2025 西寧 西藏 雲南 遊記

原來未爛尾

啱啱轉完山
轉完之後真係會對藏人、藏族信仰、文化多一份敬畏

啱啱3月去完西藏～
你啲相好靚！回憶返曬嚟！
玩得開心啲！！

3個auntie好yo, 精神好個時會係車到唱歌揮手

就快寫完架la

多謝支持

你轉個時多唔多人 & 天氣如何?
轉完我都好佩服佢地既堅持

Day 18

文布南村 當穹措 尼瑪縣 天空之樹 恰規措 色林措 魯特灘



一打開窗簾就見到落緊大雪。係大堂等緊其他團友個時，同個大叔吹水。我話天氣唔好好可惜，但大叔話d山光禿禿無咩好睇，但落雪既話景色就同平時好唔同

因為大雪既關係，當穹措就睇唔到skip



湖南湖北妹又話要去廁所，今次湖南妹行得好遠同埋好耐下，個師傅有d唔耐煩，我講笑話用無人機搵下佢係邊。之後湖北妹發起雪戰，但太廢，企定定佢都打唔中我



個旅程就快完結，湖南妹之後去林芝玩，而湖北妹就去成都睇三星堆。本身我plan左去雲南雨崩，但條路比洪水沖爛左，同埋隻腳有d傷，自己仲未諗到下一站去邊，有d迷惘。



去尼瑪，3個auntie 都有些少感冒喉嚨痛，所以佢地去左買藥食

湖北湖南妹同埋我就去左食野。我食左個炸醬麵之後個肚唔舒服左成日



去天空之樹既途中，又見到野生動物



去到天空之樹，如果唔用航拍基本上無野好睇。玩玩下無人機，有個廣東呀叔拎左部air 3黎問我點樣控制部機影天空之樹。睇佢部機應該係租返黎。



又係一段車程，湖北妹坐車頭一直keep住同師傅吹水。事後佢講返話個師傅恰眼訓，個師傅已經係咁同其他車既師傅吹水，但有時無訊號傾唔到，驚佢出事所以keep住吹水

然後聽到琴日有架車去林芝，團中一個三十幾歲既男人係車到昏迷，搶救左20分鐘，最後都去左救唔返…事後聽返每年都好多人出左事

車程途中坐隔離既auntie c個樣越黎越唔掂，我問下佢情況，原來佢只係食盤尼西林同喉嚨糖就算。唔知點解大陸人唔鐘意食西藥，但有事就好鍾意食盤尼西林，而且佢哋唔知食抗生素要食足7日唔斷得。最後問左佢d基本野，再翻牆問chatgpt，結論係食布洛芬比撲熱息痛好，所以就比左布洛芬佢食，而佢食左之後情況都好左好多。



去到恰規措，落車位有藏民放羊。我第一個開車門落車之後，有隻羊搵到位就衝入架車搵野食，另外亦都有幾隻羊圍住架車。湖南妹就掉咗包旺旺出去引開佢地。湖北妹話d羊好醒，見到佢哋識撕開唔食個包裝，只係食入面既野。



其他團亦不能幸免



有個小山坡可以上去睇下風景，但d羊會跟住你行



去到色林措，湖北湖南妹好興奮跑去湖邊，auntie c都精神左好多出黎行。



放下無人機



d波浪現場睇都好靚，終於係到處埋最後一件野



離開色林措之後湖北湖南妹又係路中間去廁所。原本覺個景一般，但比湖北妹拉左落車影相。行到去睇先知原來有不一樣既風景



去到魯特灘，第一個諗頭係今次無計一定係到食貴野，因為四周圍係完全無野，去最近一個鎮都要10公里。



check in 個時見到d員工係到翻土，佢地話想試下係到種油菜花。都幾欣賞佢地既賞試，由其係一片荒蕪既地方慢慢改造自己既地方。



逼住係到食晚餐，張餐牌有小菜，但個員工話廚師今日唔係度，得$280嘅細火鍋，白飯就每人$5蚊。最後全團人好唔gur咁食左呢餐。不過係一個好似蒙古包，外面落緊大雪，室內食住火鍋，聽住唔知咩歌，一班人係到吹吹水都係唔錯既回憶黎

無人機上帝視覺好正

都算多人，不過主要都係藏人為主，好多大陸人去到止熱寺同不動地就叫車走了
轉山兩日天氣都幾差，狂風暴雨加落雪，雨季轉山真係要睇運氣
但沿途見到藏人無論係環境幾惡劣，路面情況幾差都好都依舊三步一拜，就會比佢哋嘅毅力感染到，咬緊牙關行晒全程
Btw 最後四公里真係好難頂，又長又冇嘢睇，加上又攰，基本上行到最後都已經係Walking dead

我都想了解下一個人點去西藏
we7 搵飛豬/香港報旅行團/夢迴西藏好

一個人就飛豬啦 or join 老外團

睇你想平定貴 有時間ge可以去到先報 包平 但司機好唔好就撞手神
有錢就join夢回

去唔到雨崩 可惜
去香格里拉 麗江玩幾日羅

睇相似好多都要用到無人機, 唔用影唔到, 而且用相機唔可以周圍走得遠

我都諗住到時先報，不過感覺好伏
暫時plan 10月去唔知會唔會好凍

伏唔伏都係睇司機 睇團友質素
睇你好唔好運 跟團就有機會中伏

有無人機可以影多好多野, 但可以既話推薦大少少既機, 因為大風, 細既機會有d危

而家plan緊可能8月去連埋雨崩徒步

Day 19

班戈 巴木措 納木措北岸聖象天門 那根拉山口 念青唐古拉山 拉薩



最後一日環阿里行程 朝早仍然落住雪。住宿地方包早餐，但得粥，饅頭，榨菜，同一隻雞蛋。有好過無，不過團友朝早問師傅先知有早餐，師傅唔主動講



大雪，skip左巴木措，直接去聖象天門。去到既時候無雪，不過都大風好凍下，隻flip飛唔到。
入到去個門票包埋景區巴士，景點都只可以遠觀，行唔到埋去。某程度上，好處係影相唔會影到人



如果天氣好應該會正好多



入面可以騎下馬。去到最後一日，湖北妹笑大家都已經變到3個auntie咁，無哂力氣，行得好慢





去到那根拉山口，有成5190高。門口有多人sell野。抱羊仔$10，隻羊仔只係得3日大。係咁高咁凍既環境下，好似虐畜咁



個團包既經幡終於用得上，別人有技術/課金既效果



自己個團土炮既效果

過左成3個鐘既車程，師傅又係停係一間貴既鋪頭食野，全團人又去左另一間到食野。基本上師傅搵既鋪係4x-5x, 而旁邊其他鋪2x-3x就有交易





黎到最後一個景點念青唐古拉山。其實係路邊一個觀景台，大家影幾張相就走人

接近拉薩既時候，大家都話d樹好綠，d樓好高，見到好多人…好似去返文明社會咁

返到拉薩，湖北湖南妹同我就住八廓街到，三個auntie 就住另外既酒店。旅程正式結束，但夜晚我就約左湖南湖北妹同埋大連女食飯



搵左間平民宿，天台都見到布宮



湖北妹搵左間cafe, 佢就點左青菜&白飯食



湖南妹點左炸雞，我就點左個藏式酸奶青菜西藏青稞餐。佢地兩個都已經唔想再食西藏既野食



夜晚仍然有好多人朝聖。之後大家吹下水，下場想搵間酒吧，不過搵唔到，最後去左民宿大堂吹水到一點幾先散水

Day 20

拉薩 成都





朝早去搵超市行，結果去左呢到。唔算大，但都算多野睇。手信主要係牛肉乾，甜茶，酥油茶，牛奶糖，青稞整既各種零食，酒，草藥等等。不過細心睇有d產地係青海唔係西藏。甜茶個d係京東買寄返香港。



11點幾約左湖北妹同大連女食飯。諗唔到食咩，就搵左附近既西藏餐廳。太早無咩人，但係大連女既要求下，兩個可能末到廿歲既藏族小姐姐員工唱歌跳舞表演。



點左個火鍋餐2百蚊到，都幾多料下，服務態度超好，會係咁幫手筆湯上菜。

羊架幾好食。佢哋用當地既香草整左隻似薄荷醬既野，但無牙膏味，唔錯。

感覺西藏火鍋個湯都好鮮甜幾好食，但奇怪西藏餐係其他地區未見過。相反新疆野食周圍都有。大連女話西藏餐無可能鬥得過東北野食。可能西藏人好難去其他地方，同埋大陸鍾意食辣重口味既野食

之後大連女就坐飛機走人。我同湖北妹就行下街，之後就去機場搭飛機去成都



湖北妹做左攻略，搵右邊窗口位睇珠峰，但座座雪山都差唔多樣，唔知邊座先係珠峰



見到第一個廣告係火鍋店，但湖北妹話當地人唔會食呢間網紅店。



落機坐大巴去到市中心都已經好夜下。大巴落既位置係市中心春熙路熊貓屁股下面。三星堆，都江堰同埋機場大巴都係呢個位置



成都除左熊貓，亦都係兔兔既城市，市中心好多兔頭既鋪頭



兔兔身首異處

Day 21

三星堆博物館



一朝早就出發。博物館門票要上網預約，係春熙路坐大巴去，車程都幾耐下，起碼成個鐘



落車再要行多陣，係門口塞左好耐先入到場



入到去搵講解，要自己即場拼團，有10人同20人選擇。好彩現場人多，好快就拼到10個人



三星堆無文字記錄，而家既發現研究都係靠估
個講解都幾高質，內容有條理同埋有logic推論。講左差唔多成個鐘，但要注意現在超多人，有可能會走失



甚有喜感既國王頭像（估）



第一代國王縱目（估）

個博物館最有趣既地方係佢仲發掘緊個遺址，所以幾年後再黎可能會有新野睇
80蚊既入場費，比同樣價錢既青海省博物館好得多



差d睇錯字。精品店到都有好多野賣，但淘寶有官方店，而且仲平d

行完坐埋車返市中心都差唔多成4點鐘，之後係市中心行下。



好多人睇，但唔覺有咩好睇



晚餐請湖北妹食火鍋，答謝佢之前幫手。食食下會有員工唱歌跳舞助慶。個磨菇湯底幾鮮甜。埋單都近4百蚊

夜晚就係太古里散步吹水

樓主日日同湖北妹相處 會唔會有意外

Day 22

青城山 都江堰



又係一朝早出發，但春熙路得去都江堰既大巴，無青城山，所以就坐地鐵再加滴滴去。當然再平d既方法係地鐵再加高鐵，但要預先買飛同埋夾出門時間



青城山有前山後山路線，而且可以坐纜車或者全程行上去。如果自己單身一人黎都想全程行上去



課金的話可以全程坐係到。行哂成個山好似2k就搞掂



個纜車好快就上到去，都算穩陣



上到去都係睇下道觀，亦都可以課金求籤睇相

行到兩點就落山。青城山景區門口有公交大巴直接去都江堰。大巴師傅幾好人，拎張地圖出黎教點樣行都江堰



係南橋出發，中間可以坐觀光車



但成個景區唔算大，行快少少半日應該行哂



行左個圈到返南橋，有好多鋪頭同餐廳



去到夜晚有so call既藍眼淚，用燈打出黎，現場睇係偏綠色

Day 23 -25

成都 香港

好猛太陽，成35度，但唔算濕，出汗都好快乾

決定休息下，唔去景點，係市中心既商場行下涼冷氣同埋休息



有日晚餐食左間老字號，係團購到是但點左個餐，中間個碟唔記得叫咩名，食落去我以為係辣既雞肉。食完行出餐廳，突然醒起點解碟雞無骨？食落去又唔似豬肉牛肉，難道係可愛既…

第三日朝早食左野就去機返香港，正式完結旅程