【pH值介乎於7飄浮的愛情故事】《一腳踏兩船》(1)

1001 回覆

10 Like 1 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

飛揚 2024-12-03 19:00:27

上回講到Crystal執好咗自己之後，就繼續同Joanne一齊等～
等咗一段時間，終於到Crystal～
咁Joanne就拎部電話出嚟同Jeff Message先～
都係講吓啲IG女神好假吖～係唔係冇晒FF吖～
Jeff本身對IG女神都冇FF㗎啦～
仲話心裡只有Joanne添～
係唔係真㗎？口甜舌滑咁～
真心話嚟㗎～
聽住先啦～
Crystal返嚟～但又唔講俾Joanne聽要做啲乜喎～
俾個心理準備都唔得！
再等一陣，就到Joanne喇～
入到去都有唔少評審喎～當中仲包括LB！
乜原來有LB份㗎？Crystal又唔講！
雖然坐咗喺度...不過就咁睇都覺得LB唔係高...（肯定就冇193啦...好似話170都唔夠...）
以為高度對一個明星嚟講係好重要...但而家面對面咁睇...又幾Charm喎！
點Charm法？
Joanne都唔知吖...總係好似...帶住微笑嘅眼神就好有種...吸引力？
總係會吸引住你嘅注意...注意住佢對眼...
就算有幾個人坐喺佢身邊都好...你都只係會望住佢...好似就只有佢...冇其他人...
呢啲就係星？
「歡迎你嚟試鏡...」其中一個男人開聲，「我叫Mark...係呢個MV嘅導演。」
『哦你好你好...我叫Joanne...』好彩有呢個叫Mark嘅導演叫一叫Joanne...唔係嘅話佢都唔知俾LB吸咗去邊...
「Joanne你好...」Mark托一托眼鏡，睇睇部iPad，「睇你IG都有唔少相...麻煩你介紹一下自己先。」
『哦好好...』介紹自己...要點介紹自己？
講真Joanne一心淨係諗住陪Crystal嚟就講到口都臭啦～都冇諗過原來要好似見工咁自介...
見工吖...工...工...
『我叫Joanne...中文名周頌茵...啱啱十四歲仲係個學生...不過就有做過神秘顧客嘅～』呢啲資料又算唔算有用呢？
跟住既劇情發展又會係點呢？

準備出文

飛揚 2024-12-03 19:00:43

「神秘顧客？」Mark導同幾個男男女女都好有興趣...當中仲包括LB！

LB對眼...好似閃閃發光咁望實我。

呢啲係唔係叫放電？我又有冇被電倒？

有冇過到電就唔知喇...係未見過呢種眼神就真嘅...

『係吖係吖～都做過一段時間啦～』不過又估唔到佢哋對神秘顧客有興趣...

Mark導又繼續問：「咁係要做啲咩㗎？」

『都係扮唔同嘅顧客去做啲嘢...事前會有啲人設...間店舖係咩類型...要入去做啲乜咁俾我哋準備...』我都係講到1999...

鬼咩都唔知要點講...

飛揚 2024-12-03 19:02:10

「嗯嗯...」Mark導點點頭，又望望身邊嘅男男女女，「咁同演員都幾似喎～」

『似㗎似㗎～都係要角色扮演咁啦～不過就唔係太難嘅～都係啲日常生活會遇到嘅角色啦～要做嘅嘢又唔算太複雜嘅...可能會係入去店舖裡面睇睇啲嘢...又或者係...睇戲啦～入戲院睇戲～可能要同其他人夾話太嘈吖～同職員投訴吖～都要啲執生嘅～因為可能會出現唔同情況...咁預先都可能要諗定唔同嘅對應啦～』我就繼續噏多少少...

「好好...」Mark導又點點頭，「咁都幾有挑戰性喎～」

『都幾㗎～都幾㗎～』挑唔挑戰吖...我都唔知啦...

在場嘅男男女女都點點頭～LB都有～

LB一直都好留心咁聽我講～

我講得有咁吸引咩？都係求其亂噏咋喎...

定係我講得太1999，LB要好留心都係聽唔明呢？

重要咩？都唔係咁重要嘅...

問題都係...俾LB咁樣望住好唔自然...

唔係話難受！又唔係話尷尬...可能係...唔好意思咁囉...

飛揚 2024-12-03 19:03:57

「嗯嗯...」Mark導睇睇iPad，「咁講返今次個MV先...係校園故事嚟嘅～女主角同LB係情侶～」

『哦哦...』雖然我就冇睇過今次個MV嘅簡介（有冇我都唔知...）...不過都估到㗎喇～

Mark導繼續講：「因為冇對白嘅～所以就唔使點記嘢～首先我哋想問問啲問題...你覺得學生拍拖係一種點嘅感覺？」

『學生拍拖吖...唔...』我諗諗...諗返我而家同Jeff，『成日會見到面啦～返學放學都會一齊啦～又可以一齊做功課溫書啦～好似呃...世界多咗一個人～』

「嗯嗯...」大家都點點頭，好似好認同咁。

「咁初戀呢？」Mark導又繼續問，「你覺得初戀係點㗎？」

『初戀吖...』我又諗諗...又諗返我而家同Jeff，『咩都唔識咁...但又會一直去嘗試？試好多唔同嘅新嘢～以前一個人未必會試...但兩個人就會好好奇咁一齊去試呢樣～試嗰樣～可能中伏都會好開心～』

「嗯嗯...」大家又點點頭，又好似好認同咁。

其實都唔知係唔係答到佢哋想要嘅答案...我都係跟返而家同Jeff拍拖嘅感覺講返出嚟姐～

飛揚 2024-12-03 19:04:37

「咁你而家試吓...」Mark導又繼續講，「拎住部手機扮Send Message...同男朋友Send Message...」

『哦哦...』我就拎部電話出嚟...Send Message俾Jeff～

扮就不如真Send啦～

“喂喂～佢哋叫我扮Send Message俾男朋友喎”

“Jeff：咁搞笑”

“係吖係吖都唔知點解要我扮Send 又唔知有咩用你咁快覆到我嘅做緊咩”

“Jeff：冇喎等緊你囉”

“就咁咋？”

“Jeff：係吖我話過等你吖嘛”

“咁都唔使乜都唔做㗎傻佬”

飛揚 2024-12-03 19:05:43

「OK...」Mark導點點頭，「咁又試吓拎起面前本書嚟睇...」

“喂喂唔講住佢哋要我拎起本書”

“Jeff：OK 等你”

『係係...』我就拎起面前本書...

Mark導又講：「試吓...幻想自己諗緊男朋友...掛住男朋友...」

諗緊男朋友...掛住Jeff...

我就諗吓早幾日喺學校，一到小息Jeff就落咗去買咗個杯麵焗定俾我食啦～

我話想食燒賣，Jeff又走去幫我買啦～

食飽仲會拎紙巾俾我添～

飛揚 2024-12-03 19:07:34

放咗學就一齊去咖啡店Chill住咁做功課～

我想偷懶，Jeff就催我要勤力啲！

不過俾我嗲兩嗲～扭兩扭～佢又心軟俾我抖抖～

一抖就抖咗十五分鐘～做功課又做得勁慢～

其實唔係我懶囉～係我想同Jeff一齊嘅時間多啲～耐啲～唔通又要話俾佢知咩～

返到屋企又要傾電話～除咗食飯同沖涼，做啲乜都要同Jeff傾住電話做～

直到我瞓落床～直到我差唔多瞓著～聽住佢把聲咁瞓...瞓著先俾佢收線...

咁樣先熟睡～咁樣先會發到好夢～

呢三個禮拜，雖然返學已經成日見，唔見都傾住電話，但其實都唔夠！

好多時都會諗起佢～係掛住佢嘅～

飛揚 2024-12-03 19:08:32

有時俾Crystal拉走咗，去行街睇嘢，睇到啲得意嘢，又或者新奇嘢，都會諗起Jeff～

下次要同Jeff一齊嚟？

啲嘢幾好食，要同Jeff食一次～

呢件衫好似幾啱Jeff，買俾佢都好喎～

搞到好多時都會俾Crystal話我重色輕友嘅～

不過係咁㗎啦～拍拖吖嘛～拍拖拍到好似獨立生活咁，咁拍嚟做乜呢？

所以呢...我而家都真係掛住Jeff㗎！

唔使Mark導叫，我都已經諗緊Jeff～成個腦都係Jeff～

「OK...」Mark導點點頭，「咁而家就...」

而家就？

我仲沉醉喺腦海中之時...

LB就坐咗喺我面前！

飛揚 2024-12-03 19:09:35

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～