[垃圾文筆日記]帶住心臟踩去西藏

Lm
上年去完環台想試踩川藏線
諗返起當時自已一個上武嶺真係痴撚左線

支持樓主

9月13號 (Day 54)

Today target

書松村->飛來寺


今日有個之前都去左西藏既人話想跟我地一齊出發，但係佢又踩得幾慢真係，好快就已經見唔到佢。










個景

今日要上白馬雪山，一出發就已經係咁上，明天好快就頂唔住，推下踩下，比我過左佢，就同佢講係前面等。

上白馬雪山係有兩條路，一條行隧道，冇咁辛苦同快勁多，另一條係行舊國道，可以上到山頂
我一開始聽老闆娘講話一直行柏油路就得，一直踩一直踩，不知不覺已經到左隧道口，問人先知原來要行舊國道，但係翻轉頭勁遠，所以都係屈服左，行左隧道。


3個60歲以上既老人家都踩去拉薩，佩服。

等左明天10分鐘之後就出發通過隧道，隧道入面係凍過出面，所以要著多兩件衫先可以出發，入到去都係覺得凍，差條褲呀屌。

過左隧道就好快到落斜位，加埋成29km落斜，爽到不得了，仲睇到梅里雪山。






落山風景

到左德欽縣，我地既明天又黎料，我就想到飛來寺，可以睇梅里雪山，其實都係多10km，明天就係咁要求我不如留係德欽算啦，我就同佢講，咁你不如你跟5人團一齊住青旅啦，佢又話唔想住青旅，話同我食左飯先再諗。

問佢食咩，話是但，求其入左間餐廳到，話每人20蚊到，又話太貴，搵多間12蚊食面又話唔食，成個港女咁，真係。。。

食完就問佢跟我上去定住係到，佢又話跟我上去，咁就諗住搵定酒店囉，問佢又話想住邊間，
佢又話想住翻青旅平啲，心諗。。

踩上飛來寺既途中又撞番今日同我地一齊出發果條友，不過一直都唔知佢叫咩名，咁就一齊上。

踩到一半，明天哥又頂唔住，咁我繼續踩。

佢一面嫌棄話：唔洗咁急呀話，依加幾點呀。

當堂呆左，我踩快啲到都唔得咁專制。

一到飛來寺就即刻影梅里雪山





可惜勁多雲

其實前幾日DaDa啊達已經話係飛來寺等我，所以今日一定要衝到上黎，夜晚就同DaDa啊達食飯聚舊，食左個土雞邊爐，平靚正！而明天就同另一個人去左食野。

https://www.youtube.com/watch?v=8IcQVFRKE-A

有機會真係要試下，挑戰自己

9月14號 (Day 55)

Today no target

今日係飛來寺休息，為左再試下睇梅里雪山，正所謂，搏一搏，單車變摩托。

一早就比明天佢地嘈醒左，因為佢地今日出發，目送佢地之後等DaDa啊達起身食早餐，食完早餐就去飛來寺睇下。



呢啲野叫經輪，轉左一個圈就等於你念左一經文


佛教既經文顏色順序都係藍白紅綠黃（好似係）




飛來寺的風景

睇完飛來寺就去捕住梅里雪山，等啲雲飛走




等左好耐先露左小小出黎


有時候仲會冇埋

影唔到就決定先翻去先，約左七點食飯。

到左七點打開門一望，哇屌，終於黎啦黎啦，狗衝拎相機係咁影










正到癲


夜晚佢地打邊爐，我就鋸扒，佢地仲要食唔飽。

9月15號 (Day 56)

Today target

飛來寺->鹽井


今日朝早一起身，就聽到有人係出面叫，心諗晨早流流搞乜。


屌，原來係傳說中既日照金山，狗衝拎相機影相，如果冇雲，個場面係咁壯觀呢。

雖然淨係睇到主峰，但係都好正，好滿足，大滿足。


食左個勁豐富早餐，有米線，玉米，茶葉蛋，酥油茶，食到好飽。

好似未介紹過咩係酥油茶，酥油茶係西藏獨有既一種茶，有甜有鹹，不過再原先就只有鹹味，但係個味唔係個個都可以接受得到。

連續係咁落，但係全部都係山泥傾瀉路段，路邊都有好多碎石，所以都要刹住刹住咁落，最搞笑係我轉彎成支水飛左出去，嚇鳩死，唔夠膽汁翻，太多車係後面。


落斜既途中就係去雨崩，下次黎就睇下你咩料。


危險中影相

全部都有機會山泥傾瀉
去左佛山食個米線，呢到有個地方又叫佛山，人地仲請我地食奶渣，奶渣係可以用黎整酥油茶


奶渣，我覺得冇乜名，佢地覺得好好食


個公廁臭到佢差啲嘔






個天點解可以咁藍都有


承你貴言


輕輕鬆鬆過西藏，其實上西藏唔難

仲有九公里就到目的地，正當我以為輕鬆上埋個斜，就聽到架車有好怪既聲
啊達就話：你爆軚啦柒頭
我就話：唔撚係掛



結果三條友一齊整，搞左成半個鐘。
佢地仲話我有機會搞到佢地睇唔到中國新歌聲，我真係頹撚左。
整完就繼續上路，但係上得好辛苦，唔知係咪爆軚爆到頹左個人。

搵左酒店就去食飯，去左間好似麥當勞既快餐到食，叫左個pizza，35蚊。


細撚到仆街，差啲將個pizza，dum翻入廚房。
仲要唔好食，翻大陸食野都要問清楚，唔係就好似我地咁成日比人呃。

https://youtu.be/0D57MMRV8pE

9月16號 (Day 57)

Today target

鹽井->毛尼村


今日係超級辛苦一日，因為有一條連續41km上斜，直達紅拉山山頂。

原本諗住六點起身出發，因為有機會係咁耐以黎最辛苦既一日，但係大家都知道係冇可能成功，結果八點半起身，狗衝汁整食早餐。

入左好普通既餐館食野，三條友都叫左個炒飯，老闆就同我地講不如炒一個大盤啦，你地分啦，有人食多有人食少，咁我地緊係話好啦。

點知老闆又拎左一大盤湯出黎，我地比人呃左咁多次，緊係有哂經驗啦
即刻同佢講：好似冇叫喎。

老闆就話：呢個送既，唔洗錢，你地踩單車要多啲能量。

感動到仆街!!

你係香港？點會有人雪中送炭，唔踩多你兩腳都偷笑。

見我地食哂啲飯仲問我地洗唔洗要多啲，我地臉面厚過裝甲車，緊係話要啦。

食飽先出發

一開波就先落6km斜，之後就黎料啦，上斜啲路全部都係碎石路，時速都係得6km左右，慢慢搖上去。





好鬼靚


話說，呢個人叫風神，佢試過用十幾日就踩完滇藏線，我係一條癲佬，佢係一條大癲佬。

https://m.sohu.com/n/494576154/?wscrid=95360_7
佢事蹟(有殘體字)

踩踩聽到好似琴日爆軚既聲，心諗唔撚係又黎呀話，即刻跳車睇下咩料，禁一禁，屌你老母係咪玩鳩我呀，淋到仆街。

兩條軚都爆左，姐係一定要補軚，全程都係自己補，佢地兩個都冇幫過我，其實我都覺得係好事黎，總有啲時候係要靠自己，冇人幫到你，雖然補左個半鐘，但係都係難得既經驗，中途仲要比兩條仆街仔係咁言語攻擊，又咩梅開二度，叫車錢你比，當然只講笑啦。

補緊既期間，仲有揸車既人話送水比我地，真係好人，感謝!

補完就繼續上路，但係已經三點半，仲有成30km上斜，仲有70km先到芒康，姐係踩硬夜車
因為我架車個腳踏有問題，會格格聲，一下大聲一下細，啊達就話我部單車係心跳號。我又覺得幾得意，所以我部單車就心跳號。

路況到最後上斜10km先有好轉，因為就上頂係咁爆上去，只要個頂上有經幡，你就根本上可以確認係山頂。





山頂直觀梅里雪山


仲搞你唔掂?

係山頂已經七點半，太陽已經開始落山，只係得番9度左右，等陣仲要準備落斜，所以我地都不停加衫保暖。

落左一半已經個天黑哂，天黑踩車係極度危險，落斜一定要慢慢黎，同隊友最小保持兩個車位，有大車就讓佢行先。

我地踩踩下仲有隻唔知係狗定羊經過，黑到都唔知係咩黎，當堂嚇一跳。

落到底就傾，今晚點樣，因為真係太危險，仲有40km先到我地原本既目標芒康縣，所以決定踩到有住既地方就停。

一望上個天空真係正到不得了，成條星河出哂黎，係香港真係冇可能睇到。

我地一經過民屋就問人地可唔可以比我地住，佢竟然話前面一公里就有住既地方，我地懷住好興奮既心情踩去睇，點知又真係有。

踩多1km又真係有住宿，係一個藏民家庭開。


老板娘就整左個蛋面比我地食。


間房好有特色，白色係鹽黎，出汗出到咁，就知道我地咩料啦。

https://www.youtube.com/watch?v=9AnvL4XVjH8

9月17號 (Day 58)

Today target

毛尼村->芒康


一起身係老板娘屋企食野既時候，老板娘就問我地可唔可以幫佢入電話費，咁我地3個人就得我有整微信付款，咁我地就緊係幫得就幫啦，原來佢係想幫佢老公入錢，就入100蚊人仔，咁係微信到入左之後，佢就開始打電話比佢係城入面既老公啦，點知都係話個電話號碼冇錢所以唔通，當時既諗法係怕老板娘以為我地係想呃佢錢，所以我地都好緊張，但係我明明睇到微信係比左錢，又double check埋個電話號碼，應該冇死啦，但係睇住老板娘係咁打都唔通，我個心都有啲忐忑，做好最壞打算比翻一百蚊佢，微信冇左一百蚊都冇所謂。

好彩等左5分鐘，都係打通左，可能西藏既手機信號冇咁勁，所以要等下，我地可以安心離開。

因為琴日未踩到去芒康，所以今日繼續，一路上都係好路，勁好踩，可以keep到17km/h。



藏民既屋企





西藏呢邊好多咁既平原


測量都有

踩到一半既時候有啲𡃁仔跑出黎，唔通就係傳說中既藏族小孩，我即刻避開佢地，避免比人打劫。

作為香港既同胞，入到檢查站緊係左check，右check，仲要寫埋行程，由邊到去到邊到，用左幾多日。

入左城搵左酒店，大家都好肚餓，佢地就諗住食加加面，佢係一碗好細既面，可以一口過，食完一碗就係咁加比你，最高記錄147碗，聽聞係一位單車友破記錄，成功破佢記錄既話就有500蚊同5隻牦牛。

點知行過一堆爛路，佢竟然冇開，啊達就講左成日加加面啊，食唔到啊。

不過我就冇乜所謂，反正我食10碗就收皮了。


三人房

push

9月18號 (Day 59)

Today target

芒康縣->如美鎮


由於我戰友心跳號啲心跳聲太澎湃，DaDa同啊達都頂唔順，咁我唯有拎去整，我一朝早八點起身，班友仔仲訓緊。


個師傅講話一定要成個腳踏換，要50蚊，價格都可以接受既，不過就有啲細，唔係好食力。


翻到去班屎忽鬼仲訓緊，我汁汁下野佢地先起身，不過佢地整野好快，我搞掂，佢地搞掂。


今日終於由214國道去到318。








今日黎講只係上12km，就有得享受30km落斜，所以都好輕鬆，旅程上總有意外發生。

DaDa為左避開個減速坡就唔小心跌落窿到，立即見紅，佢隻手指一忽肉就甩出黎咁制，因為我同啊達一早行先，所以佢唯有自行處理傷口，佢竟然剪左忽肉，真漢子！
係佢出事既半個鐘後我地先知道佢炒左車，狗衝去搵佢，問佢洗唔洗包一包，佢竟然話：小事黎姐，踩埋佢先，好撚癲。

輕鬆到達山頂，因為只係爬500米。



正到呢


似唔似WINDOW XP個WALLPAPER

之後就瘋狂係咁落，好正。

去到如美鎮搞掂啲野，咁岩見到reception部電腦到有LOL，就問佢可唔可以玩場，佢又話得，打打下成班人一路食煙一路睇我玩，我都係安靜咁打一鋪機姐。

https://youtu.be/9OBQ13tGIAY

9月19號 (Day 60)

Today target

如美鎮->榮許兵站


今日可能係有史以黎最辛苦既一日，因為要連爬兩個山，先要爬上覺巴山，再爬上半個東達山，廢話少講，出張海拔圖比大家睇



今日朝早去左藏民餐館食野，佢地叫左炒面，我就叫左酸辣粉，藏民餐館係整野係特別耐，可能係全部即整


個炒面有湯





一路上山既風景都唔錯



踩到一半我零食小王子又要出動

係呢段啊達又一馬當先衝左上去，好快唔見左人，我又盡跟，DaDa就係後面慢慢踩

山頂有個觀景台，我同啊達就係到一路睇風景一路等DaDa，突然收到個whatapps，原來DaDa爆左軚，係下面整緊。






觀景台的風景

等緊DaDa既時候，都有好多由成都出發既人上到黎，黎自邊到都有，大家都係為左挑戰自己，挑戰西藏，完成壯舉。

DaDa到左之後，因為時間太遲，冇得食飯要直上榮許。

又要上山，真係喊出黎，DaDa因為爆完軚又休息左好短時間，所以佢上到好頹。

不過風景就真係好既，只要有風景睇我就滿足。



有冇歐洲森林feel

當我停低休息之際，突然山坡有舊石碌落嚟，好彩冇揼中我，嚇死人咩，心都離一離呀


就係呢個坡

踩左冇排就有班人過左我，有啲有行李有啲冇，我就立馬追鳩番佢地，又不停轟落個腳踏到，之後連啊達都追過埋，但係最後都係差一個女仔追唔到，因為佢乜行李都冇。

其實大家追黎追去係幾好，因為大家整體既速度都會上升，但係千奇唔好落斜追車，好危險。


到左榮許之後揀左間名氣大既教授山莊，雖然係冇熱水沖涼，只可以抹身，但係野食勁正，個湯係世界級好飲。

https://youtu.be/4GALwnS324E

9月20號 (Day 61)

Today target

榮許兵站->左貢縣


今日要爬既就係滇藏線第二高既山，東達山，足足有海拔5000米，不過榮許已經有4000米，所以只係上1000米就到東達山埡口。（埡口係條公路既最高點）

朝早係個教授山莊食左個面，唔夠仲可以加面，務求喂飽你地，好好地再上路。


有個人係徒步加拉車，真係咩形式去西藏既人都有。

因為海拔太高既關係，氧氣唔夠，個人好易攰，四肢都冇乜力，個心臟跳得好快，成日都停低休息，每上100米個頭就會好痛，呢個係好正常既高山反應，可以用意志力解決，只要唔太勉強自己就冇事。









不得了


有兩個人係成條路既焦點，因為佢地踩住一架雙人車，仲要有一個係十二歲女仔，不過佢條腿仲壯過我，唔係講笑。

雙人車係勁難踩，因為平衡問題，總有人踩得快踩得慢，所以好難平衡到，不過佢地可能係父女，所以見佢地步伐好一致，平路踩得超快。

最係都係慢慢上到埡口，慢又點上到咪得。


上到成隻狗咁



輕輕鬆鬆落斜到達左貢

究竟點解叫做心跳號

樓豬架單車係特登買踏去西藏？

#207 樓主咪講左

見到樓主三個人又結伴同行，好滾動呀

Live

係

會一齊到拉薩

想問樓主係踩咩種類既車 ？
好似樓主咁踩長途既話，公路車定山地車會比較好

Lm

其實對單車黎講，我都唔算識好多。
不過公路車最大既問題係車架，因為為左加速度化，所以個車架都唔算好硬淨。
山地車就冇呢個問題，當然都要部車唔錯啦，例如鋼架。
但係依加都有啲新選擇，叫做旅行車，佢就算係比較全面啲車種。

https://item.taobao.com/item.htm?id=533012370636&ns=1&abbucket=12#detail
遲啲如果買既話，可能會買呢部，不過唔叫你買，只係比個參考你(有殘體字)

9月21日 (Day 62)

Today target

左貢縣->邦達鎮



朝早食左勁有誠意既米線，都只係15蚊。

一個好食既早餐，立即增加戰鬥力20%。











好快就踩左兩個鐘，佢地一講話已經踩左40km，當堂嚇一跳，原來我地踩得咁快，可能最近上得山多，兩個鐘都只係踩到12km左右，有進步。


啊達踩踩下肚痛，就諗住搵個地方食飯加柯屎，佢就打開個紙巾筒偷成卷紙巾去柯屎，點知咁啱老闆娘就係廚房出黎，mission failed。

笑到我地訓係到


依加好似係收稻草既時間，見到好多條村都收完之後一車車運走。

啊達踩踩就話，條路咁輕鬆，一定有古怪，屌佢真係雷達，踩到最後15km，突然狂風驟雨，勁大既逆風，落斜都只有10km/h，又凍，隻手好似結左冰咁，冇哂知覺。

佢地仲話要破風，跟都跟唔到。

搵左個地方停低，食下野就已經冇落雨，風都冇咁大，冇左阻礙，好快就到左目的地。


洗衫要洗到咁，你都咪話唔慘，要企係到等十分鐘。


有人帶埋隻狗一齊旅行，好彩夜晚都好安靜

9月22號 (Day 63)

Today target

邦達鎮->八宿縣



今日就係傳說中既怒江72拐，先放張圖比大家睇下咩料，呢到只係72拐既3份之1，總長45km。


怒江72拐係進藏線最出名同最危險既一段路，因為佢既難度加上有好多前輩係到失手。

今日一早就起身諗住同成班單車友一齊出發，為求疊馬，英雄主義，一起身收衫就發現，啊達啲衫飛哂去水氹到，笑到我地仆街。







爬左個業拉山就到戲肉，怒江72拐。

一開始都有啲緊張，因為聽太多人講呢到好危險，我就慢慢落，發現原來都幾輕鬆，同平時差唔多，個人就開始囂，係咁放，淨係轉彎先刹車。


當DaDa放低左部車去影72拐，中國人就會借你部單車影一張相冇問過你既情況下，好似佢自己都有份踩過黎咁

意外真係意料之外屌你老味，一轉完個急彎就有個M字位，太快過搞到炒車，好彩淨係擦傷小小，如果有對頭車，就好可能冇呢篇遊記。

其實當時炒車個下，好似個腦一片空白，咁就飛左落地下，再係地下轉幾個圈。

最柒係炒完車之後，後面架車停左係到問我有冇事，搞到成條車龍，之後我話冇事架車走左，後面架車又停低問我，來來回回左十次，係咁講冇事okay，仲有條友比罐雪碧我，唔知做乜。

之後一路踩一路痛都算，竟然有世界級逆風，係大到有一下用最輕既波都上唔到，本身20km既路用兩個鐘應該搞掂，結果用左三個鐘。

由於今日係星期五，佢地要睇中國新歌聲，搵左間有電視，點知老闆娘話本身唔比住香港人，當係外國人，我地被迫港獨？之後叫我地唔好同人講係香港人。

正當佢地睇緊個節目，就有公安黎緊，老闆娘立即叫我地熄燈唔好嘈，搞到佢地電視都要熄埋冇得睇，笑鬼死，但係又有啲緊張，比人發現唔知會點。


炒車都會食餐好既