【pH值介乎於7飄浮的愛情故事】《一腳踏兩船》(1)

飛揚

1001 回覆

10 Like 1 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

飛揚 2024-12-05 19:03:58

成個腦都係LB個樣...親切嘅微笑...貼埋嚟...靠得好近...一對閃耀嘅眼神...望實我...望實我...

諗諗個心都跳咗一大跳！

又係呢種心跳嘅感覺？

「係吖係吖～開心啦你拍拖拍到～」Crystal冇我咁好氣～

『食嘢啦你咁多嘢講～啲嘢食嚟喇～』

「咁都要燒先有得食㗎～」

『你燒囉～』

「一齊啦～好玩啲吖嘛～」

『好喇好喇怕鬼咗你...』

「一人一個鏟～一左一右～」

飛揚 2024-12-05 19:04:37

同Crystal一齊燒，我都係心不在焉咁...

都係...諗住LB...

點解要諗呢？

明明都只係見咗一陣...又唔算有好多交流...都係試鏡閒話幾句咁咋嘛...

應該好快就唔記得...冇咗感覺先係㗎...

好明顯...係Crystal成日提住先搞到我啲感覺仲喺度啦！

一日最衰都係Crystal！佢自己迷戀LB就好啦！做乜搞到我都好似個痴女Fans咁㗎？！

飛揚 2024-12-05 19:05:23

同Crystal食完餐大阪燒…

「嗚吖～」Crystal攤咗喺梳化上拍拍自己個肚腩，「好飽飽～」

『飽吖...飽到你個肚腩都出晒嚟喇...』著露腰又要食到咁飽...凸晒咁...

「有乜所謂吖～」Crystal一啲儀態都唔顧，「都試完鏡啦～」

『一陣出去俾人見到都唔好啦～』

「街上面啲人理得佢咁多吖？」

『如果咁啱遇到LB呢？』

「嘩你咁講我就要收收個肚仔喇！」

『點收都係凸～』

「收住行多幾步就冇㗎啦！」

『收皮啦～』

「你翻皮添吖！」

飛揚 2024-12-05 19:06:10

同Crystal食完嘢再行陣街...

「呢件衫好唔好睇吖？」

又睇吓衫...

「呢條裙呢？好唔好睇？」

又睇吓裙...

「呢個袋靚唔靚吖？」

又睇吓袋...

「呢對...喂喺唔喺度吖？」Crystal向我揮揮手～

『咩吖喺度吖喺度吖咩喺唔喺度吖？』我一直都喺你身邊㗎啦！

「個人就喺度！」Crystal冷眼打量住我，「個靈魂就唔知去咗邊度！」

『咩人同靈魂吖？邊有得分開㗎？靈魂出竅吖？』咁科幻咩？

飛揚 2024-12-05 19:06:59

「唉唔知你～」Crystal又繼續睇嘢，「肯定又係掛住你個毒毒Jeff啦～」

『係吖～你都知呢？』

「見少一日都唔得！你好耐冇陪過我㗎喇！」

『而家咪陪緊囉～』

「咁唔好個靈魂唔知去咗邊喇～」

『係喇係喇～』

其實...我唔係掛住Jeff...淨係...

至少仲有諗住...LB...

飛揚 2024-12-05 19:07:41

同Crystal行完街買完唔少嘢...都夜喇...

「咁聽日返學見啦～」Crystal同我揮揮手～

『嗯～聽日返學見～』我哋都各自搭上對面嘅列車～

一開車，我就拎部電話打俾Jeff...

「嘟...嘟嘟喂～返去喇？」Jeff好快就接聽～

『係吖～同Crystal行咗陣就返去喇～而家搭緊車～』

「係吖？點吖？試鏡點吖？」

『試鏡吖？都係同Crystal一齊等消息囉～應該都收得皮㗎喇～咁多人爭一個角色～』

「話唔埋嘅～」

飛揚 2024-12-05 19:08:40

『你知唔知吖，原來LB都有份㗎！』

「有份？」

『係吖！有份評審㗎！』

「哦？有得見明星喎！」

『明星吖？都係咁囉我覺得...又唔係高...企喺度嘅時候個人直啲咁囉...』

「就係咁㗎咋？」

『係吖...好普通㗎咋...同普通人差唔多咋嘛～都唔知點解Crystal咁迷佢嘅～』

「點迷法先？」

『佢吖～仲要發晒姣咁話好想做女主角～要抽LB水～姣婆嚟㗎～』

飛揚 2024-12-05 19:09:10

我做乜講大話？

冇吖～至少Crystal發晒姣呢點我係冇講大話嘅～

咁點解要話LB好普通？

咁唔通同Jeff講LB好Charm～對眼識發光咩？

講又有乜問題？

冇問題咩？

淨係得我自己一個覺得有問題？

或者...我都係唔想Jeff多心...啦...

TO BE CONTINUED

飛揚 2024-12-05 19:09:28

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～