9月29號 (Day 70)
Today target
八一鎮->工布江達縣
今日又挑戰自己最遠距離，140km。
出發冇耐又見到彩虹
林芝去拉薩國道318，呢一段因為整路封左，只有單車可以行。
因為最近聽到唔少單車友講可以上林拉公路，係一條高速公路
所以我地一開始就搵高速公路既入口，踩左冇耐就發現左入口，不過有啲工人係附近休息
右邊就係去拉薩，左邊就係林芝方向。
拉薩個邊比人封左，就停左入到，就係到傾點搞。
點知啊達就講衝左邊。
我話，唔係呀嘛。
啊達就話，黎到中國，唔犯下法，都唔好話自己黎過中國。
就拉開個黃色水桶，就起勢係咁衝。
DaDa都跟住上，不過角度唔岩，仲要撞爆人地個黃色桶。
我就一路大笑一路衝
踩左冇幾耐就已經有架警車追住我地，十足十大追捕咁。
結果我地都係比人捉住
跟住車上個靚女警察，怒屌我地話，高速係你地行架咩。
翻去既同時就係橋上面影翻張相
帶左我地翻去入口到，仲收埋我地張回鄉證，叫我地等下，結果我地又真係ON99咁等左成半個鐘，之後先有人提我地入去個休息室道歉，要語氣好啲就冇事。
我諗大陸既文化係應該自己主動行入去道歉，不過我地啲港仔點會知。
我地用香港人既秘技—扮傻，係咁講唔知呀，睇唔到原來唔比入高速，其實都係DaDa同啊達講，我就做freeride，係後面罰下企，因為我唔係好識呢啲人情世顧，廢事講錯野就搞笑。
最後都放左我地走，香港人真係有免死金牌，原本要罰錢同上堂。
冇得上高速就唯有繼續踩翻國道，本身都頹，點知就越踩越頹，啲路爛到仆街，係廣東廣西既大佬都翻哂黎一齊送我地去拉薩，咩爛路，水氹，泥路，乜都有。
記得有一幕好搞笑，前面就有一個勁大既水氹，過就點都落水架啦，DaDa就一馬當先，慢慢踩過去，我同啊達就愁眉苦面，諗緊點算，我就望到個壆，同啊達講，呢單野上壆好喎，啊達就好驚訝咁望住我，good idea。
點知前面DaDa已經失平衡成隻腳叉左落泥水到，仲同我地講呢到小心，好深，但係我地係面已經搬緊部車上壆，DaDa一直都冇向後望，所以佢一直都唔知我地輕鬆過左去，哈哈哈。
不停爛地
尼洋河，點解西藏既河都係咁藍，真係嘆為觀止
正
踩到夜晚成八點鐘先到工布工達，因為係大陸既apps到終於搵到個酒店可以住香港人，去到竟然開我地3個房400蚊，當堂嚇一跳，平時先住開3人房100蚊。
坐警車
我地轉身離開，就去搵其他酒店，搵左間旅，但係老板話要搵派出所打聲招呼，公安話要去左先前果間酒店做左登記先，仲有得坐佢地架哥爾夫球車去，仲有幾個公安係我地隔黎一齊入去。
點知搞左一大輪，諗住fitfit啦，翻到去派出所，點知有個大隊長同我地講都係唔得，話一係住個間酒店，一係就離開呢個縣，我地成個人呆左，大隊友都同我地講，唔好意思，呢個係我地既政策。
結果我地唯有翻去間酒店到，點知公安都有跟埋黎，仲同酒店既人講，人地咁辛苦黎到呢到就平少少比人啦，真係估唔到公安都會幫我地講價，結果我地用左240蚊兩間雙人間，我就自己住。
今日真係好攰，精神同肉體都唔掂。
https://youtu.be/Lg6KQ7L3alU
