[直播]獨闖非洲之巔，5895米吉力馬札羅山

千奴 · 2018-09-08T14:02:56+08:00

自從上年同女神旅行咗接近一年，返嚟香港做咗幾個月嘢，旅行嘅新鮮感已經消磨得八八九九適逢轉工之際突然有十幾日空檔，屎忽痕想搵返啲刺激，就用咗一個星期計劃行程，訂機票，出發（同女神嘅遊記請睇舊post : ［一年長途遊記］直到世界盡頭： https://lihkg.com/thread/436262/page/1 ）就係咁，我尋日踏上咗非洲之巔嘅旅途。非洲最高峰吉力馬札羅山（kilimanjaro）海拔5895米，即係富士山頂加多2000米到。因為無需任何攀山設備就可以攻頂，而成為熱門嘅行山聖地。座山位於東非國家坦桑尼亞，上年旅行一直冇機會去到撒哈拉沙漠而南嘅非洲，一直對呢塊神秘嘅大陸念念不忘。九月嘅坦桑尼亞天氣涼爽，晏畫太陽晒住都有廿幾度，唔算太熱，加上係旱季，甚少落雨，係登山嘅旺季。遇上對嘅時間，又係想去嘅地方，可以話天時地利都齊晒。可惜嘅係因為籌備得太急，連女神都唔得閒，所以都註定孤獨一人出發七日準備時間花得最多係同登山嘅公司聯絡。以我所知，坦桑尼亞為咗保障國家收入同遊客安全，規定咗所有人都要跟導遊上山，唔比人自己上去。隔離post見到有巴打話下年準備一個人唔請guide攻頂唔知係咪check到有咩方法繞過agent 定係搵啲冇人看守嘅奚徑上山？行呢座山單係入場費已經800美金可以話係好撚狼死，但衰就衰在年年都大把人（包括我）課金爬山好似又要屌又要睇tvb咁為咗令到呢筆錢使得值啲，減低中伏機會，花咗幾日去睇review同直接聯絡佢地，最後揀咗其中一間報名，如果攻頂成功再開名幫佢賣廣告再嚟就係打針買藥。坦桑尼亞入境要有黃熱病打針證明，我因為上年去南美打咗，今次慳返。各位巴絲要去就一定要預早book定旅遊健康中心見醫生打定針，記得上年book到好full，早兩三個月更加好。但即使打咗針，都要預備瘧疾藥同高反藥。book唔切travel clinic唯有睇其他診所搵醫生寫紙開藥，再出去買。再搵返晒之前旅行嘅四季裝備出嚟（山頂可達負二十度，登山公司話最凍嗰晚要瞓負十度），就準備好了