[直播]獨闖非洲之巔，5895米吉力馬札羅山

留名加速

lm

Live

可以輯錄成書

你係咪買

D Porter勁到 10幾歲就揹20幾kg上山
有無夜晚銀河既相

根據導遊之一Mfaume所講，佢17歲第一次做porter時係好辛苦。因為porter係唔會有training，通常有興趣入行嘅人自己跟人行一兩次，就會用freelance嘅形式接嚟做。第一次孭嘢上山嘅時候，真係攰到發脾氣，佢仲話試過行到一半灰到將客人嘅行李揼落地洩憤

就我所見大部份porter都好敬業，偶然見過有porter差錯腳連人帶袋仆親 但就未見過專登揼袋落地

d Porter 煮既野食好唔好味?通常會煮d咩?

煮嘢食嗰個係廚師，人工同小費都比porter高，算係高一級嘅職位 廚師孭嘅嘢少過porter，但就負責晒卞遊客嘅早午晚三餐。早餐多數係麥皮+斑戟+多士，午晚餐就一定有湯（唔同款嘅菜湯/湯麵），坦桑尼亞式嘅飯（同之前喺moshi town餐廳食嘅好相似）/意粉/薯條沙律+一碟餸（試過有炸雞/炸魚/芋頭/海鮮批/菜/炸薯蓉），同埋每餐都有生果（西瓜/牛油果/菠蘿/橙/蕉/⋯⋯）

款式之多，露營嚟講只能用奢華嚟形容

從未試過因為口味唔啱而冇胃口食

一個6人tour
上山變左廿幾人 都幾壯觀

計埋其他公司每個營地都幾百人，仲壯觀

加速唔該

喺好天氣之下，第二日難度亦唔大。



鬼馬嘅導遊，一見到鏡頭就會笑晒同擺晒甫士。

三個導遊分別叫Viviano（圖中前者），Mfaume（圖中後者）同埋Innocent（不在圖中），年齡分別36、21同27，有1至5年帶團上山經驗。其中Viviano已經做咗5年，攻頂159次，可以話係咩類型嘅遊客都見過晒。據佢講法，一般頭痛，作吓嘔，心跳好快（平靜時一分鐘百三下），都唔係大問題，咁點先有問題 其中一個分辨嘅方法，就係睇吓你行唔行到直線，如果行唔到，可能係腦水腫嘅癥狀，噉佢就會即刻帶你落山

總之有咩問題，最緊要即刻話比佢地聽，佢表示睇一眼就知道你得定唔得

雖然話佢地唔係醫生，但老老實實，人喺山上，可以話係連條命都交咗比佢地。不過有時聽佢地分享以往帶團嘅經驗，都覺得佢地係幾可靠，每一日都有種越嚟越放心嘅感覺 畢竟Kilimanjaro又唔係珠峰，雖然唔係最易，但講難都唔算好難，大把六十歲嘅阿伯阿婆照樣上山



大部份嘅導遊都係Porter出身，Mfaume都唔例外。政府規定18歲以上先可以登記做Porter，但係唔少喺我身邊擦身而過嘅坦桑尼亞Porter，望落都肯撚定冇18歲，有啲我懷疑佢地14都未有。我就問Mfaume幾歲開始下海

Mfaume坦誠17歲就偷偷做Porter。佢話喺坦桑尼亞，年紀隨你講咩就咩，要報大數絕對唔難。佢未夠秤就申請，主要唔係為咗啲錢，而係好想快啲有練習英文嘅機會

之前計過，團費1750嚟講，其中至少860係入場費，扣除兩晚酒店錢（90X2）同埋接送費（機場的士USD50一程 ），最多淨返600蚊到。當佢間公司賺200，就算唔計七日嘅食物同埋物資嘅折舊，除返開22個工作人員，每人都係分得USD20到。六個客人加埋就係每人人工USD120，做足七日冇收工，隨時半夜都要比客人痾夜尿嘈醒



所以我地呢間公司出發前係有比建議，每個Guide每日額外有USD20，廚師USD15，而Porter就USD10嘅小費，作為佢地微薄收入以外再多少少人工。

好多Porter，佢地都希望有一日可以做到Guide，唔駛再孭咁重嘅之餘，又可以賺多一倍嘅小費。而要做到Guide，最重要嘅，就係英文要講得好。當然隨住教育水平嘅提高，Mfaume表示今日要做Guide唔係咁易，英文好之餘仲要讀啲Tourism嘅證書。佢當時都儲咗幾年錢，先可以21歲咁後生就做到Guide

即係每人每日要俾 USD20 + USD15 + (USD10 x 18) = USD 215 小費?
去7日, 每人即係另外小費要俾多USD1505?

為porter致敬

留名

即係每人每日要俾 USD20 + USD15 + (USD10 x 18) = USD 215 小費?
去7日, 每人即係另外小費要俾多USD1505?

因為3個guide，USD20*3，然後個大數六個人分，每人大約USD300

加速唔該

喺街 今晚加速

咁都好D
如果團費1500蚊 TIPS 1500蚊
7日3000蚊美金你都咪話唔貴...
雖則話 1800蚊美金都唔算平 但真係有排儲錢

Kilimanjaro底下的廁所 因為有咁正嘅廁所，每日都非常暢通，便便冇問題，胃口更冇問題，每日嘅狀態都好好 曾經聽過有人上山七日冇屎痾，唔知佢地個廁所係點





第四日一出發，天氣同風景都冇得彈

由Barranco Camp去Karanga Camp，要經過一個以山勢嚴竣而出名嘅Barranco Wall，因為我聽指示嘅時候成日都發夢，行完先知自己過咗，都冇覺得有咩特別險要



睇返都要手腳並用噉爬。



Porter都出動對手扶實啲袋，睇嚟有啲難度了



Barranco Wall 上面有舊Kissing Rock，因為立足點好窄，要用手抱住石頭先過到。大家都會攬住舊石影相留念



舊石收集咗幾多人嘅口水

利申我都有錫



過咗Kissing Rock，已經離Campsite好遠，啲營亦收捨得八八九九。



轉個靚彎，迎來天堂之路



左邊係封雪嘅山頂



右邊係另一座山頂同埋雲海

覺得張張相都差唔多？



但我就從來沒有睇厭過

我從來唔係呢座山嘅主角。



佢地先係



見佢地放返兩隻手落嚟，就知道越行越輕鬆了。



遊客先需要用行山杖

第四日輕輕鬆鬆鄧梓峰，膠膠吓遊就行完了



啲Guide同Porter樣樣都好，唯獨影相仲差過我 隻手指咩事



呢張算好，只係斬咗我隻腳

上到山頂乖乖地，影得我靚仔啲，OK？

好正

very high sauce post

食邊種高反藥?

樓豬英文一定勁撚到爆燈啦

支持樓主~
吉力馬札羅山真係行山友心中嚮往之地
我一直都想有生之年去
而家先追PO過癮下先

我係食佢。因為屬於處方藥物，最好都係提早Book定旅遊健康中心，睇吓個醫生有咩建議，由佢開藥

英文我應該同坦桑尼亞嘅導遊差唔多程度 溝通到就可以啦

第五日，山頂已近在眼前



呢一日會上最高嘅一個營地，亦係Kilimanjaro嘅Base Camp，海拔4673米。法國仔話齋，如果用尼泊爾嘅EBC Trek同呢度比，景色係EBC靚幾班，但係講滿足感，行呢度係大啲。因為EBC真係行到個Base Camp就完，但係喺呢度，去到Base Camp，先係戰鬥嘅開始，Base Camp之後係攻頂，攻頂呀！對行山嘅人嚟講，攻頂同去Base Camp嘅滿足感，係冇得比



由4千行到4673，係上升六百幾米，橫向距離只有4公里，但因為空氣稀薄，呢日將會用一個鐘頭一公里嘅速度嚟行



當然Porter就唔係呢個速度



問啲Guide最快試過用咩速度上山，Mfaume表示一日來回一定冇問題

即係點？即係一天光就由Machame Gate開始上，上到山頂再落返個Gate，係可以喺天黑之前完成，連Tent都唔使帶

佢就話十五六個鐘來回算係好慢，基本上每個Guide都一定做到。如果計最快紀錄，坦桑尼亞本土人係可以十個鐘來回 但係世界紀錄就由一個厄瓜多爾人創下，只係需要6個鐘



明明望返轉頭，我都走咗好遠



第五日嘅路係全個旅程之中最短，四個幾鐘就玩完。六點幾就起咗身，七點多啲就出發，中午已經抵達營地。



畀咗部相機個Guide幫手影，佢影乜鳩

咁快到，目的只有一個，就係畀足時間我地瞓覺同休息，準備今晚十一點起身攻頂。由Base Camp到山頂Uhuru Peak，要爬升1200米，大約要6-8個鐘頭。如果十一點幾出發，就可以喺日出之前到頂，睇到吉力馬札羅嘅御來光 喺到山頂之後，仲要預多3個鐘頭返落Base Camp，然後稍作休息就再行多3個鐘落返較低嘅營地瞓覺。計埋食飯同休息嘅時間，到咗頂之後都要活動多7-9個鐘頭，加上Kilimanjaro一般都係朝早天氣比較好，下晝開始起霧甚至落雨，半夜攻頂都係冇辦法之中嘅辦法

一諗起最後一戰將會喺睡眠不足嘅情況下展開，就有少少緊張。連量心跳嘅時候都一度跳到一分鐘百二下 究竟我最終會唔會做得到呢？

啲人攝影技術