《我還是救護員的日子》(2) [假人真事+你問我答]

巴打
我之前有聽過話啲消防員都要做paper work，咁其實係要做啲咩？定係我聽錯 thanks

每間局不輪救護消防都有局務既
例如有唔同既倉
有d 野到期前或者壞左要申請換或者要去卑人年檢
同埋編大假、返工車更等等
救護同消防最大分別就係消防可以當值時搞
救護就要off duty 先得閒係局搞
E 個就係用消防嗰套黎管救護出黎既結果

另外、消防仲有唔同部門、唔一定只限於行動總區、仲有牌照、建設、甚至賣紀念品都可以係消防做
係e d位做既野咪要做paper work

呢啲都係文職位，通常係比IOD人士去做，有次我經過總部，行過幫人賣紀念品，個師兄number好新，仲好後生，估佢都係整親先派住呢個位先

消防老左傷左仲有位走下
救護就⋯

仲話做到60

消防好多位走咖。沙田個BA倉，仲有消防安全同埋其總區。

救護就只有UC。。。。我肯定好多都做唔到六十歲，成身傷仲點同你番工

今日d 大sir 話之你第時點
佢都拍拍蘿油走左lu
到時既問題到今日即2，3粒搞啦
最緊要我揸旗時㩒得住d 鑊

唔止消防處，成個政府都係咁

退左休既大sir 到時仲會係電視機前小爆你班AO
無佢當年咁醒

師兄係在職？之後只會越黎越難做，真係自求多福

升左喇，走唔到
見住部門個環境氣氛愈黎愈令人難做，種種不公⋯
同當日入黎做帶住熱誠入黎做嗰種既反差
實在唏噓⋯

淨係1800秒都死。呢個部門只會越黎越揸得緊，遲下ARH十五分鐘唔知會唔會縮
將來個勢真係越黎越衰

老實講，以前上一代老人家嗰套走車方法真係要執
但時代已經進步左
而家就完全係矯枉過正
執人出黎祭旗成為左d 官升官發財既功積
加上d 官無做主管走車一齊受，搞到d 政策離哂地

同意以前果代走車方法係要執，而家真係執到離晒地，之後只會越執越衰 點執都唔會理前線係點

加油樓主 想屌爆班閪官好耐 中間果段屌官 睇完心情舒暢左好多

放題巴 仲做緊？

03 查房

救護界之中，對外而言，若然各類既濫用案件係屬於荒謬，咁對內而言，「查房」都算係數一數二既荒謬事情。

一年一度既查房，可以稱得上為呢份工當中最無意義既一件事。

每年去到咁上下時間，救護局就會收到指示，不久後會有高層親臨現場視察環境，然後一班救護員就要開始準備，不斷為局內地方進行打掃清潔，將所有裝備物品執拾排列好，將辦公室既文件整理好…

總之，一切見到光，甚至見唔到光既地方都要搞得好睇乾淨，做一個假象出黎俾啲救護高官睇。

而最重要既係，大部分既同事明明係放緊假，但都要專登返去搞關於查房既嘢。

某一次，好記得當日係返完夜班，但大家收到指示，當日下午三點鐘要返黎為查房作準備。原本可以返屋企舒舒服服訓個覺，但三點鐘又要返黎做嘢，當日已經係遲收工，假如返屋企既話，一來一回要用唔少時間，咁搞法會無哂啲休息時間，最後我選擇放工後留喺局度訓，但局入面人來人往，又經常響鐘去車，根本就訓得唔好。

三點鐘，同事開始陸續返到，我地所負責既環節係局內既地方清潔。

每逢查房，就係所有搏升職既人爭取表現既好時間。未升既搏升，升咗既就搏升多一級，所以一切功夫都要做得好好睇睇，萬一高層落到黎發現個地下清潔得唔乾淨，然後問一句：「個地下咁污糟既？邊個負責打掃架？」

負責清潔地下既嗰個人就會俾啲官點咗相，然後被視為辦事不力，輕則當面鬧兩句，嚴重既可能會影響到日後升職。

高層既一句說話，影響力真係可以好大…

其實相當諷刺，或者大家會諗，升唔升職竟然唔係睇平時既工作表現，而係睇「查房」既表現？

係啊，呢行的確係咁。

一年救返醒一百個人咁又點？只要查房衰一次就前功盡廢。

查房前嗰幾日，個個救護員都會化身成為清潔員，用掃把地拖將地方清潔乾淨…

其實個地下係用黎俾人行，有人行就自然會唔乾淨，有少少唔乾淨其實又有咩問題？

都算喇，仲要爬上櫃頂抹埋上面啲塵…

其實個櫃頂有邊個會睇？啲官會唔會真係爬上去睇先？

不過啲大既吩咐到，咪唯有照做囉。

最離譜都係揭開個坑渠蓋清走入面啲污糟嘢…

喂大佬啊，坑渠入面污糟都好正常者，唔污糟又點叫坑渠啊？

有啲一心為紮職，想喺高層面前搏取表現既人就會開聲：「拍爛檔打掃得乾淨啲啊！唔係話要一塵不染，但盡量搞得好好睇睇。」

咩叫好好睇睇…塊地已經拖過兩次，然後見大家得閒又叫我地拖第三次，咁樣同做到一塵不染有咩分別？

全間局既每一處地方都幾乎要進行清潔，只係差在未拎埋個關公像落黎幫佢沖涼。

有時會感到好迷失…究竟我喺度做緊咩？做呢啲嘢到底有咩意義？救護員唔係應該要去救人幫人架咩？點解要做埋哂啲門面嘢去應酬班高層？

不過我地呢邊都唔算離譜，另一邊先離譜，因為另一邊嗰班人係負責清潔救護車，包括車廂入面同埋車身出面。

「其實邊一日係正式查房？」輝仔問。

「後日。」我回應。

「後日先查房，咁今日清潔啲救護車黎做乜？」

輝仔真係一矢中的，道出咗問題既精髓。

救護車係會出動，有鐘響係會繼續去車，而家呢一刻清潔完，聽日、今晚甚至一陣做完call返黎架車又係變返污糟，咁目前呢一刻既清潔其實有咩作用同意義？

「係無作用架，只係大家都要搵啲嘢黎做，證明大家有喺呢件事上面出過力，費事引來其他人話柄。」

「乜咁鬼無聊架…」

無錯，查房真係非常無聊既一件事，一切只不過係一場戲，一場搏緊上位既人喺高層面前所演既一場大龍鳳…

而因為呢場極度無意義既大龍鳳，所有放緊假既同事都要專登返黎加班，仲要係無任何補水。

仲有樣嘢差啲漏咗講，就係查房之前會有個指定動作，就係「走鬼」。意思係指將一切唔想俾高層見到既「遺禁品」搬走，無眼屎乾淨盲。

遺禁品可能係一啲私人物品，可能係一啲甩甩漏漏唔齊全既工具裝備或者文件，可能係一啲殘舊到根本唔想再進行打理既局內設備…

總之就係一啲高層見到後有機會去挑剔過問既嘢。

大家會夾手夾腳將呢啲遺禁品搬走，可能暫時擺住去消防嗰邊先，因為消防同救護既查房係分開，有時消防嗰邊查房，都會利用救護既地方作為走鬼之用。

又可能喺附近租借一個地方，可能係一個貨倉仔，然後將所有嘢擺哂入個倉度，等查完房之後先搬回原位。

一句講哂就係無鬼謂，成班人將救護局包裝成一個高層想要見到既美好環境，務求要取悅班老細。

後日正式查房，當日要返工既同事會面臨被高層檢閱既局面，假如中途響鐘去車既話，就可以避免同班高層撞到正…

相信大家情願去車，都唔會想對住班高官，因為見到班高官又要俾禮又要交戲。佢地會問長問短，仲會問書，考吓大家既救護知識，而問書對象通常係剛剛出班既新人。

其實班高層都知眼中既一切只不過係假象，過咗查房呢一日，所有嘢都會打回原形，但佢地就係要睇到有呢一場戲，就係要大家辛苦，就係要憑住呢一點去彌定邊一間局既救護主任最有表現，最識得管理，最做到嘢。

為咗應付查房，當日做嘢做到夜晚九點幾十點，感覺仲攰過平時返工。

雖然夜晚有餐免費慰勞飯食吓，但講真，我情願唔食呢餐飯；雖然只係一年一次，但無意義又作狀既事情，一次都嫌多。

04 人手不足

特別支緩隊，簡稱SSU，係部門聲稱為處理大型事故(MCI)而設既一支特別隊伍，當出現突發或有大量傷者既大型事故，部門會調動SSU作為支緩。

救護員只要過咗三年試用期，就會以輪流既形式為SSU當值，每次為時兩星期，返工時間一般為星期一至五既朝九晚六，除非有大型活動或者特別安排，否則星期六日係唔會有SSU。

首先，如果呢支係專為處理大型事故而設既特別部隊，點解唔係每日廿四小時stand by？

難道夜晚唔會發生大型事故？二零一七年嗰單中環電車出軌導致反車咪就係發生喺晚上。

另外，假如大家睇返過往既報紙或者新聞，會發現大型事故好多時都係發生喺星期六日...

MCI出現既時候，SSU喺邊度？

又話呢支係一支為大型事故而設既特別部隊？

不過又真係幾特別既，特別在呢支隊伍係好少需要處理大型事故。

以我所見，SSU既最主要作用，就係「頂飯更」。

每日既下午十二點至下午三點，部門會調派SSU到各環頭駐守，原因好簡單，就係坐陣於救護站，假如局內響鐘需要去車，SSU就幫手頂一頂，等救護站既同事可以有時間食飯…

但係，有時就算SSU幫手頂飯更，救護站既同事一樣係食唔到飯，因為實在太多人叫車，前線人手根本不足以應付。

其實SSU當中既救護員，都係由各區抽取不同人手調派入去。咁即係話，SSU既存在，其實代表咗各環頭既人手係減少咗，條總數其實係一樣。

平時唔使頂飯更既時候，SSU會舉行講堂同埋進行操練。至於無講堂操練既時候，SSU其實等同處於真空收態，只係stand by，喺度等待大型事故發生。若然無大型事故發生就唔使去車，相當悠閒，但出面環頭既同事就喺度打緊仗，繼續俾市民輪姦。

咁樣都算係充分利用救護資源？

＃＃＃＃＃＃

賣血，其實即係OT，明明放緊假但選擇返工。

有賣血既出現，主要係因為有人手不足既出現。

行內有唔少人喜歡報名賣血，因為賣一日血就多一日人工。自身月薪越高，賣血既日薪自然相應提高，賣一日血就多千幾二千蚊，賣幾日就多幾千蚊，聽落的確係幾吸引。

但人係需要休息，賣血賣得太狼死其實同玩命無分別，所以啲人通常揀放緊rota既時候賣血，畢竟連續放七日假，除非係去旅行，否則好多時都真係搵唔到咁多嘢做，反正坐喺屋企睇電視，倒不如返工賺吓錢。

而由於大家咁踴躍賣血，原本不足既人手就得以填補，然後部門就認為人手不足其實都唔係一個大問題，因為賣血呢個制度可以將問題妥善解決。

賣血所賺既OT唔一定要換錢，可以換鐘，有啲人會選擇用賣血既鐘去幫自己既夜更製造假期，務求返少一日夜就得一日。畢竟夜班工作係非常傷肝，而且年紀越大就越唔捱得夜，有邊個會嫌命長？

除咗賣血，仲有樣嘢叫打仗，即係搵外快，但唔係返自己份工，而係喺出面秘撈。

基本上部門內既所有人係禁止打仗，因為賺取外快係要向部門申報同批准，而實際上無乜秘撈係部門肯批准。假如被部門發現秘撈而無申報，隨時會引來紀律處分。

救護員比較少選擇打仗，消防員則會比較多，畢竟佢地返一日工然後放兩日假，能夠善用既時間其實比救護員多好多。

消防處會唔會告我架
咁樣爆料法

巴打。我quit左了 不過我都希望咁多位救護師兄加油，望都望佢地好景嘅日子多啲

發夢見到

查房真係on9到震，我淨係拎住塊揸攤布抹，拎住成日，見到其他人黎先抹，道具真係好重要咖