【pH值介乎於7飄浮的愛情故事】《一腳踏兩船》(1)

「你條裙咁短...」Jeff諗一諗，「返去會唔會俾人捉㗎？」

『就咁咋？』冇其他喇咩？明明頭先仲硬緊...而家都唔知軟返未～

「吓？」Jeff唔多明咁。

『冇～』我又喺Jeff耳邊細細聲講，『都唔係好短咋嘛～』

「都露晒大髀喇喎...」Jeff仲係有啲疑惑...

『係咯～露晒大髀喇呵～』

「係囉...好易俾人捉喎...」

『唔會啦～今日都唔會Check校服～』

「咁行過見到都會捉㗎...」

『邊有Prefect咁得閒㗎？你真係唔識㗎喎～』

「吓？冇㗎咩？」

『有㗎咩？』

Jeff份人係唔係過份老實呢？定係話佢蠢呢？

不過蠢蠢地咁又幾好嘅～

因為顯得更加暖吖嘛～

「喂～」Crystal坐到嚟我身邊，「你個Jeff呢？」

『佢要幫老師手喎...』啲老師好鍾意喺小息嗰陣就叫Jeff幫手囉！

「咁你咪好寂寞囉～小息一個人坐喺長檯～」Crystal古古惑惑咁用膊頭撞一撞我，「點姐？拍拖拍成點姐？」

『都幾好吖～』諗返起呢五日都係開心嘅～

都成日喺身邊啦～唔喺身邊都傾住電話啦～係甜蜜嘅～

「咁去到邊個Stage先？」Crystal又古古惑惑咁打量住我～

『咩去到邊個Stage吖？可以去到邊個Stage吖？拍得嗰五日拖！』Crystal真係吖...問埋啲奇怪問題！

「五日拖喇喎！而家啲情侶吖～第一日就Stage 5啦！」Crystal成條小蟹柳咁～

『會唔會吖？』有冇咁快吖？

「咩會唔會吖？最起碼都Stage 4啦～」Crystal好似好識咁！

『痴線！』我就唔信喇！

「吓？即係仲係Stage 3？唔係唔係...」Crystal又諗一諗，「Jeff份人咁毒咁...都唔會主動得去邊...再加上你又第一次拍拖...」

『你直頭冇拍過拖添啦！』講到自己好似咁有經驗咁！

Crystal吖！咪又係好似我咁！係就係有人追吖～但又係話對人冇興趣嗰啲囉～

係咁㗎啦～多人追就有得揀～有得揀就高要求㗎啦～

唔通求求其其受咗個就算咩？

「邊使自己拍㗎～睇得多都識㗎啦～」Crystal好有自信咁點點頭～

那來的自信吖？

不過講真啲Stage幾Stage幾我又唔多在乎嘅～

咁我又唔係咁守舊嘅...

即係冇話幾耐就要去到邊個Stage咁規範自己～

話唔定今日放咗學就Stage 5都得㗎～

最緊要都係...有Feel囉～

個Feel一到就會自然想㗎啦～

想做嘅...咪做囉～

突然...

“WOW～～～”

籃球場嗰邊傳嚟歡呼聲！

“嘩呀～～～”

仲有女仔嘅尖叫聲！

好似好熱鬧咁喎～

我同Crystal都被熱鬧嘅氣氛所吸引，望咗過去...

就望到有勁多女同學圍觀緊！

「係Alex打緊波喎～」Crystal望清楚啲，「唔怪得啦～」

『Alex...』我都嘗試望清楚啲，『校草吖？』

「咪就係佢囉～」Crystal點點頭，「又高又靚仔...打波都勁幾㗎喎～唔怪得咁受歡迎啦～」

『好受歡迎咩？』我又冇留意喎...

淨係知...我哋學校有個師兄係校草...都幾出名...

「梗係受歡迎啦！你睇睇！」Crystal離遠咁指指！「Elsie都喺度睇緊吖！」

又係喎...Elsie都企定定咁望實Alex打波喎...

Elsie係邊個？我哋嘅校花囉～大我哋一年嘅～不過就成間學校嘅男仔都會留意佢～

就連啲阿Sir都特別照顧佢添～

「我諗都唔單止我哋學校啦～」Crystal都好迷咁望住Alex打波嘅英姿，「佢個IG都有成十幾萬Followers㗎～」

『十幾萬Followers吖？』咁我又唔知喎...

我都冇Follow佢嘅～

做乜無啦啦Follow人先得㗎？

即係睇Crystal個樣都知實有Follow到啦～都係為咗睇靚仔啦～

咁我本身其實就對靚仔冇乜感覺嘅～

唔會話走去碌靚仔IG嗰啲囉～

碌嚟做乜鬼姐～咪又係人一個～

咁十幾萬Followers係唔係好多？

我又冇乜概念喎...

咁我自己本身個IG就一定唔多啦～都係得自己啲Friend Follow㗎咋嘛～

係有啲街外人Follow嘅...都係千幾個咁囉...

千幾個都好多？咁十幾萬係咩概念？

「唔知會唔會成為下一個LB呢？」Crystal發晒夢咁～

『唔知喎...』我諗Crystal都唔係問我㗎啦...我都唔使認真答㗎啦～

「LB之前都係咁㗎咋嘛...都係由IG開始...」

『哦...』

「跟住就開始Busking...」

『哦...』

「然後就放埋上YouTube添...」

『哦...』

「越嚟越多人睇...越嚟越多人支持...越嚟越多Fans...」

『哦...』

「越嚟越出名...就做咗星喇～」

『哦...』

Crystal自己有自己喺度講...我就唔多理佢喇～

都係嗰句～我冇興趣嘅～

靚仔又好～明星又好～咪又係人一個～

又唔係多幾隻手少幾隻腳個頭識得三日六十度轉～

「喂！係喎！」Crystal突然拍一拍我！「LB公司搵新MV女主角！下個月試鏡喎！」

『哦...』使唔使突然就拍一拍我吖？關我咩事吖？

「我諗住去試吖！」Crystal好雀躍咁拍拍我！

『哦...好...試囉...』都係嗰句...關我咩事吖？

「我幫你報咗名喎！」Crystal再拍我多幾下！

『哦...好...試...』喂等陣先...關我事㗎？！

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

[/center]

三句預告

[Day 02－五日之後] PART 02

『喂等等先！你幫我報咗名？』報咩名吖？

「係吖～」Crystal點晒頭，「我Send咗你個IG過去喇～」

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 02－五日之後] PART 02

『喂等等先！你幫我報咗名？』報咩名吖？

「係吖～」Crystal點晒頭，「我Send咗你個IG過去喇～」

已經將[Day 02－五日之後] PART 01 Upload上Penana

食明星

真識食

仲未有婆仔鞋出現

大家心照啦

各位早晨
又到星期六休息

早

走冰早

大件事！
飛揚竟然唔拖故又冇婆仔鞋又冇大字報封面
你唔係外賣仔！！！

我真係外賣仔嚟㗎！！！

晚

揸𨋢晚