[直播]獨闖非洲之巔，5895米吉力馬札羅山

留名支持

LMLM

中華奇人

下年都係一支公去，想唔跟團，太貴，睇下可唔可以solo trekking先，因為我睇到鬼佬d blog係solo上山，無人帶

以我所知係唔畀 但始終坦桑尼亞，要偷偷地入應該總有辦法

巴打行開山好有信心

第一日無驚無險就結束咗。雖然包括睡袋在內嘅嘢已經由Porter們負責拎晒上山，但為咗預防高原反應，導遊建議每人帶3公升水喺身，沿路飲用，加埋以防萬一嘅防風褸、防曬、以防太乾嘅Lotion、急救用品，等等，自己大約孭四五公斤左右。



到咗Camp site，就要逐個做登記。



就噉寫名寫日期，真係有咩事，真係搵得返個紀錄



呢個時候已經見到其他公司嘅人喺度起緊營。

而我地嗰啲，喺我地嚟到之前已經起好晒 每一日，Porter都會用神速早我地一兩個鐘到，搵定靚位扎營



本來準備好同法國仔一齊瞓，但係去到嘅時候，竟然見到有四個營喺度 原來佢地為咗令到我地瞓得自在啲，就孭多咗一個Tent上嚟，仲特登唔講我地聽，想畀個驚喜我地



Camping Camp到咁闊落，我會唔係好慣



連熱水都準備好了 呢個時候氣溫已經得返八九度，山風亦開始大，體感溫度應該得返五六度。洗手抹身都係靠佢呢靠熱水了。

最令我驚奇嘅，都唔係呢啲。



做好咗隨地便溺嘅準備，但見到Camp site咁多人，但有少少唔知點算。原來我地係唔建議周圍痾

Porter連成個馬桶都搬埋上嚟 每次去到新營地，佢地就會為馬桶注水。每次痾之前，我地要拉開中間塊掩，去完之後泵水，然後啲便便就會沖咗落去下面個箱都裝住

第二朝就會有專人將佢倒去冇人見到嘅地方

打點完一切之後，我就返咗入帳篷入面眠一眠。一出返嚟，天已經黑了，山風越嚟越大，我竟然有啲頭痛，而且痛得唔輕。從未去過高原嘅Vicky都有少少痛，但其他人就咩事都冇。唔通真係因為我冇食到高反藥，輕視咗一切，所以搞到而家有啲辛苦？

我其實都唔想唔食，只係個旅行準備得太趕，連高反藥都唔得閒買，淨係帶咗之前去南美食淨嗰幾粒就出咗發，諗住第三日先開始食就啱啱好。見形勢唔對，我問Grace同Kiat借多咗幾粒藥，當晚就啪咗粒，希望聽日會有好轉



慶幸嘅係仍有胃口。晚餐有湯有菜有生果，簡直係露營嘅最高享受。仲要七日嘅餸菜都唔一樣，每日都好開胃，行得再攰都補返晒

食完之後，導遊就入嚟檢查我地嘅狀態，用血氧儀幫我地量心跳同血氧飽和度。睇返數字我都應該OK，有啲頭痛係正常，導遊話No Worry。

唯有瞓一覺，再睇吓點吧，唔通第一晚就落山咩

I bless the rains down in Africa 🇹🇿

好睇！請繼續

高反真係好辛苦

一路睇一路為porter覺得好心悒

14k club = 最高上過14,000呎山峯

加速

廁所都孭埋 真係估你唔到...

咁嘅服務個團費一啲都唔貴

Day 1 營地，Machame Camp，亦係第二日嘅起點，標高2835米。


（圖片來源：www.machame.com）

趁機介紹一吓整條線。

Day 1 (6hr) machame gate 1800m - machame camp 2835m
Day 2 (6hr) machame camp 2835m - shira camp 3750m
Day 3 (8hr) shira camp 3750m - lava tower 4600m - baranco camp 3900m
Day 4 (5hr) baranco camp 3900m - karanga camp 3995m
Day 5 (5hr) karanga camp 3995m - barafu camp 4673m
Day 6 (13hr) barafu camp 3673m - uhuru peak 5895m - barafu camp 3673m - milenium camp 3950m
Day 7 (6hr) milenium camp 3950m - gate 1800m

第4日到達營地之後有個幾鐘頭嘅小行山，主要用嚟適應一吓高度。而第5日就為咗準備之後凌晨出發攻頂，一早就安排我地瞓晏晝休息，所以行嘅路程都會比較短。

有啲Machame Route總共係用6日，方法就係將Day4同Day5二合為一，一日行晒兩段路 報嘅時候就要講定，因為由入場費去到Porter嘅Tips，都係逐日計錢，行6日要帶上山嘅食物份量亦唔一樣。報名時決定咗就冇得中途改變



第二日就向住3750米營地進發，天氣非常之好



可以望到坦桑尼亞第二高峰，4562米嘅Mount Meru。唔少人喺挑戰Kilimanjaro之前，都會先去嗰座熱吓身。又有人行完Kilimanjaro之後唔夠喉行埋第二座

邊座難行啲？我就唔知道，個Guide就話兩座都Very easy



兩邊嘅植物明顯生得比起尋日雨林嘅矮小。



越行越高，開始見到封雪嘅山頂了

Kilimanjaro有赤度之雪嘅稱號，可惜嘅係隨住全球暖化，封頂嘅雪已經一年比一年少 有預測話再過多十五年，山頂將唔會再見到雪

其實高反藥嘅作用大唔大？

strong post lm

其實高反藥嘅作用大唔大？

我自己覺得作用幾大。因為我係由第一日上到2800m發現有頭痛先開始食，然後第二日去到3700m反而乜痛都冇，之後一路食到尾。

之前喺南美3/4000m住咗成兩個月，以為冇事，點知2800m恰一恰醒返已經頭痛。個人認為高反係每次都唔同，曾經冇事唔代表下次冇事，除非有藥物敏感或者身體有問題唔食得，否則都係食定好

副作用主要係手腳甚至塊面會有啲痺痺地嘅感覺，同埋小便多咗。詳情都係問返醫護人員

喺好天氣之下，第二日難度亦唔大。



鬼馬嘅導遊，一見到鏡頭就會笑晒同擺晒甫士。

三個導遊分別叫Viviano（圖中前者），Mfaume（圖中後者）同埋Innocent（不在圖中），年齡分別36、21同27，有1至5年帶團上山經驗。其中Viviano已經做咗5年，攻頂159次，可以話係咩類型嘅遊客都見過晒。據佢講法，一般頭痛，作吓嘔，心跳好快（平靜時一分鐘百三下），都唔係大問題，咁點先有問題 其中一個分辨嘅方法，就係睇吓你行唔行到直線，如果行唔到，可能係腦水腫嘅癥狀，噉佢就會即刻帶你落山

總之有咩問題，最緊要即刻話比佢地聽，佢表示睇一眼就知道你得定唔得

雖然話佢地唔係醫生，但老老實實，人喺山上，可以話係連條命都交咗比佢地。不過有時聽佢地分享以往帶團嘅經驗，都覺得佢地係幾可靠，每一日都有種越嚟越放心嘅感覺 畢竟Kilimanjaro又唔係珠峰，雖然唔係最易，但講難都唔算好難，大把六十歲嘅阿伯阿婆照樣上山



大部份嘅導遊都係Porter出身，Mfaume都唔例外。政府規定18歲以上先可以登記做Porter，但係唔少喺我身邊擦身而過嘅坦桑尼亞Porter，望落都肯撚定冇18歲，有啲我懷疑佢地14都未有。我就問Mfaume幾歲開始下海

Mfaume坦誠17歲就偷偷做Porter。佢話喺坦桑尼亞，年紀隨你講咩就咩，要報大數絕對唔難。佢未夠秤就申請，主要唔係為咗啲錢，而係好想快啲有練習英文嘅機會

之前計過，團費1750嚟講，其中至少860係入場費，扣除兩晚酒店錢（90X2）同埋接送費（機場的士USD50一程 ），最多淨返600蚊到。當佢間公司賺200，就算唔計七日嘅食物同埋物資嘅折舊，除返開22個工作人員，每人都係分得USD20到。六個客人加埋就係每人人工USD120，做足七日冇收工，隨時半夜都要比客人痾夜尿嘈醒



所以我地呢間公司出發前係有比建議，每個Guide每日額外有USD20，廚師USD15，而Porter就USD10嘅小費，作為佢地微薄收入以外再多少少人工。

好多Porter，佢地都希望有一日可以做到Guide，唔駛再孭咁重嘅之餘，又可以賺多一倍嘅小費。而要做到Guide，最重要嘅，就係英文要講得好。當然隨住教育水平嘅提高，Mfaume表示今日要做Guide唔係咁易，英文好之餘仲要讀啲Tourism嘅證書。佢當時都儲咗幾年錢，先可以21歲咁後生就做到Guide

好犀利……

呢個地方以前睇書成日聽，但而家第一次睇實時相

Strong post lm