《我鍾意同妳鬥氣，其實只係因為…》

9成係啦，其它女撩佢扑嘢實會白咭必上身

其實八婆儀應該仲係好鍾意必哥

其實都唔駛去到扑嘢，已經白卡上身

初戀難忘，初次心痛

二十八

「喂，妳記唔記得中一果陣既班際壁報設計比賽？」我一路揸車一路問。

「梗係記得喇，」葉佩儀唔知諗緊啲咩，過咗半响先開口兼拍咗我膊頭一下，道︰「你話我係猩猩乸果次吖嘛！」

「哈哈。」估唔到葉佩儀咁都記得。

對於我黎講，其實果一日接住由locker跌緊落黎既佢，都係一個好深刻既回憶。

可惜，我提起呢件事唔係想講呢樣嘢，而葉佩儀都未必想我提起呢件柒事。

我想講既係︰「果陣班會班仆街咪no show既，其實我都係覺得佢哋係知妳責任心重，知妳會自己一個人攬晒上身，佢哋先唔返黎，等星期一返學既時候享受成果！」

「佢哋先冇你諗得咁攻心計啊！」葉佩儀笑道︰「佢哋真係唔得閒啫！我諗！」頓了一頓，又問︰「做咩無啦啦提起呢件事啊？」

「我響度諗緊石生係咪特登跣妳，」我哈哈一笑，道︰「特登屙完屎唔沖廁唔抹屎跡，等妳幫佢洗廁所！」

「痴線，佢先唔係個咁既人啊！」

的確，石生無論工作又好、待人接物既態度又好，都係一個非常之有交帶既人，我都係同葉佩儀講下笑啫。

葉佩儀接住道︰「咁生活上面少少唔同既習慣梗係有架喇！」

「哈，妳睇妳，護夫心切到，」我笑道︰「咁妳而家咪明白到，要同呢個男人結婚，就有好多嘢要互相包容架喇！」

葉佩儀望住我，道︰「唉，講起呢樣嘢，你唔好睇佢平時好就得我咁啊，其實佢個人都好大男人主義架！」

「咁唔出奇吖，佢響公司又係高層，個個都要聽佢講嘢架喇！」呢個時候咁啱紅燈要停車，我擰轉面同佢對望︰「呢啲真係要習慣下架喇，唔係點結婚啊？妳唔係好開心終於有人肯要架咩？」

「妖，死人林必才！講到我好恨嫁咁！」葉佩儀定睛咁望住我，過咗幾秒先道︰「唉，你把口雖然係臭啲，成日激我，但係如果純粹講遷就我黎講，比我任打任發洩都唔會還手…無論係以前啲ex又好，石生又好，佢哋…都唔夠你黎。」

聽到葉佩儀咁講，已經好足夠喇。

至少我係有嘢令葉佩儀記得清清楚楚、有嘢係令佢覺得即使對比佢啲男朋友們黎講，我都係特別既一個。

足夠喇。

此生無憾。

「點啊？而家先諗起我既好，想轉會啊？」我調笑地道，但當然冇可能喇。

「妖，收皮喇你！」葉佩儀又大大力咁拍咗我手臂一下︰「你？做我出氣袋就差唔多啊！」

「嗚啊！妳真係夠晒大力！」我笑道。

呢種力度…其實我都慣晒喇。

如果妳結婚以後我都可以繼續做妳既出氣袋，就算妳再大力啲打，我都唔介意。

「妳結咗婚之後，有咩問題都歡迎妳黎搵我出氣啊。」我望住葉佩儀道︰「幾時都OK，妳call既話我實到！」

葉佩儀望住我，好似有啲感動，我哋就咁對望咗一陣，正當佢諗住開口講嘢既時候，突然後面架車響鞍，我望一望前面，原來已經係綠燈，唔怪得後面車要砵我。

「啊，屌，開車先。」我入波再開車。

「嗯…」

一路上，葉佩儀冇再接住啱啱既對話開口，甚至令我有一種錯覺，就係佢啱啱好似想開口既果個動作，其實都係我幻想出黎咁。

「不過石生對妳咁好，睇怕妳都冇咩機會call我出黎打我出氣架喇！」我笑道。

「嗯…可能喇。」葉佩儀好似諗緊嘢咁。

究竟佢諗緊乜嘢呢？

差唔多揸到葉佩儀公司附近，我兜咗響路邊好快咁停一停比葉佩儀落車︰「聽日記住黎睇波啊！」我響佢臨落車之前叮囑佢。

至於有冇機會響球場見面…隨緣喇。

最初佢真係成日都會響我比完賽之後等埋我，同我傾幾句，但自從某一任男朋友呷醋話唔鍾意佢咁樣之後，就變咗唔係必然既事。

我諗石生絕對唔係果種會因為呢啲小事呷醋既男人，況且佢響葉佩儀既介紹之下識咗我，本身都支持香港波，所以如果葉佩儀完場後要黎搵我吹兩咀，佢應該唔會阻止。

只係，有啲習慣改變咗就好難返轉頭。

「嗯，我同石生聽日會早啲入場架喇！」葉佩儀解開安全帶。

「唔係拎漏嘢啊，今次我去練波，妳拎漏嘢我冇咁快車得返過黎架。」我開玩笑地道︰「就算妳今次搵把刀話要斬我都唔得啊。」

「咁搵兩把刀斬你囉！」

葉佩儀走咗落車，行咗兩步，突然回頭。

佢有嘢想講？

我拉低咗車窗，然後望住佢。

「你記得要遵守你個諾言啊！」

諾言？

「我結婚之後，我一call你，你都要即刻出現，然後比我揼揼揼咁樣黎出氣啊！」

聽到葉佩儀咁講，我一副「原來如此」既表情笑咗一笑，然後點點頭道︰「嗯！」

葉佩儀同我道別咗之後，我既心先識得隱隱作痛起黎…

（待續）

一日未結婚，一日仲有彎轉！

仲轉彎？八婆儀中門大開，白咭必都唔敢單刀直入啦

佢自己淆底

「走啊！嚇死人喇！」

結咗都有

二十九

足球係我生命中最重要既一部份。

我同余正熙響球場上面成為好拍擋，正正係由中一果年開始，我死纏爛打咁要佢帶我去同果班騎呢大叔踢波，響佢哋既實戰同埋指導之下表現可以話係突飛猛進。

余正熙同我最唔同既一點，係佢真真正正係街場出身，佢踢波咁勁係因為佢真係天生有呢方面既才能。

而我呢？咁我都唔會妄自菲薄，我都勉強算係一個足球天才，但比起余正熙就爭得遠囉，佢係真真正正既無師自通，而我響成長既過程之中，其實都參加過唔少足球興趣班，同時都係小學足球隊既主力。

我既機遇其實都冇余正熙咁好，以學校社際為例，佢係學校入面我所識既第一個、亦係唯一一個學生，以中一之齡就入選社隊，兼成為絕對主力。

不過我能夠加盟流Ｏ青年軍，其實我覺得都係托余正熙既鴻福，因為佢響街場太屈機，令到有球會既人走黎睇我哋踢波，然後先順帶發現埋我，我哋兩個就係咁，響中一果年加入咗重用年青球員既本地球會流Ｏ。之後我哋兩個就一直拍住上，無論係校隊、球會定港青，我哋都係咁合拍，我傳波助攻，余正熙就負責入波，拎過本地青年聯賽既冠軍，甚至乎響啲亞洲地區性既青年比賽，為港青拎過冠軍添。

諗返起年少既時候，我仲真係有同余正熙約定過，要一齊幫香港隊打入世界盃決賽週添。

係狂妄咗啲，但如果余正熙真係繼續踢波踢落去既話，我覺得唔係夢想黎架！就算入唔到世界盃決賽週，都入到亞洲盃決賽週吖！

而家我已經踢緊職業足球，身邊見過既球員入面，無論外援又好、港腳前輩都好，如果當年余正熙係繼續踢波成長落去，我覺得而家呢啲香港球圈既球員都唔會夠余正熙勁。

唉，可惜。

好似今日練波既時候我會諗，聽日就係對住日本既大戰，如果當年既余正熙仲響度，我哋拍住一齊上，真係連日本仔都未必夠我哋打，話晒我哋當年都擊敗過日本奪得過東亞少盃既冠軍，條友仲做埋賽事神射手。

唔係話陳韋拿、入藉既前鋒隊友安祖、梵高佢哋唔好，但佢哋真係唔夠余正熙同我當年咁合拍，亦都冇當年余正熙既潛質咁勁。

我話足球係我生命中最重要既一部份，除咗足球對我有無比重要既意義之外，仲有就係…當年我第一次感受到葉佩儀對我既關心，就係響一場學界比賽入面…

*

「其實妳可以唔駛跟住我哋。」我對住葉佩儀道︰「其實冇乜嘢好睇。」

今日係我同余正熙代表學校C grade出戰第一場學界足球比賽既日子，譚梓淇知道咗之後，就叫埋葉佩儀同埋鄭海欣黎同我哋打打氣。

「係淇淇叫我黎咋嘛，你估我好想黎啊？」葉佩儀講完之後大力咁打咗我一下，道︰「你又唔叫淇淇同欣欣唔好跟住黎？」

「咁佢哋係女仔黎吖嘛！」我笑笑口咁講︰「作為男仔，有女仔黎幫手打吓氣，梗係開心架喇！」然後對住葉佩儀面露鄙夷之色，道︰「但妳係男架嘛，我梗係唔想妳響度搞搞震，阻住晒喇！」

「你係咪想死？」葉佩儀發出龐大既殺氣…

我即刻變臉，笑面迎人咁同葉佩儀講︰「歡迎葉大小姐大駕光臨！細佬我即刻去準備啲茶點比大小姐妳一路食，一路欣賞比賽！」

余正熙呢個時候冷冷地道︰「唔好同佢咁多嘢講喇，我哋行快少少，早啲去球場熱下身仲好喇！」

我都話，我同葉佩儀只係表面上係歡喜怨家，實際上余正熙同葉佩儀先至係天敵。

正當葉佩儀想發作，譚梓淇又出黎打圓場︰「大家都係想為學校打吓氣啫，我哋快啲行喇！」

「哼，唔係淇淇想我陪埋佢黎我先唔黎啊！」葉佩儀硬生生忍住冇對余正熙發作。

「阿儀啊…」譚梓淇道。

葉佩儀不屑地道︰「喂死人必，你同阿熙唔係響出面踢緊啲乜嘢足球興趣班架咩？我就黎睇下你哋有幾勁！」

球會幾時變咗興趣班…

「呵呵呵，勁到妳唔信啊！不過…其實真係冇乜嘢好睇。」我道。

「哼！」

不過，我咁樣同葉佩儀講話冇乜嘢好睇，其實係想比定一個心理準備佢，等佢對我哋足球校隊既期望唔好咁高。

因為…我同余正熙係好勁，遠遠比起身邊既隊友勁上起碼十條街，但同樣係因為咁，成隊波基本上只係得我同余正熙兩個識踢波咁，其他隊友真係廢到不得了，就好似我同余正熙兩個人，帶住班小學生去同大人比賽咁…

我睇社際時候已經睇過，響屋邨球場亦都同啲同校師兄踢過幾腳，我清楚明白地知道，我哋學校既足球水平有幾「高」，仲要社際果啲已經係比較勁既高form，我哋所屬既C grade校隊，基本上都係中一、二既初中生，實力仲差過果班高form，呢點真係響學校練波既時候已經明白。

講堅，一陣唔輸三球以上其實都要還神…

（待續）

記得當年呢場波好似寫咗一排

校隊應該一、兩集左右，社際同港超先係戲肉，會寫多啲，校隊佢哋場場都比人炒鑊甘，冇嘢好寫

最可惜嘅愛情
白卡必真係爭唔落

扶不起的阿必

三十

估唔到第一場分組賽既比賽結果真係要還神。

當然我哋唔係贏咗啊，呢樣係冇可能既事，同太陽由西方升起既可能性一樣，機會係零！不過，我哋竟然真係只輸二比五，真係神蹟黎。

入兩個波既隊友，估都估到係余正熙，而我就貢獻咗兩個助攻出黎。

余正熙扭波同射波都好勁，但我哋踢十一人場，個場鬼死咁大，加上佢比人睇穿咗係重心球員之外，搵咗成幾個球員mark實佢，佢行到邊就跟到邊，咁樣好難搞。

我呢個中場發電機都一樣，佢哋都搵咗兩個人專mark我，務求要我冇乜位傳到波出去。

對面有成四、五個mark實我哋兩個，咁我啲隊友咪好多位？

係啊，佢哋好多位啊，但就算冇人mark佢哋自己都會帶波帶出界，然後瀨啲草凹凸不平果下大鑊呢。

「估唔到只係輸三粒，」一完場我同對面握完手之後就走咗去同余正熙傾計︰「真係還得神落。」

「預撚咗。」余正熙木無表情地道。

果排佢響球會暫時仲未上到位，冇乜得出場，心情唔係幾好，日日都黑口黑面。

當然，佢本身就已經係日日都黑口黑面。

「點啊，你啱啱比人踢中果個位？」余正熙問我。

其實以踢法黎講，余正熙既踢法咁獨食，應該係更加容易惹人犯規果個，不過佢要扭波既話，首先要有人傳到波比佢，而響而家呢隊垃圾波入面，我就係做傳波呢樣嘢果個人。

同余正熙唔同，我既踢法其實全面過佢，防守都做到唔少嘢，球隊好多球權都係我搶返黎，而後再由我自己轉守為攻，所以今場應該係我哋隊波入面郁動最多、球權佔得最多果個，咁所以理所當然地，我比人都係踢得最多。

不過我知道佢哋唔係特登要foul既，但我同余正熙郁個波既時候真係太快，佢哋出腳一慢就好易踢中我哋，而余正熙啱啱講既果個位，係其中一次踢得比較應既犯規。

「冇事、冇事，小事啫！」往後既日子，再恐怖既傷我都見過，呢下其實真係濕濕碎。

我哋行返去球場外面，然後走過去後備席（話就話係後備席，其實全部人都係蓆地而坐），聽教練鳩UP幾句就散band。

唔好期待呢個教練有乜嘢好講，嚴格黎講佢只係我哋足球隊既顧問老師，平時鍾意睇下英超咁，絕對冇教練牌，連識波牌都可能冇。

我同余正熙響解散之後拎埋個袋走去更衣室沖涼，中途經過堆觀眾，於是乎就走埋去同葉佩儀佢哋三個女仔打個招呼。

順帶一提，其實黎睇波既觀眾就係得四、五個人，佢哋三條女已經佔咗三個。

我哋學校既社際比賽通常會吸引好多同學黎睇，為佢哋所屬既社打氣，但係學界既校際比賽反而冇乜人黎睇，唔知係咪因為唔係響學校搞要特登走出黎睇，又定係佢哋對自己個社既歸屬感仲大過對自己學校嘞，反正由呢場波開始到我中五畢業既時候，我有份踢過既學界比賽都係得咁少人黎睇喇。

唔止足球隊係咁，我同葉佩儀、鄭海欣都有去捧譚梓淇有份出賽既學界女排，雖然女排陣中有唔少美女加持，但一樣係冇乜人理、冇乜人睇，所以，我諗呢個並唔係足球校隊獨有既對待。

「你哋好犀利啊…」出呢句聲既係譚梓淇。

「唔犀利，輸到咁…」余正熙嘆咗口氣。

「你同阿必已經做得好好架喇。」譚梓淇安慰佢。

余正熙聳聳肩，道︰「冇計，足球係一隊人，得我同佢踢到幾腳係冇乜用。」

女神同余正熙就傾起計上黎，冇我插口既餘地。

要講返既係余正熙因為本身響學校入面屬於校內數一數二既美男子（雖然個樣細個啲同埋成日黑面寸寸貢摟打咁款），加上響社際足球入面表現非常出眾，雖然只係中一仔，但係好似已經成為咗校內既風頭躉，響女仔之間（尤其是黃社女仔）非常有人氣。

但條友好似冇乜自覺咁，對啲埋去諗住識佢既女仔大多數時間一律完全無視，有時心情唔好甚至乎會用啲好難聽既語氣窒佢哋添。

所以，佢而家同譚梓淇可以咁平和咁傾計，我果陣既諗法就係，其實佢係咪起碼對譚梓淇係有好感先呢？

老實講，你問我見到佢哋兩個越行越埋，心入面難唔難受呢？

或者真係中一仔，我對譚梓淇既感覺並唔深，最初真係有少少酸溜溜既感覺，但係其實好快就接受咗佢哋將會成為一對既事實，仲響心入面祝福佢哋添。

而響往後既日子裡面，葉佩儀同我甚至會因為佢哋兩個之間既進度唔理想，去做啲嘢去推波助瀾添。

葉佩儀同我講過，雖然佢好唔鍾意余正熙，但係都覺得佢唔係壞人，又唔想見到譚梓淇成日都因為唔敢向余正熙採取行動而自己煩惱同唔開心，所以先會去幫佢哋一把。

當然，後面發生既事出乎所我哋意料之外，呢個係後話。

（待續）

結果八婆儀同必哥就係咁幫淇淇推進度，但自己同必哥反而冇進展

三十一

「喂！」會用啲咁既語氣叫停我既一定唔係女神喇。

「點啊？八…葉大小姐？」我本來想叫佢八婆儀，呢個係我同余正熙背後幫葉佩儀改既花名，不過好彩剎停得切，如果唔係，我連隻手分分鐘都會比葉佩儀斬埋落黎。

葉佩儀先係惡狠狠咁瞪咗我一眼，之後先至問︰「喂…你啱啱比人踢果度…有冇事啊？」

「冇事，冇事，踢波係咁，條友都唔係有心。」我笑一笑。

「咁都唔係有心？」葉佩儀反而替我有少少抱打不平︰「佢真係踢落你度啊！」

「踢波實有既，我個波控得太快，佢出腳慢咗，先至踢唔中個波啫。」我又笑一笑。

其實果下犯規，係個波高空跌落黎時我伸腳痴定，對面條友就拉晒弓咁踢落黎，收唔切掣踢中我，睇落係好肉酸既，好彩呢啲C grade Division 3學界波，對手拉晒弓都唔算大力，如果唔係就真係可能會受傷喇。

「如果係冇事啊，阿熙就唔會衝過黎推開果個人喇！」葉佩儀道︰「哼，呢次真係我唯一見佢似返個人既時候啊！」

對面犯完規，余正熙即刻成個人衝埋去推開果條友兼用粗口屌佢，不過條友都即刻say sorry話唔係有心做死（咁我都相信既），反而搞到起晒鋼既余正熙唔知點咁。

「唔好咁話佢喇，佢其實都好有雷氣既。」

「叫佢食屎喇！」葉佩儀惡狠狠地道。

我望一望余正熙，佢仲同女神傾緊計，好彩佢聽唔到，如果唔係呢邊真係又黎世界大戰。

「喂，死人必！」

「又點啊？」我問。

「你隻腳…真係冇事？」葉佩儀好似仲係唔太放心咁。

於是我係咁跳、係咁跳，向佢笑道：「妳話我有冇事吖？」

「喂！你…你唔駛特登咁樣跳黎比我睇架！」葉佩儀又有啲擔心咁問︰「真係唔痛？」

我搖頭笑道︰「唔痛啊。」

「係唔痛先好啊…」葉佩儀道︰「唔好死頂。」

「哎呀呀，乜妳呢個男人婆都識得關心人架咩？」我恥笑下葉佩儀。

「痴線！我驚你隻腳斷咗唔知點樣送你返屋企咋！」

「哈哈，妳咁大力，妳孭我返屋企咪得囉！」我當然係講笑咁講，話佢大力似個男人婆，但其實葉佩儀一啲都唔大力既。

「你就想啊！本小姐唔會咁容易孭人架！」葉佩儀指住我道︰「仲要孭你呢隻一形豬！」

「哈哈哈，是旦喇，反正我而家都冇事，我去換衫先喇，出黎再搵妳哋喇！」我向葉佩儀揮一揮手。

「嗯，陣間見。」

呢次係我第一次響葉佩儀身上面睇到佢對我既關心，雖然我當時把口一定唔會認，但其實我好開心佢關心我受傷既地方。

而且…仲感覺到心入面有一陣溫暖。

我諗…我哋雖然成日鬥咀，但係我哋兩個其實真係慢慢咁成為咗好朋友。

事後都唔記得中學邊一年、咩時間地點同譚梓淇兩個傾起計既時候，譚梓淇同我講，話其實雖然果場學界比賽我哋係大敗，但係佢同葉佩儀（不過佢冇提鄭海欣）對於我同埋余正熙兩個響場上面果種拼搏既精神同埋態度非常印象深刻，尤其是我，因為社際既時候佢哋其實已經見識過余正熙既球技同埋態度，但估唔到我響球場上比賽時都好似變咗另一個人咁，佢仲話比我知葉佩儀覺得我踢波既時候好有型添。

我聽到葉佩儀會咁讚我都有啲唔好意思，本來好厚面皮既我，其實應該係會搵個機會唔知醜咁行去葉佩儀面前大大聲咁拎呢件事出黎笑佢，仲會響佢面前裝模作樣咁認屎認屁，但唔知點解，當我有呢個念頭既時候，我發覺我既內心竟然係好怕醜咁唔想去做…

哈，話唔定…只係話唔定…當時我已經對葉佩儀產生咗好感了，只係…我自己唔知罷了。

不過就算我知，果陣既我會去馬咩？

大個咗、明白咗自己對葉佩儀既感情之後，次次有機會我都縮架喇…

唉，唔講啲後悔事…

我諗亦都係因為譚梓淇同葉佩儀兩個見到我哋踢波既時候咁投入感染咗佢哋兩個，本身佢哋對足球係冇乜興趣（譚梓淇本身都算運動女孩都好啲，但葉佩儀真係唔做運動的），但係為咗睇我同余正熙踢波，佢哋慢慢都開始研究起足球，而葉佩儀佢甚至係上咗大學、出咗黎做嘢都好，得閒都會黎睇下我比賽，而我代表香港隊既比賽，佢更加係一場不漏咁睇晒。

所以話…足球係我生命中最重要既一部份既其中一個原因，係因為佢拉近咗我同埋葉佩儀既距離。

（待續）

好希望，白咭必試返一兩次主動，唔好話表白丫，只係試探一下 咁將來會無咁可惜

如果係求婚大作戰式走向嘅話，應該要去到最後邊先會夠膽進取

熙哥故你好想BAD ENDING
白咭必呢個故你會唔會希望係HAPPY ENDING呢？ 我希望啊

呢一對係比鄰居姐弟更加合拍

我會想good end呀
起碼必哥真係唔會玩人感情唔會偷食先吖

岩岩新讀者加入LIVE完走去睇完OCAMP故好想睇多啲阿冰個故事
係咪應該睇靚女MISS 想好奇問下會唔會有些少阿冰同威既情節