《我鍾意同妳鬥氣，其實只係因為…》

四

「多謝我？」我非常好奇，葉佩儀做乜無端端想要多謝我，又無端端做咩因為多謝我而將自己既婚訊第一個話比我聽。

妳知唔知咁樣做其實唔係多謝緊我，妳係整估緊我。

「我想…多謝你響過去咁多年以黎，每次我一失戀，你無論響邊度都好，都會第一時間衝過黎我身邊陪我…陪我傾計、陪我喊、陪我醉…」葉佩儀佢真係好認真咁同我講︰「就算係淇淇，有時佢都未必可以好似你咁即刻飛過黎陪我。我諗…如果我每一次失戀既時候，唔係有你響我身邊，我…我都唔知點算…」

我回憶起葉佩儀口中所謂失戀既回憶，一陣後悔、悔恨同苦澀一齊湧上我心頭，為咗唔好令呢種心情加劇，我即刻開口講笑咁講︰「咁係因為我有車牌又有車啫！所以妳叫到我，我都一定可以揸車黎搵妳架喎！如果淇淇有車都一定會咁做架啫！哈哈哈哈哈！」仲加句招牌式傻笑。

題外話，雖然我係當打既職業球員，但而家呢間球會比我既人工並唔高，所以我要去秘撈，我話「有車」，果架車實際上並唔係由我擁有，而係我借朋友既貨van黎送貨用，當係幫補下生計。

「妖，你咪搞亂個氣氛喇…我認真講緊架！」葉佩儀好似有啲唔高興我打亂佢講正經嘢。

我做咗個舉高雙手投降既手勢，道︰「對唔住，葉大小姐，妳繼續，請繼續…」

「唔…」葉佩儀深呼吸口氣，又培養返個情緒，續道︰「我可以響愛情路上面行到而家呢一步…可以同石生修成正果，你其實係功勞最大果個…如果…我響失戀…最失落既時候，冇你同埋淇淇既鼓勵，我冇咁容易去企返起身…冇咁容易去接受一段新戀情…更加冇咁易就可以接受到石生。」

石生，諗到佢同石生呢段感情，我就仲加後悔…因為…因為...當時...唉。

葉佩儀然後深呼吸咗一啖氣，笑道︰「你啊…雖然把口成日唔收，又好鍾意激我，但係我知道其實你係好愛錫我、好重視我…」

吓？

葉佩儀佢…感覺得到…？

咁突然？

我個心突然好緊張咁跳起黎…

「…當我係一個好好、好好、甚至可以話係最重要既朋友…」

啊…呢句真係一盤冷水照頭淋…

不過諗落佢咁講先至正常，如果佢係對我…對我乜嘢既話，都唔會同石生結婚喇…

係我仲有幻想先至唔正常…我究竟期待緊啲乜？

「正因為我覺得你幫我幫得咁多…」我回過神來，聽得葉佩儀續道︰「所以啊…我先想第一個將婚訊話比你知，當係報答你一路以黎咁照顧我喇！」

「乜妳咁樣黎報答我啊…」Shit…我唔小心將心入面果句都講埋出黎…

不過意外地葉佩儀冇發嬲，佢淨係瞇埋雙眼咁望住我…

「哦…我既意思係…妳有冇實質啲既嘢報答我啊？」我乾笑幾聲，道︰「例如呢餐飯吖！」

「喂，林必才！」葉佩儀睜大返雙眼，然後停咗一陣先問︰「你有冇嘢想同我講？」

…

真係有一剎那…

一個剎那…

我係覺葉佩儀想我同佢講，叫佢唔好結婚…期待我同佢講，其實我由唔知幾時開始，已經無法自拔咁愛上咗佢…

我都差啲衝口而出講咗出黎…

不過由我擘大個口既果一刻，我就做返果個專業既「演員」，笑道︰「本來想寸下妳幾句，不過見妳咁認真咁多謝我，我都正正經經咁祝妳百年好合、永結同心喇！」然後我仲響褲袋拎咗送兩張後日比賽既波飛出黎，開玩笑道︰「哈哈，今次呢兩張波飛就係送比妳做賀禮喇！」

呢個其實係我既習慣，自從我有份入選香港隊以黎，逢親有比賽，我都會將球員家屬果兩張波飛，送比葉佩儀，等佢同朋友甚至係男朋友黎睇我比賽。

我唔係偉大到咁，想幫葉佩儀同男朋友增進感情，只係…我希望葉佩儀入場睇我比賽啫。

唔知係咪因為我心入面某種主觀願望太強而引起咗錯覺，我覺得葉佩儀聽完我既答案之後，眼入面好似閃過一絲失望既表情。

葉佩儀接過波飛，望住果兩張比我摺到皺晒爛紙一樣咁既嘢，向我甜甜一笑，一副幸福既模樣笑道︰「多謝你喇！我結婚果日記得早啲到！到時候唔止要送波飛架，我要一份厚禮！一份最好既朋友送比我既厚禮！」

見到佢呢個幸福既笑容，果然啱啱果一絲失望既表情只係我既幻覺…

哈，我自認話愛佢愛到無法自拔，但唔止十幾年黎錯失咗無數咁多次表白愛意既機會，又試過幫手鼓勵甚至係獻計令佢同幾個男朋友一齊，到最後竟然連一句「我愛妳」都講唔出口…

哈…我自己都忍唔住心中冷笑一聲…我咁樣叫做愛佢咩？

（待續）

唉，超人，你要著住底褲拯救世界好威好型，但你唔除底褲，係無人知你底褲之外係點概人

唔明阿必呢種人嘅諗法
其實條女都已經不停埋身，點解仲要猶豫呢？表白一次，唔得咪唔得。
總好過自己遺憾一世。

講得啱
不過都明點解必哥唔講嘅,講又好似有少少不負責任咁

責任感
驚打亂佢心愛嘅女人嘅人生

踼波搵錢唔多比唔多幸福比女人

Hello葉開巴
想問下今次依個故預計會有幾長？
Kitty姐姐外傳又預計會幾長？

再睇落去，就會更加清楚佢係乜嘢諗法

係啊，佢真係一個好人黎，做唔出破壞人哋關係既事

呢個故320左右
Kitty補習老師果個，應該50以內

五

「我哋去唔去食糖水？」我問，摸住食飽飽既大肚腩行出餐廳。

我梗係唔係真係有個大肚腩喇，比喻黎架咋。

「仲食啊？」葉佩儀笑問︰「喂，你唔係好pro架咩？職業運動員、職業足球員喎！」

「球會冇人理架，哈哈。」

其實…我唔係想食糖水。

我只係想見多葉佩儀一陣啫。

總覺得…響佢結咗婚之後就唔會再有咁既機會同佢癲癲得得咁亂吹水。

就算呢十幾年黎，我哋幾friend都好，結咗婚之後，就會係另一個世界黎。

更何況，佢會有做媽媽既一日架嘛。

石生年紀都唔細，話唔定結婚之後佢哋即刻有計劃造人添啊。

我係咁諗，而一諗到呢度，我個心就隱隱作痛。

無錯啊…佢係石生既準太太，佢係屬於石生唔係屬於林必才架。

所以…我想見多佢一陣。

即使去到最後，佢唔會係屬於我既都好，我都想見多佢一陣。

總之我就係想見多佢一陣。

葉佩儀笑咗一笑，道︰「你要自己保持專業喎，又係你自己講既！」

「專業都可以食糖水架啫！」我又問多次︰「咁去唔去？」語氣就好似同往常一樣。

以前我哋都成日食完晚餐去食糖水。

「我都想去啊…」葉佩儀有啲無奈地道︰「不過石生話一陣間黎接我啊。」

…

石生…

都真係石生先有資格令到葉佩儀唔肯同我去食糖水…

我故作輕鬆咁一笑，道︰「仲諗住食完糖水車埋妳返屋企添，而家咁樣都幾好，可以慳返啲油錢！」

我係一個好專業既「演員」，我不斷咁響葉佩儀面前做戲，扮到同佢真係得友情咁，故作輕鬆，盡量唔好去諗佢好快就要成為人妻既事。

屌，話唔諗又諗咗！

係啊…

佢好快就要成為人妻喇…

佢離我…都越黎越遠喇…

葉佩儀大大力咁拍咗我膊頭一下，又一次將我打返醒，道︰「死嘢，係咪咁講嘢啊！」

「嘩，痛死人咩！妳其實係咪真係男人黎？」我大聲叫痛︰「痴線妳仲大力過我啲外援隊友！」

梗係講笑喇，但我就係鍾意話佢男人婆。

呢十幾年黎一直都係。

不過…

以後呢啲機會應該越黎越少架喇。

葉佩儀揸實個拳頭問︰「你再講多次？」

「女俠饒命，女俠饒命，女俠拳法高明，打死小人喇。女俠唔係男人，一定唔係男人！」

「你仲講！」

我扮到好無奈咁講︰「女俠又唔係男人婆，咁都唔得？」

葉佩儀舉起個拳頭，作狀又想再打我，不過望咗我一陣，然後先嘆咗口氣，道︰「你啊…廿幾歲人都仲係咁既…再係咁落去，邊會有女仔鍾意你架？」

「呵呵，妳驚咩吖，我要女既話啲女由旺角呢度排隊排到尖沙咀喇！」我裝作自信滿滿地道。

「又係呢句，有冇第二句啊你？聽咗十年都黎喇。」葉佩儀都冇我咁好氣，而呢個時候佢既電話響起，我都估到係邊個。

「係咪果個男人既救世主搵妳啊？快啲聽喇！」睇到葉佩儀既表情，我都估到係石生架喇。

葉佩儀作勢打我一下，然後就擰轉身接聽電話︰「喂？係啊…係啊…同阿必佢食完飯喇…嗯…好啊…我去到果個位再比電話你喇。」

望住葉佩儀背住我聽電話既背影，我心入面嘆咗口氣，然後又深深咁後悔起黎。

每一次葉佩儀開始拍拖，我總會自欺欺人又理所當然會諗佢一定會分手，分手之後我一定要試下追佢，同佢講出我既心意。

我哋其實都只係二十六歲，總係覺得結婚距離我哋仲有一段距離，所以佢今次拍拖都一定會散，然後我就又有機會。

我以為呢個循環會無限loop，所以到每一次我想踏出、想跨過朋友呢一個身份既時候總會猶豫，然後就覺得仲有大把機會，所以將告白呢件事一次又一次咁拖延。

我有時個人好似瘋瘋癲癲咁，但實際上只係一個膽小鬼，尤其是對住葉佩儀，我總係用呢啲誇張既行為去掩蓋自己既膽怯，到最後仲係維持朋友既關係，一啲都唔敢跨出第一步…總係驚萬一跨出第一步既時候，我同佢會連朋友都做唔成。

中學時係咁。

佢入咗大學，我出黎做嘢時係咁。

到佢出黎做嘢，計計埋埋我同佢識咗十幾年之後都係咁。

所以先會等到葉佩儀結婚呢個消息，然後就發覺到咗呢一刻，原來我自己係乜都做唔到。

悔恨…

我好悔恨，如果時光可以倒流一次，我絕對絕對會搵個機會同葉佩儀表白。

就算比佢拒絕都好，我都一定會表白。

我好悔恨…真係好悔恨…

而我最悔恨既，其實係我有份一手推佢去石生度。

（待續）

鳩估：若果阿必開聲，八婆儀會心亂，但最終唔會悔婚

我覺得呢個係原因
覺得自己讀唔好書，無份好工養老婆
用膠去掩飾自己無自信

求婚大作戰
呢個feel唔錯

唔該葉開巴

同時期待偵探系列

其實好多原因，慢慢就會講返究竟阿必係點諗
不過，總之佢就好後悔

六

我響度追憶緊往事既時候，葉佩儀都傾完電話擰返轉身向我走過黎。

佢行到去我面前既時候皺起眉頭，問︰「喂，你雙眼…好似咁紅咁既？」

嘩，妳咁都留意到？

「我對con帶得太耐，所以有啲乾。」我講完之後就用手係咁捽雙眼，順便捽走眼入面果啲若隱若現既淚水。

「乜你有近視架咩？」葉佩儀疑惑地問︰「我識咗你咁耐都唔知既？」

「我帶大眼仔吖嘛！帶完會可愛啲架！」我睜大雙眼，道︰「妳睇，幾可愛？」

「妖。」

我唔願意再響呢個話題上糾纏落去，一陣真係比葉佩儀發現到啲咩我真係會好柒好尷尬，於是我急忙轉變話題，問︰「石生黎接妳嗱？」

「係啊，佢啱啱收工，泊咗架車響附近。」葉佩儀答道。

「嘖嘖嘖，石生係妳上司，又係妳未來老公，妳就pat低佢自己一個響office OT，真係冇良心啊。」我刮下葉佩儀塊面。

「妖你食屎喇，我做完晒自己啲嘢架喇，佢做啲嘢我都幫唔到佢架喇。」葉佩儀推開我刮佢面豬燈既手指道。

「我陪妳行去搵佢？」我問。

葉佩儀都冇拒絕，道︰「行喇。」

「妳今晚上石生屋企？」我問。

「係啊。」葉佩儀隨口答道。

唉，我都知架喇。

想像今晚葉佩儀響石生屋企張大床上面比石生任屌任砌，我心入面就好似比人重重咁打咗一拳。

見我唔出聲，葉佩儀追問我︰「做咩？」

我嘻嘻笑道︰「冇啊，諗住提妳要做足安全措施，唔好搞出人命。」然後哈哈笑兩聲︰「妳大住個肚著婚紗結婚一啲都唔好睇。」

「啊，你個死人林必才，係咪想比人打？」葉佩儀怒道。

妳又知唔知，我講呢句玩笑既時候，我個心係有幾酸…？

石生泊咗架車響一條橫街既馬路邊，我同葉佩儀行到附近，葉佩儀離遠已經見到個車牌，佢打一打電話，然後石生就駛前少少架車。

「行幾步路都懶架妳。」我恥笑葉佩儀，道︰「妳對腳冇用架？下次坐下輪椅好唔好？」

「妖，你把口可唔可以唔好咁衰架啫。」葉佩儀講完呢句之後，石生架車都已經駛到我哋隔離。

「Hello阿必，唔該晒你送阿儀過黎喎。」石生較低咗佢既車窗，然後向我友善地道謝。

石生係銀行back office返工，同葉佩儀同一個department，係佢既上司，都成四十幾歲，不過身型都保持得唔錯，一頭灰灰地既頭髮梳理得好整齊，帶住副金絲眼鏡，筆直整齊西裝，確係有銀行高層既氣派。

「客咩氣，佢自己一個行過黎其實都好安全，我陪佢行過黎反而係因為擔心路上其他行人既安全。」我一本正經地胡說八道。

葉佩儀大大力咁拍落我度，問︰「死人必，你咁講係咩意思！」

「嘩痴線咩妳！咁大力會打死人架！」我摸住被打既手臂，問石生︰「佢平時係咪都咁對你架？佢痴線架，由細到大都係惡屎能登咁既樣，幾擔心佢嫁唔出！好彩有你出現咋！」

葉佩儀今次係大大力咁扭我耳仔，怒罵︰「你夠膽就繼續再講落去吖！」

「嘩嘩嘩！痴線！痴線！好Q痛啊！」嘩呢下葉佩儀黎真架，佢真係想扭甩我既耳仔咁︰「放手！放手！對唔住！對唔住！妳嫁得出！一定嫁得出！」

聽到我道歉饒命，葉佩儀先唔忿氣咁放開手，道︰「睇你仲敢唔敢響我老公面前亂講嘢！」

我真係眼水都標埋出黎︰「唔敢…唔敢…妳嫁得出…一定嫁得出…」

見我仲想亂講嘢，葉佩儀又伸起隻手作勢想打我，我即刻收口︰「唔講…唔講…我乜嘢都唔講…」

石生忍唔住笑道︰「見到你哋咁好感情，真係連我都覺得好羨慕。」

我同葉佩儀差唔多係同一時間大聲一齊叫出黎︰「鬼同佢好感情啊！」

石生微微一笑，道︰「真係想知道多啲以前你哋係點樣相處既，而中學時期既阿儀又係個點既女仔。」

我伸出隻手掌係咁搖，道︰「呢啲真係唔知好過知，知道咗你可能會即刻悔婚。」

同埋…你作為葉佩儀既未婚夫，佢成個人都已經係你架咯…如果你連我同葉佩儀既中學回憶都知道埋既話，我連唯一一樣比你優勝嘢都冇架喇。

話我自欺欺人都好，我唔想咁。

石生望住葉佩儀，溫柔地笑道︰「唔會啊，阿儀佢變到點都好，我都會娶佢。」

石生對我知道佢同阿儀會結婚一啲都唔吃驚，睇黎葉佩儀一早都已經同佢講咗今日食飯既時候會同我講佢哋既婚訊。

唉，不過佢呢句都再一次咁提醒咗我，石生係咩身份。

「作死你啊！林必才，隔咗都冇半分鐘又亂咁講嘢！」葉佩儀好似聽唔到石生講咩咁，淨係掛住作勢要打我。

「唔好打頭！」

見我哋又黎料，兩個人都唔理佢，石生仲係保持住微笑，道︰「我講真架，我真係好羨慕你哋啊。」

我搖頭嘆道︰「唉，有咩好羨慕…係喎，我都仲未正式恭喜你哋，祝你哋百年好合，永結同心喇。」

葉佩儀道︰「啊，死人林必才，原來你都識人話架喎。」

「哦，石生係人，所以我對佢講人話，」我哈哈笑道︰「妳係母夜叉，所以我講鬼話！」

「妖，死人頭！」葉佩儀講埋呢句，就行過去副駕果面打開車門坐上去。

「後日場波我張飛我比咗阿儀架喇，記得早啲黎捧場！」我望住葉佩儀既身影走入私家車，心入面滿係惆悵。

「多謝你喇，你比賽都要加油啊！」石生笑道︰「次次都麻煩你，真係唔好意思！」

「你哋都快啲返去喇！」

「好，睇下後日有冇機會再見！」

道別之後，我企咗響原地，呆呆咁望住石生揸住架車絕塵而去。

葉佩儀走咗喇…

我唔駛再扮喇...

佢好快就會成為人妻…

係啊…

好快…

到我回過神來既時候，我先發覺口水眼淚鼻涕流到我滿面都係…

原來…

原來…

原來我真係好唔甘心…

原來我真係好後悔啊…

原來我真係好悔恨自己既無能啊…

（待續）

如果一早上過床，會唔會無咁大遺憾？

播埋種，應該好少少

怨一世，未一齊先會有幻想

呢啲故永遠都係講個男主十世都萬9幾個理由唔肯表白
對我嚟講真係麻麻，唔係睇開呢個系列真係唔會想睇