【pH值介乎於7飄浮的愛情故事】《一腳踏兩船》(1)

究竟係你選擇愛情？定係愛情選擇你？

逢星期一至五，準時七點正有文出。

鍾意嘅朋友記得Like同Share俾身邊嘅朋友一齊睇～

有咩都可以留言同我講～有你哋嘅意見，我先會有進步～

下面係Penana嘅Link，想睇返之前嘅章節都可以Click入去。

Penana
https://www.penana.com/story/168592/一腳踏兩船

鍾意我呢條廢腸寫嘅故可以Like Facebook同Follow Instagram～

感激大家長久以嚟嘅支持～在座各位都係讓我光合作用嘅陽光～

Facebook專頁
https://www.facebook.com/whirlingdancer

Instagram
https://www.instagram.com/whirling666/

Penana
https://www.penana.com/user/122935/飛揚/stream

Lm

[Day 01－平凡生日] PART 01

「喂早吖～」

一早就行入校門...

「溫咗書未吖？」

行上樓梯級...

「跑快幾步啦！」

啲男仔總係鍾意跑上跑落...

我都係小心啲...唔係實俾佢哋撞到碌落樓梯...

行到入班房...

「喂喂！做咗功課未？借嚟抄！借嚟抄！」

一行到埋自己位，都第一時間𥄫𥄫自己個櫃桶...

『果然！』有份禮物！

我拎件包到靚靚嘅禮物仔出嚟...

「Joanne～」坐喺我隔籬嘅Crystal啱啱返到，「又收到生日禮物吖？」

『嗯...』我點點頭...

「都第三年喇喎～」Crystal打量住坐喺窗邊位嘅Jeff，「三年都送生日禮物俾你，真係有你心呢～」

我都打量住靜靜坐喺自己位嘅Jeff...

其實又點止...三年呢～

要講到第一次收到Jeff嘅生日禮物...應該要講到我哋初相識嘅第一年...

「周頌茵～」Jeff雙手遞咗支米奇筆俾我，「送俾你吖～」

我同Jeff係由小學一年級相識嘅～

我接過Jeff手上支米奇筆：『送俾我？』

「嗯嗯！」Jeff用力咁點點頭，「你今日生日吖嘛～生日禮物～」

『你點知我今日生日㗎？』我碌大對眼仔～

「你上個禮拜講㗎嘛～」Jeff又用力咁點點頭，「話今年生日，希望收到有米奇嘅嘢～」

『你記得吖？』我對眼仔再碌得大對啲～

「梗係記得啦！」Jeff又勁用力咁點點頭！「我有好好記住㗎～咁你鍾唔鍾意吖？」

『鍾意吖～多謝你吖陳俊然～』

「唔使客氣～」

嗰陣時收到Jeff嘅禮物係開心嘅～不過都係單純嘅開心～

小朋友吖嘛～收到禮物梗係開心㗎啦～冇諗咁多～

小朋友...就係咁單純...

「Joanne～」到咗小二嘅Jeff就雙手遞咗個米奇筆袋俾我，「生日快樂～」

『多謝吖Jeff～』我接過Jeff手上個米奇筆袋，「你仲記得我生日吖？」

「梗係記得啦！」Jeff用力咁點點頭，「我有好好記住㗎嘛！」

『多謝你吖～』

「鍾唔鍾意吖？」

『梗係鍾意啦～』

嗰陣都係好單純嘅開心～又有禮物收～仲有個朋友記得自己嘅生日～

嗰陣我哋仲係同班，經常一齊玩嘅～

『陳俊然！追我啦追我啦～』

「Joanne...唔好跑咁快啦...等埋我吖...」

可能係咁啦～所以Jeff記得我生日都唔出奇嘅～

然後好快就到小三...

「生日快樂～」Jeff今年送咗塊米奇手巾仔俾我～

『多謝～』一心諗住又同Jeff同班嘅關係，佢記得我生日係理所當然～

而我哋學期初都好似小一二嗰陣咁，經常一齊玩～好似兩小無猜咁～

不過都只係過咗幾個月...

「Joanne唔好同佢玩啦～」

幾個女同學就拉住我...

「佢係男仔嚟㗎...唔好黐佢咁多啦...」

想分開我同Jeff...

「女仔同返女仔玩㗎嘛！」

一啲好小學雞嘅理由...

「佢份人咁孤獨...都冇朋友嘅...唔好理佢啦...同佢玩得多都會冇朋友㗎...」

然後我就同Jeff冇乜點再玩過...甚至越嚟越少交流...接觸...

或者小朋友就係咁㗎啦～男仔嘅一堆～女仔嘅一堆～

只係我有一班女仔Friend～而Jeff就經常自己一個...

呢種情況一直維持到升小四...

我同Jeff終於都唔同班...

一心諗住都唔同班啦～再加上都好耐冇傾過計...都唔係Friend啦～冇理由會再送生日禮物俾我...話唔埋都唔記得咗我生日添喇～

點知到我生日嗰日...有份禮物喺我櫃桶！

原來係Jeff送俾我...

講真吖，喺見到份禮物之前，我係又期待...但又預咗Jeff唔會送禮物俾我。

不過當我見到份生日禮物嗰刻...我係超開心囉！

總係覺得估唔到Jeff都仲當我係Friend！

不過呢...我都冇走過去多謝佢...

或者係因為...始終佢都冇親手送份禮物俾我...

然後好快又到五六年級，都係冇再同Jeff一班...但都係喺生日嗰日就有份禮物喺我櫃桶！

都係Jeff送俾我嘅！

開心㗎～仲記得我生日喎～都已經三年冇講過一句嘢喇喎！仲會送生日禮物俾我喎！開心都好正常啦！

不過呢...都係冇走過去同佢講返句多謝...

或者...始終...男女有別...尤其係嗰個年紀...總係有啲敏感...尤其係身邊啲女仔Friend...

免得俾佢哋講咁多啦～

時間過得好快，然後就升中喇。

一心諗住應該都冇機會再見...會分到唔同中學...點知我哋又升咗去同一間喎！

係意想不到嘅！仲好似有啲...驚喜？

我都唔知個感覺包唔包含喜...或者有...我又唔肯去肯定...

雖然係升上同一間中學，不過我哋依舊唔同班。

或者...天意愛弄人...

啱啱升中就識到坐喺我隔籬嘅Crystal...

「咦咦？」Crystal八八卦卦咁打量住我手上份包到靚靚嘅禮物，「禮物嚟㗎？有禮物收嘅？邊個送㗎？」

『嗯嗯...今日我生日吖嘛...係隔籬班送嘅...』好明顯Crystal係條八婆嚟...

「喂生日快樂吖！唔早啲講嘅？隔籬班？邊個吖？男仔嚟㗎？」

『呃...嗯...係囉...多謝囉...』

「喂你都未講！邊個姐？識咗好耐㗎喇？喂生日有冇慶祝？我同你慶祝啦～」

『哦好好...多謝喎～』

成個中一生活都係同Crystal黐住過～

或者每個女仔總有一個好姊妹～而且都會係喺中學嗰陣認識～

而我個好姊妹就一定係Crystal啦～

收到Jeff嘅生日禮物當然就開心～

而呢種開心...又複雜咗...

都已經係第七份...由小學一年級...到中一...

都已經有三四年冇交流...又冇同班咁多年...都仲記得我生日...會送生日禮物俾我...

但我都係冇親自過去同Jeff講返句多謝...

都係嗰句啦！佢都唔係親手送俾我！

係唔係親手真係咁重要？唔知喎～或者...都係藉口...亦都係藉口...

我諗唔到藉口去主動搵Jeff...但想偶遇然後老尷咁講句：『乜咁啱吖？吖～多謝你份生日禮物...應該話咁多年嚟嘅生日禮物...』都冇機會...

點解？因為真係偶遇唔到囉...

係唔係又係天意弄人？偏偏剛剛擦過？相遇就只差一步之遙？

或者啦～或者生命中彼此總係互相錯過...

除咗同Crystal黐得埋，都同班中啲女同學好玩得嘅～

都係女仔埋女仔堆～男仔又同男仔圍埋一堆～

久唔久班男仔都會走嚟玩吓我哋～作弄我哋班女仔嘅～

不過Friend唔到啦～只停留喺打打罵罵～

然後好快又到中二～

我懷住期待嘅心情一睇...真係有！

「咦禮物？」Crystal八八卦卦咁打量住我手上份包到靚靚嘅禮物，「係喎！今日你生日喎！生日快樂！」

『多謝多謝～』係吖～我又同Crystal同班～佢又坐喺我隔籬吖～

你話緣份嘅嘢係唔係好奇怪呢～

「喂份禮物唔係又係...」Crystal諗一諗，眼仔碌碌，「隔籬班嗰個男仔送吖化？」

『係吖係吖...』冇錯吖～我又同Jeff唔同班喇～

所以就話緣份嘅嘢好奇怪囉...

有緣相見，無緣相識...

有緣相識，無緣相熟...

有緣相熟，無緣相知...

有緣相知，無緣相愛...

有緣相愛，冇緣相戀...

緣緣份份...或者到頭來都係一場空～

喺邊度聽返嚟㗎呢？唔記得喇～反正都唔重要～

重要嘅都係...今年Jeff都係冇親手送份生日禮物俾我囉！

其實佢係點諗㗎呢？

或者係因為...我哋唔同班？

所以都只好偷偷咁潛入我哋班房，快快手手放份生日禮物喺我櫃桶就閃人？

講唔通啦～咁麻煩不如親手送俾我咪仲方便～

咁究竟係點解呢？

有啲嘢你永遠都得唔到答案...

就算有機會問...你又唔想問到咁清楚...

有時就係咁...咁清楚做咩？唔清唔楚可能仲好過～

「喂今日係Joanne生日吖～」

小息路過Jeff嘅班房門口...

「係咩？喂你唔講嘅？生日快樂吖～」

只見Jeff坐喺自己個位...靜靜咁...靜靜咁...

「生日快樂吖～咁我哋放咗學去慶祝咯～」

就好似小學嗰陣嘅佢...

「市中心開咗間Cafe喎！不如去試吓囉～」

總係一個人靜靜咁...靜靜咁...坐喺自己個位...

「喂好唔好姐？今日生日嗰個～」

『哦哦...好好～我冇所謂吖～都想試吓～』

其實升咗上中二，本身嗰班Friend都唔同咗。

好多都分晒去其他班，得返Crystal係同班。

都係嗰句啦～緣份嘅嘢就係咁奇怪～唔係第一日...亦唔會得今日知...

過去一年就算日日一齊玩，功課一齊抄，出貓一齊俾人捉，有咩節日都一齊出出去，到咗今年就算都仲係同一層，只係唔同班房，都唔記得我生日啦～

所以話呢...

「喂喂咁有你心...」Crystal古古惑惑咁打量住Jeff，「一定係將你放喺心裡面啦～」

『想講咩吖？』我都打量住靜靜坐喺自己位嘅Jeff...

「仲要問吖？」Crystal古古惑惑咁撞一撞我，「好明顯係對你有嘢啦～」

『咪亂講啦...』其實我都係咁諗...

中一二嗰班Friend都唔記得我生日啦～唯獨Jeff一個...咁多年都有記住...送禮物俾我...

「咩亂講姐？」Crystal又古古惑惑咁打量住Jeff，「對人點姐？」

『咩點姐？』雖然今年終於同班...但Jeff都係冇親手送份生日禮物俾我囉！

「對人有冇Feel姐？」Crystal諗一諗，「咁有心嘅男仔...不過呢...普通咗啲囉～」

『咩普通咗啲吖？』我皺皺眉咁打量住Crystal。

「咩叫普通？」Crystal好認真咁望實我，「嗱！呢個世界有兩種人係特別起眼！一就係超級靚仔！二就係超級樣衰！但Jeff就係太普通...平時就好似透明人咁...」

『喂你唔好咁講人啦...講到咁衰...』

「咩衰姐？講事實咋嘛～做咩吖？幫住人吖？仲唔係有嘢？」

『咁你真係講得衰吖嘛...我都係講事實姐...』

「係吖係吖～事實囉～事實就係佢三年嚟都咁有你心～咁你點姐？有咩表示姐？」

『有咩表示吖？唔知喎～唔話你知喎～』

「車～唔講俾我知都唔緊要～最重要係你自己知要有咩表示姐～」

Crystal只係知三年...萬一俾佢知由小一就開始...

或者Crystal都講得啱～佢知唔知都唔緊要...最重要都係我自己知...

我自己...係Feel到Jeff對我有啲嘢嘅...（都唔止啲㗎喇...）

不過我對Jeff又點呢？

講真都未試過對人心動...

唔係我冇人鍾意吖！即係唔好話小學嗰啲童言童語啦！中一二都有人同我表白過啦！

只係...冇囉～我對佢哋係冇Feel嘅～（用得個“哋”字即係唔少啦～我OK多人追㗎～）

咁對Jeff呢？

總係有一種...一種...感覺？

望住喺我手上...Jeff送俾我份生日禮物...

呢種係咩感覺呢？

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 01－平凡生日] PART 02

感覺呢樣嘢就係咁虛無飄渺...

你永遠都唔可能實實在在咁捉得住...

已經將[Day 01－平凡生日] PART 01 Upload上Penana

走冰

報到

LM