[直播]獨闖非洲之巔，5895米吉力馬札羅山

圖呢?

樓主平安返黎就好
等睇攻頂文

樓主平安就好
諗起如果男朋友去足7日無消息我實擔心死

巴打平安返到香港就好，等睇精彩post

介紹多次今次一齊行山嘅團友。左起Vicky、Sam（英國夫婦）、Stephane（法國仔）、樓豬、Grace、Kiat（新加坡夫婦）。

Vicky同Sam已經認識咗十一年，曾經一齊去中國同東南亞旅行咗五個月，而今次係結婚兩周年旅行。原來Sam只係提議去坦桑尼亞睇吓動物，點知從來冇試過露營嘅Vicky竟然話不如順便行埋Kilimanjaro 就係噉佢地就開始咗今次嘅登頂之旅。

Grace同Kiat係一對已經五十一歲嘅夫妻，強勁嘅地方係佢地二十年前已經嚟過一次，當時Kiat已經去到5600米，距離山頂只得200米，但係都頂唔住寒冷嘅天氣，飲恨落返山。今次就係Grace提出要番挑當日未完嘅夢

至於Stephane，應該係成團感覺最強嘅一個，啱啱上年去尼泊爾行咗12日EBC Trek，呢七日應該難唔到佢？而我，可能勉強係呢班日當中喺高山地區適應過最耐嘅人，上年有個幾兩個月時間都喺秘魯同玻利維亞渡過。但講到行山同體能，或者真係差啲，淨係對腳都短過人 呢個時候難免諗起之前Omana同Nupur另一個印度朋友嘅說話，佢話：

「行山唔係睇你行唔行到，而係睇座山畀唔畀你行。」

有時結果未必控制得到，但求盡力無悔

坐車出發到國家公園入口。



三個導遊之一，Viviano。任職導遊5年，攻頂159次 平均一年攻30次以上，每個月攻3-4次，每次5-8日⋯⋯

Kilimanjaro嘅路線有好多條，其中有一條叫Marangu係曾經最熱門嘅路線，沿路有山屋，可以唔使紥營，因為唔使帶營，價錢亦係最平，但最後一段爬升幅度大，登頂失敗率比較高。而其他路線都要住帳篷，其中Machame同Lemosho因為爬升比較慢，成功率最高，近來已經超越Marangu成為最多人行嘅路線。

喺報團嘅時候，就要揀定想行邊條路。我揀嘅原則好簡單，就係睇吓我出發嗰幾日有咩團比我Join。咁啱喺我比agent嗰兩三日入面，就有一個Machame 7日團比我加入，我冇乜考慮之下就揀咗佢了。



Machame route嘅入口，Machame gate，海拔1800米，已經感覺到少少涼意。



距離第一個Camp site Machame camp 11公里，亦係第一日要行嘅路程，由1800米上升到2800米，預算係5個鐘頭。因為營地都只係2800米，根據之前喺南美洲嘅經驗，海拔唔到四千幾我都冇乜感覺，所以都好放心噉完全冇食到高反藥，諗住留到第二三日先至開始食。除咗Stephane以外嘅其他人早喺尋日就已經開始食藥了。



喺門口登記處簽埋名，就準備出發。有啲公司係要人而家去售票處交錢，而我地嗰間就一早收晒錢，由佢地幫我地比。每個要入場嘅遊客，每人每日要比如70美金入場費，每晚50扎營費，同埋20蚊救援費。以7日路線為例，即係就算唔計導遊人工同公司賺嘅錢，淨係入去已經要擺低（70+50）*7 + 20 = USD860。只能話，嚟呢度行山絕對唔係平價嘅活動

之前上網見到有啲Tour唔駛一千蚊就報得，而家計返都唔係好夠膽報 始終上到山，可以話連條命都交埋比間公司

喺我食緊公司提供嘅Lunch box時，Porter們已經好似六合彩攪珠噉，由下至上，由左至右整齊排列好，等緊開工。



就係呢班無名英雄，日復日年復年噉上山，先造就咁多人登頂成功。

雖然話係國家規定人行山一定要join團，而join團就一定包埋Porter，如果唔係可能會有唔少人挑戰自己孭晒所有嘢上山。但平心而論，行完之後諗返，如果除咗自己每日跟身嗰三四公升水，仲要加埋嗰十公斤八公斤睡袋帳篷同食物，我諗我真係行唔到上去 有時見到佢地拎住咁多嘢做得咁辛苦，先得10蚊美金一日，真係不禁問一句，公平咩



Porter輪流將行李磅重，每人規定最多背負25公斤。



但佢地並唔係用孭嘅。而係用頭頂

我地六個人，就有18個Porter負責拎我地嘅嘢，包括行李，全程食物，帳篷，等等。至於點解要咁多人？開頭我地都唔明，但後來好快就知道了

留名 由直到世界盡頭開始追

加速

LM
登一次咁撚貴

加速

要18個人應該係因為佢地要係上面煮野食
要揹埋啲食物爐具

正式開始

入口大約有15-20度，連同行路時郁動嘅熱力，第一日着短袖衫短褲行都冇問題。



Machame route由起點海拔1800米，到頂點5895米，溫度由20度一路下降至大約-20度，濕度亦由最低嘅9X%，去到山頂嘅30%。行一次可以話係經歷晒四季。

因為氣候變化大，整個行山路段可以按氣候分為五個區：上山前嘅Bushland（叢林），1800米-3000米嘅Rainforest（雨林），3000米-4000米嘅Heath/Moorland（荒野），4000米以上嘅Alpine Desert（高山荒漠）同埋山頂。



第一日嘅路程全部都係雨林入面，可以當係涼爽版嘅香港行山徑。11公里爬升1000米，同由荃灣行上大帽山嘅波波差唔多，對於慣咗濕濕淋淋嘅香港人嚟講，難度唔高。1800米行上2800米亦通常未有高山反應。



有啲路甚至舖得靚靚仔仔，好似行緊麥理浩徑

出出街先 今晚繼續

支持

食厭左pancake未

等睇

樓主平安返到香港 推

lm

正呀