7月26號(Day 5)
Today，target
虎門->廣州
今日越級挑戰，由虎門踩70km到廣州，廣州個名就聽得多，其實我自己一次都未去過，唔知入面係點樣。
早餐就食左個炒面
一路上踩去都好大沙塵，好彩有面紗同太陽眼鏡擋一擋，大貨車又多，成日係後面響咹，嚇到成個人彈起，真係細膽啲都炒車。
晏晝就食左個揚州炒飯，乾到以為食緊沙，仲要25蚊。
因為天氣太熱太焗，踩到個人勁頭暈，應該中暑。
不停休息，踩到呢到仲有成27km，但係已經好唔想踩落去，不過冇計，結果都係要繼續堅持。
就快入城係油站買左啲餅食，唔知係咪太肚餓，好鬼好食。
入到城，廣州比我既感覺就係霧霾好嚴重，同個城好亂，車就勁多，大貨車都有。
因為廣州整緊路，好多地方都得翻一條線，搞到勁塞，好多電單車就係車既中間穿插，咁啱我就目擊意外既發生。
事源就係前面塞車，架貨車就停左係到，隔黎就有條gap，單車友就諗，正呀，條gap仲唔係為我而設，一上就仆街，出事啦，架貨車就咁岩開車，轉彎收尾就夾到佢，好彩個單車友都冇事，係架車爛左姐，單車友佛都有火，立即衝上前以禮相待，問候一下貨車佬既老母，聽左一陣，單車友都只係要貨車佬賠架單車錢比佢
個陣時我就諗，有陣時係咪人既命會廉價過一部單車？
踩多一兩個鐘就搵到間青旅，咁啱突然之間落大雨，就走左去避雨，之後有個應該大我一兩年既人踩住架單車一齊黎避雨，佢見到我一身裝備，就同我講
青年：「兄弟，你一身裝備要去哪？」
我：「我去西藏。」
點知佢竟然話：「哎，我之前也去過呀。」
真係遠方遇到知音人，我就不停問佢關於西藏既事，佢仲好好人帶埋我去青旅。
間房就有兩個大叔，一個青年
講起個大叔a，唔知真定吹水王。
當我講我係香港人，就話成日落香港同曾志偉踢波。
另外一個大叔b就叫佢"別再說啦"。
笑到我仆街
係到訓一晚，想訓得好就要鬥早訓真係唔係講笑，好彩我訓得早，朝早起身個大叔b，啲鼻寒聲好似火車。
https://www.youtube.com/watch?v=jT7wEjSpktY
皮已正
