都做架啦…」細華喺我耳邊細細聲講：「最需要溫習既其實係佢自己…」

主任：「正式開始之前，問問書先…有無人答到我，假如係CPR既對象係小童，心外壓同俾氣既比例應該係幾多？」

問啲咁既問題，簡直就係對我地既一種侮辱，作為前線假如連呢啲問題都答唔出，仲點著呢套制服？

輝仔舉手回答：「阿sir，要視乎情況喎，假如係一人拯救法，應該係三十比二，但如果係二人拯救法，就係十五比二。」

主任：「嗯…咁點樣將對方介定為成人同小童呢？」

佢就咁嗯一聲，其實佢自己到底知唔知係有分一人拯救法同二人拯救法？

輝仔又答：「撇除初生嬰兒，八歲或以下係小童，如果無法識別年齡既話，就用拉尺量度，身高120 cm或以下就當係小童…」

主任打斷咗輝仔既話：「正確黎講，應該係115 cm。」

我留意到細華同樂文師兄同時間反白眼。

呢個咪就係理論同實戰之間既分別，去到現場做call，仲會唔會有多餘時間考慮對方究竟係成人定小童？成人小童基本上一眼就望得出，唔通真係要用把尺去慢慢度？

阿sir，到底嗰幾cm重要啲，定一條人命重要啲？

主任：「好喇，事不宜遲，立即搵人出黎示範…」

每次都係搵人出黎示範，佢自己永遠唔會落手。

「燈凳燉鄧～」

都仲未開始，已經響鐘去車，根本忙到連操練都無時間。

「緊急救護先遣服務，秋名山去234號救護車，病況：不省人事…」

234號車…即係我要去車。我今日係做司機，主管係益哥，車籠係輝仔。

益哥：「阿sir，呢轉我地去喎，你頭先係咪話想跟我地車？」

聽到係不省人事，主任好似表現得有啲猶疑，可能係考慮緊跟唔跟車好。畢竟DBA對我地黎講屬於家常便飯，但對主任黎講應該都幾驚心動魄。

一話想操練，而家即刻就整一轉俾佢嘆，真係天注定，連個天都磨練吓呢位高層。

主任：「好，我跟埋去。」

細華同樂文師兄不斷向我戚眉弄眼，從佢地既眼神當中，我竟然見到有對白既出現…

「有戲睇。」

「今次佢仲唔死？」

真係事不宜遲，主任咁鍾意睇示範，而家有機會俾佢見識一下我地既示範，對象仲要係真人而唔係假公仔阿Ann。

「無呼吸無脈搏，輝仔CPR！」益哥為傷者檢查過後，發現對方斷咗氣。

輝仔正打算上前之際，我將佢拉停，然後話：「咦阿sir，你會唔會想試吓做？」

「好！」主任諗都唔諗就埋位做CPR。

實戰經驗佢就一定無乜，但我幾欣賞佢呢份勇氣同果斷。

過程中，我一邊做嘢一邊留意住主任既表現，CPR算係做得唔錯，姿勢同按壓深度都符合要求。不過似乎力有不逮，都仲未將傷者運送到救護車，主任已經開始上氣唔接下氣，而由於佢漸漸感到無力既關係，心外壓開始壓得唔夠深，效果未如先前理想。假如佢只係一個普通既車籠，而唔係阿sir，主管一早開聲炳咗鑊甘。

益哥見到咁既情況，只係淡然講咗一句：「轉一轉手啦，輝仔你去做。」

由於我地係用輪椅將傷者運送上救護車，上車時需要將輪椅收好先至夠空間俾我地做嘢，但主任收極都收唔到架輪椅，於是我上前幫手…

「阿sir，不如等我黎。」我一下就將架輪椅摺好，無任何多餘動作，搞掂後就坐返去司機位，準備開車。

將傷者送到去醫院，所有善後工作搞掂之後，我見到主任喺車上打開咗架輪椅，喺度練習緊收摺。

我：「咦阿sir，喺度搞緊咩？」

主任：「無…我想檢查吓張輪椅咋嘛，我見頭先摺極都摺唔埋，唔知係咪壞壞地…」

「你個人就壞，自己舞唔掂啲架生就唔好賴落張輪椅度啦。」我當然無咁講出口，講咗出口仲得了？

不過，佢咁樣係咪即係幫自己搵藉口？

「哦…有時係咁架，啲嘢用得太耐係會神神地…」畢竟對方係阿sir，點都要俾返條下台階佢。

呢個時候，輝仔剛剛去完廁所返黎，我於是話：「輝仔，你去睇睇架輪椅有咩問題，如果有壞就要返局換過架。」

然後輝仔為輪椅進行測試，動作非常利落咁將架輪椅又開又收：「張輛椅無問題喎，好正常啊！」

「哦，咁就得啦。」我心入面覺得諷刺又好笑。

仲話自己係主任…輛椅都未識收，點樣救人啊？

就算課本上既理論背得有幾熟都好，落到場假如做唔掂就幾叻都無用。

剩係識問書…剩係識叫人做示範…

不如搞掂好自己先再講啦。

講就兇狠，做就…

自己諗。

真係難聽過粗口

啱啱呢篇，係我咁耐以黎寫得最身心舒暢既一篇

真係難聽講粗口。特別係凌晨去車，啲patient就係咁講。果時真係無名火起想爆粗糾正佢，不過我冇呢個勇氣 因為知道我屌完佢都係冇意思，現實都唔會改變，快快手番局博下好過

以前身邊都有啲朋友覺得我應該好得閒，仲話消防員忙，救護無乜嘢做

故事經已去到尾聲，將會係最後一章。

十二月頭就要同大家講拜拜